មនី្ទរសុខាភិបាលខេត្តរតនគិរី Ratanakiri Province

08/09/2026

សកម្មភាពចុះអង្កេតស្រាវជ្រាវ និងអន្តរាគមន៍ឆ្លើយតបបន្ទាន់ចំពោះករណីសង្ស័យជំងឺពងបែកមាត់ ដៃ ជើង (HFMD) នៅស្រុកវ៉ឺនសៃ។

​នៅថ្ងៃទី០៨ ខែកញ្ញា ឆ្នាំ២០២៦ ក្រុមការងារបច្ចេកទេសនៃមន្ទីរសុខាភិបាលនៃរដ្ឋបាលខេត្តរតនគិរី ដឹកនាំផ្ទាល់ដោយ លោក ជា សានិត ប្រធានមន្ទីរសុខាភិបាល បានចុះបេសកកម្មអន្តរាគមន៍បន្ទាន់ ដើម្បីអង្កេត ស្រាវជ្រាវ និងឆ្លើយតបចំពោះករណីសង្ស័យការផ្ទុះឆ្លងជំងឺពងបែកមាត់ ដៃ ជើង (Hand, Foot, and Mouth Disease - HFMD) ស្ថិតនៅភូមិហាត់ប៉ក់ ឃុំហាត់ប៉ក់ ស្រុកវ៉ឺនសៃ ខេត្តរតនគិរី។

​សកម្មភាពសំខាន់ៗដែលបានអនុវត្តរួមមាន៖
-​ការពិនិត្យ និងព្យាបាល៖ ក្រុមគ្រូពេទ្យជំនាញបានចុះពិនិត្យសុខភាព វាយតម្លៃរោគសញ្ញា និងផ្តល់ការព្យាបាលបឋមដល់កុមារដែលមានអាការៈសង្ស័យ ព្រមទាំងតាមដានស្ថានភាពសុខភាពកុមារក្នុងសហគមន៍យ៉ាងយកចិត្តទុកដាក់។
-​ការអប់រំ និងផ្សព្វផ្សាយសុខភាព៖ ផ្តល់ការណែនាំដល់អាណាព្យាបាល លោកគ្រូ-អ្នកគ្រូ និងប្រជាពលរដ្ឋអំពីវិធានការការពារការឆ្លងរាលដាល ដោយផ្តោតលើអនាម័យខ្លួនប្រាណ ការលាងសំអាតដៃជាមួយសាប៊ូ ឬអាល់កុលឱ្យបានញឹកញាប់ និងការរស់នៅស្អាត។
-​ការគ្រប់គ្រងបរិស្ថាន៖ ណែនាំអំពីការសំអាត និងសម្លាប់មេរោគលើសំភារៈប្រើប្រាស់ ប្រដាប់ប្រដាក្មេងលេង និងទីតាំងដែលមានហានិភ័យ ដើម្បីទប់ស្កាត់ការរាលដាលបន្តនៅក្នុងសហគមន៍ និងសាលារៀន។

​លោកប្រធានមន្ទីរសុខាភិបាល បានសង្កត់ធ្ងន់ថា សុខុមាលភាពរបស់ប្រជាពលរដ្ឋ ជាពិសេសកុមារតូចៗ គឺជាអាទិភាពចម្បង។ មន្ទីរសុខាភិបាលនឹងបន្តតាមដានស្ថានភាពនេះយ៉ាងយកចិត្តទុកដាក់បំផុត ព្រមទាំងសហការជិតស្និទ្ធជាមួយអាជ្ញាធរមូលដ្ឋាន ដើម្បីធានាថាស្ថានភាពជំងឺត្រូវ បានគ្របដណ្តប់ និងទប់ស្កាត់បានទាន់ពេលវេលា។

​មន្ទីរសុខាភិបាលនៃរដ្ឋបាលខេត្តរតនគិរី សូមអំពាវនាវដល់ឪពុកម្តាយ និងអាណាព្យាបាលទាំងអស់ ប្រសិនបើពិនិត្យឃើញកូនចៅមានរោគសញ្ញាដូចជា ក្តៅខ្លួន មានពងបែកនៅលើបាតដៃ បាតជើង ឬក្នុងមាត់ សូមប្រញាប់បញ្ជូនពួកគាត់ទៅទទួលការពិនិត្យ និងព្យាបាលនៅមណ្ឌលសុខភាព ឬមន្ទីរពេទ្យដែលនៅជិតបំផុត ដោយជៀសវាងការទិញថ្នាំព្យាបាលដោយខ្លួនឯង៕
​ #មន្ទីរសុខាភិបាលខេត្តរតនគិរី #សុខភាពសាធារណៈ #ការឆ្លើយតបបន្ទាន់ #រតនគិរី

