https://www.facebook.com/101259961865584/

يوميات طبيب عام - General Physician Diaries, Tripoli, Tiji (2026)

08/06/2026

📋 🩺
بكري شوي قاعد في مناوبتي جاني شاب عمره 37 سنة، وما كانش جاي أصلاً بسبب القلب 👈🫀
كان جاي يشتكي بس من دوخة خفيفة وتعب عام وحاس إن جسمه مش طبيعي زي قبل

💡 فدرتله كشف وفحص كامل مع D.r "ندى" بغرفة الطوارئ فقلنا خلينا نديروله تخطيط قلب روتيني عادي ونشوفوا شن فيه آخر

📉 وأول ما شفت التخطيط، على طول تفاجئت وشدني الرقم قبل أي شيء
❤️ دقات القلب مته كانت حوالي بين 42 و 44 نبضة في الدقيقة بس.. وهذا الرقم يعتبر منخفض مقارنة بالمعدل الطبيعي عند أغلب الناس.

وسألته مباشرة انت "تاخذ في أي أدوية معينة؟"

قالي:
"إيه دكتور.. ناخذ في كونكور 10mg للضغط"

🔔 هنا قتله بهي كنك مقلتليش من الاول لما نسأل فيك أدرق فيها ليش يا خوي.. وبدت الصورة توضح أكثر عندي
دواء الكونكور (Bisoprolol) متع الضغط هذا معروف وينتمي لعائلة اسمها Beta Blockers
ووظيفته من ضمنها تهدئة القلب وتقليل سرعة النبض متعه ويوصف لمرضى الضغط بشكل كبير وعادي ومعنداش اي مشكلة لكن اوقات مايمشيش مع الي أعمارهم تكون صغيرة

📉 لان من اعراضه عند بعض المرضى انه يسبب بطء زائد في دقات القلب، خصوصاً إذا كانت الجرعة أعلى من الحاجة الفعلية أو إذا الجسم حساس للدواء هذا.

واوقات اتجيك دوخة اوتحس بتعب وإرهاق او عدم ارتياح عام واوقات يجنك إحساس حتى بقرب الإغماء (دوخة)

🩺 طبعاً ما ينفعش نحكم من تخطيط بروحه، لكن في الحالة هذي كان من المنطقي جداً تصرفي اني نطلب منه يراجع العلاج متعه ويعيد تقييم دواء الضغط بالكامل.

لهذا من أول الأشياء اللي خلتني نشك في سبب الأعراض هما هو تأثير الكونكور على دقات القلب، ولهذا قررنا نراجعوا الخطة العلاجية معاه.. ونشوفوا هل النبض يتحسن بعد تعديل الدواء أو لا.. وقررنا فعلاً التعديل ومتابعة النبض والضغط خلال الفترة الجاية

❕ فالرسالة المهمة ليكم
إذا كنتوا تاخذوا في كونكور أو أي دواء من عائلة ال Beta Blockers وحاسين بدوخة أو تعب أو بطء واضح في النبض، ما تهملش الموضوع هذا.. وفي نفس الوقت

❗ما توقفش الدواء بروحكم✋

وراجعوا طبيبك اول حاجة لأنه هو اللي يقدر يحدد إذا كانت المشكلة من الجرعة أو من الدواء نفسه أو من سبب ثاني مختلف تماماً

🧠 لان مرات التخطيط ما يكتشفش مرض جديد لكن مرات بالصدفة يكتشف إن العلاج الي قاعد تاخذ فيه نفسه محتاج مراجعة

🖋️° وإن شاء الله ديما طيبين وفي حفظ الله ورعايته.. .
_____________________________________________

🇱🇾
يوميات طبيب عام - General Physician Diaries🩺

08/06/2026

💔 " ليها سنتين يقولولها عندك قلق ونفسية.. وبالأخير طلعت الغدة هي السبب!" 🦋🩺

كيف حالكم..ان شاء الله يارب اتكون بخير وعافية

اليوم بنحكيلكم على حالة من النوع اللي محير شوي ومش لأنها نادرة طبياً، لكن لأن فيها درس يخص واجدين منا گ أطباء ومن أهلنا اللي ما يعرفوهش.

والقصة بدت بدموع على الباب.. وكانت يوم امس والساعة قريبة من المغرب وأنا طالع من العيادة، لقيت بنت في العشرينات واقفة على الباب ماسكتها أمها في يدها وعيونها فيها دموع وهيا داخلة

وعلى طول انتبهت لوجهها البنت كان واضح فيه إرهاق من النوع اللي ما يجيش من يوم أو يومين كأنه إرهاق مخزن سنين.
فقالتلي أمها بصوت هادي
"يا دكتور، بعد اذنك نبي نكشف بنتي من ثلاث سنين تشتكي من مشكلة مرضية مفهمتهاش مشينا لهلبا أطباء ويقولولنا في نفس الكلام .. قلق وتوتر وخلاص.
وجربنا مهدئات وما ريحتها جربنا إجازة وراحة من العمل وما ريحتها. وتوا هيا رفضت حتى تكمل شغلها وترجع لأنها تخاف بيوم اطيح قدام الناس."

