https://www.facebook.com/236635796849348/

Mostafa Mahmoud -MME, Minya Elkamh, Cairo (2026)

03/09/2023

شايفين سلة الزبالة اللي ماشية ورا العيلة دي
دا روبوت اسمه جيتا بيقدر يمشي لوحده ويتبع الشخص اللي محدد له
في محاولة لمساعدة كبار السن جامعة نيوكاسل قررت تطبق الفكرة العبقرية دي
انا عايز اخلي كبار السن يتحركوا ويمارسوا انشطة خارج المنزل لأن دا مفيد لصحتهم
ليه معملش روبوت يمشي وراهم يحطوا فيه الحاجات التقيلة او اللي بيشتروها مثلا من السوبر ماركت بحيث اخفف عنه الحمل وهو ماشي فالمشي يبقى بالنسباله اسهل
ولو تعب يقدر يقعد على الروبوت ويريح ويتحرك تاني وقت ما يحب
مش بس كدا الروبوت نفسه ملفت للانتباه وممكن يزود الاجتماعيات بين كبار السن وبعضهم وغيرهم
يعني ممكن يتكلموا مع بعض عن الروبوت وازاي بيساعدهم ومشاكله وغيرها

الحقيقة انا شخصيا فكرت ان روبوت زي دا حاجه عظيمة وليه لأ ميبقاش جزء من الاستشفاء بتاع المرضى داخل المستشفيات في بداية رجوعهم للحركة دا يساعدهم ويتيح فرصه انهم يخرجوا ويمشوا مسافات ابعد في جناين مثلا مش بس داخل المستشفى نفسها خوفا عليهم
الروبوت ممكن يتزود بجي بي اس تقدر بيه تطمن على مكان التواجد بتاعه وبالتبعيه مكان تواجد صاحب الروبوت ويكون مزود بانذار مثلا للتنبيه من الشخص الكبير لو تعب جسديا او احتاج مساعدة او الروبوت نفسه يكون فيه معدات الاسعافات الاولية اللي محتاجها الشخص الكبير وحاليا في وجود الساعات الذكية اللي تقدر تلقط بدايات مشاكل صحية وتنبه بنفسها يبقى متاح الاسعافات الاولية بجانب الشخص نفسه علطول

الشركة بتعمل على مشاريع كتير لذيذة بس الروبوت دا صراحة لفت انتباهي جدا في التعليقات هتلاقوا رابط البوست الأصلي فيه فيديو للروبوت من فترة تجربته

30/08/2023

معضلة جديدة واظن دي مشهورة في مصر وبتتشاف كتير
انت دكتور طوارىء في استقبال مستشفى دخلت عليك سيدة باين عليها انها مضروبة جامد عينيها حواليها كدمة ودراعها مكسور
سألتها ايه اللي حصل وبعد شوية ملاوعات
قالتلك ان جوزها هو السبب في اللي حصلها دا
فانت كتبت دا في تذكرة المريضة
الزوجة اتجبست وخدت الاسعافات اللازمة وبعد كام ساعه كدا خلاص بقت جاهزه صحيا انها تخرج
وهي خارجة ندت عليك وقالتلك
ابوس ايدك يا دكتور متكتبش في ملفي او التقرير او تبلغ ان اللي عمل فيا كدا جوزي
وامسحه من التذكره لو كتبته عشان هو له ناس قرايبه شغالين في المستشفى ولو عرف باي طريقة اني قلت انه اللي عمل كدا هيكسرني وممكن يأذيني جامد او يموتني حتى
انت تقدر عادي تقطع التذكره وتكتب في واحدة جديدة او تشطب على جزء انه السبب زوجها بحيث تنفذلها طلبها

لو انت مكان دكتور الطوارىء دا هتعمل ايه وهتتصرف ازاي؟ وايه مبررك لتصرفك دا
وعشان نخلي الموضوع مثير اكتر ايه رايك في اللي هيعمل التصرف عكس اللي بترشحه
يعني لو رؤيتك انه تمسح جزء جوزها دا زي ما الزوجة عايزه ايه رايك في اللي بيقول لأ نسيبه في التقرير او نبلغ الشرطة؟ والعكس صحيح

29/08/2023

معضلة النهاردة لذيذة ياريت كله يشارك هنا ويحاول يبرر سبب رايه للعلم مفيش اجابة صح او خطأ دي معضلات اخلاقية بتواجه الكل الكتاب نفسه اللي اسمه who says you are dead بيقدم شرح من وحهة نظر القانون الامريكي مش حل تام للمعضلة.

