19/04/2022
https://www.facebook.com/102367771866662/posts/347719290664841/?app=fbl
අර්බුදයට එකම විසඳුම :
ශ්රී ලංකාවේ ව්යවහාර මුදල් ඒකකය US$ සහ LK$ බවට පත් කර රුපියල (LKR) භාවිතයෙන් ඉවත් කිරීම පමණයි.. !!
---------------------------------------------
මාතෘකාවට ඒමට පෙර එහි නිධාන කතාව පැහැදිලි කළ යුතුයි…...
---------------------------------------------
මුදල් ( Currency ) , 700BC පමණ යුගයේ සිට භාවිතයට පැමිණි පසු ඉන් සමාජයට ඇති කළ ධනාත්මක සහ ඍණාත්මක බලපෑම් විශාලයි. අද වන විට මුදල යනු වෙළඳාමේ හුවමාරු මාධ්යයක් පමණක් නොවේ . " මුදල ම " විකුණුම් භාණ්ඩයක් වී හමාරයි.
මෙම සංසිද්ධියෙන් උපාය මාර්ගික සහ තාක්ෂණික ලෙස උපරිම ප්රයෝජන ගෙන ඇත්තේ අද ලෝක වෙළෙඳ පොළේ වඩාත් ශක්තිමත් යැයි කියාගන්නා මුදල් ඒකක හිමි රාජ්යයන්ය . මෙම ක්රීඩාවේ වැදගත් තරඟ තීරකයෙකු වන්නේ ඇමරිකාව සහ ඇමරිකානු ඩොලරයයි (US$).
* ඇත්තටම ඇමරිකානු ඩොලරය මෙච්චරම වටිනවද ?
ඇත්තටම නැහැ . එය ඇමරිකානු ආර්ථික යන්ත්රණ මාෆියාව විසින් ඩොලරය විකුණුම් භාණ්ඩයක් ලෙස උපායශීලී ලෙස manipulations මගින් ඔවුන් විසින්ම ආරූඪ කරගත් ( කෘත්රිමව නිර්මාණය කරගත් ) වටිනාකමක් පමණයි !! ලොව වටිනාම මුදල් ඒකකය Kuwaiti Dinar වේ. ( 1KD=3.27US$)
* අපි ඩොලර් බිලියන 50 ක් පමණ ණයයි. අමෙරිකාව විදේශවලට ණය නැද්ද ?
ඔවුන් ඩොලර් ට්රිලියන 31 කට වඩා විදේශයන්ට ණයයි . (1 Trillion = 1000 Billion, 1 Billion = 1000 Million ).
නමුත් මෙම මුදල් වලින් ට්රිලියන 4 ක් පමණ රට තුළ ඇති ආයෝජන ලෙසත් , තවත් ට්රිලියන 6 ක් පමණ අමෙරිකාව විසින් වෙනත් රටවල් තුළ තුල සිදුකරන ලද විදේශ ආයෝජන ලෙසත් ඇත. එම ආයෝජන සමස්තයක් ලෙස ලාභ උපදවමින් , භාණ්ඩ සහ සේවා සීඝ්රයෙන් ලෝක වෙළඳපොළට මුදාහරිමින් පවතී. තවත් ඩොලර් ට්රිලියන ගණනක් ඇමරිකාව විසින් යුධ උපකරණ / මෙහෙයුම් , දෛනික ගෘහස්ථ පරිභෝජනය, නවීන විද්යා / අභ්යවකාශ තාක්ෂණය සහ වෙනත් " නාස්තිකාර / ප්රයෝජනවත් වැඩ" වෙනුවෙන් වැය කරමින් සිටී.
( N.B. දළ දේශීය නිෂ්පාදනයට සාපේක්ෂව විදේශ ණය වැඩිම රට ජපානයයි . දෙවෙනි තැන ග්රීසිය. කිහිප වරක් ග්රීසිය විදේශ ණය ගෙවීම ( අද ශ්රී ලංකාව මෙන් ) සම්පූර්ණයෙන්ම පවා නවතා දැමුවා. ණය අඩුම රට රුසියාවයි )
* අපි පසුගිය වසර 2 තුළ රුපියල් (LKR) ට්රිලියන 1.4 ක් පමණ මුද්රණය කළා. ඇමරිකාව ඩොලර් මුද්රණය කරන්නේ නැද්ද ?
2020 ජනවාරි වන විට ලොව පුරා තිබූ ඩොලර් ප්රමාණය ට්රිලියන 4 ක් පමණ වූ නමුත් එය 2022 ජනවාරි වන විට ට්රිලියන 21 ද ඉක්මවා තිබුණා. එනම් දැනට ලෝකයේ සංසරණය වන ඩොලර් ප්රමාණයෙන් 80% කටත් වඩා මුද්රණය කර ඇත්තේ පසුගිය වසර දෙක තුළයි. සමහර මූල්ය විශේෂඥයන් එය විවේචනය කළත්, ෆෙඩරල් රජය පවසන්නේ covid වසංගතය සමඟ ඇමරිකානු ආර්ථිකයට ඇති වූ බලපෑම නිශේදනය කිරීමට ඔවුන්ට වෙන විකල්පයක් නොමැති බවත්, එම කෙටිකාලීන අතිවිශාල මුදල් මුද්රණය රටෙහි උද්ධමනයක් ඇති නොවන ලෙස "කළමනාකරණය" කර ගැනීමේ හැකියාව ඔවුන් සතු බවත් ය.
