09/08/2026
🌹 ഓർമ്മദിനം — സഖാവ് ടി. കെ. വർഗ്ഗീസ് വൈദ്യൻ (1914–1989)
കേരളത്തിലെ കമ്മ്യൂണിസ്റ്റ് പ്രസ്ഥാനത്തിന്റെ ആദ്യകാല നേതാക്കളിൽ പ്രമുഖനും, കുട്ടനാട്ടിലെ കർഷകത്തൊഴിലാളി പ്രസ്ഥാനത്തിന്റെ സംഘാടകനും, ഐതിഹാസികമായ പുന്നപ്ര–വയലാർ സമരത്തിന്റെ മുൻനിര പോരാളിയുമായിരുന്ന സഖാവ് ടി. കെ. വർഗ്ഗീസ് വൈദ്യന്റെ 37-ാം ചരമവാർഷികം — 2026 ഓഗസ്റ്റ് 10.
1914 മാർച്ച് 9-ന് തേവലക്കരയിലെ പ്രസിദ്ധമായ കണ്ണുവൈദ്യ പാരമ്പര്യമുള്ള പുതുശ്ശേരിൽ മഠത്തിൽ (വേട്ടാമ്പള്ളിൽ) കുടുംബത്തിൽ, കുഞ്ഞാക്കണ്ട വൈദ്യന്റെയും മറിയാമ്മയുടെയും മകനായാണ് അദ്ദേഹം ജനിച്ചത്.
കേരളത്തിൽ കമ്മ്യൂണിസ്റ്റ് പ്രസ്ഥാനം വേരുറപ്പിച്ച ആദ്യകാലത്തുതന്നെ തൊഴിലാളികളുടെയും കർഷകത്തൊഴിലാളികളുടെയും അവകാശങ്ങൾക്കായി രംഗത്തിറങ്ങിയ അദ്ദേഹം, കുട്ടനാട്ടിലെ കർഷകത്തൊഴിലാളികളെ സംഘടിതരാക്കുന്നതിൽ നിർണായക പങ്കുവഹിച്ചു. തിരുവിതാംകൂർ കർഷകത്തൊഴിലാളി യൂണിയന്റെ പ്രസിഡന്റായും പ്രവർത്തിച്ചു.
1946-ലെ പുന്നപ്ര–വയലാർ സമരം കേരളത്തിന്റെ രാഷ്ട്രീയചരിത്രത്തിലെ നിർണായക അധ്യായമായി മാറിയപ്പോൾ അതിന്റെ മുൻനിരയിൽ വർഗ്ഗീസ് വൈദ്യനുമുണ്ടായിരുന്നു. സ. ടി.വി. തോമസിന്റെ സന്തതസഹചാരിയായിരുന്ന അദ്ദേഹം, കേരളത്തിലെ കമ്മ്യൂണിസ്റ്റ് പ്രസ്ഥാനത്തിന്റെ ആദ്യകാല വളർച്ചയിൽ നിർണായക പങ്കുവഹിച്ച വ്യക്തിയായിരുന്നു.
രാഷ്ട്രീയത്തിനൊപ്പം കേരളത്തിന്റെ സാഹിത്യ-സാംസ്കാരിക ലോകത്തോടും അദ്ദേഹത്തിന് വളരെ അടുത്ത ബന്ധമുണ്ടായിരുന്നു.
“വർഗ്ഗീസ് വൈദ്യൻ ഇല്ലായിരുന്നുവെങ്കിൽ ‘വയലാർ ഗർജിക്കുന്നു’ എഴുതാൻ എനിക്ക് കഴിയുമായിരുന്നില്ല” എന്ന് കവി പി. ഭാസ്കരൻ പറഞ്ഞതായി രേഖപ്പെടുത്തിയിട്ടുണ്ട്.
മലയാറ്റൂർ രാമകൃഷ്ണനുമായും അദ്ദേഹത്തിന് അടുത്ത ബന്ധമുണ്ടായിരുന്നു. മലയാറ്റൂരിന്റെ പ്രശസ്ത നോവലായ ‘വേരുകൾ’-ൽ വർഗ്ഗീസ് വൈദ്യനെയും അദ്ദേഹത്തിന്റെ കുടുംബത്തെയും സംബന്ധിക്കുന്ന പരാമർശം വരുന്നതും ആ ബന്ധത്തിന്റെ മറ്റൊരു സാഹിത്യസ്മരണയാണ്.
പിന്നീട് തോട്ടപ്പള്ളിയിൽ വർഗ്ഗീസ് വൈദ്യൻ ആരംഭിച്ച സ്ഥാപനത്തിന് ‘കൽപ്പകവാടി’ എന്ന പേര് നൽകിയതും മലയാറ്റൂർ രാമകൃഷ്ണനായിരുന്നു. തകഴി ശിവശങ്കരപ്പിള്ള ഉദ്ഘാടനം ചെയ്ത കൽപ്പകവാടി, പിന്നീട് രാഷ്ട്രീയ-സാഹിത്യ-സാംസ്കാരിക രംഗത്തെ പ്രമുഖർ ഒത്തുചേരുന്ന ഒരു ഇടമായും മാറി.
വർഗ്ഗീസ് വൈദ്യന്റെ ജീവിതം മലയാള സിനിമയിലും മറ്റൊരു രൂപത്തിൽ അടയാളപ്പെട്ടു. വൈദ്യൻ കുടുംബത്തിലെ പുതിയ തലമുറയിൽ പലർക്കും അധികം പരിചിതമല്ലാത്ത ഒരു ബന്ധം കൂടിയാണിത്.