انت طبيب نفسي بيزورك مريض من فترة طويلة عمره ٣٥ سنه وفي احد الجلسات معاك قالك انه لما كان في الكلية ارتكب بالغلط جريمة قتل اثناء سكنه جنب الجامعه جارته حصل معاها مشكلة عادية بالغلط وهو بيزقها وقعت على رقبتها ماتت جوا شقته
هو اتخض جدا ومكنش عارف يعمل ايه لكنه قرر يدفن الجثة في جنينه قريبة من البيت ومحدش لقى الجثة
ولما انت اتكيت عليه في تفاصيل اكتر عرفك بالظبط دفنها فين هو عرفك انه جارته اهلها لسا بيدوروا عليها والشرطة مسجلة انها مختفية
العيان بتاعك دلوقتي راجل عنده طفلين سعيد في حياته الزوجية وبيحلفلك انه القتل دا كان بالغلط
هو لما اقترحت عليه يسلم نفسه للشرطة
قالك انه مستحيل يعمل كدا وانه بينهاك انت كمان كدكتوره انك تبلغ الشرطة بخصوص الكلام دا
انت كدكتور عندك فضول دخلت بحثت عن اسم الجاره دي لقيت على النت ان لسا اهلها بيدوروا عليها وبينزلوا بوستات وكدا وفيديوهات لايف كل سنه بيدعو فيها انهم يلاقوها قريب
انت ادركت انك لو بلغت كمجهول عن وفاة الجارة دي فانت مش هتحل المشكلة بل هتزود الشكوك بخصوص المكالمة لو مجرد قولت انها ماتت مش مفقودة وفي نفس الوقت خايف تقول مدفونه فين لانهم لو راحوا فهما كدا هيعرفوا مين قتلها من الفحص الجنائي وكدا يعتبر فضحت سر مريضك
السؤال الأن:
تعمل ايه لو انت الطبيب النفسي وليه تعمل التصرف دا؟

28/08/2023

حاله افتراضية تانيه ياريت تشوف ردك عليها ايه وتحاول تبرر اجابتك قدر الامكان
انت دكتور جراحة مخ واعصاب في مستشفى كبيرة دخل عليك راجل ومراته
الراجل بيشتكي من صداع شديد جدا اسوء وجع حسه في حياته
بعد عمل الاشعة والفحص تم تشخيصه انه عنده تمدد في الاوعية الدموية بمخه ومحتاج جراحة عاجله في خلال ال١٢ ل٢٤ ساعه الجايين لو معملهاش احتمال كبير جدا يموت
فالعيان ومراته سألوك يا دكتور ايه معدل النجاه من العملية دي
فانت قولتلها والله معدل النجاه هنا هو ٦٠ في الميه من العملية دي يعني من كل ١٠٠ شخص عملوا العملية في ٦٠ شخص عاشوا و ٤٠ توفوا
في معلومة تانيه انت تعرفها بس لسا مقولتهاش
وهي انه على بعد ٢٠ دقيقة من المستشفى بتاعتك بالاسعاف في مستشفى تانيه فيها دكتور تاني معدل النجاه لنفس العملية هو ٨٥ في الميه يعني من كل ١٠٠ شخص عملهم العملية ١٥ بس ماتوا
انت متعرفش تفاصيل اكتر من كدا
دلوقتي انت بتفكر تتصرف ازاي
هل تقول للعيان ولا متقولش
هل المعلومة اللي عندك كاملة ولا لأ
وارد الحالات اللي بتجيلك اصعب من حالات الدكتور التاني

