أخصائي التغذية العلاجية فرج النفاتي Faraj Alnafati Clinical Dietitian

19/08/2026

لو تعرف حد ملتزم بالدايت والتمارين الفتره هذي امسك فيه بيديك وسنونك، لان اللي في ظل هالظروف المأساويه متمسك بصحته الجسديه وعقليه مستحيل يتخلى عليك😁💔

18/08/2026

🥗🍔 شن الفرق بين الوجبة المفتوحة واليوم المفتوح؟

خلّونا نسهلوها 👇😄

أول حاجة، الوجبة المفتوحة غير اليوم المفتوح تمامًا، وهنا الغلطة اللي يديرو فيها ناس واجده

🍔 الوجبة المفتوحة Cheat Meal
هي وجبة وحدة بس، تاكل فيها الحاجة اللي تشتهيها وتحبها، سواء كانت مكرونة، بيتزا، رز، برجر، حلو أو غيره، لكن بكمية معقولة ونحاولوا نخلوها عالية في الكربوهيدرات، متوسطة في البروتين وقليلة في الدهون.

أما ❌ اليوم المفتوح Cheat Day
معناها اليوم كله تاكل عشوائي وبكميات كبيرة: فطور وغدا وعشا وحلويات وسناكات… وهكي ممكن بسهولة تتجاوز السعرات اللي نقصتها طول الأسبوع، وتضيع جزء كبير من تعبك.

🧠 باهي شن فايدة الوجبة المفتوحة؟

أول فايدة إنها نفسية قبل ما تكون غذائية 😁❤️
لما تعرف إن عندك وجبة تقدر تاكل فيها الحاجة اللي تحبها، الالتزام بالنظام يقعد أسهل، خصوصًا لو أنت ماشي على نظام لخسارة الدهون.

🔥 وفيه نقطة ثانية مهمة: هرمون اللبتين Leptin.

اللبتين مرتبط بكمية الدهون في الجسم وله دور في تنظيم الشهية والطاقة. لما نقعدوا فترة طويلة على سعرات قليلة وننقصوا في الدهون، مستوى اللبتين ممكن ينخفض، ومعاه الجسم يبدأ يتأقلم مع نقص الطاقة، فتزيد الشهية ويقل صرف الطاقة.

وهنا يجي دور الوجبة المفتوحة 👌

الوجبة اللي فيها كربوهيدرات بشكل مناسب ممكن تساعد في رفع إشارات الطاقة والشبع بشكل مؤقت، وتخلي الالتزام بالنظام أسهل.

⚠️ لكن مهم جدًا نفهموا حاجة:

الوجبة المفتوحة مش معناها يوم مفتوح، ومش معناها ناكلوا لين نخلوها زبط

هي وجبة محسوبة ومخطط لها، وتدخل ضمن برنامجك الغذائي حسب احتياجك وهدفك.

يعني باختصار:

🥗 نظامك = أغلب الأسبوع
🍔 وجبة مفتوحة = وجبة تستمتع بيها
❌ يوم مفتوح = فوضى في الأكل وسعرات وتخربها زي اللي امس 😂

والأهم من كل هذا… النتيجة مش في وجبة وحدة، النتيجة في الاستمرارية والالتزام. 💪🔥

📍 متواجد بكرا بإذن الله:
🌅 الصبح في مصحة الأمل للشفاء
🌙 والمساء في نجاح كلينك

واللي عنده سؤال على التغذية أو نزول الوزن، يخليه في التعليقات 👇❤️

18/08/2026

💊 إيفانيوتريم Evaneotrim

عليش نعتمدوا عليه بدل أدوية التخسيس المجهولة اللي في السوق؟

خلونا نوضحوا نقطة مهمة قبل كل شيء 👇

مش كل حاجة مكتوب عليها «حبوب تخسيس» معناها دواء مضمون، وفي السوق تلقى منتجات مجهولة المصدر أو تركيبتها مش واضحة، ومش معروف بالضبط شنو المادة اللي فيها ولا بكمية المادة الفعالة.