* එම ඩොලර් වලින් තවත් අතිවිශාල ප්රමාණයක් වෙනත් රටවල් සහ ආයතන වලට (IMF ඇතුලුව ) , ණය සහ " ප්රතිලාභ සහිත ආධාර " ලෙස ආයෝජනය කරයි . එම ඩොලර් නැවත වතාවක් "එම රටවල් " විසින් භාවිතා කරනුයේ ඇමරිකාවෙන් ම හෝ ලොව පුරා පවතින ඇමරිකානු ආයෝජන හරහා ලෝක වෙළදපොළට සීඝ්රයෙන් මුදාහරින සේවාවන් සහ භාණ්ඩ මිලදී ගැනීමටයි. මෙම යන්ත්රනය මගින් ෆෙඩරල් රජයට ණය පොලියට අමතරව භාණ්ඩ / සේවා විකුණා ගැනීමේ වෙළඳපොලත්, එහි ලාභයත් කිසිදු ආයාසයකින් තොරව හිමිව ඇත.
උදාහරණයක් ලෙස , පසුගිය වසරේ සාමාජික රටවල් 190 අතරින් අමෙරිකාව පමණක් IMF වෙත US$ බිලියන 117 ක් අනිවාර්ය Capital Subscription ලෙස මුදා හැර ඇත. එය IMF වාර්ෂික Subscription ආදායමෙන් 18% ක් පමන වේ. මීටත් අමතරව 2022 වසරේ තවත් (අමතර) US$ බිලියන 44ක් ෆෙඩරල් රජය IMF වෙත ලබාදුන්නේ ඔවුන්ගේ අපනයන මිල දී ගන්නා ආර්ථික අවපාතයන් ට මුහුණ දුන් රාජ්යයන් වෙත ණය පහසුකම් සැලසීම සඳහාය ( එම රටවල් වලට ඇති ආදරය නිසාම නොවේ ) . මෙම US$ බිලියන (117+44=161) සඳහාම IMF වෙතින් ෆෙඩරල් මහ බැංකුවට වාර්ෂික ලාභාංශ ද හිමි වේ. ඒ අනුව සාමාජික රටවල් 190 අතරින් ඇමරිකාවට IMF හි 25% ක පමන බලයක් සහ අයිතියක් හිමි වී ඇත..
"කිරි මුට්ටියට දෙව්වත්, පැටියා බිවුවත් වාසිය කිරිවල අයිතිකාරයාට" . මෙම GAME එකේ ඉතිරි ටික ඔබම සිතා ගන්න .....
* ඇයි අපිට මේ GAME එක මේ විදියට PLAY කරන්න බැරි. ?
සරලවම කිව්වොත් හේතුව ඇමරිකානුවන්ගේ මූල්ය සහ ආර්ථික කළමනාකරණයේ පවතින උපායශීලී දක්ෂතාවය සහ අපගේ ආර්ථිකය සහ මුල්ය කළමනාකරණය බාරව කටයුතු කරන්නන් ගේ පවතින උපායශීලී බවේ සහ දක්ෂතාවයේ තිබෙන දුර්වලතාවයයි. මක්නිසාද යත් ෆෙඩරල් රජය සහ එහි මහ බැංකුව මෙහිදී කිසිදු නීති විරෝධී යන්ත්රණයක් භාවිතා නොකරයි. !!
* කවුද ඉතින් ඒ අදක්ෂයන් ට මේ වගකීම පැවරුවේ ?
රටක රජයක ප්රධාන වගකීම ආර්ථිකය නිවැරදි ලෙස කළමනාකරණය කිරීමයි. ජාතික ආරක්ෂාව , සෞඛ්යය , අධ්යාපනය සහ නීති පද්ධතිය යහපත් ලෙස පවත්වා ගැනීම ද ඊට දෙවැනි නොවේ . නමුත් ඒ සියල්ල ද වක්රව ආර්ථිකය මතම රැඳෙයි. මීට දශක කිහිපයකට පෙර පැවැති සමාජ ක්රමයෙහි මේ සියල්ල හැසිරවීමේ සුක්කානම රැඳී තිබුණේ නිලධාරී පන්තිය සතුව මිස දේශපාලකයන් අත නොවේ. එම පන්ති පරතරය සහ නිලධාරි පැලැන්තිය විසින් සමාජය තුල නිර්මාණය කළ මාෆියාවට සහ පීඩනයට ප්රති අරගලයක් ලෙස බිහිවූ "ජනතා නියෝජිත" දේශපාලක පැලැන්තිය එකල ජන හිතකාමී සමාජ ප්රවාහයක් විය. නමුත් අද එය ම පාරාවළල්ලක් වී ඇත. බොහෝ තැන්හි පිරිස් බලයක් ගොඩනගා ගෙන සිටින ( නමුත් කිසිම සුදුසුකමක් නොමැති ) දේශපාලකයන් වටා රොක් වී සිටින නිලධාරි පැලැන්තිය ද වරප්රසාද අපේක්ෂිත දේශපාලන වහලුන් වී ඇත. අවංක සුදුසුකම් ඇති නිලධාරීන් මෙම පන්ති අරගලය සමග ගැටී "බෙල්ල කඩා ගැනීමට" ඇති බිය නිසා මුනිවත රකියි. තමාට තර්ජනයක් වන බලවේග යටපත් කිරීම සඳහා ඊනියා " ජනතා සුබ සිද්ධිය " නමැති කැරට් අලය පෙන්වමින් ඔවුන් විසින්ම නීතිගතකල නොගැලපෙන ආණ්ඩුක්රම ව්යවස්ථාව සහ යල් පැනගිය ( update නොවූ) නීති පද්ධතිය ද අද ඔවුන්ගේම බූදලයක් වී ඇත.