27/08/2023

الحج فريد رجل عمره ٧٥ سنه ارمل بعد وفاة زوجته اتشخص بفشل كلوي يحتاج غسيل دائم
قعد الحج فريد مع الدكتور وعرف انه ممكن يتخطى مشكلة الغسيل دي بزراعة كلى من متبرع
وبالفعل بدأت رحلة البحث
بنته لينا قرابة الخمسين سنه قررت انها تعمل الفحوصات اللازمة عشان لو مناسبة تتبرع لوالدها
دكتور مصطفى مسك نتائج تحاليل الدي ان ايه اللي اتعملت في المستشفى قبل ما يعرف بيها الحج فريد وبنته
دكتور مصطفى اكتشف ان لينا مينفعش تتبرع بكليتها لابوها ودا لان العلامات الجينيه اصلا بتقول انه مش والدها البيولوجي يعني بالمختصر المفيد الحجة ام لينا كانت بتخون الحج فريد ونتيجة العلاقة دي جت لينا
دلوقتي دكتور مصطفى محتار يعمل ايه هل يبلغ لينا وابوها ولا يبلغ واحد فيهم ولا ميقولش جزء انها مش بنته ولا يتصرف ازاي
لو انت مكان دكتور مصطفى هتعمل ايه؟

10/02/2023

السلام عليكم ازيكم يا جماعه
انا قررت تفعيل قناة اليوتيوب من فترة بفيديوهات من كتب قرأتها وحاسس ان في أجزاء منها ممكن تتشارك سواء مع القطاع الطبي وأهله او مع اللي مهتم بالامور دي بشكل عام
حاليا قررت اعمل سلسلة تانية تستحق الذكر وهي شرح حسب فهمي لأوراق بحثية شايفها مهمة جدا وتستحق الاهتمام خاصة أنه منها بتناقش وجهات نظر ثورية أو مختلفة عن المعتاد
منهم على سبيل المثال الفيديو التالي اللي بيتكلم عن أهمية إعادة تعريف الأمراض في الطب والاستغناء عن النتلازمات الطبية وبعض التصنيفات المرضية زي تسمم الدم مثلا
طبعا ارشح الورقة البحثية ليكم لقراءتها لكن ممكن تشوف الفيديو لو حابب تسمع رايي وفهمي لمحتواها

27/12/2022

الإسعافات الأولية لنزيف الأنف

26/10/2022

في دراسة كبيرة تمت على ٢٨ الف شخص صغير في السن وسألوهم عن ممارسة التأمل اللي بقت اجباريه في بعض المدارس برا زي استراليا
لقوا ان معظم الاطفال علقوا انهم مقدروش يندمجوا مع تمارين التأمل دي وحسوا نفسهم مجبرين عليها
والدراسة وجدت ان اغلب الطلبة مكانتش مستفيده من تطبيق ممارسة التأمل دي اجباريه في عدد اه استفاد لكن في المجمل مفرقش مع العيال في حاجه
في دراسة تانية عملتها المدرسة اللي كانت مهتمه بالبحث عن اهمية التأمل على طلبة ثانوي
وجدت ان الطلبة كانت بتشتكي من انها بتحس بتنميل في رجلها او انها مش قادرة تركز او تحس باستفادة من التأمل دا
المدرسة بتقول انه ممكن يكون عندنا مشكلة في ابحاث اللي بتوجد فوائد للتأمل وهي مشكلة بتواجه البحث العلمي عادة وهي معضلة نشر النتائج الايجابية وعدم نشر الدراسات اللي بتلاقي نتائج سلبية سواء الباحث نفسه ميقدمهاش او المجلات تصعب قبولها لانها بتخالف المتعارف عليه
هل التأمل مفيد ممكن جدا يكون مفيد لعدد لا بأس به من الناس لكن اللي الدراسات دي بتقوله ان اجبار الجميع عليه مش فكرة جيدة وانه سلوك اللي حابه يعمله ممكن يستفيد منه كتجربة ايجابية
https://medicalxpress.com/news/2022-10-mindfulness-young-people.html

