Mohammad Azzam - Original Lifestyle

23/08/2023

Skye, United Kingdom
📷 Robert Lukeman

🍃

22/08/2023

Lagunas de Ruidera, Spain
📷 Alex Chaves

🍃

22/07/2023

🍂

14/07/2023

Box Wood, Stevenage, UK
📷 Ernest Gikuma

🍃

12/07/2023

Adriatic Sea, Italy
📷 Mauro Roberto Scalabroni

🍃

23/03/2023

كل عام وانتم محبوبون ✨🍃🌻

عزف Ensemble Ibn Arabi - فرقة ابن عربي 🍃

11/10/2022

رياضة التنفس البطني - اللي بيشرح في الفيديو خبير في الطب الصيني

فيديو يصور الوضع الجسدي أثناء التدريب مع الشرح لتحميل النسخة الكاملة المجانية من كتاب العافية بصيغة ملف بي دي اف تستطيع قراءتها في أي جهاز - اضغط الرابط التا...

21/06/2022

تجربة جديدة في استخدام الفيسبوك اعتقد هتخفف حرق الوقت اللي بيحصلي اثناء ال scrolling + هيبقى الموضوع نسبيا صحي أكتر

1) قفلت ال watch
2) كل ما ادخل بختار stories بدل reels فبقت ثابتة على ال stories
3) كل ما تظهر reels وانا ب scroll بعمل hide والمفروض الفيسبوك بعد فترة يظهرلي reels تهمني
4) اخترت إنه الفيديوهات متشتغلش اوتوماتك
5) لغيت إني أشوف كام عدد اللايكات اللي على البوستات
6) لغيت 8 أنواع notifications متهمنيش أوي من مجموع 17

رقم 5 إحساسها غريب جدا ومش عارف أفسره! لقيت إنها كانت تهمني جدا وأنا مش واخد بالي .. هل بدي البوست أهمية من عدد لايكاته؟ هل دا بيأثر عليا أعمله لايك ولا لأ؟ هل بيأثر عليا سلبيا إنه عدد لايكاتي أقل؟ مش عارف بس حاسس إنها خطوة هتخليني متجرد أكتر وانا بعمل لايك لأي بوست.

تجربة مستوحاة من نصيحة رهام حلمي، لنك البوست بتاعها في التعليقات.

31/12/2021

🤍🌲🎈

31/12/2021

"أظهر ما تكون أو كن ما تُظهِر"

مولانا جلال الدين الرومي

أن تكون متساويًا داخليًا وخارجيًا مهم للعافية وللقيمة الذاتية، وهذا لا يعني إظهار السلوك السيئ إذا كنا سلبيين داخليًا، ولهذا ذكر الرومي الاختيار، لنختار الاتجاه الصحيح 🤍😊🔮

"Show what you are or Be what you show"

Mawlana Jalaluddin Al Rumi

Being equal internally and externally is important for well-being and for self-value, and this doesn't mean to show bad attidude if we are internally negative, that's why Rumi mentioned the choice, to choose the proper direction 🤍😊🔮

07/12/2021

"If you tell me, i will listen. If you show me, i will see. If you let me experience, i will learn."

