Grow MPF

31/05/2026

31/05/2026

Udne do paringo ko abhi shokh hawa me.
Phir laut k bachpan k zamane nahi aate.*“Phir Laut Kar Bachpan Ke Zamane Nahi Aate…” ✨*

Jab hum chhote the, to Eid ki sabse badi fikr yeh hoti thi
aaj kya pehnenge…
hum sabse ache kaise lagenge…
mehmaan aayein to zyada eidi mile…
school ki chhutti ho…
aur doston ke saath khoob masti ho…
Magar aaj jab hum bade ho gaye hain,
to un logon ko dhoondte hain
jo kabhi hamari Eid hua karte the…
Woh haath, jinhone hamara bachpan khoobsurat banaya…
woh chehre, jinse ghar me ronak hua karti thi…
aaj unki kami mehsoos hoti hai.
Ab fikr yeh nahi hoti ke hum kaise dikh rahe hain,
balki yeh hoti hai ke
bachche khush hain ya nahi…
ghar me sab khairiyat se hain ya nahi…
Isi liye main kehti hoon,
apne bachchon ko shararat se mat rokiye…
unhe hansne dijiye, khelne dijiye,
ghoomne phirne dijiye…
kyunki kal ko wahi bachche
zindagi ke masail me ulajh kar,hamari tarah fikron me mashghool ho jayenge.
Aakhir hamari zimmedari sirf unhe bada karna nahi,
balki ek achha aur zimmedar insaan banana bhi hai.
InshaAllah,
Allah Ta’ala hum sabko apni aulaad ki behtareen tarbiyat ki taufeeq ata farmaye. Aameen. 🌸
— Mumtaz Fatema ✍️

30/05/2026

1. . Gehraa Paani
"Khuda ki qudrat ko samajhna ho to gehraai mein utarna seekho."
2. Khoobsurat Pahad
"Har bulandi gawahi deti hai ke koi qudrat ise thaame hue hai."
3. Doobta Sooraj
"Har khatam hone wali cheez ek naye aaghaz ka paighaam deti hai."
4. Uthta Sooraj
"Har subah Allah ki taraf se umeed ka naya tohfa hoti hai."
5. Hare Bhare Ped Paude
"Zindagi ka har hara patta Rab ki rehmat ka nishaan hai."
Mumtazfatema.

28/05/2026

Aaj Ka Daur Aur Hamari Parwarish
Aaj ka zamana woh zamana hai jahan hum apne bachon ko sunte bhi hain, samajhte bhi hain aur unki baat maante bhi hain.
Lekin hamara daur kuch aur hi tha…
Na hume itna suna jata tha, na itna samjha jata tha. Baat maanne ka to sawaal hi paida nahi hota tha.
Phir bhi…
Hum aaj ki generation se zyada fit, active aur mazboot hua karte the.
Hamare rishte apne ghar walon aur khandaan ke saath bahut gehre aur mazboot hote the.
Hum sirf apni family se hi nahi, balki apne doston ki family se bhi bahut close hua karte the. Ghar ke kaam bhi khoob karte the, school bhi paidal jaya karte the aur phir bhi zindagi ko dil khol kar enjoy karte the.
Aaj ki generation ki tarah har waqt “mood off” nahi hota tha.
Balki sach to ye hai ke jab walid sahab ka mood kharab hota tha to woh hume daant kar, kabhi maar kar apna gussa nikaal lete the… aur phir bhi hum unse mohabbat karte the.
Ghar me dakhil hote hi agar Abbu ki jooti nazar aa jaye to hamara dab aur adab dono shuru ho jata tha.
Aur aaj…
Hum apne bachon se unka mood dekh kar baat karte hain.
School se lane aur le jane ke liye vans aati hain, phir bhi bachche thak jaate hain.
Kabhi kabhi to ghar aane wale rishte daar ko bachche pehchante tak nahi aur poochte hain:
“Ye kaun hain hamare?”
Jabke pehle bachche bade hote hote khud jaan jate the ke kaun chacha hain, kaun mamu aur kaun phuphi.
Sochne wali baat ye hai ke hum kis daur me jee rahe hain?
Kal ka daur apnayein, aaj ka ya aane wala woh daur… jahan shayad rishte aur bhi kamzor ho jayenge.
Wallahu Aalam.
Meri bas itni si ilteja hai…
Apne bachon ko duniya ki har sahulat dijiye, lekin Khuda ke liye unhe adab aur rishte zaroor sikhaiye.
Kyuki hum poora muashra to nahi badal sakte, lekin apni aulaad ki tarbiyat zaroor kar sakte hain.
Unhe rishton ki ahmiyat samjha sakte hain.
Unhe sikha sakte hain ke bade ki awaaz par awaaz buland nahi ki jati.
Aap yaqeen kijiye…
Rishte daar aapke woh pankh hote hain jinse aap asmaanon me parwaaz karte hain.
Agar ye pankh kat jayein to insaan sirf asmaan ko dekh sakta hai, ud nahi sakta.
Insaan taraqqi bhi isliye karta hai ke uski khushi me apne shamil hon.
Koi dua de to dil ko sukoon mile… aur koi hasad kare to bhi ehsaas ho ke hum akelay nahi.
Aaiye mil kar dua karein:
“Parwardigaar, is pur-ashob daur me hume hamare mukhlis rishton ke saath salamat rakh. Hamare bachon ko sharre-shaitaan se mehfooz rakh aur unke dilon me adab, mohabbat aur ehteraam paida farma.”
Aameen.
Mumtaz fatema

