31/08/2026
ជំងឺស្លេកស្លាំងដោយសារកង្វះជាតិដែក គឺជាប្រភេទជំងឺស្លេកស្លាំងដែលជួបប្រទះញឹកញាប់។ ជំងឺស្លេកស្លាំង គឺជាស្ថានភាពដែលឈាមមិនមានកោសិកាគ្រាប់ឈាមក្រហមដែលមានសុខភាពល្អគ្រប់គ្រាន់។
នៅដំណាក់កាលដំបូង ជំងឺស្លេកស្លាំងដោយសារកង្វះជាតិដែកអាចមានកម្រិតស្រាល រហូតដល់អ្នកមិនបានចាប់អារម្មណ៍។ ប៉ុន្តែនៅពេលដែលបរិមាណជាតិដែកកាន់តែថយចុះ ហើយជំងឺស្លេកស្លាំងកាន់តែធ្ងន់ធ្ងរ រោគសញ្ញាក៏កាន់តែធ្ងន់ធ្ងរទៅតាមនោះដែរ។
រោគសញ្ញា
អស់កម្លាំងខ្លាំង
ខ្សោយកម្លាំង
ស្បែកស្លេកស្លាំង
ឈឺទ្រូង ចង្វាក់បេះដូងលោតញាប់ ឬថប់ដង្ហើម
ឈឺក្បាល វិលមុខ ឬងងឹតមុខ
មូលហេតុ
ការបាត់បង់ឈាម៖ មនុស្សដែលមានការធ្លាក់ឈាមរដូវច្រើន, ជំងឺដំបៅក្រពះ, ជំងឺលៀនក្រពះ (Hiatal hernia), ដុះសាច់ពោះវៀនធំ (Colon polyp) ឬជំងឺមហារីកពោះវៀនធំ។
ការប្រើប្រាស់ថ្នាំបំបាត់ការឈឺចាប់មួយចំនួនជាប្រចាំ
របបអាហារខ្វះជាតិដែក៖ អាហារដែលសម្បូរជាតិដែករួមមាន សាច់ ស៊ុត បន្លែស្លឹកបៃតង និងអាហារកែច្នៃ/ស្រាប់ៗដែលបានបន្ថែមជាតិដែក។
រាងកាយមិនអាចស្រូបយកជាតិដែកបាន៖ បញ្ហាពោះវៀនមួយចំនួន ដូចជាជំងឺ Celiac អាចប៉ះពាល់ដល់សមត្ថភាពរបស់រាងកាយក្នុងការស្រូបយកជាតិដែក។ ការវះកាត់តភ្ជាប់ ឬកាត់បន្ថយផ្នែកខ្លះនៃពោះវៀនតូច ក៏អាចប៉ះពាល់ដល់សមត្ថភាពស្រូបយកជាតិដែកផងដែរ។
ការមានផ្ទៃពោះ៖ ប្រសិនបើគ្មានការបន្ថែមថ្នាំបំប៉នជាតិដែកទេ នោះស្ត្រីមានផ្ទៃពោះជាច្រើនអាចកើតជំងឺស្លេកស្លាំងដោយសារកង្វះជាតិដែក ព្រោះរាងកាយត្រូវការជាតិដែកកាន់តែច្រើនក្នុងអំឡុងពេលមានផ្ទៃពោះ។
ផលវិបាក
មនុស្សដែលមានជំងឺស្លេកស្លាំងដោយសារកង្វះជាតិដែកកម្រិតស្រាល អាចមិនមានផលវិបាកអ្វីឡើយ។ ប៉ុន្តែជំងឺស្លេកស្លាំងដោយសារកង្វះជាតិដែកដែលមិនបានព្យាបាល អាចកាន់តែធ្ងន់ធ្ងរ និងនាំឱ្យមានបញ្ហាសុខភាពដូចជា៖
បញ្ហាបេះដូង៖ អាចនាំឱ្យរីកបេះដូង ឬកើតជំងឺខ្សោយបេះដូង។
បញ្ហាអំឡុងពេលមានផ្ទៃពោះ៖ ចំពោះស្ត្រីមានផ្ទៃពោះ ជំងឺស្លេកស្លាំងដោយសារកង្វះជាតិដែកកម្រិតធ្ងន់ធ្ងរ មានទំនាក់ទំនងទៅនឹងការសម្រាលកូនមុនកំណត់ និងទារកមានទម្ងន់ស្រាលខុសធម្មតាពេលកើត។
បញ្ហានៃការលូតលាស់៖ ចំពោះទារក និងកុមារ កង្វះជាតិដែកធ្ងន់ធ្ងរអាចធ្វើឱ្យយឺតយ៉ាវដល់ការលូតលាស់ និងការអភិវឌ្ឍរាងកាយ។ ជំងឺស្លេកស្លាំងដោយសារកង្វះជាតិដែកក៏ជាប់ទាក់ទងនឹងការងាយឆ្លងជំងឺផ្សេងៗផងដែរ។
ប្រភព: HCC
#ចែករំលែកចំណេះដឹង
