23/10/2025
كاين بزاف أمهات يسقسيو: "الخطة العلاجية شحال تدي وقت؟ ووقتاش ولدي يتحسن ويولي عادي؟ وقتاش مشاكلو تتحل؟"
باش نجاوبو على هاد السؤال لازم نعرفو بلي كل طفل مختلف على الآخر، يعني حتى إذا كانو زوج أطفال عندهم نفس المشكلة كل واحد راح يكون عندو برنامج خاص بيه وكل واحد راح يدي الوقت اللي يحتاجو باش يكمل التأهيل.
ثاني حاجة كاين اضطرابات وعاهات ما عندهاش علاج نهائي بصح عندها تأهيل وتدريب باش الطفل يقدر يتعامل معاها. كيما مثلا الإعاقة العقلية الشديدة، التوحد، الشلل الدماغي . متلازمة داون... طفل عندو متلازمة داون ما راحش في ظرف 9 شهور مثلا من تكفل يولي طفل عادي راح يبقى داون طول حياتو لانو السبب خلل جيني بصح بالتأهيل يقدر يتعلم يهدر و يعتمد على روحو ويتطور قد ما يقدر.
وقتاش يكمل العلاج؟
إذا كان ابنك عندو اضطراب قابل للعلاج الوقت اللي راح يستغرقو راح يختلف من طفل لطفل بسبب الفروق الفردية. بصح كاين خطوات تقدر تسرّع النتيجة:
1️⃣ ما تضيعيش الوقت غير ما تشوفي حاجة مشي عادية عند وليدك روحي مباشرة للأخصائي لانو كل ما كان التدخل بكري كل ما كانت النتيجة خير. الأخصائي يا إما راح يحطلو برنامج ويتابعو يا إما يعطيك توجيهات باش تخدمي معاه فالدار.
2️⃣ كل حاجة تعلمها فالحصص الأرطوفونية عاوديها معاه فالدار باش يرسخها لازم نخدمو على مهارة التعميم.
3️⃣ تقدري تزيدي عدد الجلسات المبرمجة فالاسبوع حسب الحالة وبموافقة الأخصائي.
4️⃣ وفّريلو جو مليح لانو النفسية عندها دور كبير فالتطور كي يكون الجو فالدّار مريح ابنك راح يكون مرتاح ويتقدّم خير.
5️⃣ من اللول خيري الأخصائي المناسب متبقايش تبدلي الاخصائيين في كل مرة هذا يقدر يضر الطفل أكثر ما ينفعو شوفي مختص مليح و كفؤ و انظبطي معاه.
6️⃣ ما تغيبوش على الجلسات الحضور المنتظم مهم بزاف لانو الغيابات تعطل النتيجة.
7️⃣ كمّلي الخطة العلاجية للآخر :كاين بزاف أمهات كي يشوفو الطفل تحسن شوية يوقفو التكفل وهذا غالط لأنو الخطة العلاجية فيها أهداف لازم توصلها للأخير والمرحلة النهائية فيها توجيهات مهمة ما لازمش تتجاهليها.
الاخصائية الارطوفونية بلخديم ز
