06/04/2019
პედიატრ-ნეფროლოგთა ასოციაციის განცხადება
უკანასკვნელი დღეების განმავლობაში სოციალურ ქსელში ფართოდ გავრცელდა 3 წლის გოგონას, ე.ლ-ს ისტორია,რომელიც ამჟამად ლიმფომის დიაგნოზით გადის მკურნალობას ქ.ბარსელონაში. გავრცელდა არასწორი ინფორმაცია პაციენტის დიაგნოზის და მკურნალობის თაობაზე,რომელმაც თითქოსდა ლიმფომის განვითარება გამოიწვია.ამ ფაქტის გამო საჭიროდ ვთვლით საზოგადოებას რამდენიმე განმარტება მივცეთ ამ შემთხვევის თაობაზე.
1.პაციენტს არ ჰქონდა ცისტიტი,მას ჰქონდა მაღალი ტემპერატურით და შემცივნებით მიმდინარე საშარდე გზების ინფექცია,რაც აუცილებლად მოიცავს თირკმლის ანთებას,მნიშვნელოვანი ცვლილებებით შარდში და სისხლში.მკურნალობა მსოფლიოში მიღებული სქემის მიხედვით წარმოებდა ( ეროვნული და ევროპული გაიდლაინის მიხედვით ( EAU Guidelines on paediatric Urology -European Association of Urology 2018 ).
პაციენტი ბინაზე გაეწერა ნორმალური ტემპერატურით,შარდის და სისხლის ნორმალური ანალიზით. მდგომარეობის გაუმჯობესების შემდეგ ჩაუტარდა მიქციური ცისტოგრაფია,იმის დასადგენად,ჰქონდა თუ არა პაციენტს თანდაყოლილი რეფლუქსი,ანუ შარდის უკუსვლა ბუშტიდან თირკმელში.პაციენტს დაუდგინდა მარცხენამხრივი III ხარისხის შარდბუშტ-შარდსაწვეთ-თირკმლის რეფლუქსის არსებობა.რეფლუქსი სულ 5 ხარისხისაა, მე-3 უკვე მძიმე ხარისხად ითვლება,მოითხოვს ხანგრძლივ 1,5-2 წლიან პროფილაქტიკურ მკურნალობას,რაც ნიშნავს ანტიბიოტიკის სამკურნალო დოზის 1/5-ის ყოველდღიურ მიღებას,რაც კ.ლს 21.12.18-დან დაენიშნა ცეფაკლორის (სპერექსი) სახით.ასეთი მკურნალობით ხდება თირკმლის დაცვა ანთებისგან,ნაწიბურებისგან,თირკმლის ფუნქციის დაკარგვისგან.ასეთი მკურნალობით უამრავი პაციენტი გადაურჩა ოპერაციას.ოპერაცია მხოლოდ 2 წლის შემდეგ ინიშნება,თუ მკურნალობის ფონზე რეფლუქსის ხარისხი არ შემცირდა.ჩვენ ესპანეთში მიღებული საშარდე გზების ინფექციის გაიდლაინითაც დავინტერესდით,სადაც ხანგრძლივი პროფილაქტიკის ჩასატარებლად რამდენიმე ანტიბიოტიკია მოწოდებული,მათ შორის არის ცეფაკლორი.ისტორიას თუ გავიხსენებთ, ჯერ კიდევ 1941 წელს ექიმმა ჰელმჰოლცმა პირველად გამოიყენა ხანგრძლივი პროფილაქტიკური მკურნალობა ანტიბაქტერიული პრეპარატებით საშარდე გზების ინფექციის პროფილაქტიკისთვის.
2.ზემოთქმულიდან გამომდინარე მკურნალობა დიაგნოზის და მიმდინარეობის შესაბამისია.
3.ანტიბიოტიკის გამოყენება არ იწვევს იმუნიტეტის დაქვეითებას,განსაკუთრებით ისეთი მინიმალური დოზით,როგორიც ე.ლ-ს ჰქონდა დანიშნული,პირიქით კი ხდება- დაქვეითებული იმუნიტეტის პირობებში განვითარებული ინფექციური გართულებების გამო საჭირო ხდება ანტიბიოტიკების გამოყენება.
4.პაციენტი იმყოფებოდა ექიმის მუდმივი მეთვალყურეობის ქვეშ. 02.12.18-დან 25.02.19-მდე ჩატარებული აქვს სისხლის ს/ა - 5-ჯერ ( ცვლილებები დაფიქსირდა მხოლოდ პირველ ანალიზში);შარდის ს/ა-4-ჯერ (ცვლილებებით მხოლოდ პირველ ანალიზში); მუცლის ღრუს ექოსკოპია ჩაუტარდა 2-ჯერ; საშარდე სისტემის ექოსკოპია -3-ჯერ ( ქსოვილოვანი ჩანართები ღვიძლსა და თირკმელში მხოლოდ 24.02-ს გამოვლინდა);თირკმლის ფუნქციური მდგომარეობის კვლევა 2-ჯერ- კრეატინინის კონცენტრაცია სისხლში ნორმაში იყო.
ამგვარად,პაციენტს,III ხარისხის რეფლუქსის ფონზე განვითარებული საშარდე გზების ინფექციის მკურნალობა ჩატარებული აქვს სწორად,არსებული მკურნალობა ვერ იქნებოდა ლიმფომის გამომწვევი მიზეზი