Lao Tzu

photo by cotnoir

06/12/2021

أهلا بيكو 😊
اسمي محمد ، سنة 1984 اتولدت في فيلا بالإيجار في المدينة المنورة .. كان فيها شجرة كبيرة وانا واخويا تقريبا كنا فاكرينها شخص فكنا بنحضنها جامد واحنا مستمتعين ومبتسمين جدا 😀 وفي يوم قطعوا الشجرة دي مش فاكر ليه يمكن كانت هتميل عالبيت بس فاكر اننا زعلنا أوي .. أتصور إنه كان عندي 4 سنين ونص مثلا لأني وأنا خمس سنين نقلنا شقة تانية لمدة سنة ..
💐
قبل ما اتولد بسنوات بابا الله يرحمه اشترى مزرعة وسماها "البستان" .. ووانا عندي 6 سنين عمل فيها بيت دور واحد من البيوت الجاهزة اللي بتتركب مش بتتبني فنقلنا فيه وبقينا ساكنين وسط المزرعة .. كان بيت من برا أشبه بالصاج كدا ومن جوا ماتيريال تانية أجمل من برا .. كان محندق والأوض قريبة من بعض ولما كانت بتنزل مطرة كنا بنسمع بداية قطراتها على السقف فبنقطع أي حاجة حتى المذاكرة ونطلع جري برا عشان نلعب أنا واخواتي وبنبقى فرحانين جدددااا .. كان البيت متركب على حتة زي مسطبة كبيرة مرتفعة مترين تقريبا عن الأرض .. وقبل ما يتركب وننقل فيه كان في أوضة خشب تانية واسعة بس في مستوى الأرض وسقفها من برا شبه الكوخ وكانت العيلة بتجمع فيها كل يوم جمعة عالغدا .. ولما اتعمل البيت جمبها اتجددت وبقت هي الصالون واستمر فيها اجتماع يوم الجمعة برضه .. المزرعة كان فيها خيل ومعيز وأرانب بتجري وقطط وفراخ سايبة وبط بيبيض ويفقس 🙂 وكان في خفافيش بتطير بليل بس مسالمة بتاعت الفاكهة .. وساعات بليل كان بيدخل تعلب بس الكلاب بتموته 😢 وأحيانا كنا بنلاقي قنفد وساعات طير هدهد .. عشت معظم ذكرياتي في المزرعة دي وكنت شبه منعزل عن العالم الخارجي .. كان لعبنا ومتعتنا بعد ما نخلص مذاكرة هي اللعب تحت في الزرع والطين أو الجري ورا الغنم وساعات أنا واخويا كنا بنجرب نحلبه 😀 والقعدة في البرسيم واللعب في قنوات المية اللي جية من البير .... وكنا بنجري حافيين تحت ولابسين زي طرزان 😂 كان عم عبدالمعتمد اللي بيحش البرسيم الله يرحمه بيجيب طماطم وجبنة بيضة وجرجير وبصل ونعد ناكل معاه .. وعم أحمد الجنايني كان زارع جزر لذيذ .. غير الياسمين والورد اللي كان فنان في زراعته ربنا يذكره بالخير .. ومناكفة علي عبدالشافي سايس الخيل الله يرحمه .. واللعب مع ولاد عبدالمعتمد وولاد ابراهيم الباكستاني العجوز اللي بيسقي الزرع وولاد اخوه اللي بيرعى الغنم الله يرحمهم جميعا .. ومطاردة أخويا لكل ما هو كائن متحرك ومنظور غير البشر .. كنا زارعين دوار الشمس وبغبغانات الدرة الصبح بدري كانت بتيجي تاكل منه .. وانا واخواتي ساعات 🙂 وساعات كنا بنجرب ندوق البرسيم وهو لسا منبت 👀 وكان في شجرة زتون بس مطرحتش ونخل وشجرة نبق وشجر لوز هندي ..
🌾
مرة من المرات جبنا جمل وسميناه مبروك وحطيناه مدة مع الخيل فتقريبا اجنن وبقى يحاول يعضهم .. ومرة جري ورانا فجرينا واستخبينا ورا الخزان فكان بيحاول يشفط جسمه عشان يخشلنا 🤣
🌴
قعدت 7 سنين في البيت دا وبعد كدا نقلنا لبيت أكبر اتبنى برضه في نفس المزرعة وقعدت فيه 4 سنين كمان .. وأنا 17 سنة اتمردت ورحت شقة تانية كانوا مأجرينها جمب الحرم ولما بقيت 19 رحت جدة لأني اتنقلت بين كذا جامعة وطولت أوي في البكالوريوس .. فقعدت حوالي 11 سنة بعيد عن جو المزرعة اللي كنت عايشه .. ماعدا الزيارات كل فترة لبيت المدينة المنورة وفترات السفر في الصيف اللي كانت بترجعني لجو الطبيعة تاني ..
