07/02/2026
التوحد عند الأطفال🔴
الأم:
دكتور لو سمحت، أنا شاكّة إن ابني عنده توحد!
الطبيب:
ليه حضرتك بتقولي كده؟
الأم:
يا دكتور ابني مش بيبص في عيني لما بيكلمني.
الطبيب:
أيوة يا مدام، بس اللي حضرتك بتقوليه ده مش كافي لتشخيص مرض التوحد.
الأم:
طيب إمتى نشخّص توحد يا دكتور؟
الطبيب:
شوفي يا مدام، تشخيص التوحد مش بيتم من جلسة واحدة ولا من عرض واحد.
علشان نشخّص طفل بالتوحد لازم:
نعمل أكتر من استبيان متخصص
ندي درجات معينة
الطفل يتم مناظرته بواسطة أكتر من متخصص في التوحد
نشوف تأثير الأعراض على حياته اليومية وتقدمه الدراسي
ويكفي أقول لحضرتك إن في بريطانيا تشخيص التوحد بيمر بمراحل متعددة على مدار 6 شهور كاملين.
الأم:
طيب يا دكتور، هو ممكن التوحد ييجي في سن صغير أقل من 3 سنين؟
الطبيب:
ممكن، بس ده مش الشائع.
الأم:
طيب ممكن تقولي أعراضه؟
الطبيب:
ما أنا قلت لحضرتك يا مدام، لازم استبيان متخصص، لأن الأعراض لوحدها مش كفاية للتشخيص.
الأم:
طيب إيه اللي يخليني أشك إن ابني عنده توحد؟
الطبيب:
من العلامات اللي ممكن تخلينا نشك:
الطفل بيكون انطوائي زيادة عن اللزوم
لا ينظر في العيون ولا يستجيب للنداء
بيلعب بألعابه بطريقة غير تقليدية (زي ترتيبها في صفوف)
عنده عادات ونظام معين يكرره يوميًا بشكل نمطي
مستواه المعرفي والتعليمي واللغوي بيكون متدني في أغلب الأحيان
الأم:
هو كل مرضى التوحد عندهم نفس الأعراض؟
الطبيب:
لا يا فندم، اسمه طيف التوحد، يعني الأعراض بتتراوح من بسيطة جدًا لا تؤثر على الطفل، لحد أعراض شديدة.
الأم:
طيب لو أنا لسه قلقانة من سلوك ابني أعمل إيه؟
الطبيب:
نروح لطبيب متخصص، ونعمل تقييم واستبيانات مناسبة.
الأم:
ولو لا قدر الله تم تشخيص طفل بالتوحد، إيه العلاج؟
الطبيب:
في الأغلب بيكون فريق كامل، مش طبيب واحد، وكل واحد ليه دور، وأهمهم:
أخصائي سلوك معرفي
أخصائي نفسي
أخصائي تخاطب
أخصائي علاج وظيفي
الأم:
يا دكتور إنت عقدت الموضوع كده ليه؟ كنت فاكرة الموضوع أبسط من كده!
الطبيب:
ما هو مش سهل يا مدام إني ييجي لي طفل عنده عرض واحد وأقول للأهل ابنكم عنده توحد.
ده قرار بيأثر على حياة أسرة كاملة، علشان كده الموضوع معقد، وبلاش نستسهل ونطلق تشخيص “توحد”.
الأم:
طيب طفل طيف التوحد بيدخل مدارس عادية ولا مدارس خاصة؟
الطبيب:
على حسب الدرجة، في أطفال يقدروا يكملوا في مدارس عادية، وفي أطفال بيحتاجوا مدارس خاصة.
الأم:
طيب إيه نسبة الشفاء يا دكتور؟
الطبيب:
على حسب الدرجة.
في أطفال بنقدر نساعدهم يتكيفوا ويتعاملوا بشكل طبيعي مع المجتمع، وفي حالات بنواجه صعوبة أكتر.
لكن التشخيص المبكر والمتابعة المستمرة بيفرقوا جدًا.
الأم:
هل في أدوية بتعالج التوحد؟
الطبيب:
للأسف لا، مفيش أدوية تعالج التوحد نفسه، كلها أدوية مساعدة وغير مثبتة علميًا كعلاج أساسي.
....
دكتور سيد معوض
أخصائي طب الأطفال وحديثي الولادة
🎓 زميل الكلية الملكية لطب الأطفال – إنجلترا
📍 العناوين:
1) عيادة 35 - الدور الثاني - All Season Park - مدينتي.. (الخميس من 4 ل 9 مساءً).
2) عيادة مستشفى القوات الجوية بالعباسية.. ( الأحد والثلاثاء من 11 صباحاً ل 4 مساءً).
3) عيادات زاهر - شارع حسن المأمون - أبراج زاهر - برج "3" - بجوار عماير مدينة نصر - أمام المنطقة الحرة.. (الأربعاء 8 ل 10مساء بالحجز المسبق).
📞 للحجز والاستعلام:
01067710688
🧡 صحتهم أمانة… واطمن عليهم مع د. سيد معوض.
...
#العباسية
#التوحد
