25/04/2020
كل عام وانتم بخير وتقبل الله منا ومنكم صالح الأعمال.🙂
بالنسبة لمرضى السكر في رمضان :::
النوعين الأشهر لمرض السكر وهما :::::
١-النوع الأول وده المريض لازم يمشي على نوعين من الأنسولين ؛ نوع طويل المفعول (زي اللانتوس) بيتاخد غالبا بالليل ونوع سريع المفعول ( زي الأكتارابيد أو الهيومالوج) بيتاخد 3 مرات قبل الوجبات .
٢- النوع التاني وده مريض يا إما ماشي على انسولين ميكس قبل الفطار والعشاء أو انسولين زي بتاع النوع الأول يا اما ماشي على أقراص وسكره متظبط عليها.
دلوقتي مين يفطر ومين يصوم في الأنواع دي ؟؟؟🙄
النوع الاول : قولا واحدا ما يصومش🤚🤚
النوع التاني :
* اللي ماشي على انسولين زي بتاع النوع الأول ما يصومش خاصة لو سكره مش متظبط قبل رمضان .
* اللي ماشي على انسولين ميكس مرتين في اليوم بجرعات عالية وسكره متأرجح برده ملوش صيام.
*اللي جاله غيبوبة انخفاض سكر أو ارتفاع سكر او غيبوبة كيتونية أو سكره في آخر 3 شهور قبل رمضان مرة عالي ومرة واطي او اكتر من مرة يقيسه يلاقيه HI يعني عالي جدا برده ملوش صيام .
*النوع التاني اللي عنده أمراض سواء ضغط أو قلب أو كلى أو كبد برده ملوش صيام.
* النوع التاني اللي ماشي على أقراص وسكره مش متظبط آخر 3 شهور والتراكمي عالي يفضل برده ما يصومش.
* الحامل وعندها سكر ما تصومش برده
*النوع التاني اللي ماشي على أقراص وسكره متظبط والدنيا معاه تمام ومفيش امراض زي اللي قولنا عليها مصاحبة لمرض السكر ده بقى يصوم عادي مفيش مشكلة مع تظبيط في جرعات الأدوية ومتابعة السكر بالقاياسات التي يحددها الطبيب .
طيب معظم مرضى السكر عاوز يصوم !!
لازم مريض السكر يعرف يبقى عارف هو في اي فصيل من اللي قولنا عليهم ويبقى عارف ان الصوم في خطورة خاصة لو هو سكر عالي الخطورة أو سكر خطر ..!🤔🤔
يعني ايه ؟🤔
دلوقتي تم تقسيم مرضى السكر لسكر شديد الخطورة وسكر خطير وسكر متوسط الخطورة وملخصهم في الأنواع اللي قولتها فوق ☝️
واخر التوصيات أن السكر الشديد الخطورة والخطير من الأفضل ما يصومش
طب لو مصمم يصوم ؟؟!!🙄🙄
# النوع الاول او النوع التاني اللي ماشي على انسولين متعدد الحقن :
اللانتوس : هيقلل ١٥- ٣٠ ٪ من الجرعة اللي كان بياخدها وهياخدها في نفس الميعاد .
اللي قبل الوجبات :
*جرعة الفطار هياخدها هي هي قبل الإفطار
*جرعة الغداء هنوقفها
*جرعة العشاء هياخد نصفها قبل السحور
والجرعات ممكن تتعدل تاني على حسب قياسات السكر اليومية اللي هيحدد الطبيب مواعيدها
# النوع التاني اللي ماشي على انسولين ميكس أو المعكر :
* جرعة الفطار زي ما هي في الإفطار
* جرعة العشا هياخد نصفها قبل السحور
وبرده كل ده مرهون بالقاياسات على مدار اليوم
# النوع التاني اللي ماشي على أقراص :
انواع الاقراص كتير وفيه انواع بتمشي على نص الجرعة وانواع بتفضل زي ماهي ولذلك لابد من استشارة الطبيب المعالج
طيب مواعيد قياس السكر امتى؟؟
اللي مصمم يصوم من النوعين الاول او التاني اللي ماشيين على انسولين هيبقى قياسات السكر ليهم كتير شوية على مدار اليوم
١- بعد السحور بساعتين
٢- في منتصف اليوم الساعة ١٢ الظهر والساعة 4 العصر
٣- قبل المغرب
٤- بعد الافطار بساعتين
٥- قبل السحور
٦- اي وقت يحس فيه بعرق أو دوخة أو رعشة أو زغللة أو ضربات قلب زيادة ( أعراض إنخفاض السكر )
اللي ماشي على حبوب ممكن يكفيه قياس الساعة ١١ الظهر والساعة ٤ العصر
امتى المريض يكسر صيامه ؟؟ 🤔
عند رقمين مهمين جدا ٧٠ أو ٣٠٠ »»»» لازم يكسر صيامه لو لقى السكر أقل من ٧٠ أو أعلى من ٣٠٠ وإبلاغ الطبيب المعالج .
طب لو مثلا كان من ٨٠ أو ٩٠ ممكن يقيس تاني بعد ساعة ولو بيوطى لازم يفطر .
بس كده خلاص ☝️☝️☝️
انا حاولت على أد ما اقدر أبسط الموضوع والا فالموضوع اكبر من كده ..
معلش طولت عليكم ... ونسألكم الدعاء بظهر الغيب .
وأي استفسار ربنا يوفقني وأرد عليه سواء هنا على الصفحة أو صفحتي الشخصية أو الواتس .
وده رقم الواتس 01094816857
د/أحمد عبدالعزيز
