Fitology Hub

Website

Fitology Hub نُضيف المرح إلى الغذاء🥑
Dt. Habiba Elawad🌱

19/09/2026

ليه الميزان ممكن يثبت رغم إنك بتخس دهون؟

كام مرة جربت تقف على الميزان ولقيت نفس الرقم ؟
وطبعا من جواك بتقول أنا ليه مش بخس؟
استنى بس 👀

الميزان بيقيس وزن جسمك كله، مش الدهون لوحدها
يعني ممكن تكون فعلًا بتفقد دهون، لكن في نفس الوقت حاجة تانية بتزود أو تغيّر وزنك مؤقتًا 👇

1. احتباس الماء | Water Retention
التمرين، قلة النوم، التوتر، التغيرات الهرمونية وحتى بعض التغييرات في النظام الغذائي ممكن تسبب احتباس سوائل.
➡️ فيزيد الرقم مؤقتًا رغم استمرار فقدان الدهون.

2. الجليكوجين | Glycogen 🍚
لما تزود الكربوهيدرات، الجسم بيخزن جليكوجين في العضلات والكبد، والجليكوجين مرتبط بالماء.
➡️ بالتالي وزن جسمك ممكن يزيد من الماء والجليكوجين، مش من الدهون.

3. اكتساب العضلات | Muscle Gain
خصوصًا لو بتتمرن مقاومة.
ممكن تخسر دهون وتبني عضلات في نفس الفترة.
➡️ النتيجة؟ شكل جسمك يتحسن والمقاسات تقل، بينما الميزان يتحرك ببطء أو يثبت.

4. الصوديوم | Sodium
وجبة مالحة أو أطعمة غنية بالصوديوم ممكن تخلي الجسم يحتفظ بمياه أكثر لفترة مؤقتة.
➡️ فتلاقي وزنك أعلى في اليوم التالي، وده مش معناه إنك اكتسبت دهون.
5. الدورة الشهرية | Menstrual Cycle
التغيرات الهرمونية قبل وأثناء الدورة ممكن تسبب احتباس سوائل وانتفاخ وتغيّرًا مؤقتًا في الوزن.
➡️ لذلك مقارنة وزن يوم بيوم خلال الدورة ممكن تكون مضللة.

6. محتوى الجهاز الهضمي | Gut Contents
الأكل والسوائل اللي لسه موجودة في الجهاز الهضمي لها وزن!
يعني اختلاف كمية الطعام، الألياف، السوائل ووقت دخول الحمام ممكن يغيّر الرقم على الميزان من يوم للتاني.

🚨 ثبات الميزان ≠ ثبات أو خسارة الدهون!
عشان كده ما تحكمش على تقدمك من وزن يوم واحد
تابع محيط الخصر والمقاسات ، تابع صور التقدم
استخدم متوسط الوزن الأسبوعي بدل رقم يوم واحد ، لاحظ تغير شكل وملابس جسمك ، تابع أداءك في التمرين
والأهم ، التغيير الحقيقي مش لازم يظهر على الميزان بنفس السرعة اللي بيحصل بيها داخل جسمك 🤎
Dt. Habiba Elawad

17/09/2026

الكرياتين مش منشط هرموني ومش Steroid
ومش Accused، بالعكس ده طلع برئ

كل ما حد يسمع كلمة Creatine يقول:
ده منشط؟ هيبوّظ الهرمونات؟ هيكبر العضلات بطريقة صناعية؟
طيب، خلينا نفصل الموضوع ببساطة 👇

إيه هو الكرياتين أصلًا؟
- الكرياتين مركب طبيعي موجود في الجسم، وبيتم تصنيعه من الأحماض الأمينية، وكمان بنحصل على كمية منه من بعض الأطعمة، خصوصًا اللحوم والأسماك.

- الجسم بيخزنه بشكل أساسي في العضلات في صورة Phosphocreatine، وبيساعد في إعادة تكوين ATP، وهو مصدر الطاقة السريع للعضلة أثناء المجهود القصير والعالي الشدة.

يعني إيه عمليًا؟

الكرياتين ممكن يساعدك على:
• تحسين الأداء في التمارين عالية الشدة.
• زيادة القدرة على تكرار المجهود.
• دعم زيادة القوة مع التدريب.
• المساهمة في زيادة الكتلة العضلية مع المقاومة والتغذية المناسبة.