زدت شفت للبنت.. الي كان اسمها "هدى" ماشاء الله عليها بنت طيبة وشابة في عز شبابها ولقيت في عيونها فعلاً شي يشبه الخوف الساكن ويدنها يرجفن رجف خفيف وهي ساكتة.

قلتلهم تمام عمتى "ادخلوا.. نحكوا بالعيادة بهدوء."

👥 "الحوار اللي وضح وغير كل شي"
جلست" هدى" وأمها وبديت نسمع فيهن من طقطق لي السلام عليكم وبكل نبرة واضحة انها كانت تعبانة واجد
"وقالتي امها انها تحس ديما بقلبها يدق بسرعة حتى وهيا قاعدة وما ادير في شي.
وحرارتي ترتفع من غير سبب واضح واوقات ترجف وديما سقعانا وحتى من وزنها نزل واجد في الستة أشهور اللي فاتوا بدون ما يتغير وكالها."

وبعد ما سمعتهن واجد سألتها بالاخير "عيونك تحرق أو تدمعن بدون سبب؟"
استغربت البنت وقالت "إيه والله.. كيف عرفت نا مقتلكش؟"

🔔
طبعاً هنا نا وقفت وسألت هذا السؤال لاني ركزت فيها بعين الطبيب مش بعين الإنسان العادي
ولاحظت ثلاثة حاجات اخرة ما تنلاحظش بسهولة لو ما كنتش دكتور صح وركزت

👈 #أولاً العيون متعها فيهن بياض العين كان ظاهر أكثر من الطبيعي فوق وتحت القزحية، يعني العيون بارزة بشكل خفيف للقدام.
وهذا اللي نسميه طبياً (Exophthalmos أو Proptosis) وهي علامة كلاسيكية جداً في مرض اسمه غريفز تحديداً، لأنه المرض هذا مناعي يخلي الأنسجة خلف العين تتورم وتدفع العين للأمام..
وهذي العلامة بالذات هي اللي فرّقت عندي بين فرط النشاط العادي ومرض غريفز المناعي لأن Exophthalmos ما تصيرش في كل أنواع فرط النشاط هيا خاصة بمرض غريفز في الغالب بس.

👈 #وثاني شي الي ركزت فيه العنق متعها (رقبتها) لقيت فيه انتفاخ خفيف متماثل من قدام ما ينلاحظش للعين المجردة لو ما ركزتش واجد
وعند الجس بي ايدي (اللمس) حسيت بتضخم ناعم ومتماثل في الغدة الدرقية (Diffuse Goiter) وهذا التضخم المتماثل حتى هوا من العلامات المرجّحة لمرض غريفز ومش نتيجة التضخم العقدي.

👈 #وثالث حاجة الي ركزت فيها أثناء حوارنا على الرجفة الدقيقة كانت عندها وطلبت منها تمد إيدها قدامها وتبسطها، وحطيت ورقة صغيرة فوقها
والورقة كانت ترتجف بسرعة خفيفة وهذا اللي نسميه (Fine Tremor) وهو من العلامات الكلاسيكية باقي لفرط النشاط بالغدة

✍️ وطبعاً هنا اكتملت الصورة في ذهني قبل ما نطلب أي تحليل قبل الكشف والي جات اساساً بعدها باش تؤكد شكي مش تكشف لي الحالة ولقيت
🧪- TSH
نازل جداً أقل من 0.01 والطبيعي بين0.4 و4.0، وهذا يعني إن المخ "أوقف الطلبية" لأن الغدة تنتج أكثر من اللازم بواجد

🧪و Free T4 - لقيته مرتفع فوق الحد الطبيعي
🧪و Free T3 - مرتفع هوا الآخر
🧪و TSH Receptor Antibodies (TRAb)
وهذا يعنبر التحليل الحاسم اللي أكد إن المشكلة مناعية، و الجسم ينتج أجسام مضادة تهاجم مستقبلات الغدة وتخليها تشتغل بجنون بدون توقف وطلع مرتفع واجد وهذا هو التأكيد المخبري الي اكدلي مرض غريفز تحديداً

🩻 وصورة الموجات فوق الصوتية (Ultrasound) على الغدة الدرقية حتى هيا أكدت وجود تضخم متماثل في الغدة مع زيادة واضحة في التروية الدموية Increased Vascularity وهي من العلامات الكلاسيكية المرجحة لتشخيص مرض غريفز..

