17/06/2024
කෙනෙක්ට දිග කාලයක් ආදරය කරනවා කියන්නේ ඒ පුද්ගලයාගේ එක් එක් යුගවල එයා ගෙවපු විවිධ ජීවිතවල මරණයන් වලට සහභාගි වීමක්. එයා එක් එක් යුගයන්වලදි එයා වෙලා හිටපු කෙනා මිය ගිහින් අළුත් කෙනෙක් බිහිවෙන හැම වතාවකම එයාගේ ඉපැරණි ජීවිතයේ මරණයන්වලට ඔබට සහභාගී වෙන්නම වෙනවා. තවදුරටත් එයා වෙලා හිටපු කෙනා බවට පත්වෙන්න බැරි තරම් වෙහෙසට පත්වුණාට පස්සෙ, එහෙමත් නැත්තම් එයාගෙ ඉපැරණි ජීවිතය තව දුරටත් එයාට ප්රමාණවත් නැති බව දැනෙන්න පටන් ගනිද්දි, එහෙමත් නැත්තම් එයා බලාපොරොත්තු වුණ කෙනා බවට එයාට පත්වෙන්න බැරි බව දැනුණු මොහොතෙදි එයාලා මරණයට පත්වෙනවා. ඔබ ආදරේ කරන්නෙ දීර්ඝ කාලීනවනම්, ඔබට සිද්ධ වෙනවා ඒ හැම මරණයකටම සහභාගී වෙන්න.
අපි ආදරේ කරන මිනිස්සුන්ගෙ ආලෝකය අහිමි වෙමින් යන බව දැක්කම, අපිට උවමනා වෙනවා හැකි ඉක්මනින් ආයෙත් ඒ ආලෝකය ඔවුන් ළඟා කරගන්නවා දකින්න. ඔවුන් කියද්දි ඔවුන් අතරමං වෙලා බව, අපිට උවමනයි ඔවුන් හැකි ඉක්මනින් ඔවුන්ගෙ පාර හොයාගන්න.
ඒත් කෙනෙක් එක් යුගයකදි වෙලා හිටපු කෙනා හැටියටම තව දුරටත් නොහැසිරෙද්දි, අපිට අයිතියක් නැහැ එයාලට බල කරලා අහන්න "ඇයි ඔයා වෙනස් වුණේ?" කියලා. ඒක නෙමෙයි අපිට පැවරෙන කාර්යභාරයය. අපේ කොටස වෙන්නෙ එයාලා එක්ක එයාලගෙ විවිධ ස්වරූපයන් හරහා එයාලා ඇවිදන් යද්දි, එයාලත් එක්ක ඒ ගමන යන එක විතරයි. එක තැනකින් තවත් තැනකට...
ඒ ගමනෙදි අපිට මුණගැහෙන එයාගෙ විවිධ ස්වරූපයන්ට ගෞරවයෙන් සලකන්න පුරුදු වෙන්න අපිට සිද්ධ වෙනවා. ඒ අළුත් කෙනාව පිළිගන්න සිද්ධ වෙනවා. ඒ පිළිගැනීමත් එක්ක එයා එක්ක ඇවිදින්න අපිට සිද්ධ වෙනවා. එච්චරයි.....
සමහරදාක ඒක මහා ප්රභාසම්පන්න ගිනිජාලාවක් වගේ දැනේවි. සමහරදාක ඒක හෙමි හෙමින් ඇවිලෙන, කාමරය අවැසි මොහොතේදී පරිපූර්ණ සහ අත්යාවශ්ය අඳුරකින් පුරවා දමන්න හැකි මන්දාලෝකයක් වේවී...
ඒ තමා දිගු කාලයක් එක මනුස්සයෙක්ට ආදරය කිරීම කියන්නෙ. ඒ මනුස්සයා මිය යමින්, නැවත ජීවිතයට එන හැම වතාවකම, ඒ බිහිවෙන අළුත් කෙනා එක්ක ආදරයෙන් බැඳීමයි!!
-Heidi Priebe
අනුවාදය: Shenu Perera
(Book: This Is Me Letting You Go)
