11/09/2026
'මම තනිවෙලා'
'තවත් නම් මට මේ ජීවිතේ දරාගෙන ඉන්න අමාරුයි'
'මට මාවත් නැතිවෙලා වගේ'
'එයා නැත්නම් මට ජීවත් වෙලා වැඩක් නෑ'
මට දැන් හරි මහන්සියි'
ඕනෙම කෙනෙකුට ජීවිතේ ඕනෙම වෙලාවකදි මුහුණ පාන්න වෙන විවිධාකාර ප්‍රශ්න වලදි
තමන්ගේ හුස්ම වල බර දැනේවි.
තව දුරටත් ඉවසගෙන ඉන්න අමාරුයි කියලා හිතේවි.
තමන් වටේ කොතරම් පිරිසක් සිටියත් තමන් තනිවෙලා කියලා දැනෙන මොහොතක් ඒවි.
හුස්ම වල බර, හදවතේ බර උහුලන්න බැරිම වෙන වෙලාවක් ඒවි.
වෙන කවදාටවත් වඩා ඔබට, ඔබව අවශ්‍ය වෙන්නේ ඒ අවස්ථාවේදීයි.
ඉවසලා ඉවසලා අමාරුම තැනත් ඉවසීමෙන්, දරාගැනීමෙන් ඔබට, ඔබව හයියෙන් අල්ලාගෙන ඉන්න පුලුවන්.
මතක තියාගන්න..
ජීවිතේ විවිධ නවාතැන් වලදි ඔබව අල්ලාගන්න වගේම ඔබ අල්ලාගන්න අත් ඔබෙන් අත හැරේවි.
ඒත් ඔබට ඔබේ ශක්තිය විශ්වාසයිනම්,
ඔබට ඔබ විශ්වාසයි නම්
ඔබට දරාගන්න අමාරුම තැනත් නොවැටී හිස කෙළින් තබාගෙන ඉදිරියටම යන්න පුලුවන්.
ඔබේ ජීවිතයේ වටිනාකම, ඔබේ වටිනාකම ඔබම තේරුම් ගන්න.
කිසිම අවස්ථාවක ඒ වටිනා ජීවිතය ඔබෙන් අතහැරෙන්න දෙන්න එපා..
💜️ඔබේ සතුටේ හිමිකරු ඔබම වන්න
💜️ඔබ තුළින්ම ඔබේ සතුට හොයාගන්න
💜️ජීවිතේ විඳීමට එකම එක හේතුවක් හෝ
තමන් තුළ ඇති බව සිහියේ තබාගන්න
💜️තමන්ගේ ආරක්ෂකයා, රැකවලා තමන්ම මිස වෙන අයෙකුගෙන් එය බලාපොරොත්තු නොවන්න
💜️තමන් තුළ ඇති හැකියාවන් හඳුනගන්න
💜️ජීවිතේ තමන්ට අත හැරේවි යයි හැඟේනම්
තමන් තදින් අල්ලාගෙන ඉන්න
💜️ඔබේ ශක්තිය, දරාගැනීම ඔබ තුළින්ම සොයාගන්න
නමුත් ඔබ ගැනත් ඔබට විශ්වාසයක් නොදැනුනොත් අනිවාර්යයෙන්ම ඔබට වඩාත් විශ්වාසදායී, ඇහුම්කන් දෙන්නෙකුට, ඔබව දරාගැනීමට හැකි කෙනෙකුට කතා කරන්න.
යා යුතු මඟ අපැහැදිලියි හිතෙනවානම් ඔබට නිසි මඟ පෙන්වන්නෙකු සොයාගන්න.
ක්ෂනික ආවේග පාලනය කරගන්න.
ක්‍රියාත්මක වෙන්න කලින් නැවතිලා කල්පනා කරන්න.
ඒත් කිසිම අවස්ථාවක ඔබේ ජීවිතය ඔබෙන් ගිලිහෙන්න දෙන්න එපා.
ඔබේ සමීපතමයන් වෙනුවෙන් අවධානය දෙන්න.
කිසිම අවස්ථාවක කිසිම කෙනෙකුට ජීවිතය අතහැරීමට හේතුවක් වෙන අයෙක් නොවී ජීවිතය රැකගන්න දරාගන්න හේතුවක් වෙන ආදරණීය කෙනෙක් වන්න.
ඔබට කතා කරන්න කවුරුත්ම නැත්නම් අපි කතා කරමු.
එක්ව අපි හැම දෙනාගේම ජීවිත රැකගනිමු.
කාන්චනා නවගමුව
ජ්‍යෙෂ්ඨ මනෝ උපදේශිකා