അപ്പച്ചൻ്റെ മകൻ ആയ തിരക്കഥാകൃത്ത് ചെറിയാൻ കൽപ്പകവാടി , Cherian Kalpakavadi എഴുതിയ, വേണു നാഗവള്ളി സംവിധാനം ചെയ്ത ‘ലാൽസലാം’ എന്ന സിനിമയിലെ മോഹൻലാൽ അവതരിപ്പിച്ച നെട്ടൂർ സ്റ്റീഫൻ — ‘നെട്ടൂരാൻ’ — എന്ന കഥാപാത്രം കുറച്ച് ഫിക്ഷൻ ചേർത്തെങ്കിലും തന്റെ പിതാവ് ടി. കെ. വർഗ്ഗീസ് വൈദ്യനാണെന്ന് ചെറിയാൻ കൽപ്പകവാടി തന്നെ വ്യക്തമാക്കിയിട്ടുണ്ട്.
മലയാളികൾ തലമുറകളായി കണ്ടും ഓർത്തും വരുന്ന സിനിമ ലാൽസലാമിന്റെ പിന്നിൽ നമ്മുടെ വലിയ വൈദ്യൻ കുടുംബചരിത്രത്തിന്റെ ഒരു ശാഖയിൽ നിന്നുള്ള ജീവിതവും ഓർമ്മകളും കൂടി അടയാളപ്പെട്ടിരിക്കുന്നു എന്നത് ഇന്നത്തെ തലമുറ അറിയേണ്ട കൗതുകകരമായ കുടുംബചരിത്രം കൂടിയാണ്.
കേരളത്തിന്റെ രാഷ്ട്രീയചരിത്രത്തിൽ ഇത്രയേറെ ആഴത്തിൽ ഇടപെട്ട്, ജീവിതത്തിന്റെ വലിയൊരു ഭാഗം ആലപ്പുഴയിലും കുട്ടനാട്ടിലും ചെലവഴിച്ചപ്പോഴും ജന്മനാടായ തേവലക്കരയോടും നമ്മുടെ വൈദ്യൻ കുടുംബത്തോടുമുള്ള ബന്ധം അദ്ദേഹം ഒരിക്കലും കൈവിട്ടില്ല.
തന്റെ മൂലകുടുംബമായ പുതുശ്ശേരിൽ മഠം (വേട്ടാമ്പള്ളിൽ )കുടുംബത്തിലെ ഓരോ ഭവനങ്ങളോടും, സഹോദരങ്ങളോടും അവരുടെ മക്കളോടും അദ്ദേഹം പുലർത്തിയിരുന്ന സ്നേഹവും കരുതലും കുടുംബത്തിലെ പഴയ തലമുറയുടെ ഓർമ്മകളിൽ ഇന്നും നിലനിൽക്കുന്നു.
രാഷ്ട്രീയവിശ്വാസങ്ങൾക്കപ്പുറം സ്വന്തം നാടിനോടും കുടുംബത്തോടും അദ്ദേഹം പുലർത്തിയിരുന്ന ബന്ധത്തിന്റെ മറ്റൊരു അടയാളമാണ് തന്റെ കുടുംബദേവാലയമായ തേവലക്കര മർത്തമറിയം ഓർത്തഡോക്സ് പള്ളിയുടെ 1965-ലെ പുനരുദ്ധാരണത്തിന് നൽകിയ നേതൃത്വവും സഹായസഹകരണങ്ങളും.
1989 ഓഗസ്റ്റ് 10-ന് ആ സംഭവബഹുലമായ ജീവിതത്തിന് തിരശ്ശീല വീണു.
ജീവിതത്തിന്റെ വലിയൊരു ഭാഗം കേരളത്തിന്റെ രാഷ്ട്രീയ പോരാട്ടഭൂമിയിൽ ചെലവഴിച്ച അദ്ദേഹം ഒടുവിൽ അന്ത്യവിശ്രമം കൊള്ളുന്നതും സ്വന്തം ജന്മനാട്ടിൽ — തേവലക്കര മർത്തമറിയം ഓർത്തഡോക്സ് പള്ളിയിലെ കുടുംബക്കല്ലറയിൽ.
പുന്നപ്ര–വയലാറിന്റെ പോരാളി.
കുട്ടനാട്ടിലെ കർഷകത്തൊഴിലാളികളുടെ സംഘാടകൻ.
ടി.വി. തോമസിന്റെ സന്തതസഹചാരി.
പി. ഭാസ്കരന്റെ വയലാർ ഗർജിക്കുന്നു എന്ന കവിതയുടെ ഓർമ്മകളിൽ ഇടംനേടിയ വ്യക്തി.
മലയാറ്റൂരിന്റെ വേരുകൾ മുതൽ കൽപ്പകവാടി വരെ സാഹിത്യലോകവുമായി ബന്ധപ്പെട്ടു നിന്ന ഒരാൾ.
ലാൽസലാമിലെ നെട്ടൂരാനിലൂടെ മറ്റൊരു തലമുറയുടെ മനസ്സിലേക്കും കടന്നുവന്ന ജീവിതം.
അതോടൊപ്പം തേവലക്കരയെയും സ്വന്തം വേരുകളെയും വൈദ്യൻ കുടുംബത്തെയും ഒരിക്കലും മറക്കാത്ത മനുഷ്യൻ.
വൈദ്യൻ കുടുംബത്തിന്റെ ചരിത്രത്തിലെ അഭിമാനകരമായ ഒരധ്യായമായ സഖാവ് ടി. കെ. വർഗ്ഗീസ് വൈദ്യന്റെ 37-ാം ഓർമ്മദിനത്തിൽ ആദരപൂർവ്വം പ്രണാമം. 🌹
ലാൽസലാം. ✊🌹