أما إيفانيوتريم Evaneotrim فهو دواء موصوف من شركة إيفا فارما Eva Pharma، ومبني على تركيبة دوائية معروفة ومدروسة، وهي:

🔹 Bupropion 90 mg
🔹 Naltrexone 8 mg

وكل قرص يكون ممتد المفعول، يعني المادة الفعالة تنطلق بطريقة محسوبة داخل الجسم.

والأهم إن المواد الفعالة نفسها مش مواد مجهولة أو «خلطة تخسيس»؛ البوبروبيون والنالتريكسون مواد دوائية معروفة، وتركيبة النالتريكسون + بوبروبيون لها استخدام معتمد لإدارة الوزن عند البالغين مع نظام غذائي مناسب وزيادة النشاط البدني. (European Medicines Agency (EMA))

🧠 شن يدير إيفانيوتريم؟

الدواء يشتغل على مناطق ومسارات في المخ مرتبطة بالشهية والرغبة في الأكل والمكافأة الغذائية.

بمعنى أبسط:
يساعد الشخص إنه يتحكم في شهيته، ويقلل الرغبة الشديدة في الأكل، خصوصًا عند الأشخاص اللي يعانوا من زيادة الشهية أو الأكل بشراهة.

لكن مهم جدًا 👈
إيفانيوتريم مش بديل عن النظام الغذائي والرياضة، بل يُستخدم كجزء من برنامج متكامل لإنقاص الوزن.

🔬 عليش تركيبة المادتين مع بعض؟

Bupropion – بوبروبيون

مادة دوائية معروفة، وتؤثر على بعض النواقل العصبية في المخ، ولها تأثير يساعد على التحكم في الشهية والرغبة في الأكل.

Naltrexone – نالتريكسون

مادة دوائية تعمل على مستقبلات الأفيونات، ولها دور في تقليل تأثير مسارات المكافأة والرغبة الشديدة، وعند دمجها مع البوبروبيون تساعد على التحكم في تناول الطعام. (الطبي)

💊 الجرعة كيف تكون؟

الجرعة ما تقعدش عالية من أول يوم، بل تزيد تدريجيًا بيش الجسم يتعود على الدواء:

الأسبوع الأول:
قرص واحد صباحًا.

الأسبوع الثاني:
قرص صباحًا وقرص مساءً.

الأسبوع الثالث:
قرصين صباحًا وقرص مساءً.

الأسبوع الرابع وما بعده:
قرصين صباحًا وقرصين مساءً.

يعني الجرعة القصوى 4 أقراص في اليوم.

⚠️ والجرعة لازم يحددها الطبيب حسب حالة الشخص، وما يقدرش الواحد يرفع الجرعة من روحه.

⚠️ هل الدواء آمن لكل الناس؟

لا.

وهذي نقطة مهمة جدًا.

الدواء يحتاج تقييم طبي قبل استخدامه، خصوصًا لو الشخص عنده:

ارتفاع ضغط غير مسيطر عليه
تاريخ تشنجات أو صرع
بعض اضطرابات الأكل
أمراض في الكبد أو الكلى
أمراض قلب أو مشاكل في الضغط
بعض الاضطرابات النفسية
أو يستعمل أدوية أخرى تحتوي على بوبروبيون.

🚨 والأهم:

ممنوع استخدامه مع الأدوية الأفيونية (Opioids)، لأن النالتريكسون يمنع تأثيرها وقد يسبب مشاكل خطيرة في بعض الحالات.

وكذلك لا يُستخدم أثناء الحمل لإنقاص الوزن.

🤢 شن الأعراض الجانبية الممكنة؟

أكثر الأعراض اللي ممكن تظهر:

الغثيان
القيء
الصداع
الدوخة
جفاف الفم
الإمساك أو الإسهال
الأرق أو اضطراب النوم

وممكن عند بعض الأشخاص يرتفع ضغط الدم أو تزيد ضربات القلب، لذلك المتابعة مهمة.

وفي حالات نادرة ممكن تحصل تشنجات أو أعراض خطيرة، وهنا لازم إيقاف الدواء والتواصل مع الطبيب فورًا.

🏭 باهي الشركة المصنعة؟

إيفانيوتريم من إنتاج إيفا فارما Eva Pharma، وهي شركة دوائية مصرية عندها خبرة طويلة في صناعة الأدوية، وتذكر الشركة أن مصانعها حاصلة على اعتمادات من جهات تنظيمية دولية، منها وكالة الأدوية الأوروبية والهيئة السعودية للغذاء والدواء وجهات تنظيمية أخرى.

