17/10/2026
العجز المكتسب.. لما الإنسان يتعود إنه مفيش فايدة!
من أخطر الحاجات اللي ممكن تصيب أي مجتمع مش الفقر ولا قلة الإمكانيات لكن إن الناس تفقد إيمانها بقدرتها على التغيير.
في علم النفس فيه مفهوم اسمه العجز المتعلم (Learned Helplessness) وده بيحصل لما الإنسان يتعرض لإحباطات متكررة ومحاولات فاشلة لدرجة إنه يبدأ يقتنع إن مفيش حاجة هتتغير مهما حاول.
المشكلة الحقيقية مش في الفشل نفسه لكن في اللحظة اللي الإنسان بيبطل فيها يحاول حتى لو بقت عنده فرصة حقيقية للنجاح.
وده مش بيحصل للأفراد بس. ممكن تشوف آثاره في مجتمع كامل لما الناس تتعود إن الشكوى ملهاش نتيجة وإن الاجتهاد مش بيتقدر وإن المطالبة بالحق مش هتغير حاجة.
ومع الوقت بتتحول جملة «مفيش فايدة» من مجرد تعبير عن الإحباط لقناعة بتتحكم في تصرفاتنا وقراراتنا.
لكن لازم نفرق بين إن الإنسان يكون عاجز فعلًا بسبب ظروف خارجة عن إرادته وبين إنه يكون اتعلم العجز من كثرة التجارب المحبطة.
وأعتقد إن أخطر ما في العجز المكتسب إنه مش بيسلب الإنسان قدرته على التغيير بالضرورة لكنه ممكن يسلبه إيمانه إن التغيير ممكن أصلًا.
والسؤال اللي يستحق التفكير..
إحنا فعلًا مش قادرين نغير ولا اتعودنا إننا منجربش؟
