08/08/2026
يسعد صباحكم بكل خير 💊
خلونا نحكوا شوية على تخلّيص الصيدلي بالساعة…
موضوع يمكن هلبا صيادلة يعانوا منه، خصوصًا اللي يخدموا بالساعات.
الصيدلي يخدم بـ 6 دنانير أو 7 دنانير للساعة، ويخدم 8 ساعات، 10 ساعات وحتى أكثر في اليوم…
لكن لما نحسبوها في آخر الشهر، نلقوا إن المبلغ معاش يوازي لا الوقت، لا المجهود، ولا المسؤولية.
الصيدلي مش مجرد شخص واقف في الصيدلية 💊
هو مسؤول على وصفات، جرعات، تداخلات دوائية، نصائح للمرضى، وتركيز طول ساعات الخدمة.
ومع غلاء المعيشة وزيادة المصاريف، 6 أو 7 دنانير للساعة اليوم معاش كيف زمان.
الموضوع مش إن الصيدلي يبي يبالغ في سعر ساعته،
الموضوع إن المقابل لازم يكون عادل مقارنة بالخدمة والمسؤولية والخبرة.
👩🏻⚕️ الصيدلي عنده علم وتعب وسنين قراية وتدريب وخبرة…
ومن حقه تكون خدمته مقدّرة ماديًا ومعنويًا.
يمكن لازم نبدوا نحكوا على الموضوع أكثر،
لأن تحسين قيمة ساعة الصيدلي مش رفاهية…
هو تقدير لمهنة ومسؤولية. 🤍💊
pharmacist HadeeL