මතක තබා ගන්න .... ආණ්ඩුක්රම ව්යවස්ථාව සහ නීති පද්ධතිය යනු සර්ව බලධාරී දෙවියන් වහන්සේ විසින් රන් පතක ලියා නිමවා මිනිස් ලොවට එවන ලද්දක් නොවන බව . සුළු පිරිසකගේ ඕනෑ එපාකම් මත , බහුතරයකගේ මොළ සෝදා සම්මත කරගෙන ඇති ව්යවස්ථාවක් සහ යල්පැනගිය නීති පද්ධතියක් දඩමීමා කරගෙන පවත්වාගෙන යන පාලන තන්ත්රයක් රටකට තබා ගමක මරණාධාර සමිතියකට වත් නොගැලපේ . ඉන් රටෙහි මිනිසුන් අඳුරෙන් අඳුරටම යයි නම් එය වෙනස් කර හෝ ඉරා දමා වඩා විද්යාත්මක , යාවත්කාලීන වූ (updated) සොබාදහමේ රීතිය සමඟ අනුගත වන රාමුවක් තුළ නව පාලන තන්ත්රයක් බිහි කර ගැනීමට රටෙහි ජනතාවට අයිතියක් ඇත . එම නිසා අදක්ෂයින් අතට "සුක්කානම" ගියේ කෙසේද යන්නත් එය නිවැරදි කළ යුත්තේ කෙසේද යන්නත් දැන් ඔබට පැහැදිලියි. එසේම "දේශපාලකයන්" ලෙස ජන කොටසක් නැත. එම වචනය ද සිංහල ශබ්ද කෝෂයෙන් ඉවත් කළ යුතුය. සිවිල් ජනසමාජයේ සිටිය යුත්තේ දේශපාලන යාන්ත්රණ ව්යුහයේ "ජනතා නියෝජිතයින් ( Representatives ) " ලෙස නම්කළ පිරිසක් පමණි.
අද එම පන්ති අරගලය නිසා බිහිවුණු පීඩනයට එරෙහිව "වර්තමානයේ" පරිකල්පනයෙන්, විශ්ව දැනුමෙන් සහ ජවයෙන් සන්නද්ධ තරුණ පරපුර කේන්ද්රකොටගෙන ගොඩනැගෙන " ප්රති-අරගලය" එනිසා සාධාරණය, සහේතුකය. නමුත් එම අරගලයේ ඊළඟ දිශානතිය දැනට වඩා පුළුල්, ප්රායෝගික ( practical & Feasible) , නායකත්වයක් (Agents & Principals) සහිත , වැඩ පිළිවෙලක් (සැලසුමක් - Action Plan) සහිත ජන ප්රවාහයක් බවට පරිණාමය විය යුතුමයි. එය "ඇරඹිය" යුත්තේ අඩුම තරමේ රට තුළ "අතුරු ව්යවස්ථාවකින්" මා මේ ලිපියෙහි සඳහන් කරන වෙනස් විය යුතු තැන් වෙනස් කිරීම ආරම්භ කිරීමෙන් මිස GR ගෙදර යැවීම එහි "ආරම්භක" පියවර නොවිය යුතුය. නමුත් එම පියවර ද එම action plan එකේ Subsequent විසඳුමක් ලෙස අඩංගු කළ හැකිය . එසේම ගොඩනැගෙන ජන බලය (ආකල්පමය වෙනස ) රටෙහි නිශ්පාදන ක්රියාවලිය සහ අපනයන ආර්ථිකය ශක්තිමත් වන ප්රායෝගික වැඩපිළිවෙළක් වෙත කේන්ද්ර ගත නොකළහොත් "අරගලය" හුදෙක් පය බරවයට පිටිකර බේත් බැඳීමක් වනු ඇත. මෙතැන ඇත්තේ පුද්ගලයන් පිළිබඳ ප්රශ්නයකට වඩා සම'හරක්' පිරිසක් විසින් කිසිදු විළි බියක් හෝ විළිරුදාවකි තොරව "බිහි කරන ලද" Failed System එකක ප්රශ්නයක් බව තේරුම් ගත් දවසට අරගලය තවත් ජය ගනු ඇත. එසේ නොමැතිව හුදු ජනප්රිය - සාම්ප්රදායික දේශපාලන සටන් පාඨ පමණක් මත දිවෙන අරගලයක් රටෙහි ප්රශ්න උග්ර කරනවා මිස සැබෑ විසඳුමක් නොවේ. එම පරිණාමය අරගලය තුළ තුළ ඉක්මනින් සිදු වේවි යයි අපේක්ෂාවෙන් තරුණ අරගලයට ජය පතමි !!
