14/06/2026
🦷 تسوس الأسنان.. إمتى نلحق السن بحشو عادي وإمتى نحتاج حشو عصب؟
كتير من المرضى بييجوا العيادة ويقولوا: "يا دكتور هو أنا محتاج حشو عادي ولا حشو عصب؟" 🤔
والإجابة بتعتمد على التسوس وصل لفين.
في البداية التسوس بيكون بسيط وبيأثر على الطبقات الخارجية للسن، وساعتها المريض ممكن يحس بحساسية مع الساقع أو السخن أو يلاحظ نقطة سودة أو حفرة صغيرة في السن.
🦷 لو التسوس لسه موصلش للعصب بنشيل الجزء المتسوس ونحط حشو تجميلي، وده اللي بنسميه الحشو العادي. الإجراء بيكون بسيط وسريع والسن بيرجع يشتغل بشكل طبيعي.
⚠️ لكن لو التسوس اتساب فترة طويلة ممكن يوصل للعصب ويسبب التهاب، وساعتها الألم بيكون أقوى وممكن يزيد بالليل أو مع الأكل والشرب.
من العلامات اللي بتخليني أشك إن السن محتاج حشو عصب: 🔹 ألم شديد ومستمر. 🔹 حساسية قوية جدًا للساقع أو السخن. 🔹 وجع مع المضغ أو الضغط على السن. 🔹 وجود تورم أو خراج في بعض الحالات.
🦷 وحشو العصب مش معناه خلع السن بالعكس، الهدف منه إننا ننقذ السن ونحافظ عليه أطول فترة ممكنة.
💡 أهم نصيحة دايمًا بقولها : متستناش لحد ما الوجع يزيد. كل ما اكتشفنا التسوس بدري، كان العلاج أسهل وأسرع وأوفر، وفي أغلب الأحيان بنكتفي بحشو عادي بدل ما نوصل لحشو عصب.
حافظ على أسنانك بالكشف الدوري، لأن التسوس في بدايته ساعات بيكون من غير أي أعراض.
📞 للحجز والاستفسار: د. مؤمن أشرف 01060355390
#اسنان 🦷✨