بهي شن اللي كان صاير طبياً مع الحالة بالضبط؟
الي صار ان الغدة الدرقية متع الجسم، عندها تعتبر هيا الي تتحكم في سرعة كل شي، الأيض، ضربات القلب، الحرارة، والمزاج
وفي مرض غريفز، هنا الجهاز المناعي يتمادى ويهاجم الغدة الدرقية بأجسام مضادة خاصة (TRAb) بدل ما تهاجم البكتيريا والفيروسات لانها حست بانها عدو وهذي الأجسام المضادة بطبيعتها تحفز الغدة وتخليها تشتغل بجنون وما تقدرش توقف.

#والنتيجة؟
فيضان من هرمونات الغدة في الدم يخلي الأعراض واضحة
▫️ القلب يدق بسرعة حتى وأنت قاعد (Sinus Tachycardia)
▫️ والجسم يبدأ يحرق طاقة بسرعة فينزل الوزن والكيلوات بدون سبب
▫️ وتجي رجفة دقيقة مستمرة في الإيدين
▫️ وإحساس دائم بالتوتر والقلق والحرارة الداخلية ترتفع وتتعرق وما تتحملش الجو الحامي
▫️ والعيون تبرز لقدام بسبب التهاب الأنسجة خلفها
▫️ والغدة تتضخم من كثرة الجهد والشغل
وكل هذي الأعراض تتشخص بالغلط على إنها "قلق وأعراض نفسية" لأن ما حد فكر يشوف للغدة ويطلب TRAb باش يتأكد قبل ما يرمي الكورة في ملعب التوتر والقلق المزمن

🩺 بهي شن درنا معاها علاجياً؟
✅ بدينا بدواء Carbimazole لوقف إنتاج الهرمونات الزايدة، مع متابعة دقيقة لوظائف الكبد والصورة الدموية الكاملة كل أسبوعين في البداية لأن الدواء هذا نادراً ممكن يأثر عليهم
✅ وأضفنا Propranolol بجرعة بسيطة باش يهدي ضربات القلب ويريح الرجفة ريثما يأخذ Carbimazole مفعوله وهذا البروتوكول المعتمد في إرشادات ATA (American Thyroid Association)
✅ وحولناها لأخصائي الغدد الصماء للمتابعة عنده اكثر وتحديد هل تحتاج في المستقبل علاج باليود (Radioactive Iodine) أو تدخل جراحي (Thyroidectomy) لو ما استجابتش للعلاج الدوائي بعد عام إلى 18 شهر

🕯️وفي نهاية الجلسة
شرحتلها ولأمها كل شي لأن المريض اللي يفهم مرضه يلتزم بعلاجه أكثر بواجد من الي مش فاهم ومتخبط

وللحظة اللي ما قدرتش ننساها بالجلسة كانت بعد ما شخصتها وكتبتلها العلاج.. أمها كانت من أول الجلسة ساكتة، قاعدة على طرف الكرسي، وتراقب في الحوار من غير ما تقاطعنا بكلمة وحدة.
وفجأة شفت دمعتها نزلت بهدوء وقالتلي "بارك الله فيك دكتور.. ربي يفتحها عليك وين ما تمشي"

🫶 وقتها فهمت من دعواتها إن بعض الناس مش محتاجين معجزة طبية على قد ما محتاجين حد يفهم شن الي قاعد يصير فيهم، ويعطيهم أخيراً اسم للوجع اللي عايشين معاه من سنين ولقت جواب بعد ثلاث سنين من الحيرة والخوف والدوران بين العيادات 💔🩺

🧠 والدرس الطبي للزملاء وللمتابعين ولغيرهم لو عندك مريض قاعد شاب وخصوصاً بنت في سن الإنجاب وتشتكي من الأعراض الي ذكرتهن نا فوق.. ما تكتبش "قلق وخلاص" اطلب
TSH + Free T4 + Free T3
وإذا طلعوا مشبوهين أضف عليهن TRAb لتأكيد مرض غريفز موجود ولا
لأن التحاليل TSH وFree T4 تحاليل بسيطة وزهيدة ممكن تغير مسار حياة إنسان كامل.. حتى لو أنت أو واحد من أهلك عايش سنين مع "قلق مش متفسّر" وتحاليل القلب والضغط كلها سليمة..
اطلب تحليل الغدة الدرقية وشوف حالتك لأن مرات الغدة الصغيرة هذي اللي في رقبتك هي اللي قاعدة تحرك في كل هالفوضى من جوا.. فما تستاهلش انك تعيش سنين في تشخيص غلط لهاذا كون واعي وفاهم حالتك كويس.