* රුපියලේ අගය අඩු වීම නිසා (1US$ = 326 LKR ) අපි දුප්පත්ම රටක් බවට පත්වෙලාද ?
කොහෙත්ම නැහැ ... !! උදාහරණයක් ලෙස ඉරානයේ රියාල් (IRR) ගනිමු. ඉරානයේ
1US$ = 266,500 IRR ( Black Market )
1US$ = 42,025 IRR (Official Market)
නමුත් ඉරානය ලෝකයේ 23 වන තැනට විශාලම ආර්ථිකය හිමි , ධනවත්ම රටවල් අතරෙන් 14 වන ස්ථානයේ සිටින වටිනාම සහ පොහොසත් රටක් .
එසේම ඉන්දුනීසියාවේ Indonesia Rupiah ( IDR) වල තත්වය :
1USD = 14,380 IDR
නමුත් ඉන්දුනීසියාව ලෝකයේ 16 වන තැනට විශාලතම ආර්ථිකය හිමි රටයි .
ඩොලර් නැති වුණු පළියට අපි දුප්පත් රටක් නොවෙයි . අපේ රටේ තිබෙන සම්පත් වලට ( මානව ,භෞතික , සංස්කෘතික සහ මානසික ) ඩොලර් වලින් වටිනාකමක් දෙන්න බැරි විදියට අපි ඩොලර් මාෆියාව තුළ හිරවීම නිසායි මුළු ශ්රී ලාංකික ජනතාවම අද මානසිකව වැටිලා ඉන්නේ. ඒ මානසික ඇද වැටීමෙන් ගොඩ අරගෙන ඔවුන්ට අවශ්ය " මානසික ඉන්ධනය" ලබා දුන්නොත් ඔවුන් මේ ශ්රී ලංකාව "ඊශ්රායලය" හෝ ඇමරිකාවටත් වඩා ඉහළ තලයක තබාවි.
* අපි කොහොමද මේ ඩොලර් මාෆියාවේ පැටලුණේ ?
කරුණාකර මේ කරුණු ටික ගැන ඔබගේ දැඩි අවධානය යොමු කරන්න :
# ශ්රී ලංකාවේ වාර්ෂික අපනයන ආදායම = US$ බිලියන 11 ක් පමණ. එයින් දළ වශයෙන් ....
24% ක් අමෙරිකාවෙන් , 9% ක් එක්සත් රාජධානියෙන්, 6%ක් ඉන්දියාවෙන් , 5.7% ක් ජර්මනියෙන්, 4.4% ක් ඉතාලියෙන් , 3%ක් බෙල්ජියමෙන් , 2.3%ක් චීනයෙන් .etc.
# ශ්රී ලංකාවේ වාර්ෂික ආනයන වියදම = US$ බිලියන 16ක් පමණ. මෙයින් දළ වශයෙන් ....
22% ක් චීනයටත් , 19% ක් ඉන්දියාවටත්, 5.7% ක් අරාබි එමිරේට්ස් (UAE) වලටත්, 4% ක් මැලේසියාවටත්, 3.9% ක් සිංගප්පූරුවටත් , 3% ක් අමෙරිකාවටත් etc. ලෙස වැය වේ .
# සාරාංශයක් ලෙස කිව්වොත්....
1- වාර්ෂිකව අපට ලැබෙන ආදායමට වඩා US$ බිලියන (16 - 11 = 5 ක් ) පමණ ( බොහෝ විට අත්යවශ්ය නොවන දේවල් වෙනුවෙන් ) වියදම් වන බව ඔබට පැහැදිලියි. පසුගිය කාලය පුරාම සෑම රජයක් විසින්ම මෙම අමතර වියදම සපයාගත්තේ එක්කෝ විදේශ ණයවලින් , නැතහොත් ස්වෛරී බැඳුම්කර ණය හරහා . අපනයන ආදායම් වැඩි කර ගැනීමෙන් එය ප්රතිපූර්ණය කර ගැනීමට කිසිදු රජයක් උපාය මාර්ගික සැලසුම් දක්ෂ ලෙස ක්රියාත්මක කළේ නැහැ .
2- එසේම වාර්ෂිකව අපි US$ බිලියන 2.7 ක් පමණ වටිනා භාණ්ඩ හා සේවා (24%ක්) ඇමරිකාවට අලෙවිකරණ අතර, US$ බිලියන 0.5 ක් පමණ වටිනා භාණ්ඩ හා සේවා (3%ක්) පමණක් ඇමරිකාවෙන් මිලට ගනු ලබයි . එසේ මිලදී ගන්නා දේ වලින් ද වැඩි කොටසක් ඉහළ මධ්යම පාන්තිකයන් වෙනුවෙන් ආනයනය කරන අත්යවශ්ය නොවන සුඛෝපභෝගී භාණ්ඩ ය. එනම් මෙම "ගනුදෙනුවේදී" ශ්රී ලංකාව මත ඇමරිකාව අනුපාතික යැපීමක් ඇත.
