07/03/2023
هل لازم اطعم اليفي ؟
سؤال بيتسأل كتير وللأسف ناس كتير فاكره انه تطعيم (تحصين)الحيوانات الاليفه غير ضروري ورفاهيه او علشان بيتربي داخل البيت مش هيكون عرضه للأمراض.
في الحقيقه دا غير صحيح تماما حتي الحيوانات المنزليه تُصاب بامراض كتير سواء من( الهوا او من اكل في مره غير نضيف او من المس او اثناء التزواج .الخ)..وتطعيم اليفك بنفس أهميه تطعيم ابنك بالظبط مش حماية للحيوان قد ماهو هيحميك انت واسرتك من فرصه انتقال اي مرض ليكم.
-ايه اهم التطعيمات الخاصه بالقطط والكلاب ؟و بتبدأ عند عمر كام؟
1-تطعيمات القطط:
-تطعيم رباعي ضد بعض الامراض البكتيريه والفيروسيه المهمة وبيتاخد عد عمر شهرين ثم يكرر بعد 21 يوم ثم سنويا ومهم جدا نعرف انه لو طنشت الجرعه التانيه يبقي كأنك معملتش حاجه وهتضطر تعيد التحصينات من الاول.
-تطعيم السعار واغلب الناس مش بتهتم بيه وبتكتفي بالسابق لكنه مهم جدا خاصة لو قطتك خرجت برا البيت وبيكون عند عمر شهرين وبيتكرر سنويا.
- تطعيمات الحشرات بتكون عند نفس العمر بس الطبيب بينظملك المواعيد وبيتكرر غالبا كل شهر او في حالة عدم المقدرة الماديه ممكن كل ما يظهر حشرات.
-تطعيمات مضاده للديدان بتتاخد عند نفس العمر وبنبقيقرص بيتكرر مره بعد اسبوعين ثم بعد 3 شهور.
2-تطعيمات الكلاب:
-تطعيم ثماني بيكون عند عمر 45 يوم ولو عمره اقل بياخد تطعيم ثنائي...
الثماني بيتكرر بعد 21 يوم ثم سنويا.
-تطعيم السعار عند عمر 3شهور ثم يكرر حسب نوعه :في حاله التحصين الميت بيكرربعد 6شهور ثم سنويا اما المضعف يكرر بعد سنه.
-تطعيم الحشرات والديدان بيبدأ عند عمر 45 يوم وبيكرر كل شهر و3 شهور بالترتيب السابق .
ملاحظات مهمه:-
-ممنوع تحصين اي حيوان مريض او حامل واذا كان الحيوان عنده اي سلوكيات غريبه قبل التحصين ضروري ابلاغ الطبيب بها
-ممنوع التطعيم قبل الاعمار المذكوره لانها اقل اعمار ممكن اعاطاء التحصينات فيها...واذا تم التطعيم خاصه في الكلاب قبل شهر ونصف ,يجب اعاده التطعيم مره اخري ماعدا الثنائي
- ممنوع الاستحمام او الجرومنج للحيوان بعد التحصين في خلال اسبوع.
4 visits · 2 online