— لكن هل هو Steroid؟
الإجابة : لا

الـ Anabolic Steroids هي مركبات دوائية لها تأثيرات هرمونية، وترتبط بمستقبلات الأندروجين ويمكن أن تؤثر على إنتاج الهرمونات الطبيعية في الجسم.

أما Creatine فآليته مختلفة تمامًا.
هو مش هرمون، ومش Testosterone، ومش بيشتغل كبديل للتستوستيرون.

طب ليه الوزن ممكن يزيد بعد الكرياتين؟

دي واحدة من أكتر الحاجات اللي بتخوف الناس!
الكرياتين ممكن يسبب زيادة في مياه العضلات داخل الخلايا، وده ممكن يظهر على الميزان كزيادة في الوزن، خصوصًا في البداية.
وده مش معناه إنك اكتسبت دهون فجأة.

📌 والأهم:
الكرياتين مش سحر ومش هيبني عضلات لوحده.

أفضل نتائجه بتظهر مع:
تمارين مقاومة منتظمة
بروتين وطاقة كافيين
نوم واستشفاء كويس
ترطيب مناسب

— هل كل شخص ياخده بدون تفكير؟

برغم إن Creatine Monohydrate من أكثر المكملات الرياضية دراسة، اختيار المكمل والجرعة المناسبة لازم يتاخد حسب الحالة الصحية والهدف، خصوصًا لو عند الشخص مشكلة صحية أو بياخد أدوية.

خلاصة الكلام
❌ Creatine ≠ Steroid
❌ Creatine ≠ Hormone
❌ Creatine ≠ Testosterone
✅ Creatine = مركب طبيعي يساعد نظام الطاقة في العضلات، وقد يدعم الأداء والقوة والكتلة العضلية مع التدريب المناسب.

قبل ما تحكم على أي مكمل اعرف هو بيشتغل إزاي الأول. 🧠
- THE VERDICT: NOT GUILTY
- CREATINE: THE ACCUSED
CHARGED WITH BEING A STEROID
Dt. Habiba Elawad

13/09/2026

الفاكهة بالليل مش ممنوعة
"ماتاكلش فاكهة بالليل!" 🍎🌙

طب ليه؟ 😂
جسمك مش بيغير طريقة تعامله مع الفاكهة لمجرد إن الساعة بقت 8 أو 9 بالليل.
الفاكهة ممكن تكون جزء من نظامك الغذائي في أي وقت من اليوم، واللي يهم هو إجمالي أكلك واحتياجات جسمك خلال اليوم.
يعني لو جعان بالليل ونفسك في فاكهة 🍓🍊🍌
كلها عادي

ومش صحيح إن الفاكهة اللي بتتاكل بالليل "بتتحول لدهون" لمجرد إن الوقت متأخر.
المشكلة مش في الساعة… المهم الصورة الكاملة لنظامك الغذائي.

اعمل لنفسك قاعدة بسيطة:
مفيش أكل ممنوع لمجرد الوقت… فيه كمية مناسبة وتوازن. 💚

DT/Shahd Mohamed
nutrition with shahd

#تغذية

13/09/2026

العسل مش دايت لمجرد إنه طبيعي
بس ده عسل طبيعي 🍯

الجملة دي بنسمعها كتير، وكإن كلمة طبيعي معناها إن الأكل مفيهوش سعرات 😅

العسل فعلًا منتج طبيعي، لكن ده مش معناه إنه قليل السعرات أو إننا نقدر ناكله بكميات مفتوحة.

العسل مصدر للسكريات، وبالتالي بيضيف سعرات لنظامك الغذائي، والفرق الحقيقي بيكون في الكمية وإجمالي أكلك خلال اليوم.