* එසේනම් අපි ඇයි ඇමරිකාවට සහ ඩොලරයට මෙතරම් බය හෝ ගැති? (ඇමරිකානු ඩොලර් කිසිසේත්ම භාවිතා නොකරන, රට තුළට ඩොලර් ඇතුළු වීම පවා සිදු නොවන ශක්තිමත් රටවල් ද ලෝකයේ පවතින බව මතක තබා ගන්න)
* ඇයි අපිට බැරි අමෙරිකාවෙන් ආනයනය කරන 3%ත් වෙන රටවල් වලින් ආනයනය කරන්න ?
* ඇයි අපිට බැරි ඔය ආනයනය කරන බොහෝ දේවල් රට තුළම නිෂ්පාදනය කරන්න? නැතහොත් සුඛෝපභෝගී භාණ්ඩ ආනයනය සීමා කරන්න ?
* ඇයි අපිට බැරි අමෙරිකාව නොවන වෙනත් රටවල් වලින් ආනයනය කරන දේවල් වලට ඒ රටවල් වල මුදල් ඒකක වලින් හෝ ශ්රී ලංකාවේ මුදල් ඒකකයෙන් ගෙවීම් කරන්න ?
* ඇයි අපිට බැරි අපනයනය කේන්ද්ර කොටගත් ආර්ථිකයක් , නිෂ්පාදන රටාවක් රට තුළ බිහි කිරීමෙන් වාර්ෂික වියදමට වඩා ආදායම වැඩි කරගන්න ?
* ඇයි අපිට බැරි ඒ ආදායම් අතිරික්තය සහ ඊට සමානුපාතික ලෙස මුද්රණය කරන මුදල් ( ෆෙඩරල් රජය මෙන් ) දේශීයව සහ විදේශීයව නැවතත් ලාභ ලැබෙන අයුරින් ආයෝජනය කරන මූල්ය යන්ත්රනයක් ඇති කරන්න ?
* ඇයි අපිට බැරි ලැබෙන අපනයන ආදායමෙන් පවා කොටසක් විඝනණයට හසු නොවන ලෙස හොර පාරෙන් නැවතත් විදේශ වලටම යන එක වලක්වන්න ?
* ඇයි අපිට බැරි තොරතුරු තාක්ෂණය (IT platforms) හරහා අපගේ නිෂ්පාදන සහ සේවාවන් වෙනුවෙන් ලෝක වෙළඳපොළ ආක්රමණය කරන්න . Paypal වැනි platforms හරහා ලංකාවට ඩොලර් පැමිණෙන ලෙස පසුබිම සකසන්න ?
* ඇයි අපිට බැරි මේ සියලු වෙනස්කම් සඳහා අවශ්ය නව නීති , systems, සහ ජනතා ආකල්ප රට තුළ ඉක්මනින් ඇති කරන්න ?
ඉහත ප්රශ්න සියල්ලටම ඇති එකම පිළිතුර - සුක්කානම අතැති අයගේ ඇති නොහැකියාව, උවමනාවක් නැති කම සහ අදක්ෂ කම - යන්නයි.
සියල්ලන් සියලු දේටම දක්ෂ නැත. වැරදි සහ නොහැකියාවන් විවේචනය කරන අතරම පසුගිය අවුරුදු 80 පුරා පාලන තන්ත්රයේ සිටි සුළු පිරිසක් "ඔවුන්ගේ" හැකියාවන් සහ දක්ෂතාවන් භාවිතා කරමින් රටට සිදු කර ඇති යහපත් දේ වගේම විවිධ ව්යසනයන්ගෙන් රට බේරා ගැනීම අගය කිරීමටද පළමුව අප නිහතමානී විය යුතුය …. කෘතවේදී විය යුතුය.
* අලුතින් ගන්නා IMF හෝ වෙනත් ණය , ආධාර , බැඳුම්කර මෙම අර්බුදයට විසඳුමක් ද ?
අත්යවශ්ය ද්රව්ය ආනයනයට ඉන් ඉඩ සැලසෙන නිසා එය තාවකාලික සහනයක් වේවි. නමුත් එම බරත් ජනතාව මතම පැටවේවි.
