12/03/2026
إحنا لبعض… مش عبء على بعض
بلاش تقول "ربنا ما يحوجني لحد"… لأن يمكن أكتر رزق جالك في حياتك كان على هيئة بني آدم.
بص حواليك كده…
كل حد دخل حياتك ماكانش صدفة، وماكانش زيادة عدد وخلاص. إحنا فعلًا ممرات خير لبعض. ربنا لما بيبعتلك رزق، دعم، فرصة، كلمة تطبطب، أو حتى درس قاسي… بيبعته عن طريق الناس. مافيش حد عايش لوحده، ولا حد مكتفي بذاته مهما حاول يقنع نفسه بكده.
الناس في حياة بعض نعمة.
وفي نفس الوقت مرايات.
في ناس بتقابلها وتشوف فيها انعكاس حلو منك. تشوف طيبتك، سماحتك، حبك، قدرتك على الاحتواء. تحس إنك شايف نسخة من أحلى ما فيك. النوع ده بيطمنك إن جواك خير حقيقي.
وفي ناس تانية بتقابلها عشان تتعلم. تتعلم ما تحكمش بسرعة، ما ترفضش حد عشان طبع مختلف، ما تصنفش الناس أبيض وأسود. تتعلم تقبل الاختلاف، وتحط حدود في نفس الوقت. تقبله زي ما هو، من غير ما تأذي نفسك، وتدعيله بالخير حتى لو مش شبهك.
وفي نوع ثالث…
ناس بيكون بينك وبينهم درس تقيل شوية. درس يمكن يوجع، ويمكن يطول، ويمكن يخليك تقول "أنا اتعقدت من الناس". بس الحقيقة إنهم جايين يعلموك حاجة عن نفسك قبل ما يعلموك حاجة عنهم. يمكن يعلموك تقول لأ. يمكن يعلموك تحط حدود. يمكن يفوقوك على جزء فيك محتاج يتشاف ويتصلح.
كتير من الأذى اللي بنتعرض له مش لأننا ضعاف… لكن لأن وعينا وقتها كان لسه بيتشكل. بندي فرصة لاختراق حدودنا لأننا ماكناش شايفين الحدود أصلًا. بنتصرف على قد وعينا، ولما وعينا يكبر… اختياراتنا بتتغير.
مفيش حاجة حصلت في حياتك مالهاش فايدة.
حتى الخذلان كان درس.
حتى الوجع كان توسيع قلب.
حتى الفقد كان إعادة ترتيب لأولوياتك.
الفكرة مش إننا نهرب من الناس علشان ما نتوجعش. الفكرة إننا ننضج وسط الناس. نتعلم إزاي نحب من غير ما نذوب، ونسامح من غير ما نسمح بالأذى، ونقرب من غير ما نلغي نفسنا.
لما نفهم ده…
علاقاتنا هتبقى أهدى، أوضح، وأنضف.
هنعيش المعنى الحقيقي إن الناس لبعضها بجد.
مش احتياج مذل، ولا استقلال مزيف… لكن مشاركة واعية.
إحنا مش عبء على بعض.
إحنا طريق بعض.
—
رفقا جريس
رفه وعي ولمسة نور 🤍✨️🪷
#وعى