07/09/2026

ការត្រៀមលក្ខណៈជួយការពារសុខភាព និងសង្គ្រោះបឋមអ្នកចូលរួមទិវាអក្ខរកម្មជាតិ ៨កញ្ញា លើកទី២៦ នៅក្នុងភូមិសាស្ត្រខេត្តរតនគិរី។
----------------------------------------------------------------------------
នៅថ្ងៃទី៦ - ៧ ខែកញ្ញា ឆ្នាំ២០២៦
មន្ទីរសុខាភិបាលនៃរដ្ឋបាលខេត្តរតនគិរី សហការជាមួយក្រុមគ្រូពេទ្យមកពីក្រសួងសុខាភិបាល បានត្រៀមលក្ខណៈ និងចូលរួមជួយការពារសុខភាព និងសង្គ្រោះបឋមអ្នកចូលរួមទិវាអក្ខរកម្មជាតិ ៨កញ្ញា លើកទី២៦ នៅក្នុងភូមិសាស្ត្រខេត្តរតនគិរី ដោយបានផ្តល់សេវាពិនិត្យ ព្យាបាលជំងឺ និងបាញ់ថ្នាំសម្លាប់មូស នៅទីតាំងប្រារព្ធពិធី(នៅមន្ទីរវប្បធម៌ និងវិចិត្រសិល្បៈខេត្តរតនគិរី) និងនៅបរិវេណតាំងពិពណ៌បឹងកន្សែង។

26/08/2026

សកម្មភាពនៃការប្រយុទ្ធប្រឆាំងទៅនឹងការផ្ទុះឆ្លងជំងឺគ្រុនឈាមក្នុងខេត្តរតនគិរី។

កម្មវិធីប្រយុទ្ធនឹងជំងឺគ្រុនឈាមរបស់មន្ទីរសុខាភិបាលនៃរដ្ឋបាលខេត្តរតនគិរី បានបន្តធ្វើសកម្មភាពទប់ស្កាត់ទៅនឹងការឆ្លងរាលដាលនៃជំងឺគ្រុនឈាមលក្ខណ:ទ្រង់ទ្រាយធំយ៉ាងសស្រាក់សស្រាំដើម្បីធានាថាករណីនៃការឆ្លងជំងឺមានការចុះ។

ដោយមានការចង្អុលបង្ហាញ និងការយកចិត្តទុកដាក់បំផុត លោក ជា សានិត ប្រធានមន្ទីរសុខាភិបាល និងមានការគាំទ្រជាថវិកាពីអង្គការ ស៊ី អា អេស (CRS) ក្រុមការងារមន្ទីរសុខាភិបាល បានរៀបចំផែការ និងធ្វើសកម្មភាពយ៉ាងខ្លាំងក្លានៅទីតាំងដែលមានការឆ្លងជំងឺគ្រុនឈាមខ្ពស់ តាមរយ:ការអប់រំសុខភាព ដាក់ថ្នាំអាបែតសម្លាប់ដង្កូវទឹក បាញ់ថ្នាំសម្លាប់មូស និងការបំផ្លាញជម្រកមូសខ្លា។

បើតាមរបាយការណ៍បានអោយដឹងថា ខេត្តរតនគិរីមានចំនួន៣៤ភូមិដែលមានករណីឆ្លងជំងឺគ្រុនឈាមខ្ពស់ជាងគេ ហើយរយ:ពេល២សប្តាហ៍ចុងក្រោយនេះ ជំងឺគ្រុនឈាមបានថយចុះគួរជាទីមោទន:។ លទ្ធផលនេះបង្ហាញពីប្រសិទ្ធភាពនៃការធ្វើសកម្មភាពឆ្លើយតបបានទាន់ពេលវេលារបស់ក្រុមការងារមន្ទីរសុខាភិបាល និងការចូលរួមពីអង្គការដៃគូរ អាជ្ញាធរ ព្រមទាំងប្រជាពលរដ្ឋនៅតាមមូលដ្ឋាន។