උදාහරණයක් ලෙස , MR රජය (2010 --> ) ලබාගත් US$ බිලියන 5 ක පමණ ණයත්, RW + MS රජය (2015-->) බැඳුම්කර සහ වෙනත් ක්රම වලින් ලබාගත් US$ බිලියන 12.5 ක පමණ ණයත් , හම්බන්තොට වරාය විකිණීමෙන් ලබාගත් US$ බිලියන 1.2 ත් ප්රධාන වශයෙන් භාවිතා කළේ මා ඉහත විස්තර කළ අයවැය පරතරය ( 16 - 11 = 5 US$.B ) පියවීමට සහ එදිනෙදා පරිභෝජනය ( Recurrent Expenditure ) සඳහාය. රටෙහි ආදායම් ( අපනයන ) වැඩි කිරීමට එම මුදල් ප්රමාණවත් ලෙස දායක වී නැත. 2019 වන විට US$ බිලියන 56ක් ව තිබූ ණය වලින් ( මින් 37%ක් බැඳුම්කර ණයයි ) , GR රජය විසින් US$ බිලියන 6ක් ගෙවූ පසු එය 50ට අඩු විය. නමුත් ඉන් සිදුවූයේ අත්යවශ්ය දේ ආනයනය සඳහා රට තුළ ඩොලර් නොමැති වීමයි. ඊට අමතරව පසුගිය වසර 2 තුළ ජීවන වියදම ඉහළ යාම වැළැක්වීම සඳහා ( කාලෝචිත නොවන තීරණයක් ලෙස ) ඩොලරය fixed exchange rate එකක පවත්වා ගැනීමද සිදුවිය. ඒ නිසා තව දුරටත් රටට ඩොලර් පැමිණීම අවහිර විය. දැන් සිදුවී ඇත්තේ එම fixed rate ප්රතිපත්තිය වෙනස් කර රටට ඩොලර් ගෙන්වාගැනීමට කළ උත්සාහය නිසා ජීවන වියදම වැඩිවීමයි . ඒ නිසා දැළිපිහිය ඇත්තේ වඳුරන් අතේ බව දැන දැන තවදුරටත් ණය සහ ආධාර ගැනීමේ භයානක ප්රතිඵල අත්විඳීමට සිදු වනුයේ අපගේ දරුවන්ටය.
උදාහරණයක් ලෙස විදෙස් ගෘහ සේවයේ යෙදෙන මවක් රට ගැන කැක්කුමෙන් තම වැටුපෙන් US$ 100 ක් තම ගිණුමට දැම්මා යැයි සිතමු. ඇය එම US$ 100 එවන්නේ මරණාසන්න ලෙඩෙකුට අත්යවශ්ය ඖෂධයක් ගෙන්වා ගැනීමට එය දායක වේවි යැයි යන සිතුවිල්ලෙන්. එම US$ 100 රුපියල් වලින් ඇයගේ දරුවන්ට බැංකුව ගෙවාවි. ඒත් ඔය US$ 100 නැවතත් මහ බැංකුවට ගිය පසු ඔවුන් එය වැය කරන්නේ ඖෂධයක් ගෙන්වීමට ද නැතහොත් ශ්රී ලංකාවේ ධනවත් කාන්තාවකට ඇමරිකාවෙන් සුවඳ විලවුන් ගෙන්වීම සඳහා වූ LC එකක් සදහාද යන්න ඔබ තහවුරු කර ගන්නේ කෙසේද ????? එනිසා කරුණාකර මෙම ඩොලර් "cash flow" යාන්ත්රණය අවබෝධ කරගැනීමට උත්සාහ කරන්න.
දැන් සිදුව ඇත්තේ තම - තමාගේ දුර්වල ආර්ථික / මූල්ය කළමනාකරණය සහ අදක්ෂතාවය වසාගැනීමට , දේශපාලන සටන් පාඨයක් ලෙස " සොරකම් - වංචා - දූෂණ - " නිසා මෙය සිදු වූ බවට දෙපාර්ශ්වයට දොස් පවරමින් ජනතාවගේ මොළ අවුල් කිරීමයි. දේශපාලන සාක්ෂරතාවයෙන් හීන වහල් බවෙන් අන්ධ වූ බොහෝ සාමාන්ය ජනතාව එනිසා අද ඒවා විශ්වාස කරමින් ඔවුන්ගේ ජීවිත ද අවුල් කරගෙන ඇත . නමුත් හැමෝගෙම කිල්ලෝට වල හුණු තිබෙන බවත් මතක තබා ගන්න.
එසේම ව්යවස්ථා, අණ පනත් , නීති සම්මත කරගෙන පුනරාවර්තන නොවන සංවර්ධන ව්යාපෘති / ප්රාග්ධන වියදම් ( Capital Expenditure ) වලින් කොමිස් % ලබාගැනීමට විෂය භාර දේශපාලකයාට ශ්රී ලංකාවේ නීතියෙන්ම අවසර ලැබෙන තෙක් සියල්ලෝ නිහඬව සිට දැන් චෝදනා කිරීම , මරණ දඬුවම නීතිගත කොට අලුගෝසුවාට මිනීමරුවා යයි චෝදනා කිරීම වැනි බොළඳ වැඩකි !!
* ආර්ථික අර්බුදයට එකම විසඳුම ශ්රී ලංකාවේ ව්යවහාර මුදල් ඒකකය US$ සහ LK$ (Lankan Dollar) බවට පත් කර රුපියල (LKR) භාවිතයෙන් ඉවත් කිරීම පමණයි.. !!