24/05/2026

🌿 Jab Allah Kisi Aurat Ko Aazmaish Ke Zariye Mazboot Banata Hai 🌿

Kya aapki zindagi me bhi kabhi aisa daur aaya hai jahan mushkilein, apnon ki be-rukhi ya lagataar zehni dabao ne aapko andar se thaka diya ho?

Yaad rakhiye…Momin ki zindagi me har aazmaish saza nahi hoti.Kabhi kabhi Allah unhi mushkil raaston ke zariye insaan ko zyada mazboot, ba-shaoor, sabir aur apne qareeb kar deta hai. 🤍

Agar aap bhi is waqt zindagi ke kisi mushkil marhale se guzar rahi hain, to ye 7 nishaniyan aapke dil ko sambhalne aur umeed dene me madadgar ho sakti hain:

🌿 1. Dard Ka Taaqat Me BadalnaAazmaish insaan ko todne nahi, kabhi kabhi mazboot banane aati hai. Sabr, dua aur hikmat ke saath guzra hua dard insaan ko andar se bahadur bana deta hai.

🌙 2. Tarjeehat Ka BadalnaMushkil waqt insan ko duniya ki fani cheezon se hata kar Allah par tawakkul aur asal sukoon ki taraf le jata hai.

❤️ 3. Dusron Ke Dard Ko Mehsoos KarnaJo khud takleef se guzarta hai, woh dusron ke aansuon ko bhi gehrai se samajhne lagta hai. Aisa dil Allah ki khoobsurat ne’mat hota hai.

🛡️ 4. Hikmat Aur Hudood Ki PehchanHar behas zaroori nahi hoti, har rishta mehfooz nahi hota. Apni emotional boundaries banana kamzori nahi, danayi hai.

🤲 5. Allah Se Tanhaai Me GuftaguJab duniya ke sahare kam padne lagte hain, to insaan ka musalle se rishta mazboot hone lagta hai. Yehi lamhe asal healing ki shuruaat hote hain.

🌱 6. Khamoshi Me NashonumaBeej ki tarah insaan bhi kabhi khamoshi aur sabr ke dino me andar hi andar mazboot ho raha hota hai. Har khamosh daur nakaami nahi hota.

✨ 7. Umeed Aur Dili SukoonHar tufaan ke bawajood dil me ye yaqeen zinda rehna:“Allah mere saath hai aur ye waqt bhi guzar jayega.”Yahi momin ki asal taaqat hai.

⚠️ Ek Zaroori BaatAgar udaasi, anxiety ya zehni thakan zyada arse tak rahe aur rozmarra zindagi mutasir hone lage, to professional help lena bilkul theek hai.Islam hume ilaaj aur madad lene se nahi rokta.

