23/06/2026
✨ Jónsmessa – nótt ljóss, vatns og heilunar ✨
Á morgun er Jónsmessa, dagurinn sem kenndur er við Jóhannes skírara, þann sem skírði fólk í vatni og boðaði nýtt upphaf. Vatnið var hans tákn um hreinsun, endurnýjun og umbreytingu. Jónsmessa er því á sinn hátt hátíð vatnsins.
Á Íslandi hefur Jónsmessunótt lengi verið umlukin þjóðtrú og dulúð. Sagt var að dögg næturinnar hefði sérstakan lækningamátt og að þeir sem veltu sér upp úr henni gætu losnað við ýmsa kvilla. Fólk leitaði einnig að óskasteinum og öðrum náttúrusteinum sem áttu að bera með sér gæfu og vernd.
Kannski eru þessar sögur áminning um það sem við vitum enn í dag; að náttúran hefur áhrif á okkur. Ljósið, vatnið, kyrrðin og tengingin við jörðina geta hjálpað okkur að sleppa taki á áhyggjum, róa taugakerfið og finna aftur leiðina inn á við.
Það er því táknrænt að hittast í vatninu á Jónsmessukvöldi. Á björtustu nótt ársins fáum við tækifæri til að staldra við, leyfa vatninu að bera okkur og minna okkur á að stundum felst mesta heilunin ekki í því að gera meira – heldur í því að sleppa takinu og vera.
💙 Viðburðurinn annað kvöld er orðinn fullbókaður og ég er ótrúlega þakklát fyrir viðtökurnar.
Ég hlakka til að taka á móti ykkur sem eigið bókað pláss og deila með ykkur þessari einstöku Jónsmessustund í vatninu.
✨ Megi ljós Jónsmessunnar lýsa leið ykkar og vatnið færa ykkur frið.