🖋️ وان شاء الله ديما طيبين.. وفي حفظ الله ورعايته.
______________________________________________

🇱🇾

يوميات طبيب عام - General Physician Diaries🩺

07/06/2026

🔥 النـقرس
"داء الملوك"... "وعقاب التخمة "

📜 مش مجرد "أملاح" عادية وصفه ابن سينا كمرض ينشأ من فضول الدم والصفراء المحترقة… ثم تترسب كالنار داخل المفاصل.

✍ أما ببعض المخطوطات القديمة فكانت تقول
“النقرس هوا ذالك القيدٌ الذي يُكسر به كبرياء الجسد.”
______________________________________________
#النقرس

🇱🇾
يوميات طبيب عام - General Physician Diaries🩺

04/06/2026

📢 "ليش المية الليبية أحلى من التونسية... هل هذا شيء فعلاً كويس؟" 🇱🇾💧🇹🇳 ❕

ركزو معاي شوي أكيد سمعتوا ناس واجد يقولوا "المية الليبية أحلى من التونسية! والحقيقة هنا إن الطعم الحلو هذا مش دايما يكون علامة جودة زي ما يعتقدوا البعض

🧐 والسبب؟
انه فيه جزء كبير من المياه اللي نشربوا فيها اليوم جاية من محطات التحلية مختلفة.. ومحطات التحلية هذي تستعمل في تقنية اسمها التناضح العكسي (Reverse Osmosis) وهي تقنية ممتازة في إزالة الأملاح والشوائب.

#لكن! في المقابل تنزع 🧲 في جزءاً كبيراً من المعادن الطبيعية الموجودة في المية زي الكالسيوم والمغنيسيوم والبوتاسيوم
ولهذا علاش تلقى طعمة المية أخف وأحلى وأسلس في الشرب

❔ بهي هل هذا شيء كويس دكتور ؟
مش بالضرورة يكون كويس او لا.. لأن المية الطبيعية عادة تحتوي على كميات معتدلة من المعادن الذائبة حتى لو تمت تحليتها، وهي اللي تعطيها الطعم المعروف للنية وتساهم في توفير جزء بسيط من احتياجات الجسم اليومية.

لهذا تلقى في بعض المناطق التونسية مثلاً مجموع الأملاح الذائبة (TDS) أعلى من ليبيا فتكون المية عندهم أثقل شوية في الطعم واعتبرها بتكون الأقرب شوي للمياه المعدنية الطبيعية بالميزة الي فيها

⚠️ #لكن!
هنا في نقطة مهمة حاب انوضحها وهيا قلة الأملاح في المية ما تعنيش بالضرورة أنها مية ضارة أو غير صالح للشرب، ولا أن زيادة الأملاح معناها ديما أنها أفضل من الحلوة.. لا
المشكلة هنا لما يتحول الموضوع هذا إلى اعتقاد إن كل ما كانت المية أحلى معنها أفضل واجود ..
أو
كل ما زادت الأملاح معنها أصح.. والحقيقة العلمية بتكون أعقد من هكي بشوية لو بنفصلوها تقنية وطبياً اكثر.

لان الجسم أساساً يتحصل ويدير في معادلة دقيقة على أغلب احتياجاته وياخذ في المعادن عن طريق الغذاء اليومي ويوازن بينهم فمش من المية بس ياخذ.

🩺 بهي شن الأفضل نشربوا دكتور؟ مية التحلية النظيفة والمراقبة صحياً... ولا مية المعدنية الموثوقة؟

💧بالنسبة لي مية التحلية العادية للشرب اليومي والتوفير تعتبر كويسة ومفيهاش مضرة لكن متكونش طعمتها حلوة واجد..
💧أما المياه المعدنية الموثوقة ممتازة علاش لانها ممكن توفر ليك معادن أكثر بس.
#لكن الأهم في الحالتين هو سلامة المية ونظافتها قبل أي شيء آخر.

✍️ الفايدة..
✔️ المية الي طعمته حلوة وطرية واجد هذي - غالباً بتكون تحتوي على أملاح أقل
✔️ والمية الي طعمتها اتكون ثقيلة او قوية شوي هذي - غالباً بتكون تحتوي على نسبة معادن متساوية او أكثر شوي

وجودة المية اكيد هنا ما تتحددش بالطعم متعها بس الأهم زي مذكرت هو (سلامة المية وخلوها من الملوثات) مع وجود توازن معقول في المعادن فيها والي حتى حتلقوها مكتوبة على أغلب ظهر العبوات بالنسبة

❕لان مرات الشي اللي نحسبوه ميزة لأنه "حلو في الطعم" يكون بس مجرد دليل على أن المعادن فيه أقل من المتوقع.