🌼
أيام بابا الله يرحمه - من ساعت ما اتولدت لحد خمسة وعشرين سنة - كنا كل صيف عادة بنسافر أماكن فيها طبيعة خلابة .. وكنا لما بنروح المغرب بنعد في قرية جبلية مكنش واصلها كهربا ولا حنفيات ولا موبايلات وكان في تليفون أرضي واحد في القرية كلها .. كان في بير مية قريب من الأوضتين اللي بنعد فيهم .. وكان الحمام بينه وبين الأوضة حوالي 20 متر وكانت المية محطوطة في جرادل وباردة تلج لأنه الجو الفجر وبليل كان متلج 😁 وساعات كانوا بيسخنوهالنا .. بعض السكان كان عندهم كشاف بيستخدموه وهما ماشيين بليل بس نادر لما بنشوفه مع حد .. وجوا البيوت القرية كلها كانت عايشة على الشموع وأحيانا أتاريك .. بيت سيدي العلمي اللي كان بيستضيفنا كانوا بيعملوا فطار وغدا وعشا من منتجات معظمها طبيعية .. لحوم وبيض وزتون وزيت زتون وجبنة وعيش وشاي أخضر وعسل وفواكه .. وكنا ساعات بنقطف توت من الشجر طعمه رائع .. بعد بابا الله يرحمه رحت أماكن تانية بس مش بنفس الطريقة المكثفة زي زمان …
🍃
عادة بميل للطبيعة الخضراء أكتر من الطبيعة الصحراوية .. يمكن لأنه دي الطبيعة اللي احتكيت بيها اكتر في حياتي .. وإن كنت رحت الصحرا في أكتر من مناسبة ومرة منهم نمنا هناك وركبنا خيل على ضوء القمر كان بدر وحوالينا الجبال .. كنت بقلق للحظات كدا عشان بالليل بس كنت مستمتع والتجربة كانت خيالية الحقيقة
🌻
حياتي كلها خلتني أحس إنه الطبيعة جزء مني وكأني معجون بمياه الطبيعة .. أو كأنه الطبيعة هي الأكسجين .. لما أكون مثلا قاعد وسط خضرة وأسمع صوت الهوا بيحرك ورق الشجر وصوت المية أو الطيور اللي بتغرد ببقى حرفيا في عالم تاني .. معظم الأوقات القعدة الهادية في مكان زي دا بتحسسني إنه معظم الزحمة واللخبطة اللي جوايا بتترتب والتفكير بيبقى أوضح ونظرتي للحياة بتبقى أنضج .. وبالذات لو عرفت أخطف وقت لوحدي ولو وقت بسيط . بيحصل كدا زي تجديد أو كأنه حصل update .. وكأنه غشاوة الأفكار الكتيرة بتتزاح والأصوات العالية بتاعتها بتبقى أهدى .. ولما أفكر أثناء الجو دا في حياتي ممكن أطلع محتار بين اختيارات بس حيرتي ساعتها بتبقى مبنية على أرض هادئة مش على وهم ودوشة على ما أعتقد .. الحقيقة إنه الأرض كلها طبيعة وإنه الطبيعة هي بيئتنا وفطرتنا كبشر زي الكائنات التانية اللي في الدنيا .. بحس إنه الطبيعة بتقربني أكتر من فطرتي ومن النقاء الداخلي والخارجي
🍂
حاجة تانية كمان بتأسرني .. اللقطات اللي ساعات بتبقى في الأفلام وفيها حياة طبيعية زي المشاهد بتاعت فلم the last samurai لما توم كروز كان عايش مع الساموراي في منطقتهم الريفية .. وزي المقاطع اللي بتظهر عالفيسبوك ساعات لناس بيبنوا بيوت من الطبيعة أو بيوت خشب في الطبيعة .. أو مقاطع يوتيوب اللي بتوثق رحلة لغابة وخيمة تحت شجرة ومطر ...
🍀
جيت مصر في 2018 .. ومن سنة وشوية كنا بنزور وحدة صديقة أسرتنا فكانت زارعة في الجنينة نعناع بتاع المدينة المنورة وشربنا منه مع الشاي وعجبنا فواحنا ماشيين قصتلنا منه في كيس وخدناه .. جربت أزرعه زي ما هوا في قصرية كبيرة فيها زرعة فل كنت شاريها فزرعت عودين واحد منهم بأوراقه زي ماهوا والتاني شلت الورق .. الأولاني طول جدا وطلع بذور والتاني نما بس كان أقصر بكتير وطلع ورق بس أصغر مش عارف ليه .. وزرعة الفل بعد شهور طرحت حوالي 10 فلات وبعدها بفترة نشفت خالص ومش عارف السبب برضه .. لو قريت في المجال دا يمكن أعرف ايه اللي كان معمول غلط عشان يتصلح بعد كدا بإذن الله