وهنا الفرق اللي يهمنا كمختصين:

مش مجرد حبوب تخسيس مجهولة التركيبة والمصدر.

عندنا:
✔️ مواد فعالة معروفة
✔️ تركيز محدد لكل قرص
✔️ تركيبة ممتدة المفعول
✔️ تصنيع دوائي من شركة معروفة
✔️ بيانات علمية على المواد الفعالة والتركيبة
✔️ وإمكانية متابعة الجرعة والاستجابة والآثار الجانبية بشكل طبي.

لكن هذا ما يعنيش إن إيفانيوتريم مناسب لكل شخص أو إنه أفضل دواء للتنحيف للجميع.

اختيار دواء التخسيس يعتمد على وزن الشخص، BMI، الأمراض المصاحبة، الأدوية اللي يستعمل فيها، ضغط الدم، التاريخ المرضي، ونمط الأكل.

📌 الخلاصة:

إيفانيوتريم مش «حبوب سحرية» ومش مناسب لكل حد.

هو دواء لإدارة الوزن يعتمد على تركيبة Naltrexone + Bupropion، واستخدامه الصحيح يكون ضمن برنامج غذائي ونشاط بدني وتحت متابعة طبية.

والأهم من اسم الدواء هو:

هل الدواء مناسب لك؟ هل ما عندكش مانع طبي أو تداخل دوائي يمنع استخدامه؟

هذي هي النقطة اللي لازم تتراجع قبل البداية، مش مجرد إن الدواء ينقص الشهية.

17/08/2026

لما كيف حالك دكتور💔😀

متواجد غدا فيمصحة الأمل للشفاءاء

16/08/2026

💬 فقره مخصصه للأسئلة والاستفسارات

عندك سؤال في التغذية، الصحة، إنقاص الوزن، أو أي استفسار حاب تعرف إجابته؟ 🤍

سيّب تعليق بسؤالك تحت المنشور 👇
وهنجاوب عليك بعون الرحمن وبكل وضوح وبساطة ❤️

📌 سؤالك يهمنا… ويمكن إجابتنا تفيد غيرك حتى هو.

15/08/2026

لما الميزان يستك ومعش ينزل… هل معناها الدايت فشل؟ 🤔⚖️

س: شن معناها مرحلة ثبات الوزن (Weight Loss Plateau)؟

ج: ببساطة، هي الفترة اللي يوقف فيها نزول الوزن أو يبطأ بشكل واضح لعدة أسابيع، رغم إنك ماشي على نظامك الغذائي وتمارس في نشاطك بشكل منتظم.

وهنا مهم تعرف حاجة 👇
ثبات الوزن مش معناه إنك فشلت، ومش معناه إن النظام ما عش قعد ينفع.
الجسم مع الوقت يتأقلم مع النزول والتغييرات اللي صارت فيه.

س: عليش في البداية الوزن ينزل بسرعة، وبعدها يبطى؟

ج: في البداية جزء من النزول يكون بسبب فقدان الماء ومخزون الجليكوجين، ومع وجود عجز في السعرات يكون النزول أسرع.

لكن لما ينقص وزنك، جسمك يقعد أخف، وبالتالي احتياجه للطاقة يقل، وهنا ممكن نفس النظام اللي كان ينزلك في البداية ما عش قعد يعطي نفس النتيجة.

س: يعني الجسم قاعد يحارب في ومعش يبي ينقص؟ 😂

ج: لا طبعًا 😂
الجسم قاعد يتأقلم.

كل ما ينقص الوزن، تقل الطاقة اللي يحتاجها الجسم للحركة والوظائف اليومية، وممكن حتى الحركة اليومية العفوية تنقص من غير ما تحس.

س: وهل المشكلة ديما من السعرات؟ 🍽️

ج: مش بالضرورة.

ممكن مع الوقت تكبر الكميات شوية، أو تزيد سناكات بسيطة، أو تتغير طريقة تحضير الأكل… حاجات صغيرة لكن مجموعها يفرق.

س: والميزان ممكن يوقف بسبب الماء؟ 💧

ج: نعم.