🖋️° وإن شاء الله ديما طيبين.. وفي حفظ الله ورعايته.
______________________________________________

🇱🇾

يوميات طبيب عام - General Physician Diaries🩺

04/06/2026

#سويسرا🏴
بكل حزن بلغنا بانه تم العثور يوم امس على جثمان الدكتورة الليبية 🩺
التي فقدت في جبال الألب السويسرية، الشهر الماضي وحاليا الشرطة تقوم بتحليل الجثمان للتأكد من هويتها🪪

وبحسب ما ذكر اخ الدكتورة بانهم وجدو الجثمان فعلاً في المسار الجبلي وسبب الوفاة يرجح انه نتيجة السقوط من ارتفاع عالي جدا عند رحلتها.

تعازينا الحارة من يوميات طبيب عام - General Physician Diaries لكافة عائلتها ونسأل الله أن يرحمها ويغفرلها ويسكنها فسيح جناته، ولا حول ولا قوة إلا بالله العلي العظيم ولا نقول إلا ما يرضي الله..

▪️ إنا لله وإنا إليه راجعون ▪️

03/06/2026

📋
"تصدق يا دكتور.. نحس في روحي كأني عايشة في حلم!"

(تبدد الشخصية والواقع 🧠
(Depersonalization/Derealization) 👥
خلال شهر واحد بس، جوني في العيادة أكثر من 4 حالات يشكوا من نفس "الوجع الغريب".. وجع مش في الجسم وجع في "الروح والوعي"
واحد يقولي: "يا دكتور، نحس في روحي كأني نسمع في صوت غريب من بعيد" ، والثانية تقول: "نشوف في أهلي قدامي، بس نحس فيهم بعاد، كأني نتفرج على فيلم مش عايشة معاهم!"والثالث يحس كأن مشاعره "مخدّرة" ويراقب في نفسه من برا 🥺💔

أغلبهم جوني مرعوبين، يحسابوا في روحهم خلاص "فقدوا عقلهم" أو بدوا يخشوا في طريق الجنون.. لكن الحقيقة غير هكي تماماً وفي حتى واجد رسائل من ناس مستغربة من الاسم وتسأل شن يعني الواحد يتبدد؟ وشن هيا أعراضه؟
"وبرغم إنه مش مشهور واجد إلا إنه أكثر انتشاراً مما تتصوروا"..
والحقيقة حتى نا كيفكم أول مرة لما شفت الحالات هذي استغربت من وصف المرضى لهاذا الاضطراب لانه نادر فعلاً

المهم من الحالات الأربعة جتني شابة في أواخر العشرينات من عمرها لا عندها سكر، ولا ضغط، ولا مشكلة واضحة في التحاليل🧾

وقعدة قدامي وقالت
"يا دكتور بالله عليك فهمني شن صاير فيا بالضبط لاني انحس في روحي بنـنجن.."

- قلتلها خير إن شاء الله..!
قالتي..
"نحس إن الناس اللي قدامي هم نفسهم .. لكن كأن بيني وبينهم زي الحاجز بمعنى الكلمة"
وقالتلي..
"حتى صوتهم نسمعه عادي لكن كأن فيه مسافة بيني وبين الدنيا كلها"

وسكتت شوي بعدها كملت..
"قالتي..
توا كيف بنفهمك؟ معناها انحس كأني نتفرج على حياتي من بعيد زي فيلم وكأني موجود ومش موجود في نفس الوقت بننجن دكتور "
وأوقات حتى صوتي نحسه مش صوتي، وكأن شخص ثاني هو اللي يعيش حياتي كاني ملبوسة ولا شنو معاش فهمت خيرني

⚠️ طبعآ هذا مش "جنون" أبداً لان أغلب الناس الي يجيهم الشعور او الإحساس هذا تخاف وبعضهم يحسب روحه فعلاً فيه مس ولا بدا يفقد في عقله وبعضهم يخاف ممكن ان يكون عنده مرض خطير في المخ

#لكن المفاجأة إن أغلب هالحالات طبياً لا عندها جنون راكبتها، ولا فقدان عقل، ولا أورام لاسمح الله بالمخ.

