27/04/2025
عارفة أنه كل اللي بتصرفيه على الماسكات والسيرم هيضيع لو نسيتي الخطوة دي؟
صيف، بحر، ومهتمية بنفسك عشان بشرتك والصور وبتحطي مرطب وسيرمز وماسكات، كل ده حلو جدًا، لكن خطوة واحدة نسيتيها يا ست الكل هتضيع كل اللي فات!
أشعة الشمس اللي بتوّحيكي أنها شديدة في المصيف مش بتظهر فيها بس، لكن دي كل يوم حواليكي حتى الأيام اللي فيها سحاب.. عايز أقولك 80% من الأشعة الضارة بتخترق الغيوم فـ بيخلي بشرتك تتعرض للتلف حتى لو مش حاسه بالشمس، فـ يا عزيزتي واقي الشمس مُهم جدًا.
طب يا عنان سوق العناية بالبشرة فيه صن بلوك وصن سكرين ايه الفرق؟ تعالي أقولك الموضوع بكل بساطة.
فيه الصن بلوك Sunblock بيشتغل زي المرايا بظبط يعني ايه؟ يعني بيعكس أشعة الشمس الفوق بنفسجية بعيد عن بشرتك باستخدام معادن زي الزنك والتيتانيوم.. وفيه الصن سكرين Sunscreen ده بيمتص الأشعة وبيحوّلها لطاقة أقل ضررًا ليكِ بدل ما يمنعها بشكل كامل.
طب بلاقي أرقام مكتوبة كده على المنتج دي ايه؟ ده ما يُسمى بالـ SPF، سامعك ياللي هتقول ايوه أنا فهمت ايه.. الصبر هقولك🤌🏻
ده بيتسمى بالـ Sun Protection Factor، وهي مدى مقدرة واقي الشمس لحماية بشرتك من الأشعة، وتعالي أقولك نسب كل واحدة عشان تاخدي بالك قبل ما تشتري:
SPF 30 بيمنع حوالي 97% من الأشعة الضارة.
SPF 50: بيمنع حوالي 98%.
SPF 100:بيمنع حوالي 99%
لكن مُهم تعرفي مفيش منتج بيمنع 100%، عشان كده لازم دايمًا تجدديه كل ساعتين أو بعد ما تطلعي من البحر!
ومش أي واقي شمس ينفع فـ لازم لما تاخدي بالك من الأرقام تدوري على Broad Spectrum عشان تحميكي حماية كاملة من أنواع الأشعة زي الـ UVA و UVB:
UVB: هي الأشعة اللي بتسبب الحروق (Burning) وبيقي الحماية منها موجودة في رقم الـ SPF.
UVA: هي المسؤولة عن التجاعيد والشيخوخة المبكرة لأنها بتخترق أعماق الجلد.
فـ ببساطة واقي الشمس مش رفاهية لأن بشرتك تستاهل تحميها، والأكيد أنه للوش وكمان أيدك ورقبتك.. وبالمناسبة عشان تاخدي أحسن نتيجة منه حطيه قبل ما تنزلي من نص لربع ساعة.
قوللنا بتواظبي عليه غير المصيف ولا لأ، وبتجدديه كل قد ايه؟☀️
