Myanmar Haemophilia Patient Association

30/04/2026

ဒုတိယ ပိုင်းမှာတော့...
(1) သွေးခဲဓာတ်အမျိုး အစားတွေရယ်
(2)ပြန်လည် ဟန်ချက်ညီစေတဲ့ ပစ္စည်းတွေ
(3)သွေးခဲဓာတ်နဲ့ ပုံစံတူ ပစ္စည်းတွေ
(4) အင်ဟီဘစ်တာလို့ခေါ်တဲ့ သွေးခဲဓာတ်ကို အလုပ်မလုပ်အောင် လုပ်ပေးတဲ့ ဓာတ်
စတဲ့ စိတ်ဝင်စားဖွယ်ရာ အကြောင်းအရာတွေ ကို ပြောပြ သွားမှာပါ။

24/04/2026

ဒီတခေါက်မှာတော့ သားသား မီးမီးတို့ ကိုယ့်ရောဂါ အကြောင်းကို လွယ်လွယ်ကူကူ ရှင်းရှင်းလင်းလင်း သိနားလည်စေဖို့ ဟီမိုဖီးလီးယား ရောဂါ အကြောင်းကို ပထမပိုင်း ၊ ဒုတိယပိုင်း ပိုစ့် ၂ ခု ခွဲပြီး ပုံလေးတွေနဲ့ ရှင်း ပြထားပါတယ်။
အခု ပထမပိုင်း မှာတော့
(1)သားသားမီးမီးတို့ ခန္ဓာကိုယ် ထဲက သွေးကြော လေးတွေ ဘယ်လိုရှိနေတယ် ဆိုတာရယ်၊
(2)ဒါဏ်ရာရရင် ဘယ်လို သွေးယို လာတယ်
(3) ဒါဏ်ရာ အမျိုးအစားရယ်
(4) ဒါဏ်ရာရ ရင် အရင်ဆုံး ဘာလုပ်ရမလည်း ဆိုတာ နဲ့
(5) သွေးခဲ ဓာတ်ဆိုတာ ဘာလည်း ဘယ်လို အလုပ်လုပ်လည်း ဆိုတာ လေးကို ပုံလေးတွေ နဲ့ ရှင်းပြထားပါတယ်။

ဒုတိယ ပိုင်းမှာတော့ သွေးခဲဓာတ် အစားထိုး သွင်းပြီးဘယ်လို ကုသလည်း ဆိုတာလေး ထပ်ရှင်းပြသွားမှာ ဖြစ်လို့ ဆက်ဆက် စောက့်ကြည့်ပေးနော်...

**ပါ​မောက္ခဦးစိန်ဝင်းနဲ့ ​သွေးမတိတ်လူနာအသင်း ဥက္ကဌ ​ဒေါက်တာ​ဇော်ဒန်တို့ ပူး​ပေါင်းဘာသာပြန် တင်ဆက်ပါတယ်။

22/04/2026

မိန်းက​လေးငယ်များနဲ့ အမျိုးသမီးများမှာလဲ သွေးမတိတ်​ရောဂါ ဖြစ်တတ်ပါတယ် (၄) ​

ပါကစ္စတန်နိုင်ငံမှ ​ဒေါက်တာ တဟီရာ ဇာဖာရဲ့
"မိန်းက​လေးငယ်များနဲ့ အမျိုးသမီးများရဲ့ ​သွေးမတိတ်​ရောဂါ ရှာ​ဖွေကုသ​ရေးမှာ မမြင်ရနိုင်​သော ရုန်းကန်ရမှုများအ​ကြောင်း" ​ဆွေး​နွေးချက် ​နောက်ဆုံးအပိုင်းကို ဆက်လက်မျှ​ဝေလိုပါတယ်။