24/10/2022

طبعا كلنا عارفين وسمعنا عن أضرار التدخين على المدخن نفسه وأضرار التدخين على اللي متواجدين حواليه وقت التدخين اللي بنسميهم السكند هاند سموكر وازاي بيتضرروا بتواجدهم جنب المدخن اثناء التدخين ودول ممكن تعرفهم لو بصيت على تحذير علبة السجاير من التدخين بجانب الحوامل مثلا
اللي جاي اكلمك عنه بقى دا واحد هيتضرر من السجاير عشان في شخص كان بيدخن سجاير في المكان اللي هو رايح يقعد فيه او الثيرد هاند سموكر
السجاير بتترك مواد كيميائيه ضاره في الهواء اللي كان الشخص بيدخن فيه وعلى الاسطح بجوار مكان التدخين وبتدنها متعلقة في الهواء وعلى الاسطح بعد ما المدخن نفسه يمشي
يعني من الاخر البيت لو في عندكو مدخن او اماكن العمل او المطاعم او كل مكان تقريبا
الباحثين في جامعة كاليفورنيا لقوا ان التعرض للمواد دي خاصة بعد ما المدخن علطول ساب المكان بعد انهاء سجارته بتزود فرص الاصابة بامراض جلدية زي الاكزيما او حساسية الجلد و الصدفية عن طريق ان المواد الكيميائية دي بتحفز الجلد يطلع مواد بتنشط ميكانيزمات الالتهابات في الجلد عن طريق زيادته لعوامل الاكسدة
الباحثين كمان لقوا ان عوامل الاكسدة دي بتزيد في بول الشخص اللي اتعرض للمواد دي وبيقترحوا ان ممكن التعرض المستمر دا يكون في سبب ان الشخص اللي لا بيدخن ولا بيقرب من مدخنين اصلا يتعب لمجرد انه في بيته حد بيدخن او في مكان شغله او حتى في الاماكن العامة اللي كله بيزورها خاصة المغلقة

الدراسة تمت بانهم احضروا ١٠ اشخاص غير مرضى وغير مدخنين ولبسوهم لبس عليه مواد التدخين الضاره دي لمدة ٣ ساعات وطلبوا منهم يمشوا او يجروا على مشاية كهربا لمدة ١٥ دقيقة كل ساعة من ال٣ ساعات
اعمار الناس دي كانت من ٢٢ ل ٤٥ سنة
الهدف من الرياضة دي انهم يفتحوا مسام الجلد بتاع الاشخاص وبالتالي تزيد فرصة دخول المواد اللي على ملابسهم دي لجسمهم
وبدأوا بعمل التحاليل
وقارنوهم بناس كانت لابسه ملابس نضيفه
ولقوا ارتفاع الدلالات اللي بتدل على حدوث ضرر نتيجة عوامل الاكسدة للحمض النووي والبروتين والدهون والدلالات دي فضلت عاليه حتى بعد ما قلعوا الهدوم بعد ال٣ ساعات
الدلالات دي بتكون عاليه في المدخن برضه
الباحثين بيتكلموا عن ضروره عمل سياسات جديدة في الاماكن المغلقة بحيث تقلل تعرض الناس لمواد التدخين العالقة دي
رغم الدراسة مش بتؤكد حدوث الضرر لكنها بتعكس حدوث تأثر من المواد اللي موجودة في السجاير مش بس للمدخن ولا حتى للي قاعد معاه دا كمان للي هيلبس هدومه او هيتواجد في مكان كان متواجد فيه
طبعا كل ما تعرضت اكتر للبقايا دي كل ما زاد التأثر خاصة للجلد اللي هو اكبر عضو بيلامس المواد دي
https://medicalxpress.com/news/2022-10-thirdhand-trigger-skin-diseases.html