احتباس السوائل ممكن يخفي نزول الدهون، خصوصًا مع زيادة الملح، التغيرات الهرمونية، بعض التمارين، أو حتى اختلاف كمية السوائل في الجسم.

يعني مرات الدهون قاعدة تنقص، لكن الميزان مش مبيّنها.

س: ولو نتمرن مقاومة ونبني عضل؟ 💪

ج: هنا الميزان بروحه ما يكفيش للحكم.

ممكن تخسر دهون وتزيد كتلة عضلية في نفس الوقت، فيبان الوزن ثابت، لكن محيط الخصر ينقص وشكل الجسم يتحسن.

س: شن العلامات اللي تقول إن عندي Plateau فعلًا؟ 🔍

ج: مش مجرد يوم أو أسبوع.

نشكوا في ثبات الوزن لما يستمر الوزن أو القياسات بدون تحسن أكثر من 2–3 أسابيع رغم الالتزام الجيد بالنظام والنشاط.

ونشوفوا كذلك:
👖 الملابس معش توسع زي قبل
📏 محيط الخصر ما عش قعد ينقص
📉 نسبة الدهون ما تتحسنش
💪 ما فيش تحسن واضح في تركيب الجسم

س: وهل الهرمونات والتوتر والنوم عندهم علاقة؟ 😴

ج: أكيد ممكن يكون لهم دور.

التوتر النفسي، قلة النوم، تغير الشهية، وبعض المشاكل الطبية أو الهرمونية ممكن يأثروا في الوزن وفي القدرة على الاستمرار في النزول.

وعشان هكي، ما نقدر نحكم على السبب من الميزان بروحه.

س: إمتى نقول خلاص، لازم نمشوا نردو ع الدكتور اللي بلطها لنا هذا؟ 🧐

ج: لو الثبات استمر لعدة أسابيع رغم إنك ملتزم، أو حسيت إنك تدير كل شي صح ومفيش تقدم، أو ظهرت أعراض زي:

⭕️ إرهاق مستمر
⭕️ انخفاض في المزاج
⭕️ تغير واضح في الشهية
⭕️ عدم استئناف النزول بعد تعديل الخطة
⭕️ أو عندك شك في سبب طبي أو هرموني

هنا الأفضل يكون فيه تقييم شامل.

س: وشن يدير الأخصائي اللي بلطها لنا في الحالة هذي؟ 👨‍⚕️

ج: مش أول حاجة يقولك: “خفف وكال وخلاص ولا انت اكيد تبلد"😂

التقييم يكون من أكثر من ناحية:

🍽️ نراجع النظام الغذائي والكميات
🏃‍♂️ نراجع النشاط والحركة اليومية
⚖️ نشوف هل السعرات المتناولة والمستهلكة متناسبة مع الهدف
💧 نقيّم احتمالية احتباس السوائل
💪 نراجع تركيب الجسم والكتلة العضلية والدهون
🩺 ونشوف لو فيه عوامل طبية أو هرمونية تستاهل التقييم

وبعدها تتعدل الخطة حسب حالة الشخص وهدفه.

والأهم من هذا كله 👇

ثبات الوزن مش معناه إنك فشلت، ومش معناه إنك لازم تجوّع روحك أكثر.

مرات الجسم يحتاج تقييم وتعديل ذكي للخطة، مش عقاب أكثر. ❤️

📌 والحكم ما يكونش من رقم واحد على الميزان… نشوف الوزن، المقاسات، تركيب الجسم، الالتزام، النوم، النشاط، والحالة الصحية ككل.

14/08/2026

التغذية ضمن بروتوكولات التعافي المعزّز بعد الجراحة (ERAS) 🏥🥗

أصبح دور التغذية في الرعاية الجراحية الحديثة جزءًا أساسيًا من Enhanced Recovery After Surgery – ERAS، وليس مجرد مرحلة تبدأ بعد العملية.

الهدف هو تقليل المضاعفات، الحفاظ على الحالة الغذائية، تقليل مدة الإقامة، وتسريع عودة المريض إلى نشاطه الطبيعي.