يعني لو بتحب العسل، مش لازم تمنعه ❣️.
استخدمه بكمية مناسبة، واستمتع بيه من غير ما ندي للطبيعي لقب الدايت😂

الطبيعي مش معناه دايت والاعتدال هو المفتاح. 🍯

DT/Shahd Mohamed
nutrition with shahd

#تغذية #العسل

12/09/2026

التين مش مجرد فاكهة حلوة إنت عارف إيه اللي جوا التينة أصلًا؟ 👀
قال تعالى:
﴿وَالتِّينِ وَالزَّيْتُونِ﴾
بس بعيدًا عن جمال الآية التين نفسه فيه حاجة مدهشة جدًا! 👇🏻
التينة من جوّا مش مجرد "ثمرة" بالمعنى التقليدي
الجزء اللي بنعتبره ثمرة هو تركيب نباتي اسمه Syconium – سيكونيوم، وبيحتوي على عدد كبير من الأزهار الصغيرة جدًا جواه وده واحد من أسرار تركيب التين المميز.

طيب غذائيًا؟ التين بيدينا إيه؟
1️⃣ ألياف غذائية
الألياف بتساعد على دعم حركة الأمعاء، وبتساهم في تغذية بعض أنواع البكتيريا النافعة في الجهاز الهضمي.
وعشان كده ممكن يكون التين، خصوصًا المجفف، جزء من نظام غذائي يساعد في التعامل مع الإمساك.
2️⃣ مضادات أكسدة
التين يحتوي على مركبات نباتية ذات نشاط مضاد للأكسدة، وده جزء من قيمته الغذائية.
3️⃣ معادن مهمة
خصوصًا في التين المجفف، لأن التجفيف بيقلل الماء ويُركّز العناصر الغذائية، ومن أهمها الكالسيوم والبوتاسيوم.
4️⃣ مش معنى إنه مسكّر إنه "ممنوع"!
التين يحتوي على سكريات طبيعية، لكن وجوده كفاكهة كاملة مع الألياف والمركبات النباتية بيخليه مختلف عن الحلويات المصنعة.

نيجي بقا لسؤال مهم ، الاحسن نأكله طازج ولا مجفف؟
بصراحة الاتنين لهم مكانهم لكن الكمية بتفرق جدًا.
التين المجفف أعلى تركيز في السكر والسعرات والعناصر الغذائية بسبب فقدان المياه وعشان كده الحصة منه عادةً بتكون أصغر من الطازج.
يعني:
طبيعي" ≠ "اكل منه بلا حدود
وده يرجعنا لقاعدة عظيمة:
﴿كُلُوا وَاشْرَبُوا وَلَا تُسْرِفُوا﴾

وآخر حاجة و أهم حاجة اغسله صح
التين من الفواكه الحساسة وسريعة التلف فاشتري كمية مناسبة واستهلكها خلال فترة قصيرة، واغسله كويس بالماء قبل تناوله.

خلاصة الكلام:
التين مش بس طعمه حلو
هو فاكهة فيها ألياف ، معادن ، مركبات نباتية ومضادات أكسدة والطريقة والكمية اللي بتاكله بيهم هما اللي بيحددوا مكانه في نظامك الغذائي.
كُل الطبيعي بس من غير إسراف. 🌿🤎
Dt. Habiba Elawad

#التين #التغذية

11/09/2026

🚩 Nutrition Red Flags
مش في العلاقات 😅😅
في أكلك

لو بتعمل كذا حاجة من دول، ممكن يكون نظامك الغذائي محتاج يتراجع 👀

🚩 بتمنع أكلات معينة تمامًا وبتعتبرها "ممنوعة".
🚩 أغلب وجباتك مفيهاش مصدر بروتين واضح.
🚩 بتشرب سعرات كتير من عصاير ومشروبات محلاة وقهوة بإضافات.
🚩 بتاكل نفس الأكل كل يوم ومفيش تنوع.
🚩 يومك كله سناكس ولقم صغيرة من غير وجبات متوازنة.
🚩 لو أكلت أكتر من المعتاد، بتعاقب نفسك بالحرمان أو التمرين.
🚩 بتعتبر أي زيادة على الميزان معناها إنك فشلت.
🚩 مركزة على السعرات وناسية النوم، الميه، الحركة والتوازن.

💚 Green Flags في طبقك

☑️بروتين موجود
يساعدك على الشبع ويدعم الكتلة العضلية.
☑️ألياف
من الخضار، الفاكهة، الحبوب الكاملة والبقوليات… عشان وجبتك تبقى أكثر إشباعًا وتنوعًا.
☑️ دهون مناسبة
مش لازم نخاف منها؛ المهم الكمية والمصدر المناسب.
☑️ أكل بتحبه
لأن النظام اللي مفيهوش أي حاجة بتحبها… غالبًا مش هيكمل 😂

ال Green Flag الحقيقى 💚؟

الطبق الصحي مش طبق "Perfect"
هو طبق متوازن، متنوع، ومناسب ليكي ولأهدافك.

