«Արաբկիր» բժշկական համալիր - երեխաների և դեռահասների առողջության ինստիտուտի մասնաճյուղ` Իջևանի երեխայի զարգացման և վերականգնողական կենտրոն:
Երեխաների առողջության խնդիրները մշտապես գտնվում են պետության ուշադրության կենտրոնում: Այդ կապակցությամբ ընդունվել են մի շարք օրենքներ, կոնվենցիաներ և ռազմավարություններ, որոնցում հատկանշական է ՀՀ կառավարության կողմից հաստատված «Երեխաների և դեռահասների առողջու
թյան ու զարգացման ազգային ռազմավարությունը»: Նշված ռազմավարության շրջանակներում ՀՀ առողջապահության նախարարությունը հաստատել է գործողությունների ծրագիր, որն ուղղված է երեխաների հիվանդությունների և զարգացման խանգարումների կանխարգելմանը, վաղ հայտնաբերմանը և բուժմանը:
Մարզերում բնակվող հատուկ կարիքներով երեխաների զարգացման գնահատումը, վաղ հայտնաբերումը և նրանց վերականգնողական բուժումն առավել հասանելի դարձնելու նպատակով «Արաբկիր» բժշկական համալիր–երեխաների և դեռահասների առողջության ինստիտուտը («Արաբկիր» ԲՀ-ԵԴԱԻ) ՀՀ առողջապահության նախարարության աջակցությամբ նախաձեռնել է մարզերում Երեխայի զարգացման և վերականգնողական կենտրոնների (ԵԶՎԿ) հիմնադրումը: Իջևանի ԵԶՎԿ-ն բժշկական վերականգնողական ծառայություններ և մասնագիտական խնամք է տրամադրում Տավուշի մարզում բնակվող ֆիզիկական, մտավոր, լսողական, խոսքի, հաղորդակցման և այլ զարգացման խնդիրներով երեխաներին: Ծառայությունները և խնամքը տրամադրվում է բազմամասնագիտական թիմի միջոցով` բժիշկ-վերականգնողաբան, ֆիզիկական թերապիստ, էրգոթերապիստ, հոգեբան, լոգոպեդ և հատուկ մանկավարժ: Կենտրոնի բոլոր աշխատակիցները Իջևանի բնակիչներ են և վերապատրաստում են անցնել Երևանում` «ԱրԲեՍ» առողջության կենտրոնում: Երեխաների վերականգնողական բուժումն ապահովելու համար կենտրոնը համալրված է հատուկ կահույքով, անհրաժեշտ սարքավորումներով և գույքով:
Իջևանի ԵԶՎԿ-ն հիմնվել է «Արաբկիր» միացյալ մանկական բարեգործական հիմնադրամի կողմից` հետևյալ կազմակերպությունների և հովանավորների աջակցությամբ` Լիխտենշտեյնի Արմենիանոս Հիմնադրամ,Կազա Շվեյցարական Մարդասիրական Հիմնադրամ,«Արաբկիր» Բժշկական համալիր-ԵԴԱԻ,Դանիայի Միջազգային Զարգացման Գործակալության Առաքելություն Արևելք,Դերձակյան Ընտանիք Արգենտինայից,Շալոդեկ Ընտանիք Մոնակոից:
