14/12/2024
عن الالم
موضوع الالم كان دايما بيشغلنى ومازال وسيظل اعتقد .. انا عشت حياة معظمها ألم يتخلله بعض الفرح .. في الطفوله الالم كان مسيطر اوى بس كان فيه لخبطه لان مفيش ادراك كامل لما يحدث والحياة كانت بتمشى كده بالزق ومحاولات النجاه من الغم والنكد اللي محاطين بيه كانت مرهقه جدا .. مش كلام منمق ولا كلام شكله حلو انا فعلا مصدقه ان الالم له فضل عليا رغم الوجع .. الا اني اتشكلت بطريقه متهيالي لولا الالم مكنتش هذا الانسان الذي اكونه الان .. يمكن مكنش هيكون عندي كم الرحمه اللي موجوده واللي ممتنه انها موجوده لانها بتساعدني اوى مع نفسي ومع الاخرين .. لولا اني تالمت لما كنت رحمت متهيالي ..
ومن هنا الالم حقيقة وواقع حتمى معاش في كل تفاصيل الحياة .. الالم موجود حتى في اوقات الفرح ممكن نفتكر حاجه مفتقدينها في لحظة الفرح دي .. حتى الفرح ممزوج احيانا بالالم .. والتحدي مش في تجنب الالم او تقليله ولكن في قبول حتميته والعيش به ومعاه في وجود انشطه تانيه تدي راحه وسلام وانبساط وفي الوجود الحقيقي في كل لحظات الحياة سوا كانت الم او فرح او سلام او تعزيه او اي نوع من المشاعر اللي بتطبطب ع النفس والروح .. الخلاص اني اعيش كل حاجه للاخر واسمح لنفس احس للاخر كل اطياف المشاعر اللي بامر بيها وده اللي هيحقق التوازن .. اني اتواصل مع نفسي ومع الاخرين بوجود حقيقي اصيل .. ان اتبنى تفكير آمل وروح راضيه مستعده تعافر في سبيل السلام والسكينه والطمأنيه بوعى ناضج
وليكن سلام للجميع
