03/12/2025
💉 Inona ilay vaksiny vaovao terena ataon'ny tovovavy gasy ?
💉 Tsy maintsy atao ve ?
💉 Tsy hatahorana ?
💉 Tsy natao hamonoana ny taranaka gasy indray ve izany ?
💉 Vaksiny anti-HPV no resahintsika androany.
🦠 HPV = Human PapillomaVirus
🦠 Inona izany ? Aretina ve ?
Ny HPV dia otrikaretina (virus) izay misy karazany 200 be izao. Mifindra amin'ny alalan'ny firaisana ara-nofo izy io. Tsy voatery hoe ilay firaisana ara-pomban-drazana fa mety mifindra na miray amin'ny lava-body, na minono, na mifampikasokasoka fotsiny aza ny taovam-pananahana. Ka rehefa manomboka miray dia mety efa mahazo karazany 1 farafahakeliny.
👄 Inona no hatahorana amin'io HPV ?
Mety ho maty ho azy izy afaka 1 na 2 taona taorian'ny nidirany ny vatany. Fa misy karazany kosa mety mahatonga homamiadana, indrindra ny homamiadan'ny vozon'ny tranon-jaza, sy ny homamiadan'ny vava sy ny tenda raha tia minono taovam-pananahana.
🧒 Izany hoe misy koa izany ny lehilahy dia afaka mamindra amin'ny vehivavy ?
Mety misy azy daholo na ny lahy na ny vavy.
💉 Inona no fomba fanefitry ny HPV ?
Vaksiny ny voalohany indrindra. Efa atao maimaimpoana izy io eto Madagasikara (manomboka desambra) : eny amin'ny CSB, hopitaly sy any am-pianarana. Amin'ny tovovavy 9 hatramin'ny 14 taona, izay mbola tsy nanao firaisana hatrizay.
👧 Fa maninona no 9 taona hatramin'ny 14 taona ?
Raha ny nodinihin'ny mpikaroka tany ivelany dia hoe eo hono ny zazavavy no mbola tsy mahalala lehilahy. Raha ny hevitro manokana, efa taraiky be ilay 14 taona raha eto Madagasikara. Efa maro ny tovovavy 13 na 14 taona, efa reny. Misy aza 12 taona efa niray. Fa mbola ho ahitsy hono io taona io any aoriana any e !
Raha ny tena marina, azo atao foana io vaksiny io ho an'ny tovovavy latsaky ny 19 taona.
🔞 Fa maninona no mbola tsy nanao firaisana ?
Araka ny fanazavana efa nomeko : mety hahazo ny HPV vao manomboka manao firaisana. Ny vaksiny dia natao hiarovana fa tsy hanasitranana.
🧪 Dia ahoana izany raha efa niray ?
Ny fitiliana ny homamiadan'ny vozon'ny tranon-jaza no tsara atao, sy fianarana miaro tena amin'ny homamiadana. Fa raha ny hevitro manokana, maro ny tovovavy handainga hoe mbola virijiny noho ny fahatahorana ny ray aman-dreny hoe efa niray sahady anefa vao 12, 13 na 14 taona. Dia ahoana re ny handaminanareo an'izay ?
🔞 Dia ahoana ary ny fiarovana azo atao raha toa ka tsy te ho voan'ny homamiadana raha toa ka efa nanao firaisana ?
🍆 Tsara raha zazalahy efa mba voafora no hiraisana. Ny filahiana izay efa voafora tsy afaka mitahiry aretina any anatin'ny mivalombalona any.
🍆 Mila manao kapôty na fimailo isaky ny miray. Sady miaro amin'ny fifindran'ny HPV iny, no miaro amin'ny aretina hafa azo avy amin'ny firaisana, ary miaro amin'ny vohoka tsy niriana.
❤️ Manana fitondran-tena ara-pananahana milamina fa tsy mikorontana. Izany hoe : tsy maro olona hiraisana, tsy miray amin'olona maro olona hiraisana, tsy miovaova olona hiraisana. Ny tena tsara aza tsy miray raha tsy efa fantatra mialoha ny fahasalamana.
🧪 Manao fitiliana ny homamiadan'ny vozon'ny tranon-jaza isaky ny 3 taona ho an'ny vehivavy 25 hatramin'ny 29 taona, ary isaky ny 5 taona ho an'ireo izay 30 hatramin'ny 65 taona raha négatif ny valiny.
💊 Tsaboina ny aretina azo avy amin'ny firaisana raha toa ka misy.
📅 Fa maninona no manao fitiliana ny homamiadan'ny vozon'ny tranon-jaza matetika ?
Raha hita mialoha ny homamiadana dia mora tsaboina. Ary tsy dia tena lafo ny fitsaboana. Tadidio fa 10 hatramin'ny 30 taona aorian'ny nidiran'ny HPV ao anaty vatana vao mety hisy homamiadana ilay vehivavy.
Raha efa niparitaka ny aretina dia hatahorana tsy ho sitrana intsony fa fanenana ny fijalian'ilay marary sisa no azo atao.
🧒 Fa maninona no tovovavy ihany no atao, kanefa ny tovolahy koa mety hamindra ?
Izay no fandaminana misy. Fa raha ny tena marina, tsara atao io vaksiny io koa ny tovolahy 11 hatramin'ny 14 taona. Mba hiarovana izay hiray iaraka aminy : na lahy io na vavy.
🌡️ Inona no mety hitranga rehefa avy nanao vaksiny anti-HPV ?
Mitovy ny vaksiny hafa ihany. Mety hanaintaina ny faritra notsindromina, na manavy. Izay no antony tsara hanomanana fanafody fanalana fanaintainana sy fampidinana hafanana aorian'ny nanaovana azy.
💪 Aiza no tsindromina ?
Ny sandry no hanaovana ny vaksiny.
💉 Impiry no manao ilay vaksiny ?
In-1 mandeha monja raha izy ity.
🎤 Mbola tsy ampy ve ny nolazaiko tato ? Mbola misy fanontaniana manitikitika momba azy io ve ?
📌 Mentionnéo ny namana fantatrao mba hahalalany ny mahazava-doza ny finonoana taovam-pananahana.
▪
🩺 Minoharifidy
🩹 Hanampy anao aho amin'ny torohevitra rehetra momba ny fahasalamana.
💌 Miandry ny fanontaniana manitikitika anao aho ao amin'ny hafatra miafina (message privé na mp).