23/10/2022

ليست أبدا بالحسن أو السوء الذي تبدو عليه
هذه المقولة اللي قدامنا ممكن نستخدمها في امور كتير في حياتنا لكن في الكتاب اللي بقرأه the psychology of money الكاتب بيذكرها عشان يوضح فكرة الحياة وازاي انه في عوامل تانيه مهمة بتؤثر على حياتنا اوقات كتير بشكل اكبر من تصرفاتنا
وممكن نسمي الحاجات الخفية دي كلها في لفظين الحظ و الخطر وهما لفظين بيمثلوا وجهين لعملة واحدة هي عملة الحياة
الكاتب بيحكي قصة بيل جيتس وصديقه اللي محدش يعرفه كنت ايفنز
ايفنز هو صديق بيل جيتس العبقري من المدرسة اللي بيل جيتس قال عنه انه لو كان موجود كان شاركه في تصميم شركة ميكروسوفت وادارتها وكانت تقدمت جدا
لكن لصدفة نسبة حدوثها واحد في المليون ايفنز مات قبل ما يخلص الثانوية
على الصعيد الاخر جيتس كان محظوظ لانه من ضمن ٣٠٣ مليون طالب ثانوية في العالم وقتها
١٨ مليون بس كانوا في امريكا منهم ٢٧٠ الف بس كانوا في ولاية واشنطن من وسط دول كان قرابة ال١٠٠ الف في منطقة سياتل بس ٣٠٠ منهم كانوا في مدرسة lakeside
المدرسة كانت مميزه برؤيتها لاهمية الكومبيوتر وقتها
ودا اللي ساعد اخونا بيل جيتس في تطوير مهاراته عشان يبقى منشأ ميكروسوفت
لانه كان محظوظ بمعدل ١ في المليون
لعوامل كتيره خارجه عن ارادتنا بتحكم مين هيتوفرله ظروف يحقق الانجاز اللي وصله ومين هيكون تعيس الحظ ويقف طريقه قبل تحقيق ما كان يقدر يحققه لو كان في ظروف مختلفة
طيب ليه دا بيحصل ليه الانسان مش دايما بذل اقصى مجهود يحقق اقصى نتيجة
لانه ببساطة العالم اكثر تعقيدا مما تتخيل وفي غيرك ٧ مليار شخص كل فرد فيهم بوجوده وتصرفاته بيؤثر على نتائج حياتك
ومن غير ما نروح بعيد جائحة كورونا وانتشارها كان خطأ عدد قليل من ال٧ مليار تسبب في تعطيل والتأثير على حياة الناس اللي ماتت ومرضت وحتى الان العايشين
قرار الحرب بين روسيا واوكرانيا اتخذه عدد اشخاص قليلين ملهمش علاقة بيا او بيك رغم كدا كان قرارهم من ضمن عوامل حدوث ازمة اقتصاديه بتعاني منها دلوقتي
المشكلة بيوصفها الكاتب تكمن في انه من الصعب قياس الحظ او القدر او الخطر ومن الصعب تقبل تأثيرهم عليك كفرد عشان كدا البشرية بتختار انها تتجاهلها وكلنا بنتعامل كأنها لا تؤثر علينا وهو امر ايجابي كنت اتكلمت عنه قبل كدا

لكن الكاتب بيستغل دا عشان يقولك يا اخينا منك له
خف من حدة اقوالك على من لم يحالفهم الحظ من حولك سواء ماديا او علميا او اجتماعيا
وتذكر اللي كتبته فوق وانت بتحكم لانه ببساطة الامر ليس بالحسن او بالسوء الذي يبدو عليه

