07/06/2026
تعالى اساعدك ليوم دراسى ممتع داخل الحضانه
هقولك على شوية حاجات ضرورى تخلى بالك منها
قبل ماتنزلى طفلك الحضانه
والحاجات دى احنا بنشوفها كمعلمات مع اطفالك وبنكون زعلانين خالص علشان كده قلت انبهك
ياحلوه👀
#اظافر طفلك بتطول بسرعه فضرورى مرتين فى الاسبوع تتقص واتأكدى قبل ماينزل الحضانه انها مقصوصه
علشان بتحوش اتربه وبتكون مش نضيفه وكمان هيخربش بيها اصحابه
#شعر بنتك لازم يكون متسرح ونضيف دايما
والولد شعره يتقص وبلاش موضة الشعر الطويل دى
بلاش تقليد اعمى وولادنا بيفقدوا طفولتهم وبرائتهم
وكمان شعرهم هيتعرض اكتر لعدوى الشعر
فالوقايه خير من العلاج ولو ظهر حالات عدوى للشعر ناخد فتره بالبيت نتعالج ونرجع نكمل من جديد
#ملابس طفلك لازم تكون نضيفه داخليا وخارجيا
يعنى يغير ملابسه كل يوم علشان ريحته تكون نضيفه
لان فى امهات بتكسل تغير الداخلى ودا كله بيظهر على طفلك متنسيش انه بيقعد. جمب معلمته واصحابه كل يوم
#الحذاء لازم يكون مريح
ويلبس شراب داخلى نضيف
#الشنطه لازم تترتب وتكون نضيفه
لان بتوصل ان فى بواقى اطعمه بتفضل فى الشنطه بالايام
او الطفل بيجيب اداوات من البيت بدون علم الام فتابعى شنطة طفلك يوميا
#الطعام
يكون كميه بسيطه مناسبه لوقت الطفل بالحضانه
بدون ارسال كميات وأنواع كتيره بلا فائده القليل منها يكفى وتكون غذاء صحى
ساندوتش بسيط مع نوع واحد من الفاكهه او الخضار
او عصير
#الصحه
اتأكدى ان طفلك حالته الصحيه جيده ولو ظهر اى عرض جديد من حراره او رشح او همدان بالجسم او ظهور طفح جلدى او تحسس او حساسية انفيه يرجى تبليغ ادارة الحضانه بالحاله والمكوث بالمنزل لحين الشفاء
ولازم نعرف ان فى مواسم بيكثر فيها العدوى زى تغير الفصول بتنتشر فيها العدوى الموسميه بين الأطفال
ذوى المناعه الضعيفه يفضل اخذ الحيطه بأخذ جرعات للمناعه واخذ الاحتياطيات الازمه من التعقيمات والنضافه
ولو لا قدر الله طفلى اصيب بأى نوع عدوى موسميه
ناخد الاجازه بكل هدوء ونرجع نكمل حياتنا من جديد بعد الشفاء 💞
#غيار اضافى ضرورى مع طفلك بالاخص لو لسه جديد فى الحضانه لان وارد يحصل اى مشكله بسبب الحمام لحد مايتعود فيكون معاه غيار احتياطى
#زجاجات الميه
يفضل ارسال كوب بلاستيك خاص بدل الزجاجه بيكون ليها مساوئ بسبب فتحها وعدم تمكن الطفل من غلقها بأحكام وهتفسد الاداوات بالشنطه
يمنع ارسال العاب خاصه من البيت علشان هتسبب مشاكل بين أصحابه الافضل ارسال العاب جماعيه يشارك بيها زمايله ويتركها بالحضانه
#النقود
عدم ارسال اى نقود مع الاطفال
غير مسموح بيها تماما
#حاولت اجمع ليكم اهم النقاط اللى بنشوفها باستمرار مع الاطفال وحبيت اساعد الامهات واوعيها ليوم مريح لاطفالنا داخل الحضانه 👍