نظام تقدرِ تعيش عليه… مش نظام تستحمله أسبوعين.

DT/Shahd Mohamed
nutrition with shahd

09/09/2026

COLLAGEN BATTLE: مين يكسب؟!🥊

في الركن الأول
MARINE COLLAGEN 🌊
أنا بحري يعني أكيد أحسن! 😎
وفي الركن التاني
BOVINE COLLAGEN 🐄
على مهلك يا سمكة 😂

بس الحَكَم؟ هو جسمك نفسه! 🎤
خلينا نشوف الحقيقة 👇🏻
━━━━━━━━━━━━━━
MARINE COLLAGEN 🐟
غالبًا بيُستخرج من جلد أو قشور الأسماك، وبيكون غني بـ Type I collagen
BOVINE COLLAGEN 🐄
غالبًا من جلد أو عظام الأبقار، وبيحتوي غالبًا على Type I & III
لكن المفاجأة؟ 👀
جسمك مش بيقرأ كلمة Marine على العبوة!
بعد ما تاكل الكولاجين، بيتكسر أثناء الهضم إلى أحماض أمينية وببتيدات، والجسم بيستخدمها حسب احتياجه.
يعني:
❌ البحري مش بيروح للبشرة مباشرة.
❌ والبقري مش بيروح للعظام مباشرة.
━━━━━━━━━━━━━━
طب مين أحسن؟
لو الاتنين Hydrolyzed Collagen Peptides وبجودة وجرعة مناسبة، فـ المصدر لوحده مش كفاية عشان نقول إن واحد أفضل بشكل مطلق
والأهم أصلًا من نوع الكولاجين:
Protein كفاية → عشان توفرّي الأحماض الأمينية اللازمة
Vitamin C → مهم لتكوين الكولاجين
نظام غذائي متنوع → عشان الجسم يلاقي باقي العناصر المساعدة
يعني بدل ما تركزي:
🐟 Marine ولا 🐄 Bovine؟
اسألي الأول:
هل أكلي أصلًا بيوفر لجسمي المواد اللي محتاجها عشان يصنع الكولاجين؟ 👀🧬
━━━━━━━━━━━━━━
وبالمناسبة
Marine غالبًا أغلى
فمش معنى إن سعره أعلى وإن عليه سمكة يبقى أقوى أو أفضل

طيب مين الفائز في المعركة دي؟ 🏆
التغذية المتوازنة أولًا والكولاجين Supplement مش بديل عنها
يعني الرسالة الأساسية من البوست هي أن : الكولاجين مش مجرد نوع تختاره؛ جسمك محتاج المواد الخام والعوامل المساعدة عشان يصنعه بنفسه.
وفي Glow gang:
مش بنحكم من شكل العبوة…
هات الـ Evidence يا كابتن 😂🥊
Dt. Habiba Elawad

22/08/2026

شوفتوا العبث اللي مدام نفيخة عملته النهاردة في عيادة الهامور جانج فرع قاع الهامور ؟🌊

مدام نفيخة دخلت العيادة وهي ماسكة جوزها من ناحية… وابنها من الناحية التانية.
وقالت للدكتورة:
"أنا جايبة الاتنين عندي نفس الشكوى… بس كل واحد مصيبة لوحده !"