🔹 أولًا: قبل الدخول للمستشفى – Pre-admission

يُنصح بـ:

• إجراء الفحص التغذوي المبكر (Nutritional Screening) لجميع المرضى، مع إجراء التقييم التغذوي (Nutritional Assessment) وتقديم الدعم التغذوي (Nutritional Support) عند الحاجة.

• تحسين الأمراض المزمنة قبل الجراحة Medical Optimization لتقليل المضاعفات.

• إيقاف التدخين وتقليل الإفراط في تناول الكحول.

الهدف: تقليل المضاعفات وتحسين الحالة التغذوية قبل الجراحة.

🔹 ثانيًا: المرحلة السابقة للجراحة – Preoperative

• تقديم التثقيف للمريض وأسرته Preoperative Education لرفع الالتزام وتقليل القلق.

• استخدام Preoperative Carbohydrate Loading عند ملاءمته، للمساعدة في تقليل مقاومة الإنسولين Insulin Resistance وتحسين الشعور العام وتقليل فترة الصيام.

• تقليل مدة الصيام قبل التخدير وفق البروتوكول المناسب:
الأطعمة الصلبة حتى 6 ساعات، والسوائل الصافية حتى ساعتين قبل التخدير، عند عدم وجود موانع.

• الوقاية من الجلطات Thromboprophylaxis والعدوى Infection Prophylaxis والغثيان والقيء بعد العملية PONV Prophylaxis.

🔹 ثالثًا: أثناء العملية – Intraoperative

من مبادئ ERAS:

• تفضيل التقنيات الجراحية طفيفة التوغل Minimally Invasive Surgery متى كانت مناسبة.

• تجنب الإفراط في استخدام المواد الأفيونية طويلة المفعول Long-acting Opioids واعتماد Multimodal Analgesia.

• المحافظة على توازن السوائل Fluid Balance وتجنب الجفاف أو فرط الإماهة.

• الحفاظ على درجة حرارة الجسم Normothermia.

• تقليل استخدام المصارف الجراحية Surgical Drains والأنابيب الأنفية المعدية Nasogastric Tubes عندما لا تكون هناك حاجة واضحة إليها.

🔹 رابعًا: بعد العملية – Postoperative

وهنا تظهر أهمية اختصاصي التغذية بشكل واضح:

• تشجيع Early Mobilization والحركة المبكرة في يوم الجراحة متى كان ذلك آمنًا.

• البدء المبكر بالسوائل الفموية Early Oral Intake، ثم تقديم الأطعمة الصلبة في يوم الجراحة حسب تحمّل المريض ونوع العملية.

• عدم تأخير التغذية الفموية دون سبب سريري واضح.

• عند عدم إمكانية التغذية الفموية، يمكن اللجوء إلى التغذية المعوية Enteral Nutrition وفق الحالة.

• استخدام المكملات الغذائية الغنية بالبروتين والطاقة Protein & Energy-Rich Oral Nutritional Supplements – ONS عند الحاجة، أو تعزيز كثافة الغذاء Diet Fortification.

الهدف: زيادة مدخول الطاقة والبروتين وتقليل خطر سوء التغذية المرتبط بالمرض Disease-related Malnutrition.

• المحافظة على ضبط سكر الدم Glycemic Control وحالة السوائل Euvolemia.

• دعم عودة وظيفة الجهاز الهضمي Gut Function وتقليل خطر Postoperative Ileus.

• السيطرة متعددة الوسائط على الغثيان والقيء Multimodal PONV Management.

• الاستعداد للخروج المبكر من المستشفى Early Discharge عندما تتحقق المعايير السريرية.

🧠 نقطة مهمة لاختصاصيي التغذية العلاجية

في بروتوكولات ERAS لا يُنظر إلى التغذية على أنها “وجبة بعد العملية”، وإنما كجزء من مسار علاجي متكامل يبدأ قبل الجراحة ويستمر خلالها وبعدها.

والأهم هو أن يكون القرار الغذائي فرديًا حسب:

نوع العملية + الحالة التغذوية + خطر سوء التغذية + وظيفة الجهاز الهضمي + الحالة الأيضية + التحمل الغذائي + الحالة السريرية للمريض.

