الفجر اليوم كان مختلف…🤲
ماقدرتش نرقد كويس، وكل ما نسكر عيوني نفكر في يوم عيادتي.🌸
اليوم احساسي بيه مختلف 👇
فيه حالة ان شاءالله بتكون أم لاول مرة عن عمر 44 سنة، بعد انتظار سنين طويلة، ربي يسلمها هيا ومولودها 💙
وفيه حالات تلقيح صناعي لكل حالة قصه أمل زادت عليا ثقل المسؤوليه 😔
وفيه أمهات مستنيات نتيجة حمل بعد أسبوعين من التلقيح…
وكل قصة وراها 9 و10 و11 وحتى 13 سنة من الانتظار.
مش عارفة علاش شعوري اليوم غريب… يمكن لأني حاسة بثقل كل الأمنيات اللي داخلة معاي للعيادة. 🤍
صليت الفجر، ووقفت بين يدي ربي ودعيت…
يا رب سهّل، يا رب طمّن القلوب، يا رب اجعل يومنا هذا مليان أخبار تفرّح، ونتائج تجبر سنين الانتظار.
وإنتوا… ادعولي بالتوفيق اليوم،
يمكن دعوة من حد فيكم تكون سبب في فرحة أم استنتها سنين
23/08/2026
أنا وحالاتي مبسوطين 🤭❤️
ومانبوش نقولو السبب😉
21/08/2026
تنبيه بكل احترام 🤍
حالاتي الغاليات، الواتس آب مخصص فقط للحالات المتابعات معاي: لمراجعة تحليل، تعديل علاج، أو استشارة ضرورية ومفاجئة تخص حالتها، وليس للكشف أو التشخيص أو تحديد مواعيد العيادة.
أتمنى من فضلكن عدم إعطاء رقمي لأي قريبة أو صديقة بدون استئذاني؛ لأن ضغط العمل كبير، ويصعب عليّ الرد على رسائل طويلة وتحاليل سنوات أو طلبات تشخيص وعلاج ومواعيد. رقمي نعطيه بنفسي للحالة اللي نقدر نتابعها.
واللي تحتاجني، بكل حب، نستقبلها في العيادة ونخصص لها وقتها كما تستحق. 🙏🏻🤍
شكراً لتفهمكم واحترام وقتي وخصوصية التواصل مع حالاتي.
والسلام عليكم
19/08/2026
في زيارتها اليوم… جتني ببنوتتها اللي انتظرتها بعد سنوات من الحرمان ❤️� والاحلي جتنا حامل للمرة التانيه ✌️
والأجمل إن فرحتي كانت أنا وممرضتي مع بعض… اللي عاشت معاي تفاصيل هالحالات، وفرحتهلهم من قلبها قبل ما تكون مجرد شغل ❤️
ممرضتي مش مجرد ممرضة… هي نظام العيادة، روحها، وسندي في كل التفاصيل ❤️🔥
حبها وإخلاصها للحالات يخلوني مطمنة، ووجودها معاي يفرق هلبا… ويوم تغيب نحس العيادة كلها مش هي! 🤍
ربي يخليكِ ❤️
لأن في ناس حضورهم ما يتعوضش. ❤ تحية ليها ولكل التمريض اللي يخدم من قلبه
والف الف حمد لله علي سلامتك وربي يعطيك الصحة ويطول في عمرك 🫂
18/08/2026
💙هشام💙
فرحة عيلة… ونعمة ثقة 🤍
مش كل نجاح صدفة… بعض النجاحات وراها سنين من الانتظار، وثقة كبيرة، ودعاء لرب العالمين🤍
بعد سنين من الحرمان، ربي رزقهم من جديد، والحمد لله اليوم فرحتهم فرحة طفل ثاني…
أنا مش طبيبة لحالة وبس…
أنا طبيبة عائلات كاملة، من أول حلم الحمل… لحد ما نشوف الأحفاد قدام عيوننا. 🤍
وثقتكم أمانة… وفرحتكم بالنسبة لي نجاح ما يتقاسش بالأرقام.
ربي يديم عليكم النعمة، ويجعل كل بيت فرحته عامرة بأطفاله وأحفاده.
شكر خاص لصاحب الأنامل الذهبيه
د عمار الأزرق
17/08/2026
� يوم عيادة طويل… متعب… وزحمة حالات وعمليات، لكنّه من أجمل الأيام! ❤️
لأن التعب يهون لما تكون النتيجة 6 حالات حمل إيجابية في يوم واحد 😍✨
وكل حمل وراه حكاية، وصبر، ومحاولات، وأمل ما ماتش…
🤍 عقم ثانوي بعد فشل حقن مجهري سابق.
🤍 عقم أولي لـ6 سنوات.
🤍 عقم ثانوي لـ4 سنوات… واليوم حمل بتوأم 👶🏻👶🏻
🤍 عقم أولي سنة ونصف مع تكيسات المبايض.
🤍 عقم أولي 3 سنوات مع ضعف مخزون المبيض.
🤍 وحكاية سادسة زادت يومنا فرحة فوق فرحة. تبي بوووست بروحها ✨
وراء كل زحمة وتعب وإرهاق… لحظة فرح في عيون حالة انتظرت سنين، كفيلة إنها تنسّيني كل التعب وتخلّي كل هذا العطاء يستاهل. 🤍
15/08/2026
صور مليانة حياة وفرحة 🤍
ماسة وخوها ✨
رحلة طويلة للوالدين في الاول لغاية ربي مارزقهم بماسة يوم 5/8/2025 وطبعا قعدو يستنو فيا لين روحت من السفر
وربي كافاهم علي قد روحهم الحلوة ومن حيت لايحتسبو ولا يفكرو اصلا بوليدنا بعد سنة بالزبط وفي نفس التاريخ 5/8/2026 وطبعا زي اوخيته استناني نروح من السفر برضو
واليوم والحمد لله أطفالي ماسة وخوها اللي قاعدين ماسموشي لتوا ملو الحوش وخلوه كله سعادة
أجمل جزء في شغلنا…
إننا نشوفو الحلم قدام عيونا يكبر ❤️💙
طبعا الام لاني مانزلت فرحتي بوليدها علي طول متخيله اني فرحت بماستي بس ووليدي مش معدلة عليه 💙🤣🤣
14/08/2026
💙مبشر💙
بعد 10 سنوات من الانتظار والدعاء… جتني حالتي وفاجاءتني لما شفتها وهي تحمل أجمل ثمرة للصبر ❤️🥹
اليوم عمره 3 شهور، وجتني بيه في زيارة حلووووة فرحت قلبي من جديد💙…
دخل الفرح والسرور على الجميع، وخلّى للحكاية أجمل خاتمة:
لما شفت حالتي وهيا تحمل طفلها… هان عليا كل التعب وكل الاذي اللي نتعرضله في جرة هالحالات حسيت بشعور غررررريب لاول مرة نحسه مع حالة ومافهمتش ليش 🥹�
شكراا من قلبي لكل من ساهم في ادخال الفرحة لهده الاسرة ✅
Be the first to know and let us send you an email when عيادة د لجين النائلي - لأمراض النساء والولادة وعلاج تأخر الحمل والإنجاب posts news and promotions. Your email address will not be used for any other purpose, and you can unsubscribe at any time.
