02/08/2026
بطبيعية شغلي انا عندي محل موبايلات وعندي مكن فوري بتجيني حالات من البلد لتسديد القروض بحاول ارفضها ومش برضي استلم حالات زي دي عندي علشان مش حابب اساعد الشركات دي علي اللي بتعمله بمحاولة ضعيفة يائسة مني بس ده اللي اقدر عليه :)
لحد ما جاتني حالة واحدة ست في الخمسينات من عمرها بتسألني اذا عندي مكنة فوري فقولتلها ايوة اول ما طلعت الورقة قولتلها سامحيني يا ست معلش مش بقبل حالات تسديد القروض عندي شوفي محل تاني يعمل الكلام ده.
مرة واحدة قالتلي وحياة عيالك يا شيخ يا تسددهالي بتقولها والدموع في عينها تقريبا وكاتمة حمقتها ودمعتها بالعافية،، قولتلها طيب استريحي بس وفهميني فيه ايه؟
قالتلي منهم لله البعدا فضحوني وجرسوني علي اخر قسط ليهم ده ولموا عليا الناس في الشارع وهنا بدأت تبكي الست.
قولتلها طيب إهدي وهسددهالك وبالفعل سددتلها اخر قسط وعطيتها الوصل واتصلت علي واحدة ست بتقولها خلاص كده وصلتك؟
قالتلها اه وقفلت السكة معاها وهي طايرة من الفرحة وبتقول الحمد لله الحمد لله وفضلت تدعيلي وتدعي لعيالي.
قولتلها انتي ليه عملتي كده إيه اللي غصبك علي كده؟
قالتلي ظروف والله غصب عني لولا الحوجة ما كنت عملت كده ابدا بس توبة والله ما هعمل كده تاني.
دخلوا عليا (بالحنجل والمنجل) والكلام المزوق في الاول وفضلوا يمضوني علي ورق وانا معرفش اقرأ وكان معايا الختم ختمتلهم علي كل الورق وبصموني عليه وبعدين دفعوني دم قلبي منهم لله.
حسبي الله ونعم الوكيل فيهم وفي كل قرش خدوه مني زيادة قالولي كلام واللي دفعته غير كده خالص حسبي الله ونعم الوكيل.
الست كانت بتحسبن والنار طالعة من جواها ،، فيها كتمة وصرخة لو طلعت منها يا ترعب اي حد قدامها.
شركات القروض والتسليف بتركز اكتر علي القرئ والنجوع عندنا وبييجوا بدوريات وبأستمرار لان بالنسبة ليهم القرئ والنجوع بتاعتنا ارض خصبة ليهم.
عميل جاهل اغلبهم مش متعلم من الأساس ونسبة فقر عالية جدا توصل لحد تحت الصفر بمراحل ،، بيتفقوا معاهم في الاول بكلام وبيمضوهم علي حاجات تانية خالص غير المتفق عليه مستغلين فقرهم وحوجتهم وجهلهم بالقوانين.
فبيعملوا فيهم ما يحلوا لهم.
تشهير وفضايح وشتيمة وحاجة اخر قلة ادب معاهم.
للأسف مفيش مراقب علي الشركات دي وعارفين ان مفيش حد هياحسبهم علي اللي بيعملوه فبينزلوا يعملوا ما يحلوا لهم في الناس!
المفروض ان كرامة المواطن المصري فوق اي قانون في الدولة.
إنتهي :)