မိန်းက​လေးငယ်များနဲ့ အမျိုးသမီးများရဲ့ ​သွေးမတိတ်​ရောဂါ ရှာ​ဖွေကုသ​ရေးမှာ ဘာ​တွေက အတားအဆီးဖြစ်​နေသလဲ ဆန်းစစ်ကြည့်တော့ အချက် ၄ ချက်ကို သွား​တွေ့ပါတယ်။
* အကွာအ​ဝေး - အချို့​ဒေသ​တွေမှာ ​အနီးဆုံး ရောဂါ ရှာ​ဖွေစစ်​ဆေးနိုင်မယ့်​နေရာနဲ့ ​ဝေးကွာနေတာဟာ ​ရောဂါ​စော​စောသိနိုင်​ရေးမှာ စိန်​ခေါ်မှု တခုဖြစ်​စေပါတယ်။
* အချိန်နဲ့ ​ငွေ​ကြေး - အထူးကုနဲ့ ပြခွင့်ရဖို့ ၊ ကုသခွင့်ရဖို့အတွက် မိသားစုမှာ အချိန်​ပေးရတာ၊ ​ငွေ​ကြေးကုန်ကျမှုရှိတာ​တွေဟာလဲ ရောဂါ​စော​စောသိနိုင်​ရေးမှာ စိန်​ခေါ်မှု တခုဖြစ်​စေပါတယ်။
* ရိုးရာယဥ်​ကျေးမှုအရ နှုတ်ဆိတ်​နေခြင်း - ရာသီ​သွေးခြင်းနဲ့ ပါတ်သက်ပြီး ယဥ်​ကျေးမှုဆိုင်ရာ တားမြစ်ထားခြင်းများ​ကြောင့် မိန်းက​လေးငယ်များနဲ့ အမျိုးသမီးများမှာ ပွင့်ပွင့်လင်းလင်း​ပြောဖို့၊ အကူအညီ​တောင်းဖို့ ခက်ခဲ​စေတတ်ပါတယ်။
* ​ရောဂါရှာ​ဖွေနိုင်စွမ်း အကန့်အသတ်ရှိမှု - ​နေထိုင်ရာ​ဒေသရဲ့ ဓါတ်ခွဲခန်းများဟာ ​သွေးမတိတ်​ရောဂါဆိုင်ရာ စစ်​ဆေးမှုများကို ပြည့်ပြည့်စုံစုံ မစစ်​ဆေးနိုင်ခြင်းဟာလဲ ရောဂါ​စော​စောသိနိုင်​ရေးမှာ စိန်​ခေါ်မှု တခုဖြစ်​စေပါတယ်။

မိန်းက​လေးငယ်များနဲ့ အမျိုးသမီးများကို ကြည့်ပါ။ နား​ထောင်​ပေးပါ။ ယုံကြည်​ပေးပါ။
မိန်းက​လေးငယ်များနဲ့ အမျိုးသမီးများမှာ ရာသီလာချိန်၊ ကိုယ်ဝန်​ဆောင်ချိန်၊ က​လေး​မွေးချိန်​တွေမှာ အများနဲ့မတူတဲ့ ​သွေးထွက်နိုင်​ခြေ အန္တရာယ်များ ရှိ​နေပါတယ်။
​သွေးမတိတ်​ရောဂါလို့ သံသယ မထားမိတာ​ကြောင့် မလိုအပ်တဲ့ သားအိမ်ဖယ်ရှားခြင်းမျိုး လုပ်မိတတ်ပါတယ်။
​သွေးမတိတ်​ရောဂါရှိ​ကြောင်း ​စော​စောသိခြင်းဟာ အသက်​တွေကို ကယ်တင်နိုင်သလို မျိုးပွားနိုင်စွမ်း၊ ဂုဏ်သိက္ခာ၊ ဘဝအရည်အ​သွေးတို့ကို ထိန်းထားနိုင်စွမ်း ရှိပါတယ်။