🧠 بهي شن اللي قاعد يصير بالضبط ؟
اللي يصير "تعب أعصاب" وإن الدماغ متعنا لما يتعرض لفترات طويلة من القلق أو الضغوط النفسية أو الصدمات سوى عاطفية او حياتية أو سهر مفرط، مرات يدخل في وضعية دفاعية غريبة جداً كأنه يضغط زر اسمه
"فصل المشاعر شوية" لين يقدر يتحمل يعني بدل ما يطفّي الخطر.. يطفّي الإحساس متعك او الشعور وهذا بالطب نسموه Depersonalization أو "تبدد الشخصية"

💡وهني المريض لما يكون في حالة تبدد الشخصية يكون عارف إن الإحساس هذا غلط وعارف إن أهله هم أهله وعارف إن المكان هوا مكانه
#لكن الإحساس متعه الداخلي هو اللي متغير تماما عن الواقع.. 💭
#يعني المشكلة مش في الواقع نفسه المشكلة في طريقة إحساسه بالواقع عنده مش نفسها

✍️ وهذا اعتبره أكبر فرق بينه وبين الأمراض الذهانية والجنون..
لأن مريض الذهان يفقد الاتصال بالواقع تمامآ أما مريض تبدد الشخصية فهوا يعتبر #متألم 💔
لأنه مازال مدرك للواقع لكنه ما عادش يحسه بنفس الطريقة الي كلنا انحسوا بيها

🩺 وللأمانه على طول عرفت إنها تعاني من تبدد شخصية ومش حاجة ثانية؟"
والتشخيص ما جاش من عرض واحد ولا من كلمة وحدة قالتها المريضة
التشخيص جاء من القصة كاملة تعمقت فيها ومن طبيعة الأعراض، ومن مدة استمرارها ومن كونها كانت فاطنة ومدركة للواقع هذا بشكل كامل..
وبعد ما استبعدت أسباب ثانية ممكن تعطي نفس الإحساس زي نوبات الهلع الي حكينا عليها امس، والقلق القوي والاكتئاب، واضطرابات النوم، وبعض المشاكل العصبية و الهرمونية حسب تحليلاتها الي شفتهن والحالة

لأن الطب مش حفظ أسماء الأمراض وخلاص.. لا بلعكس الطب هو إنك تجمع القطع🧩 الصغيرة كلها وتفرق بينها لين تكتمل الصورة قدامك باش تعطي النتيجة

💊 بهي D. r شن العلاج او الشي الي برائيك يكون و كيف نطلع من الدوامة هذي؟
قلتها
#أول خطوة لازم عليك او على الشخص الي عنده الحالة هذي يعرف إنه مش مجنون اهم شي

#وثاني خطوة لازم عليك توقفي البحث اليومي عن اعراضه في قوقل او غيره.. لأن البحث المتكرر يخلي الدماغ مركز على الأعراض أكثر ويزيد الخوف منها

#وثالث خطوة واعتبرها الاهم هي انك تنظمي نومك وتخفف من السهر والعكسة على النت بالساعات وخففي المنبهات قهوة والشاهي ومشروبات الطاقة وغيرها وابعدي على الضغط النفسي وحاولي انك تتجنبي المشاكل والضغوطات لفترة كافية واعطي عقلك فرصة يرتاح ويسترجع توازنه

#ورابع خطوة لو الحالة مأثرة على حياتك أو طولت معاك هني لازم من انك تراجع طبيب نفسي مختص لأن العلاج موجود والحالة قابلة للتحسن بإذن الله
خطوة بخطوة سواء بالعلاج النفسي المعرفي السلوكي (CBT)
أو بأدوية مضادات الاكتئاب الي تعالج القلق المصاحب للحالات مثل بعض أدوية SSRIs زي Escitalopram أو Sertraline الي ينظموا كيمياء الدماغ حسب كل حالة وتقييم الطبيب والمدة لأن العلاج مهوش دواء واحد بس يناسب الجميع بيكون مختلف حتى بعدد الجرعات

🫶
ورسالتي الاخيرة ليها ولكل شخص يمر بالإحساس هذا بنقوله أنت مش قاعد تفقد في عقلك بلعكس أنت بس مرهق أكثر مما تتصور ومحتاج بس من يسمعك ويهديك ويطمن قلبك
وصدقوني.. الإحساس هذا غالباً بيكون علامة إن جهازك العصبي وصل لمرحلة إنهاك كبيرة وعقلكم اختار الانفصال هذا المؤقت بدل ماكان حيمشي بيك لاسمح الله لانهيار كامل
لانه يحتاج لراحة وعلاج أكثر من كونه دليل على انكم فقدتوا عقلكم
ومهما كان الإحساس غريب أو مخيف.. تذكروا ديما إن آلاف الناس مروا بنفس التجربة وتعافوا منها ورجعوا يعيشوا حياتهم بصورة طبيعية وقت ما فهموا مشكلتهم

🖋️° وإن شاء الله ديما طيبين.. وفي حفظ الله ورعايته.
_____________________________________________

🇱🇾

يوميات طبيب عام - General Physician Diaries 🩺

03/06/2026

📢 من منكم يعرف شن هوا اضطراب 👥

#لعلمكم ❕
حتى هذا الاضطراب 👥 منتشر في بلادنا 🇱🇾 فخلال شهر واحد بس، جوني للعيادة أكثر من 4 حالات يشكوا من نفس الأعراض المرتبطة بالاضطراب الغريب هذا..🧠🧐

!!