🥀
لحد أزمنة قريبة نسبيا .. كانت حياة الطبيعة هي النمط اللي كل البشر عايشين عليه .. كانت كل حاجة أصلية .. الأكل والشرب واللبس والزرع والأدوية والألوان اللي بنرسم بيها ....... كله كان طبيعي .. ودا ممكن يحصل تاني عالأقل جزئيا .. عشان كدا بحلم إنه يرجع التناغم والتواصل بينا وبين الطبيعة ونقرب منها أكتر .. الطبيعة جوانا واحنا جزء منها .. الطبيعة بسيطة لكن بتحتوينا .. الطبيعة متزنة ومتناغمة مع مكوناتها ومتسقة مع ذاتها .. واحنا كمان فطرتنا كدا .. علاقاتنا بالآخرين الصح تبقى واعية وفيها جمال واتزان .. الطبيعة متجددة وجمالها فطري وحركتها مبتلغيش سكونها ولا رسوخها المتأصل فيها .. واحنا كمان محتاجين ناخد بأسباب تطوير أنفسنا في أي مجال ولو بحاجات بسيطة مستمرة عشان نحس بالحركة في حياتنا ونحس بالتجدد مع كل نفس زي الطبيعة .. وفي نفس الوقت محتاجين نبقى مطمنين ونسكن داخليا ونعرف إنه مش احنا اللي بنصنع قيمتنا حتى إذا أنفسنا أوهمتنا بغير دا لأنه حتى أعمالنا الطيبة جزء من عطاء ربنا حتى لو كان العمل دا مجرد حلم جميل فيه نية خير أو رحمة أو جمال .. فالشعور بقيمتنا ممكن نحسه بتأمل عطاء ربنا اللي مبينتهيش واللي بيعكس استمرار محبته لنا وعنايته بينا واللي بتدل على قيمتنا المستمرة عنده .. والحب والعناية دي مش لسبب ولكن لأنه ربنا 😀 خلينا نتفق ونعود تفكيرنا على إنه وجودنا في جانب وفي جهة العمل الجيد (ودا بيشمل أي حاجة حتى الأفكار والنيات الحلوة) دا في حد ذاته عطاء جميل ونعمة جتلنا ولو لفترات بسيطة متقطعة وبغض النظر عن النتيجة البعيدة .. حاجة كمان وهي إننا مش محتاجين حاجة "نتصنعها" فتجمّلنا لأنه الجمال ربنا حطه ”built-in“ فينا .. جمال ذواتنا هو تجلي من تجليات قيمتنا المستمرة عند ربنا (يعني لأننا غاليين عنده دايما وهبنا الجمال الفطري الطبيعي طول الوقت) .. محتاجين نشوف الجمال دا عشان نطمن .. والوسيلة هي إننا زي ما قلنا نتعود نشوف قيمتنا عند ربنا بتأملنا لاستمرار عطاؤه وبالتالي نطمن انه الجمال اللي وهبهولنا مستمر .. ووسيلة معاها هي إننا نجرب نترجم (ولو قيمة وحدة) من القيم الإنسانية لعادة فعلية بسيطة ومستمرة .. ووسيلة إضافية كمان وهي إننا نعيش الطبيعة المتاحة .. زرعة جمب الشباك أو أكلة طبيعية أو موسيقى من آلة خشبية أو حاجة صنعتها من مادة طبيعية وبتستخدمها أو أوضة خشب أو عطر طبيعي أو زيارة لحديقة .. ابتسامة حقيقية .. تعبير عفوي طبيعي .. ضحكة من القلب .. فرحة وحب ..