ទោះជាយ៉ាងនេះក្តី សូមយើងទាំងអស់គ្នាបន្តយកចិត្តទុកដាក់ទប់ស្កាត់ការឆ្លងនៃជំងឺគ្រុនឈាមគ្រប់ពេលវេលា៕

26/08/2026

សកម្មភាពពិនិត្យ និងបកបាយភ្នែកជូនប្រជាពលរដ្ឋនៅមន្ទីរពេទ្យបង្អែកបរកែវ ដោយក្រុមការងារកម្មវិធីជាតិសុខភាពភ្នែក សហការជាមួយមន្ទីរសុខាភិបាល ក្រោមការឧបត្ថម្ភដោយមូលនិធិហ្វ្រេតហូឡូ ដែលប្រព្រឹត្តិទៅ ពីថ្ងៃទី ២៤ ដល់ ថ្ងៃទី២៨ ខែ សីហា ឆ្នាំ២០២៦។

21/08/2026

នៅរសៀលថ្ងៃសុក្រ ៨កើត ខែស្រាពណ៍ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី២១ ខែសីហា ឆ្នាំ២០២៦
លោក ជា សានិត ប្រធានមន្ទីរសុខាភិបាលខេត្តរតនគិរី បានដឹកនាំកិច្ចប្រជុំ ស្តីពីវិធានការឆ្លើយតបការផ្ទុះឆ្លងរាលដាលនៃជំងឺគ្រុនឈាមក្នុងខេត្តរតនគិរី ដែលមានសមាសភាពអញ្ជើញចូលរួមពីសំណាក់ លោកអនុប្រធានមន្ទីរសុខាភិបាលខេត្ត ប្រធានការិយាល័យចំណុះមន្ទីរសុខាភិបាលខេត្ត ប្រធានមន្ទីរពេទ្យបង្អែកខេត្ត ប្រធាន/អនុប្រធានការិយាល័យស្រុកប្រតិបត្តិបានលុង និងបរកែវ ប្រធានមន្ទីរពេទ្យបង្អែកបរកែវ និងកូនមុំ និងមន្ត្រីជំនាញពាក់ព័ន្ធ។

18/08/2026

សកម្មភាពនៃការប្រគល់ម៉ាស៊ីនបាញ់ថ្នាំសម្លាប់មូសពីអង្គការ ស៊ី អា អេស (CRS)។

នៅរសៀលថ្ងៃអង្គារ ៥កើត ខែស្រាពណ៍ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី១៨ ខែសីហា ឆ្នាំ២០២៦ អង្គការ ស៊ី អា អេស (CRS) ប្រចាំខេត្តរតនគិរី បានប្រគល់ម៉ាស៊ីនបាញ់ថ្នាំសម្លាប់មូសចំនួន០៣គ្រឿងជូនដល់មន្ទីរសុខាភិបាលនៃរដ្ឋបាលខេត្តរតនគិរី សម្រាប់ប្រើប្រាស់ដើម្បីទប់ស្កាត់ការឆ្លងរីករាលដាលនៃជំងឺគ្រុនឈាមដែលបាន និងកំពុងកើតមាននាពេលបច្ចុប្បន្ន។

មន្ទីរសុខាភិបាលសូមថ្លែងអំណរគុណយ៉ាងជ្រាលជ្រៅដល់អង្គការស៊ី អា អេស ដែលតែងតែជួយឧបត្ថម្ភគាំទ្រដល់មន្ទីរសុខាភិបាលនាពេលកន្លងមក៕

18/08/2026

នៅព្រឹកថ្ងៃទី១៨ ខែសីហា ឆ្នាំ២០២៦
លោក ជា សានិត ប្រធានមន្ទីរសុខាភិបាលនៃរដ្ឋបាលខេត្តនគិរី បានចុះពិនិត្យវឌ្ឍនភាពនៃការសាងសង់អាគាររង់ចាំសំរាល នៅមណ្ឌលសុខភាពជំរុំបីស្រុក។

17/08/2026

ព្រឹកចន្ទ ៤កើត ខែស្រាពណ៍ ឆ្នាំមមី អដ្ឋស័កព.ស.២៥៧០ ត្រូវនឹងថ្ងៃទី១៧ ខែសីហា ឆ្នាំ២០២៦
ទិដ្ឋភាពនៃការគោរពទង់ជាតិរបស់មន្ទីរសុខាភិបាលនៃរដ្ឋបាលខេត្តរតនគិរី។

14/08/2026