သတိပြုမိဖို့ဆိုတာ ကြည့်မြင်ခြင်း၊ နား​ထောင်​ပေးခြင်း၊ ယုံကြည်​ပေးခြင်းက စတာပါ။ မိန်းက​လေးငယ်များနဲ့ အမျိုးသမီးများက ​သွေးထွက်များတယ်လို့ ​ပြောတဲ့အခါ ရာသီ​သွေး အဆင်းများတာထက် ပိုနိုင်ပါတယ်။ ကြည့်ပါ။ နား​ထောင်​ပေးပါ။ ယုံကြည်​ပေးပါ။ ဒါမှသာ ဖွင့်​ပြောရခက်​နေတဲ့ သူတို့ရဲ့ အခက်အခဲများက​နေ ​တဆင့် သွေးမတိတ်​ရောဂါကို ဆက်လက်ရှာ​ဖွေဖို့ ဖြစ်လာပါလိမ့်မယ်။ ဒါမှသာ ​ရောဂါ​စော​စောသိပြီး အ​ပေါ်က​ပြောခဲ့သလို အသက်​များစွာ ကယ်တင်နိုင်ပြီး မျိုးပွားနိုင်စွမ်း၊ ဂုဏ်သိက္ခာ၊ ဘဝအရည်အ​သွေးတို့ကို ထိန်းထားနိုင်မှာ ဖြစ်ပါတယ်။

အနဲငယ်နဲ့ စတင်လိုက်တာဟာ ကြီးမားတဲ့ အ​ပြောင်းအလဲ ဖြစ်သွားနိုင်ပါတယ်။
* ကျန်းမာ​ရေးဝန်ထမ်းများအတွက်
- ရာသီ​သွေးဆင်းခြင်းအ​ကြောင်း အမြဲ​မေးပါ။
- ​သွေးထွက်တဲ့ ​ရောဂါရာဇဝင်​ပြော​နေရင် မရပ်ပစ်ဘဲ အ​သေအချာ နား​ထောင်​ပေးပါ။
- အန္တရာယ်လက္ခဏာ​တွေ့ရင် ​အထူးကုဆီ စော​စောလွှဲပါ။
- ရာသီ​သွေး အဆင်းများတာကို ပုံမှန်ပဲလို့ ​တွေးတာမျိုးကို ရပ်လိုက်ပါ။

* မိန်းက​လေးငယ်များနဲ့ အမျိုးသမီးများ၊ လူနာများအတွက်
- ရာသီ​သွေးဆင်းပုံကို ဂရုစိုက်ကြည့်ပါ။
- ​ရောဂါလက္ခဏာများကို ​ဖွင့်​ပြောပြပါ။
- မိမိဘာသာ ကြည့်နိုင်​အောင် ကြိုးစားပါ။ (၇-၂-၁)
- ​သွေးမတိတ်​ရောဂါ ရှိ​နေတာများလားလို့ ဆရာဝန်ကို ​မေးပါ။

တိုးတက်ဖို့ လုပ်​ဆောင်ဖွယ်ရာများ
၁။ လူ​တွေကြားမှာ ​သွေးမတိတ်​ရောဂါကို သတိထားမိလာ​အောင် လုပ်ပါ။ ကျန်းမာ​ရေး ပညာ​ပေးလုပ်ငန်းများမှ တဆင့် ​သွေးမတိတ်​ရောဂါအ​ကြောင်း ပညာ​ပေးပါ။
၂။ ကျန်းမာ​ရေး​စောင့်​ရှောက်မှု လွှမ်းခြုံနိုင်စွမ်းကို တိုးမြှင့်ပါ။ ရပ်​ဝေး​ဒေသ၊ ​ကျေးလက်​ဒေသများအထိ ​ရောဂါရှာ​ဖွေနိုင်မှု၊ လွှဲ​ပြောင်း​ပေးမှုတို့ကို တိုးချဲ့ပါ။
၃။ ​သွေးမတိတ်​ရောဂါ စစ်​ဆေးမှုများကို မီးယပ်ကျန်းမာ​ရေး ​စောင့်​ရှောက်မှုနှင့် ပူး​ပေါင်းလုပ်​ဆောင်ပါ။
၄။ ကျန်းမာ​ရေးဝန်ထမ်းများကို သင်တန်း​ပေးပါ။ ပြည်သူ့ကျန်းမာ​ရေး​စောင့်​ရှောက်မှုရဲ့ ​ရှေ့တန်း ဝန်ထမ်းများကို ​သွေးမတိတ်​ရောဂါနဲ့ ပါတ်သက်တဲ့ အသိပညာ​တွေ​ပေးဖို့၊ ​သွေးမတိတ်​ရောဂါကို ရှာ​ဖွေနိုင်ဖို့ လွှဲ​ပြောင်း​​ပေးနိုင်ဖို့ လိုအပ်တဲ့ အ​ထောက်အပံ့များ ​ပေးပါ။

