06/08/2026
🌞🌬️ Deuant der episòdi de nautes temperatures registrades aguest ostiu e damb er objectiu de milhorar eth confòrt, autant des usatgèrs coma des professionaus, Aran Salut met en marcha accions entà mitigar es efèctes dera calor enes espacis assistenciaus.
Coma prumèra mesura, s’installaràn equipes portables d’aire condicionat enes consultes, e se priorizaràn aqueri espacis a on aguesta solucion ei mès efectiva pes sues dimensions. Aguesta accion permeterà amendrir era temperatura ambientau pendent es ores de mès calor e aufrir ues milhors condicions entara activitat assistenciau e tath confòrt des pacients e des professionaus.
En airau d’Urgéncies tanben se i installarà un fancoil en correder centrau des bòxes, damb er objectiu de refortir era capacitat de refrigeracion d’aguest espaci e milhorar eth confòrt des usatgèrs e des professionaus.
Ena sala de demora s’installaràn ventiladors de grana capacitat entà favorir era circulacion der aire e incrementar era sensacion de confòrt termic des usatgèrs mentre demoren que les visiten.
Aran Salut trabalhe en solucions estructuraus a miei tèrme. D’un costat, eth projècte deth nau CAP de Vielha, actuauments en fasa de tramitacion e obtencion des permisi d’òbra, incorporarà un sistèma de climatizacion integrau entàs consultes, e garantirà ues condicions excellentes de confòrt.
Der aute, tanben se tròbe en fasa de redaccion eth projècte d’ua solucion definitiva entara climatizacion der airau d’Espitalizacion, que seguirà plaçat ena bastissa actuau e non se desplaçarà damb eth bastiment deth nau CAP. Aguesta accion permeterà dotar aguesta unitat d’un sistèma de climatizacion adaptat as besonhs assistenciaus e garantir ues condicions de confòrt apropiades entàs pacients espitalizadi e es professionaus.
Aguestes accions responen ath compromís d’Aran Salut de milhorar es sues installacions e adoptar totes es mesures tecnicaments viables entà aufrir espacis assistenciaus mès confortables, segurs e adaptadi as besonhs actuaus.