خلينا نعترف إنه الحياة العصرية وبعض سِماتها وجهتنا لعكس اللي فات دا وخلينا نعترف كمان إنه فيها برضه مزايا مهمة .. فمش اختيار عملي إنه نعتزل ونعيش في كهف أو في غابة لكن عالأقل نمزج بين الحياة العصرية وبين الطبيعة المتاحة والبسيطة والسهلة عشان نرجع نحس باتصالنا بالكون اللي حوالينا وبفطرتنا النقية وبالجمال الفطري .. التواصل دا هيخلينا نحس بضد حياة الطبيعة فهنبدأ نقلله .. التكنولوجيا مثلا مفيدة بس الصح إنه نستخدمها مش تستهلكنا .. يعني ممكن نجيب أحدث موبايل بس نستفيد بكل خصائصه .. وكمان مينفعش يبقى في إيدنا 24 ساعة 🤐 ممكن أفتح التلفزيون والفيسبوك بس المفروض ”معظم الوقت“ أبقى عارف أنا عايز ايه منهم أو هشوف إيه فيهم .. ممكن أعود نفسي إني بدل ما أرد فورا كل كلمة بكلمة مضادة آخد نفس عميق وأفكر مجرد ثواني في الكلام اللي اتقال وأشوف لو أنا مكان الشخص التاني كان هيبقى كلامي مبرر ولا لأ وبعدها أكمل حوار بطريقة أوعى مثلا .. ممكن نسافر أحلى دولة بس اهتمامنا يبقى التعارف على ثقافات أخرى والتأمل في طبيعتها والتعارف على أهلها اكتر من اهتمامنا مثلا بإنه غيرنا يعرف اننا سافرنا .. وممكن نعمل بوست حلو عن التجربة ونبقى حابين إنه أحبابنا يشاركونا مشاعرنا بس مش من الاتزان إني أحس بضغط جوايا إني "لازم" في كل صغيرة وكبيرة أعمل بوست .. عشان مبقاش أسير لأداة المفروض أنا استخدمها مش العكس وكمان لأنه مش صحي إنه همي الوحيد يبقى إعجاب الآخرين .. ممكن نلبس لبس شيك ورائع بس على قد إيدي مش لازم خالص براند طالما مش متاح "بسهولة" .. ممكن ناكل أكل لذيذ بس طبيعي .. ممكن نعمل رياضة وقت طويل ونبقى مستمتعين بيها منغير شدة أعصاب إني لازم أخس في مدة كذا .. ممكن أبقى بساعد باللي بقدر عليه بس عشان أنا إنسان مش عشان مستني مقابل .. ممكن أكلم حد أسأل عليه منغير سبب معقد لكن لمجرد إنه واحشني .. هي دي الفطرة .. هي دي أحاسيس الطبيعة .. النهر الجاري بيبقى ماشي في طريقه باتجاه البحر ومبيلتفتش .. وهو ماشي بينضف الأذى بطريقة تلقائية منغير ما يحكم على اللي سببه لأنه دي طبيعته .. وكمان مرن جدا بيتقبل وجود عقبات وبيتفاداها بانسيابية شمال ويمين .. بيسقي الناس والزرع طول ماهو ماشي واستمراره في العطاء بيغير شكل الحجر اللي بيمر عليه .. الشجر بيطلع ثماره بغض النظر عن اللي بيقطفها هياكلها ولا هيصنع منها خمرة .. والعصافير بتصنع عش على أغصانه اللي بتخبيلها أطفالها من الهوا والمطر .. النبتة بتسمح للهوا إنه ياخد بذورها ويطيرها عشان تتزرع في أرض هي مش هتشوفها .. بتعمل دا لأنه دي طبيعتها مش محتاجة يبقى عندها عقل وتفكر ليه هعمله .. الوردة بتطلع عطر سواء حد شمها بلطف أو حد داس عليها في الطريق .. والنحل بياخد الرحيق ويصنع عسل من جماله .. الطبيعة حية وحياتها جمال .. واحنا جزء لا يتجزء منها ..
🌿
الجمل دي يمكن تبدو إنها روائية أو شاعرية أوي بس الحقيقة إنه دي فطرتنا الأصلية .. والحقيقة إني محتاج أعيش بالكلام دا في حياتي قبل ما يبقى كلام مكتوب .. بس كتبته عشان حابب أفكر نفسي وأفكركو بجمال الطبيعة
💐
عندي كذا شغف واكتشفت إنه أقواهم هو الحياة الطبيعية .. من فترة كنت قاعد فاتح الشباك في مكان فيه شجرة برتقان وجت نسمة هوا خفيفة بريحة الشجر فحسيت بحياة جوايا وإني مش قادر أتخلى عن الجزء دا من تكويني .. ونويت إني أجسد شغفي كبداية من خلال الصفحة دي اللي عملتها عشان أستكشف الطريق دا أكتر وأشارككم بمعلومة ممكن تكون مفيدة أو بتجربة ممكن تكون ملهمة .. أو بأي حاجة أحبها وتكون مرتبطة بالطبيعة .. ويوما ما هجرب ان شاءالله أحول جزء من اللي عرفته في الطريق دا لمنتج أو لخدمة تساعد على تفاعلنا مع الطبيعة بشكل أكبر في حياتنا العادية لأني أول حد محتاج دا
🌱