🛑 Sabr ka matlab zulm bardasht karna nahi hota.Apni hifazat karna, help lena aur healthy boundaries banana aapka haq hai.

📖 Allah Ta’ala farmate hain:

“Fa inna ma’al usri yusra”“Beshak mushkil ke saath aasani hai.”(Surah Al-Inshirah: 5)

Khud ko tanha mat samajhiye…Allah dilon ke haal jaanta hai, aur koi bhi takleef hamesha nahi rehti. 🤍

👇 Inme se kaunsi baat ne aaj aapke dil ko sabse zyada sukoon diya?

🔄 Is post ko un mazboot khawateen tak zaroor pahunchayein jinhe aaj umeed aur hausle ki zarurat hai.

📌 Agar aapko Grow MPF ki posts pasand aati hain to hamara WhatsApp channel zaroor join kijiye.

— Mumtaz Fatema

22/05/2026

Muashra Aur Hum
Aaj ka muashra ajeeb do rahe par khada nazar aata hai.
Na poori tarah adab baaqi raha aur na hi poori tarah English culture apnaya gaya. Ye ek beech ka muashra hai jahan auratein azadi ka nara lagati nazar aati hain, lekin jab unhe poori azadi di jaati hai to phir wahi auratein faryaad karti bhi nazar aati hain.
Aakhir hamare muashre ko kya ho gaya hai?
Hum kis simt ja rahe hain?
“Ladka ladki barabar hain” ka nara diya jata hai, lekin jab auraton ko night duty di jati hai to kaha jata hai ke auraton ke saath na-insafi ho rahi hai.
Aaiye zara adabi muashre ki taraf chalte hain.
Wahan mard aurat ka khayal rakhte nazar aayenge.
Unka samaan uthayenge, bachon ki dekhbhal karenge, pehle aurat ko bithayenge phir khud baithenge. Kharch uthayenge kyunki aurat unki zimmedari hoti hai.
Lekin yahan aurat ki bhi zimmedari banti hai ke woh apne khawind ko woh darja de jo ek sarparast ka hota hai. Mere khayal me isme koi qabahat nahi honi chahiye.
Jab aap kisi job me hote hain to wahan ke kuch usoolon ki pairvi karni padti hai, kyunki woh aapko salary dete hain aur aapka waqt khareed lete hain.
Isi tarah jab aap nikah ka rishta qabool karte hain — chahe apni pasand se ya walidain ki pasand se — to ek doosre ke huqooq aur zimmedariyon ko samajhna bhi zaroori hota hai.
Aurat bhi mard par choti choti pabandiyan lagati hai, apne shauq poore karwati hai, apni pasand manwati hai — aur ye sab mohabbat aur adab ka hissa hota hai.
Lekin agar mard apni biwi ki hifazat kare, use sakht ya mushkil mahaul se bachana chahe, to har baat ko “sar-zanash” ya zulm samajhna bhi theek nahi.
Agar ek mard ye nahi chahta ke uski biwi dar dar ki thokrein khaye aur woh khud uski zarooriyat poori kar raha hai, to is par Allah ka shukr ada karna chahiye.
Ab English culture ko dekhiye.
Na mard aurat ko rokta hai aur na aurat mard ko tokti hai. Nateeja ek aisa culture saamne aata hai jo be-hiss aur be-lagaam sa mehsoos hota hai.
Hamara muashra English culture se bahut mutassir ho chuka hai.
Be-shak achi baatein apnani chahiyein, lekin adab aur hudood ke dayre me.
Zara gaur kijiye…
Is shadeed garmi me ek mard ghar se bahar nikalta hai, mehnat karta hai, kamata hai, taake apni biwi aur bachon ke shauq poore kar sake.
Khud ke liye shayad ek simple lower aur T-shirt kaafi hoti hai, lekin hum hain ke naye kapdon aur naye ghar ke samaan se dil hi nahi bharta.
Apne kafeel ki qadar kijiye…
Woh sirf isliye kamata hai kyunki aap uski zimmedari hain.
Aur waqai, Allah ne mard ko kuch aisi sifaat di hain jin ki wajah se uska rutba buland kiya gaya.
Unhi sifaat me se ek sifat hai:
“Paalne wala.”
— Mumtaz fatema