රටක මුදල් ඒකකය සහ එහි සාපේක්ෂ වටිනාකම තීරණය කිරීමේ පූර්ණ බලතල ඇත්තේ එම රටේ රජයට සහ මහබැංකුවට මිස ජාත්යන්තරයට නොවෙයි. රුපියල වෙනුවට අලුත්ම මුදල් ඒකකයක් ( මා යෝජනා කරනුයේ Lankan Dollar - LK$ ) ලෙස හඳුන්වා දී එහි වටිනාකම රුපියල් 1000ක් වැනි, එනම් ඩොලරයට වඩා වැඩි තලයක තබා මූල්ය වෙළඳපොළට මුදාහැරීමට සුදුසුම කාලය මෙයයි. නමුත් ඉල්ලුම සහ සැපයුම මත, පාවෙන විනිමය අනුපාත ප්රතිපත්තිය තුළ එහි අගය ක්රමානුකූලව වැඩි වනු මිස අඩු නොවන ලෙස පවත්වාගැනීමට අවශ්ය සියලු නීතිමය, තාක්ෂණික, උපායමාර්ගික සහ විද්යාත්මක ක්රමවේද අප අනුගමනය කළ යුතුය. ක්රමානුකූලව කාලයක් සමග රුපියල (LKR) වෙළඳපොලෙන් ඉවත් කිරීමට අවශ්ය උපාය මාර්ගික සහ තාක්ෂණික වැඩපිළිවෙළද සකස් කළ යුතුය. මෙම සංක්රාන්ති සමය තුළ රටෙහි සියලුම අභ්යන්තර මිලදී ගැනීම් සහ ගෙවීම් සඳහා ඇමරිකානු ඩොලර් (US$) හැකිතාක් භාවිතා කිරීමට "සිදුවන" ලෙස ඊට අවශ්ය නීතිරීති, උපාය මාර්ගික සහ විද්යාත්මක ක්රමවේදය සකස් කළ යුතුය.
*එය සිදුකළ හොත් එහි ඇති වාසි මොනවාද ?
කෙටියෙන් කිවහොත් මේ වැඩේ හරියට කරන්න පුළුවන් නම් දීර්ඝකාලීනව ශ්රී ලංකාවට ලෝකයේ බලවත්ම ආර්ථිකය ඇති රට බවට පත් විය හැකියි. කෙටි කාලීන වාසි අතර පහත සඳහන් දේ සිදුවෙයි.
සැඟවී තිබෙන "කළු ඩොලර්" ඉබේම එළියට විත් රටෙහි ඩොලර් හිඟය නැති වී යාවි. ඩොලර් කළු කඩය අකර්මණ්ය වේවි.
ශ්රී ලාංකික මුදල් ඒකකය depreciate වීම නිසා සිදුවෙමින් පවතින උද්ධමනය (hyperinflation) තත්ත්වය ක්රමානුකූලව පහව යාවි.
රුපියල depreciate වීම සහ ඩොලර් හිඟය නිසා ඇති වී තිබෙන monetary gap එක පිරවීමට රටෙහි මූල්ය පද්ධතිය ආක්රමණය කළ හැකි ( අයහපත් ප්රතිඵල සහිත ) වෙනත් වටිනාකමින් වැඩි විදේශ මුදල්, Cryptocurrency, Bitcoin වැනි දෑ අපගේ මූල්ය පද්ධතිය ගිල ගැනීම නවතීවි.
තවත් බොහෝ වාසි ඇත… සමහර රටවල් මෙම ක්රමය යොදා ගෙන අති සාර්ථක ප්රතිඵල ලබාගෙන ඇත
*එය සිදුකළ හොත් ඇතිවිය හැකි අවාසි මොනවාද ?
සුළු සුළු කෙටි කාලීන සහ දීර්ඝ කාලීන අවාසි ඇතත් , බුද්ධිමත්ව , උපායශීලී ලෙස , විශේෂඥ මැදිහත්වීම යටතේ මෙම සම්පූර්ණ ක්රියාවලියම සිදුකරන්නේ නම් , විදේශවලින් තවදුරටත් ණයට ගැනීම තරම් අවාසි නම් මෙහි නොමැත.