📌 الخلاصة:
Early Nutrition + Adequate Protein + Early Mobilization + Optimal Glycemic Control = دعم أفضل للتعافي وتقليل المضاعفات

مع ضرورة تطبيق التوصيات وفق نوع العملية وحالة المريض والبروتوكول المحلي، وليس باعتبارها قواعد ثابتة لجميع المرضى.

14/08/2026

متواجد غدا ..

✨💚🤍

13/08/2026

11/08/2026

شوي فضفضة… للمختص وللي مش مختص 👀☕️
منكش فاضي رد بعدين،،،

امس جتني حالة، وقعدنا ناخذوا ونعطوا في الكلام… ومن كلامه واضح إن الراجل مش جديد على موضوع التغذية، عنده تجارب سابقة، وعنده معلومات، لكن يبي حد يرتبله الجو شوي.

بعدها سألني سؤال بصراحة ما توقعتش:

“عليش إنتو يا متاعين التغذية كل واحد يقول حاجة؟!
واحد يقولك السكر فوته، واحد يقولك عادي…
واحد يقولك الكربوهيدرات هي المشكلة، والثاني يقولك لا…
واحد يقولك الدهون تضر، والثاني يطلعلك يقولك الدهون هي الحل!
واحد يقولي فوت حاجه اسمها ابروتين را تدمر كلاك ولاخر يديرلي دايت فل بروتين

تبوا الحق؟؟؟

كان سؤال في محله!

لأن اللي يصير في عالم التغذية مرات يخلي حتى الشخص اللي يقرا ويبحث يقول:

“يا جماعة شن ندير؟ نصدق من؟!” 😂

لكن خليني نقولك حاجة يمكن تستغرب منها:

علم التغذية ما زال علم حديث نسبيًا.

نحن نحكوا على علم دخل في تفاصيل دقيقة في جسم الإنسان، وهو أصلاً متداخل مع الطب، والكيمياء الحيوية، والفسيولوجيا، وعلم الأوبئة، والسلوك، والرياضة… يعني مش موضوع “كل وجبة فيها بروتين وخلاص”. 😅

والأغرب؟

المعرفة الحديثة بالمغذيات الأساسية اللي نعرفوها اليوم تطورت بشكل كبير خلال القرنين الأخيرين، والفيتامينات نفسها ما تمتش بالشكل العلمي الحديث إلا في بداية القرن العشرين.

يعني بالله عليكم…

تبي علم عمره مش طويل نسبيًا، داخل في جسم بشري معقد، ويعطيك إجابة نهائية على كل سؤال؟!

صعبة يا غالي.

وزيد عليها إن جزء كبير من الأدلة الغذائية جا تاريخيًا من الدراسات الرصدية والارتباطات الإحصائية.

وهنا تصير واحدة من أكبر المشاكل:

تلقى دراسة تقول:

“الناس اللي ياكلوا X عندهم خطر أعلى من Y.”

وبعدها مباشرة يطلعلك واحد يقول:

“X يسبب Y.”

هكي لا يا حاج العوضي😂

الارتباط مش معناها السببية.

ممكن يكون فيه عامل ثالث هو اللي لعب الدور، وممكن تكون فيه عوامل سلوكية أو اجتماعية أو صحية مشتركة بين المجموعتين.

وهذا مش معناه إن الدراسات الرصدية 2 بربع

بالعكس، هي مهمة جدًا، وتساعدنا نكتشف العلاقات ونبني فرضيات وأسئلة بحثية.

لكن لازم نعرف شن تقدر تثبت وشن ما تقدرش تثبت.

وزيد عليها…

🔴 اختلاف الأشخاص عن بعضهم.

نفس الوجبة مش بالضرورة تعطي نفس الاستجابة عند كل شخص.

العمر، النشاط، النوم، الحالة الصحية، الأدوية، العادات الغذائية، والعديد من العوامل الأخرى تدخل في الموضوع.

🟡 وزيد إن بعض الدراسات الغذائية تاريخيًا كانت مرتبطة بتمويلات أو تضارب مصالح، ولهذا لازم نقرأ الدراسة نفسها، مش بس نشوف عنوانها.

🟢 وزيد إنك مرات تلقى دراستين ممتازتين لكن نتائجهم مختلفة.

وهنا بدل ما نقول:

“واحد منهم كذاب.”