20/10/2022

في كتاب sapiens الكاتب بيوصف الزراعة بانه فخ الرفاهية
الكاتب بيتكلم عن انه في قاعدة من حديد بنقع فيها وهي أنه رفاهياتنا بتتحول عادة بعد فترة لاحتياجات وتبدأ تظهر منها التزامات جديدة وبيقول ان دا بالظبط اللي حصل مع احتراف البشر للزراعة
صك العبودية اللي كتبته البشرية على نفسها
قبل ما نتكلم عن الزراعة خليني احكي المثال اللي حطه الكاتب عشان يوضح فكرة تحول الرفاهيات لاحتياجات وتسببها بعدين في مشاكل اكبر من اللي حلته على الاقل على المستوى الفردي
قديما كان التواصل امر صعب جدا بيتطلب ان الرسالة يتم نقلها يدويا من مكان للتاني وتاخد زمن طويل عشان تنتقل من مرسلها لمستلمها والعكس وطبعا دا كان مرتبط بالمسافة
مشكلة كبيرة جدا ياااه لو نقدر نختصر الوقت والزمن دا تخيل حياتنا هتبقى عاملة ازاي كل حاجه عايزين نقولها في ثواني توصل للي عايزين نوصلهاله ويرد علينا هتفرق كتير جدا
وبالفعل الايميلات والرسايل حققت دا وفرقت كتير جدا في تخليص اختصار الوقت وحل مشاكل كتيرة
لكن هل دا كان ايجابي على الانسان كشخص
الاجابة من وجهة نظر الكاتب انه لأ
زمان كانت الرسالة توصلك مش محتاج ترد في يومها اصلا تاخد وقتك وتحضر رد لبق مختصر وتبعته وتنتظر اسابيع لشهور عشان يوصلك الرد اللي برضه هيكون مختصر ولبق
كان الحوار في الاخر هما كام رسالة في الشهر وخلاص
حاليا الميل اسرع لكن اللي حصل ان عدد الايميلات اللي مطلوب منك ترد عليها اكبر بكتير وكلهم متوقعين رد فوري
فبقى انت على المستوى الشخصي دايما في قلق وتوتر ومش عارف تعيش خاصة لو الرسايل انت مجبر على الرد عليها زي رسايل الشغل
فعلى المستوى الشخصي اظن كتير من الموظفين يحبوا نرجع لعصر الحمام الزاجل
نفس الكلام الكاتب بيقوله ان الزراعة فعلا فرقت مع البشرية كجنس ساعدتنا يكون عددنا اكبر لان الفلاح الواحد قادر ياكل ١٠٠ لوحده ويوفر وقت لغيره يشتغل وظائف تانيه والمفروض دا كان يريحه
لكن تعالى نشوف حياة الانسان قبل الزراعة
الراجل كان بيصحى من خيمته ولا الكهف اللي قاعد فيه دلوقتي يصطاد بتاع مره مرتين في الاسبوع والستات والاطفال وهو يجمعوا اي اعشاب او فواكهه ياكلوها
وباقي الوقت يا نايمين يا بيحكوا يا بيلعبوا
الحياة اللي يتمناها الجميع الأن
البشر كانوا اقوياء لانهم كانوا معتمدين على نظام غذائي متنوع معندهمش مفهوم الاغذية الاستراتيجية اللي من غيرها يموتوا
امال ليه زرعنا؟ ببساطة لان تفكيرنا المنطقي قاصر منقدرش نتخيل المستقبل
التفكير المنطقي بيقول اني لو خدت كام نبات طعمه عاجبني وزرعته دا هيوفرلي اكل عن ان الاكل مش مضمون
شوية شوية لقيت اني لو راعيته وقعدت جنبه هنتج كمية اكبر فهرتاح
المشكلة كانت انه فعلا الزرع كان هيوفر كمية اكل اكتر لكل فرد لكل فرد لكن العيلة اللي زرعت خلفت عيال اكتر وبقت بترضع عيالها اقل عشان بقوا بيأكلوهم سيريلاك اكتر فالاطفال بقت اضعف عشان تنوعها الغذائي قل
العيشة في نفس المكان والاكل البسيط لان الافواه زادت خلى الانسان اضعف وحالته اوحش ولقى نفسه تم استعباده من عدة محاصيل
فكرة الزراعة في ذاتها كفكرة بسيطة منطقية عشان كدا شعوب كتيره تبنتها بشكل منفصل ووجدتها حل لمشكلاتها
لكن بعد ما تحولت الرفاهية لاحتياج وبقيت خلاص متقدرش تهرب منها وترجع لزمان لان زمان دا انت جيل معيشتوش بقت حياتك على مستوى الفرد اوحش لكن على مستوى البشرية انجاز كبير

Mostafa Mahmoud -MME

03/09/2023

30/08/2023

29/08/2023

28/08/2023

27/08/2023

10/02/2023

27/12/2022

26/10/2022

24/10/2022

23/10/2022

20/10/2022

Address

Telephone

Website

Alerts

Contact The Business

Shortcuts

Share

Category