21/10/2026
د ننګرهار عامې روغتیا رئيس د یوې لویې غونډې په ترڅ کې وستایل شو.
چهارشنبه ۱۴۰۵/۰۷/۲۹
د ننګرهار ولایت د عامې روغتیا رئیس الحاج مولوي امین الله شریف د حوزوي روغتون د پرسونل له لورې د یوې جوړې شوې غونډې په ترڅ کې چې پکې د عامې روغتیا ریاست کارکوونکو، د ولایت مقام، یونیسیف، روغتیا نړیوال سازمان او یو شمیر ادارو مسؤلینو هم ګډون کړی و، د تیرو څو کلونو خدمتونو ستاینه وکړه.
غونډه کې د حوزوي روغتون رئيس ډاکټر منصور ښاغلي د یاد روغتون په اړه معلومات ورکړل ویې ویل: ننګرهار حوزوي تخصصي روغتون ۱۶ وارډونه، ۶۲۳ بسترونه او ۹۰۵ تشکیل لري، چې ۲۴ ساعته خدمات پکې وړاندې کیږي، چې په اوسط ډول په میاشت کې ۹۵۰۰ ناروغان بستریږي، ۱۶۲۹ عادي او ۴۳۱ عملیاتي ولادتونه، ۷۵۶۰ ناروغانو ته تلویزوني معاینات، ۱۳۷۱ لوی عملیاتونه او شاوخوا ۹۰۰ د ترافیکي پيښو ټپيان ورته راوړل کیږي او دلته ورته ښه رسیدنه کیږي، نوموړي دغه راز د جدي مراقبت څانګې د لسو څخه شلو ته د ارتقا، د عملیات خونې اساسي رغونه، د کارکوونکو د معاشونو لوړول، د سرطان روغتون ایحاد او نورو پرمختګونه یادونه وکړه چې د عامې روغتیا د رئیس په هڅو ترسره شويدي.
غونډه کې د ولایت مقام کارپوه مولوي سمیع الله سمون هم وینا وکړه د عامې روغتیا ریاست د وروستیو پرمختګونو او روغتیاپالانو ستاینه یې وکړه چې په کمو امکاناتو یې لویې لاسته راوړنې درلودلي او ناروغانو ته یې غوره خدمات وړاندې کړیدي، هغه د ولایت مقام د همکارۍ او په چارو کې د ملاتړ ډاډ هم ورکړ.
په غونډه کې نورو ویناوالو د کار او ټولنیزو چارو رئیس، د امنیه قومندانۍ استازي، د یونیسیف مسول ابراهیم خلیل کونټي، د سرطان روغتون امر داکټر میرویس شاهین، د کوچنیانو وارډ مشر ډاکټر واحدالله حبیبي هم خبرې وکړې د عامې روغتیا د رئیس هڅې او کوششونو یې بې سارې وبلل او د نوموړي ستاینه یې وکړه.
د عامې روغتیا رئیس ښاغلي شریف د روغتیا پالانو مننه وکړه چې دده هڅې یې وستایلې، ویې ویل ټولې لاسته راوړنې یې د خپل ټیم او روغتیاپالانو په مرسته ترسره کړي او ولس ته د غوره او با کیفیته روغتیایي خدمتونو وړاندې کولو لپاره به خپلې هڅې لا کړندۍ کړي.