نسأل:

كيف تصممت الدراسة؟
شن حجم العينة؟
شن مدة المتابعة؟
شن نوع المشاركين؟
شن حجم التأثير؟
وهل النتيجة تكررت في دراسات أخرى؟

وهذا هو الفرق بين اللي يقرأ علم واللي يجمع عناوين دراسات.

والله يا جماعة، مرات نشوف منشور يقول:

“دراسة جديدة تثبت أن…”

نخش نقرأ الدراسة نلقاها على عدد صغير من الناس، أو دراسة رصدية، أو مدتها قصيرة، أو أصلًا ما قالتش الكلام اللي كاتبه صاحب المنشور 😂😂😂😂

العنوان مش دليل.

والدراسة الواحدة مش قرآن منزل.

حتى التوصيات العلمية نفسها تتطور مع تطور الأدلة.

وهذا مش عيب.

بالعكس…

لو العلم ما يغيرش رأيه لما تظهر أدلة أقوى، راهو مش علم من الأساس.

وهنت نجي لنقطة تخص كل أخصائي تغذية:

⛔️ ما تتعصبش لنظام غذائي.

⛔️ ما تدافعش على رأي فقط لأنك قلته من قبل.

⛔️ ما تخليش تجربتك الشخصية تصبح “دليل علمي” يا حفيد العوضي.

⛔️ وما تقولش “العلم قال” إلا لما تكون عارف فعلًا شن قال العلم، و قوة الدليل.

تعلم تقرا الأبحاث.

تعلم الفرق بين:

Correlation و Causation

وتعلم الفرق بين:

Randomized Controlled Trial
Observational Study
Systematic Review
Meta-analysis

واعرف إن قوة الدليل مش كلها درجة واحدة.

والأهم…

اقرأ الرأي اللي يعارضك.

لأن لو كل يوم تقرا بس الناس اللي متفقين معاك، راهو إنت مش قاعد تتعلم…

إنت قاعد تسمع صدى صوتك.

وأنا شخصيًا نعتبر من أجمل الحاجات في التغذية إنك اليوم ممكن تكون مقتنع بفكرة، وبعد فترة تلقى أدلة أقوى تخليك تعدلها.

وهذا مش ضعف.

هذا نضج علمي.

لأن المتخصص الحقيقي مش هو اللي عنده إجابة لكل شيء.

المتخصص الحقيقي هو اللي يعرف يقول:

“الدليل هنا قوي.”

و

“الدليل هنا متوسط.”

و

“وهذا الموضوع ما زال تحت البحث.”

وهذي في رأيي من أهم الجمل اللي المفروض نسمعوها أكثر في التغذية:

“ما نعرفوش بشكل قاطع… لكن حسب أفضل الأدلة المتوفرة حاليًا، نقدروا نقولوا كذا.”

هكي يكون العلم.

مش كل يوم:

“اكتشاف خطير 😱”
“ممنوع نهائيًا 🚫”
“هذا الطعام يقتل!”
“وهذا الطعام يعالج كل شيء!”

يا جماعة ريحونا ومعش تمرضونا ارجوكم 😂

التغذية مش حرب بين الكارب والدهون، ولا بين الكيتو والصيام، ولا بين اللي ياكلوا رز واللي ياكلوا شوفان.

التغذية علم…
والعلم فيه أدلة، وفيه اختلاف، وفيه نقاش، وفيه تصحيح، وفيه أشياء نعرفوها كويس، وأشياء ما زلنا نبحثوا فيها.

وفي النهاية:

الفكرة تنافسها ألف فكرة…
والدليل قدامه ألف دليل…
لكن مش اللي يصرخ أكثر هو اللي يكسب.

اللي يكسب هو أقوى دليل. 🧠🔬

وهذي هي الحاجة اللي نتمنى كل متخصص وكل شخص مهتم بالتغذية يفهمها:

ما تخافش من إنك تغيّر رأيك… خاف إنك تتمسك برأيك بعد ما يتغير الدليل.

غدا صباحًا متواجد في مصحة الأمل للشفاء،
ومساءً في النجاح كلينك.

واللي عنده سؤال، أو رأي مختلف، أو حتى دراسة حاب يناقشها…اقرب جاي ، متاعين العوضي ابعدو غادي.😁🤍