25/03/2017
لما تلاقى حرقان او الم اثناء التبول باستمرار , مينفعش تسكت وتقول ان شاء الله هاكون كويس :) لازم تستشير دكتور لانه لاقدر الله ممكن يكون عندك :
عدوى فى الجهاز البولى
المرض ده بييجى منين اصلا ؟
ده يا سيدى عدوى بكتيرية فى قناة مجرى البول واللى لو اتسابت من غير علاج ممكن تنتقل للمثانة او ممكن لا قدر الله توصل للحالب ( المتصل بالكليه ) وممكن للكليه نفسها وساعتها هيكون الموضوع خطير جدا :(
طب خللينى اقولك على اشهر اعراض المرض ده :
... الم او حرقان اثناء التبول زى ما قلنا قبل كده ... تكرار التبول طول اليوم عن المعدل المعتاد وكمان ممكن تقوم من نومك كذا مرة عشان تروح الحمام ... شعور بالم او تقل فى منطقة اسفل البطن ... ممكن تلاقى ريحة البول نفسه وحشه ... ولو لقيت مع الحاجات دى كلها الم فى اسفل الضهر بس من الخلف (وده مكان الكليتين ) يبقى العدوى وصلت للحالب او للكليتين ولازم تروح للدكتور على طول .
احنا كده خلصنا كلامنا :) , بس قبل ما امشي هاقولك بس شوية نصايح هتفيدك كتير :) :
1 لو حسيت انك عايز تدخل الحمام , ادخل على طول :) , متمسكش نفسك وتحبس البول فى المثانه مده طويله .
2 اشرب ميه كتير وسوائل على قد ما تقدر , ده هيساعد على طرد اى بكتيريا موجودة فى الجهاز البولى مع البول ( بمعنى اصح هتغسل الجهاز البولى من اى ميكروبات )
3 فى حالة حدوث المرض فعلا , متستعملش مضاد حيوى لفترات طويله الا لما الدكتور يقولك , وارجوك حافظ على الجرعات فى معادها بانتظام عشان المرض ميجيش تانى
4 فيه عناصر طبيعية ممكن ناخدها مع الدوا ( وليس بديل ليه ) وتنفع برضه للوقايه :
• فيتامين سى (يعنى عصير البرتقال والليمون والجوافه ) ده بيساعد على تقوية الجهاز المناعى وبالتالى يقلل من تكاثر الميكروب فى الجسم .
• خل التفاح بيساعد على طرد البكتيريا ويخليها تنزل مع البول
• زيت كبد الحوت ( تحت اشراف الطبيب طبعا ) وده غنى بفيتامين ا , د ودول مهمين لحماية الجهاز البولى (وخصوصا المثانه ) من العدوى البكتيرية :)
حفظكم الله ورعاكم :)