02/06/2026

"قالي يا دكتور.. شن يصير لو واحد مات من الخوف؟" 💔

هي تعالو مع بعض نكتشوفوا سر اخر من أسرار الأمراض العصرية وقت ما يكذب عليك جسمك.. وانت تصدقه..!

البداية والله العظيم، هذا السؤال سألني عليه شاب 30 سنة وهو جا قاعد قدامي اليوم الصبح في الطوارئ.. مش مجازاً ولا هوا يضحك، ولا يبي يغير جو.
كان يسأل بجدّ، وعيونه تحكي قصة رعب عاشها وما توصفهاش الأوراق🕯️

وجهه كان أصفر زي الليم، يديه يرجفن ويعرقن، وصدره يطلع ويهبط كأنه جاي من معركة خاسرة مش مجرد قاعد في الطوارئ.
وقالي بصوت داهش، وكأنه يصارع الموت في كل كلمة

"دكتور بالله عليك جاوبني.. هل الإنسان يقدر يموت من الخوف؟"
سكتت شوي الحق .. لأن الحقيقة؟
في ناس واجد تسأل على السكر والضغط والكوليسترول، لكن قليل اللي يسأل على الوجع اللي ما يطلعش في التحاليل فاستغربت..!
كان يقصد الوجع اللي يسكن في "الخنة" والروح الوجع اللي يخليك وسط هلك، لكن حاس روحك بروحك في غابة.. وسط الضحك، لكن من داخلك خوف.. ترقد، وتصحى كأنك ما رقدتش..
وتقضي يومك وليلك كله تدور في "أعراض جديدة لمرضك" في قوقل وكل ما تقرأ على مصيبة تقول "أكيد هذي هي اللي عندي.!" 🥺

هديت من روعه، وقمعزت معاه ساعة كاملة بالطواري وسألته "شن تحس وقت النوبة بالضبط ؟احكيلي خنقتك، نبي نفهمك."
وقالي بمرارة، وعيونه تدور في الفراغ كأنه يستحضر المشهد

"نحس في قلبي بيوقف..ومرة يدق بسرعة كأنه بيهرب من صدري، ومرة نحس نفسي مش مكفيني، كأني بننخنق ومرة نحس إني بنطيح، والدنيا تدور بيا
والأوعر منها، مرلت يجيني إحساس قوي ومؤكد إني حنموت توا.. وخلاص هذي النهاية!"

هنا سألته السؤال اللي غير مسار الجلسة كلها، وخلاني نفهم ونطلع على الحالة كلها.
"قداش ليك مرة جاك الإحساس هذا؟"
قالي "من سنتين يا دكتور، سنتين وأنا في العذاب هذا "

هنا نا ابتسمت "بفطنة" الطبيب اللي شاف واجد حالات وقلتله بهدوء باش يطمن
"بهي لو كان كل مرة تحس إنك حتموت، وعدت عليك هالسنتين وأنت مزال قدامي، وروحك فيك، معناها الظاهر فيه حد قاعد يكذب عليك!"
رفع راسه بسرعة، وعيونه وساعوا، وكأنه لأول مرة يسمع الكلام هذه "شن تقصد يا دكتور؟"
قلتله، وأنا انحاول في اللحظة هذي نثبت عيني في عينه "نقصد.. هل قلبك هو اللي يكذب عليك؟ ولا جسمك؟ ولا الخوف هو اللي داير فيك هكي؟ جاوبني.... مردش 😔
قتله ركز معاي المعركة هذي اللي تخوض فيها كل يوم.. مش مع قلبك، ولا مع رئتك، ولا مع مخك ولازم تقتنع بالشي هذا وان المعركة كانت مع الخوف نفسه!" 🧠⚡

💡 لان الحقيقة الطبية اللي نبيكم تكونوا "فاطنين" ليها وتوصل لقلوبكم قبل عقولكم
اللي تحسوا بيه هذا، نسموه في الطب نوبة هلع - Panic Attack) هو مش مرض في القلب، ولا في الرئة، ولا في المخ.
هو "إنذار كاذب" من جهازكم العصبي فتخيلوا معايا إن جسمك فيه "جهاز إنذار" زي اللي في الحوش ووظيفته يحميكم من الخطر. لكن مرات، الجهاز هذا "يخرب" ويشتغل من غير سبب.
ويبدا يطلق في صافرات الإنذار، ويضخ هرمونات التوتر (الأدرينالين والكورتيزول) في جسمك بكميات هائلة، كأن فيه أسد بيجري وراكم!
هذي الهرمونات هي اللي تخلي قلبكم يدق بسرعة، وتخليكم تعرقوا، وتحسوا نفسكم مش مكفيكم، وتخلي يديكن يرجفن

🧠 و عقلكم يفسر هذي الأعراض على إنها خطر حقيقي، وإنك بتموت. لكن الحقيقة؟ نوبة الهلع، برغم كل رعبها، نادراً جداً ما تقتل إنسان لعلمكم وهي مجرد "عاصفة أدرينالين".. عاصفة خوف.. عاصفة خلل بالإنذار متع الجسم سموها زي ماتبوا !