N.B. මම ආර්ථික විශේෂඥයකු වත් මූල්ය කළමනාකරණ විශාරදයකු වත් නොවෙමි. ඒ පිළිබඳව මට ඇති දැනුම හුදෙක් පසුගිය වසර 10 පුරා ලෝකයේ විවිධ ආර්ථික මොඩල සහ මූල්ය කළමනාකරණ ව්යුහයන් පිළිබඳව මවිසින් සිදු කරන ලද සමීක්ෂණ පර්යේෂණ සහ අධ්යයන වලින් පමණක් ලද සාමාන්ය දැනුමකි . මගේ ප්රියතම විශය ශල්ය වෛද්ය වේදය මිස ආර්ථික විද්යාව නොවෙයි. නමුත් මෙම යථාර්ථය අවබෝධ කර ගැනීමට ආර්ථික විශේෂඥයෙකු ම විය යුතු නැතැයි මම සිතමි. එසේම මෙය 100% ක් සාර්ථක විසඳුමක් බව පාලන තන්ත්රයේ සිටින විශේෂඥයන් කිසිසේත්ම නොදන්නවා විය නොහැකිය. නමුත් මෙම විසඳුම ටිකක් සැර වැඩි රැඩිකල් විසඳුමක් නිසාත් , එය ප්රායෝගිකව implement කිරිමට සැලකිය යුතු system change එකක් අවශ්ය නිසාත්, එය ක්රියාත්මක කිරීමේදී "රිදෙන පාර්ශව වලින්" එල්ලවිය හැකි ප්රතිරෝධයට මුහුණදීමට සහ එය කළමනාකරණය කර ගැනීමට තරම් කශේරුකාවක් නොමැති කම නිසාත් ඔවුන් එය සිදු නොකරන බව මට හැඟේ. දැනට පාර්ලිමේන්තු මන්ත්රීවරයෙකු ලෙස සිටින ආර්ථික විද්යා විශේෂඥ , මහාචාර්ය රංජිත් බණ්ඩාරයන් ද පසුගිය වසර 2 පුරා මෙවැනිම වූ විශේෂඥ යෝජනා රජයට සහ මහ බැංකුවට ඉදිරිපත් කලත් ඔහුගේ හඬ තපුල්ලන හරක් රැලගේ හඬින් යටපත් විය. එනිසා මා හට හැක්කේ මෙම පණිවිඩය මෙහි ලියා තැබීම පමණයි. නමුත් මා දන්නා තරමින් මෙම විවහාර මුදල් ඒකකය වෙනස් කිරීමේ මූල්ය කළමනාකරණ උපාය මාර්ගික ක්රමවේදය ගැන මින් පෙර කිසිදු තැනක මේ අයුරින් සාකච්ඡා වී නැත.
*මෙම වෙනසෙන් පමණක් සියළු ප්රශ්න විසදෙයිද ?
නැහැ.. පුරවැසි ඔබගේ වගකීම සියලු දේවල් වල ප්රතිඵලය තීරණය කරයි. තේරෙන භාෂාවෙන් කිව්වොත් රටෙහි කුඩා දරුවාගේ සිට ආගමික පීතෲ වරුන් සිට ආබාධිත මහලු කාන්තාව දක්වා සියලු දෙනා රටේ නිෂ්පාදන සහ ආර්ථික ක්රියාවලියට කෙසේ හෝ උද්යෝගයෙන් සම්බන්ධ විය යුතුය. ඔබට නිවසේදී අපනයනය සඳහා එක් අල්පෙනෙත්තක් නිපදවිය හැකි නම් , නැතහොත් ආනයනය කරන එක් පලතුරු කිලෝවක් වෙනුවට ගෙවත්තේ පලතුරු කිලෝ 2ක් වගා කළ හැකි නම් , මිලියන 20 කට අධික ජනගහනයක් තුළින් ඇතිවන ප්රතිඵලය ආශ්චර්යයක් වනු ඇත. පළමුව අප ජයග්රහණය කළ යුත්තේ එම " ආනයන - අපනයන අරගලයයි " (i.e. GOODS, SERVICES & WORK are the secrets of a strong economy)
එළැඹෙන නව වසර සුබ කර ගැනීමට මා හට ඔබ වෙනුවෙන් දිය හැකි සුබ පණිවිඩය මෙයයි. එක්වෙමු නැගිටිමු !!
අපගේ CHIRAJEEWA සහ Healthbook ක්රියාන්විතය හරහා සෞඛ්ය සේවාවන් ලබන ඔබ සියලු දෙනාටමත් , අපගේ සෞඛ්ය ක්රියාන්විතය තුළ ලියා පදිංචි වී සිටින යාව - ජීව සහ ආශ්රිත සාමාජිකයන් සියලු දෙනාටමත් , සේවා සපයන්නන් ලෙස සම්බන්ධ වී සිටින වෛද්යවරුන් සහ අනෙකුත් සියලුම ගෞරවනීය වෘත්තිකයන්ටත් එළැඹෙන නව වසර ජීවිත අරගලය දිනන සුබ නව වසරක් වේවා යි පතමි !
ස්තුතියි ,
---------------------------------------------
Author:
DR. M.H. CHIRANTHA JEEWAN DE SILVA @
(MBBS, Dip.HCM, ADBM)
_______________________________
Senior Medical Officer - Surgery
Accident & Orthopedics Service Department.
National Hospital of Srl Lanka - Colombo 10.
--------------------------------------------------
Founder & CEO -
Healthbook Professional Team &
CHIRAJEEWA Medical Services Pvt.Ltd.
_______________________________
National Consultant
Sri Lanka Federation of Hospital Service Cooperative Societies,
" Coop House" - Colombo 03
----------------------------------------------------
Source documents for data and statistics : Central Bank of Sri Lanka, UNESCO & UN financial documents, IMF financial documents, US Federal Government and US Central Bank documents
------------------------------------------------------
![ඔබත් සාමයේ දූතයෙක් වන්න ......රට දියුණු කරන්න උදව් කරන්න ...... යටතේ [+] POSTS SHARE කරන්න ...... READ..... & HELP PRE...](https://img4.healthandbeauty1.com/869/592/367445498695929.jpg)
