27/08/2026
لكل طالب اترشح لكلية تمريض جامعة كفر الشيخ 🩺❤️
لو ظهر لك في التنسيق كلية تمريض جامعة كفر الشيخ ولسه داخل الكلية، فخليني أقولك شوية معلومات من واقع تجربة طالب درس فيها 👇
أولًا: مدة الدراسة ونظامها
الكلية مدتها 5 سنوات:
4 سنوات دراسة + سنة امتياز.
والدراسة بنظام الساعات المعتمدة وGPA، وده نظام هتحتاج تتعود عليه من أول سنة.
ثانيًا: لغة الدراسة
معظم المواد الدراسية بتكون باللغة الإنجليزية، باستثناء المواد الاختيارية الخاصة بالجامعة.
ثالثًا: هل الدراسة صعبة؟ 🤔
بصراحة، مفيش إجابة واحدة تنطبق على كل الناس.
لو دخلت الكلية ومش مهتم بالحضور والمذاكرة، أكيد هتحس إن الدراسة صعبة.
لكن لو من أول سنة ملتزم بالمحاضرات، بتذاكر أول بأول وبتتابع مع الدكاترة، هتلاقي الموضوع أسهل بكتير، وتقدر تحقق تقديرات كويسة جدًا بإذن الله.
وأول ترم طبيعي تحس إن الدنيا جديدة ومختلفة، لكن مع الوقت هتتعود على نظام الكلية وطريقة الدراسة.
رابعًا: الدكاترة ❤️
من واقع تجربتي خلال 3 سنين، معظم الدكاترة اللي درست معاهم كانوا قمة في الاحترام والتعاون، ودايمًا حريصين إن الطالب يفهم ويستفيد.
سواء في مواد الأساسيات في أولى، أو البالغين في تانية، أو النسا والأطفال والحالات الحرجة في السنوات التالية، هتلاقي دكاترة متعاونين وبيساعدوك في رحلتك الدراسية.
وفي النهاية 👌
كلية تمريض جامعة كفر الشيخ مش مستحيلة ولا محتاجة منك غير الالتزام والمذاكرة وتنظيم وقتك.
متخليش كلام الناس يخوفك من الكلية، ادخل وجرب بنفسك، ومع الوقت هتلاقي نفسك اتعودت على النظام وبقيت فاهم الدنيا ماشية إزاي.
وربنا يوفق كل طالب في بداية مشواره الجامعي ❤️