والمشكلة الأكبر إنك كل ما خفت منها أكثر، زادت قوتها أكثر وتدخل في حلقة مرعبة، كأنك محبوس في دوامة من
خوف + أعراض جسدية مرعبة + خوف أوعر من الأعراض + أعراض اخرى أشد واشد.
لين تقتنع إنك مريض بمرض خطير، برغم أن المشكلة الحقيقية هي أنك وليت "خائفاً من الخوف نفسه"

💊"فكيف نسيطروا على العاصفة هذي؟".. في عندكم عدة خطوات عملية بسيطة وعلاجية
اول حاجة وقت ما تهجم عليك النوبة، لازم تكون "فاطن" إنك محتاج تهدي "السيستم" العصبي يعني اتغير قعدتك وتسند ضهرك على الحيط وترخي اكتافك وادير تمارين التنفس (Box Breathing) تنفس ببطء (4 ثواني شهيق 4 ثواني واحبس التفس، 4 ثواني زفير) وبهذا تبعت إشارة فورية للمخ إن "ما فيش خطر". .

اما العلاج الدوائي (طبعاً لازم يكون تحت إشراف طبي)
وقت الطوارئ نستخدموا أوقات مهدئات سريعة المفعول زي مدرت معا الشاب من عائلة (Benzodiazepines) مثل "الألبرازولام" (Alprazolam) بجرعة بسيطة جداً عند اللزوم بس باش نكسروا حدة الرعب هذي

اما لو استعصيت هنا العلاج الجذري لو الحالات تكررت الأفضل هو استخدام أدوية تنظم "السيروتونين" في الدماغ (SSRIs) مثل "الإسيتالوبرام" (Escitalopram)؛ هذي مش مهدئات لحظية، بلعكس هذي تعتبر "إعادة ضبط" لجهاز الإنذار باش ما يشتغلش من غير سبب، وهذي للأمانة تبي وقت وصبر باش اتشوف النتيجة

وتذكروا ديما الدواء هو "عكاز" يساعدك لين توقف على رجليك، لكن الحل الحقيقي يبدأ بفهمك للمشكلة اساساً ومواجهتها بقلب قوي✌️

🫶 فرسالتي ليكم من القلب، ومن عمق التجربة جسمك مرات "يخونك" في التعبير، ويعطيك إنذار مخادع عادي جدآ وما تصدقش كل شي يحسه جسمك وقت الخوف. أنت وهوا وهيا جسكمن سليم، وقلبكم قوي، لكن روحكم بس، محتاجة "هدنة" وعقلكم محتاج "إعادة برمجة" مش اكثر

والطب مش بس دواء، الطب هو إنك تفهم الروح قبل الوجع ولعبة العقل وتعرفوا كيف تسيطروا عليها🛡️

🖋° وان شاء الله ديما طيبين.. وفي حفظ الله ورعايته.. .
______________________________________________

🇱🇾
يوميات طبيب عام - General Physician Diaries🩺

02/06/2026

عن أم أيمن رضي الله عنها، إنها (غربلت الشعير الدقيق🌾) وعملت منه رغيف للنبي ﷺ فقال لها > «رُدِّيهِ فِيهِ، ثُمَّ اعْجِنِيهِ»
يعني رجّعي النخالة (الردة) اللي اتشالت من الدقيق واعجنيه بيها مرة اخرى.!
_____________________________________________

02/06/2026

❕نوبة الهلع (Panic Attack) من أكثر التجارب النفسية رعبْ.. ومؤلمة جدًا

في العيادة، شفت واجد مرضى يعتقدو في أول النوبة أنهم بيموتو ولا عندهم جلطة قلبية، ضيق نفس، دوخة، وعرق ورجفه.. وبعدها يكتشفو أنها كانت مجرد نوبة هلع.

#يتبع بمنشور الليلة ...
_____________________________________________
🧠
#القلق ‎
‎

#الخفقان 🇱🇾
يوميات طبيب عام - General Physician Diaries🩺

يوميات طبيب عام - General Physician Diaries

08/06/2026

08/06/2026

07/06/2026

04/06/2026

04/06/2026

03/06/2026

03/06/2026

02/06/2026

02/06/2026

02/06/2026

Address

Website

Alerts

Shortcuts

Share