30/08/2026
أول ما المدرسة تبدأ تلاقي ابنك:
رشح… كحة… سخونية… وبعد ما يخف شوية يبدأ دور جديد! 😩🤧
وساعتها أول سؤال بييجي في بالك:
هو مناعته ضعيفة؟
مش بالضرورة! 👇
طول فترة الإجازة، اختلاط الطفل بالأطفال والفيروسات بيكون أقل نسبيًا… لكن مع بداية المدرسة والحضانة بيرجع فجأة لفصل مليان أطفال، وكل طفل ممكن يكون حامل فيروس مختلف حتى قبل ما تظهر عليه أعراض.
والنتيجة؟
فرصة تعرضه للفيروسات بتزيد جدًا، خصوصًا في أول فترة من العودة للمدرسة والحضانة .
وده سبب إن أطفال كتير تلاقيهم بيتعبوا أكتر مع بداية الدراسة، وده مش معناه تلقائيًا إن عندهم مشكلة في المناعة.
لكن مع الوقت، ومع تعرّض جسم الطفل لأنواع مختلفة من الفيروسات وتكوين مناعة ضدها، ممكن تلاقي عدد مرات العدوى يقل تدريجيًا. 💪🦠
يعني كل مرة جسمه بيتعرّف فيها على فيروس، جهازه المناعي بيتعلم إزاي يتعامل معاه لو قابله تاني.
🚨 لكن لو العدوى شديدة بشكل غير معتاد، بتتكرر بصورة مبالغ فيها، محتاجة دخول مستشفى أو مصاحبة لمشاكل في النمو وزيادة الوزن… هنا لازم نطمن وندور على السبب.
يعني المدرسة مش بتضعف مناعة ابنك…
هي بس بتخليه يقابل فيروسات أكتر! 🤧🎒
ومع الوقت… جسمه بيتعلم أكتر، ومناعته بتبني خبرة أكبر 💜
معلومة تطمنك.. خطوة تحمي صغيرك 💛
