Dr.Asmaa Al-Aarag

04/05/2026

04/05/2026

Lipedema مرض جينى بيصيب ١١٪؜ من السيدات مش كسل ومش ضعف اراده ومش مجرد وزن زايد

25/04/2026

ف الفيديو ده حاولت الخص معظم ما يخص الليبيديما ، الليبيديما مرض مزمن بيصيب حوالى ١١٪؜ من السيدات عانت منه السيدات لفترات طويله فى صمت من غير ما يعرفوا عندهم ايه وكل اللى حواليهم بيتهموهم ان دى مجرد زياده وزن وانعدام اراده وكسل وشكاوى مالهاش اساس ودورنا اننا نوعى بيه ونعلى صوتنا بمعاناه نسبه كبيره من السيدات وناكد ان ده مرض مزمن بيتطور خارج عن اراده السيدات دول

23/04/2026

السمنة مش فائض سعرات.
هي اضطراب في الطريقة اللي جسمك بيتحكم بيها في الطاقة.
WHO و American Medical Association صنفوها كـ مرض مزمن زيه زى الضغط والسكر
اللي بيحصل جوا جسمك لما بتبدا تقلل اكلك :
↓ حساسية الليبتين ← بتاكلي وجسمك مش بيحس بالشبع كويس
↑ الجريلين ← الجوع بيزيد حتى مع الأكل الكافي
↓ معدل الحرق الأساسي ← جسمك بيوفر طاقة ردا على تقليل السعرات
النتيجة: مش إنك مش بتحاولي كفاية
جسمك بيقاومك بيولوجياً.

ليه الدايت القاسي بيفشل؟
لأنه بيصطدم بـ adaptive thermogenesis
الجسم بيرد على العجز الحاد بإنه يحرق أقل ويجوع أكتر.

التدخل الصح:
عجز معتدل + بروتين كافي + تنظيم الجوع + استمرارية
مش حرب على جسمك.

ويا ريت قبل ما نتهم حد انه ضعيف الاراده وانه مش قادر يقفل بقه نفهم تانى ان السمنه مرض مزمن

21/04/2026

من الاسباب اللى بتزود الالتهاب ف الجسم مستويات السكر والانسولين المتقلبه insulin spikes فمن المهم اننا نحاول نحافظ عليهم مستقريين وده بنعمله بتنظيم الوجبات كل ٣ ساعات تقريبا وجبه و صيام ١٢ ساعه عن الاكل والاكل ف خلال ١٢ ساعه كمان ندمج بين الفاكهه ومصدر بروتين او دهون صحيه علشان نقلل امتصاص السكر الموجود فيها ويدينا فتره شبع اكبر فما نلجأش للنقنقه بين الوجبات. https://www.instagram.com/p/DVB0iN3CC02/?img_index=2&igsh=OWV6bTQ2NDFwdHUw

20/04/2026

مش كل ثبات وزن معناه إنك فاشلة…
ومش الحل إنك تضغطي أكتر.

أحيانًا الحل إنك تفهمي جسمك
تحترميه… وتشتغلي معاه

وتدي لنفسك وقت تنزلي بهدوء
علشان اللي ينزل… يثبت

احنا ف رحلة مش سباق
وصحتك مش رقم على ميزان

20/04/2026

الحقيقه انى بدات الاقى نفسى لما لقيت شغفى بالتغذيه
كل لما بذاكر اكتر باحس بالجهل اكتر 😂 ولكن باحس بالمتعه اكتر واكتر 🩵
التغذيه مش كام كيلو طالع ونازل مش مجرد رقم عينى عليه
التغذيه شخص كامل بتظبط هرموناته استجابه جسمه بتحاول بالاكل تصلحه من جوه وده بالتبعيه هينعكس عليه من بره بشكل احسن وصحه افضل بغض النظر انت رقمك كام ع الميزان
رحله حياه مستدامه مش كام كيلو انزلهم وابقى خلاص كده اخدت براءه وارجع الغبط تانى و اخس تانى وافضل ف نفس الدايره مش عارف اكسرها
دى رحله وعى بنتعلمها وتكمل معانا طول العمر
ورغم صعوبتها بس ادينى بعافر وبحاول اتعلم 🩵🩵
ادعولى بالتوفيق
اللهم انفعنا بما علمتنا واستخدمنا ولا تستبدلنا يا رب 🩵

08/04/2026

نقص الحديد في البالغين مش مجرد أنيميا…
هو حالة محتاجة تشخيص وعلاج أدق بكتير من الشائع

أهم النقط المبنية على أحدث الأدلة:

• ممكن يكون عندك نقص حديد حتى لو الهيموجلوبين طبيعي
→ التشخيص بيعتمد على Ferritin و TSAT مش Hb بس

• الهدف من العلاج مش رفع Hb
→ لكن الوصول لمخزون كافي (Ferritin ≥50–70) علشان الأعراض تتحسن

• نقص الحديد غالبًا سببه:
نزيف (خصوصًا الجهاز الهضمي)
أو سوء امتصاص (زي بعد التكميم أو مشاكل الأمعاء)
→ مش مجرد “أكل قليل حديد”

• مش كل الحالات تستجيب للمكملات الفموية
→ وفي حالات كتير بيكون التدخل الوريدي هو الأنسب من البداية

• الجرعات اليومية العالية من الحديد
→ مش دايمًا الأفضل
→ والجرعات الأقل أو يوم بعد يوم ممكن تكون أحسن امتصاصًا وأقل أعراضًا

• تحسن التحاليل مش كفاية
→ لازم الأعراض تتحسن
→ وإلا يبقى السبب لسه موجود أو العلاج مش مناسب

الخلاصة:
نقص الحديد محتاج يتشخص صح
ويتفهم سببه
ويتعالج بطريقة مناسبة لكل حالة… مش بروتوكول واحد لكل الناس

25/02/2026

نخلط البيض مع الزبادى واللبن و التمر الرطب والفانيليا بالهاند بليندر وبعدين نضيف عليهم جوز الهند والبيكنج بودر ونقلبها ونحطها ف صينيه وع فرن سخن او اير فراير لحد ما الوش يتحمر تقريبا تلت ساعه
حصص الكميه كلها تقريبا
١ بروتين
٢ فاكهه
نص البان
٢.٥ دهون صحيه
سكرها مظبوط لو بتحبى الحلويات مسكره كترى التمر شويه
حلوه قوى ك سناك مع فنجان قهوه

21/02/2026