- الشكوى الأولى:
ابني مش بياكل خضار خالص يا دكتورة !
الدكتورة: ولا نوع؟
= ولا نوع
جربتي تقدميه بأشكال مختلفة؟
= آه
مع أكل بيحبه؟
= آه
طب بتجبريه؟
= أحيانًا
وهنا الدكتورة بصت للولد 👀
الولد: أنا مش بكره الخضار أنا بكره التحقيق اللي بيحصل معايا 😭

[لأن إجبار الطفل على أكل الخضار مش بيخليه يحبه بالضرورة؛ بالعكس الضغط المستمر حوالين الأكل ممكن يحوّل الوجبة لمعركة ويزيد رفضه]
الحل الأذكى؟
نكرر تقديم الخضار بدون إجبار، ونغيّر الشكل والطريقة، ونخليه يشوف أفراد البيت بياكلوه فعلًا.
--

- الشكوى التانية:
وجوزي بيحب الحلويات
الدكتورة: بيحبها قد إيه؟
مدام نفيخة: "بيحبها اكتر مني يا دكتورة" 💀
جوزها: يا دكتورة أنا باكل حتة صغيرة
مدام نفيخة: حتة صغيرة؟! بأمارة صينية البسبوسة اللي خلصت عليها كلها لوحدك امبارح؟ ولا صينية الكيكة بالشوكولاته بتاعة اول امبارح؟
الدكتورة: المشكلة مش إنك بتحب الحلويات، المشكلة لما الحلويات تتحول من جزء صغير من نظامك إلى مصدر متكرر للسعرات خلال اليوم

يعني مش لازم نمنع السكر 100%، ولا نحط الحلويات في خانة الأكل الممنوع
الأهم:
✔️ الكمية
✔️ التكرار
✔️ إجمالي النظام الغذائي
✔️ وهل الحلويات بتحل محل أطعمة أكثر تغذية ولا لأ؟
---

مدام نفيخة سكتت شوية وقالت: "يعني أنا كده جبتلك مشكلتين؟"
الدكتورة: "لأ إنتِ جبتيلي عيلتين عندهم مشكلتين، وكل واحدة محتاجة نفهم سببها الأول"
لأن التغذية مش:
كُل الخضار غصب❌
ممنوع حلويات ❌
التغذية الصح هي إننا نفهم السلوك الغذائي البيئة حوالين الأكل، الكمية، التكرار، والاحتياجات الفعلية للشخص.
- وفي نهاية الجلسة، تم حفظ البلاغ… لحين وصول صينية البسبوسة🚨

📍 عيادة الهامور جانج — حيث حتى مشاكل الأكل عليها بلاغ 🌊
The Bottom Gang 🐌🦑
Dt. Habiba Elawad






#تغذية

21/08/2026

أنا وهي بنعمل نفس الدايت.. ليه هي خست وأنا لأ؟!
كانوا اتنين اصحاب.
قرروا يبدأوا دايت مع بعض، وكل واحدة كانت بتبعت للتانية صور أكلها أول بأول.
نفس الفطار. نفس الغدا. نفس العشا !! ✅
بعد شهر
واحدة نزلت كذا كيلو، والتانية واقفة مكانها

بدأت تبص لصاحبتها وتقول:
إحنا بناكل نفس الأكل.. ليه أنا مش بنزل زيها؟ ‼️
الحقيقة إن الجسم البشري مش نسخة واحدة.
حتى لو اتنين أكلوا نفس الوجبات بالجرام، النتيجة ممكن تختلف بسبب:
معدل الحرق الأساسي (BMR).
الكتلة العضلية.
الحركة اليومية حتى خارج التمرين (NEAT).
جودة النوم.
التوتر والضغوط.
الجينات.
الهرمونات.
الأمراض أو بعض الأدوية.💊
والأهم مدى الالتزام الحقيقي بالنظام. 📋
ممكن واحدة تكون بتحرق سعرات أكتر لأنها بتتحرك طول اليوم، أو عندها كتلة عضلية أعلى، أو نومها أفضل... لكن التانية، رغم إنها بتاكل نفس الأكل، جسمها بيستهلك طاقة أقل.
علشان كده، متقارنيش رحلتك بحد تاني.
قارني نفسك بنفسك، لأن نجاح الدايت مش سباق مع الناس لكنه رحلة تناسب جسمك أنتِ
ولو لقيتي حد نزل أسرع منك، ده مش معناه إنك فشلتي... معناه بس إن جسمك مختلف.
شاركوني في التعليقات.. قبل كده قارنتِ نفسك بحد كان ماشي على نفس الدايت؟

Dt. Habiba Elawad

Address

Mansoura

Website

Alerts

Be the first to know and let us send you an email when Fitology Hub posts news and promotions. Your email address will not be used for any other purpose, and you can unsubscribe at any time.

Shortcuts

Share

Category