​ဝေးလံတဲ့ ​ဒေသမှာ ​နေရတာနဲ့ပဲ ဘယ်မိန်းက​လေးငယ်နဲ့နဲ့ အမျိုးသမီးမှ တိတ်တဆိတ် ခံစား​နေရန် မသင့်ပါ။
​​စော​စောသတိထားမိခြင်းနဲ့ ကျန်းမာ​ရေး​စောင့်​ရှောက်မှုကို လက်လှမ်းမီခြင်း တို့ဟာ ​သွေးမတိတ်​ရောဂါ ရှိ​နေကြတဲ့ မိန်းက​လေးငယ်များနဲ့ အမျိုးသမီးများရဲ့ ဘဝများစွာကို ​ပြောင်းလဲနိုင်စွမ်းရှိပါတယ်။
မကြားသိမိလို့ ​ရောဂါရှိ​ကြောင်း မသိလိုက်တဲ့အခါ မ​စောင့်​ရှောက်လိုက်ရတာ မကုသလိုက်ရ​တွေ​ကြောင့် ​နောက်ဆက်တွဲ ဆိုးကျိုးများ ဖြစ်​စေပါတယ်။
​ဒါကို ပြောင်းလဲဖို့ လိုပါတယ်။

ပါကစ္စတန်နိုင်ငံမှ ​ဒေါက်တာ တဟီရာ ဇာဖာရဲ့ အထက်ပါ​ဟော​ပြောချက်​တွေဟာ ပါကစ္စတန်နိုင်ငံမှ
အ​ခြေအ​နေ​တွေ​ပေါ် အ​ခြေခံပြီး ​ဆွေး​နွေးသွားတာ​ပေမယ့် မြန်မာနိုင်ငံအ​ခြေအ​နေ​တွေနဲ့လဲ အ​တော် ဆင်တူတာ ​တွေ့ရပါတယ်။
မြန်မာမှာလဲ မိန်းက​လေးငယ်များနဲ့ အမျိုးသမီးများမှာ ​သွေးမတိတ်​ရောဂါ ရှိ၊ မရှိ ​နောက်မကျဘဲ သိရဖို့ စိန်​ထော်မှု​တွေ ရှိ​နေ​သေးတာ​ကြောင့် အထက်ပါ ​ဟော​ပြောချက်ကို မျှ​ဝေလိုက်တာဖြစ်ပါတယ်။

အားလုံး ကျန်းမာ ချမ်းသာ ​ဘေးကင်းကြပါ​စေ။

ပါ​မောက္ခဦးစိန်ဝင်း
​သွေး​ရောဂါ အထူးကုဆရာဝန်ကြီး

21/04/2026

မိန်းက​လေးငယ်များနဲ့ အမျိုးသမီးများမှာလဲ သွေးမတိတ်​ရောဂါ ဖြစ်တတ်ပါတယ် (၃) ​

ပါကစ္စတန်နိုင်ငံမှ ​ဒေါက်တာ တဟီရာ ဇာဖာရဲ့
"မိန်းက​လေးငယ်များနဲ့ အမျိုးသမီးများရဲ့ ​သွေးမတိတ်​ရောဂါ ရှာ​ဖွေကုသ​ရေးမှာ မမြင်ရနိုင်​သော ရုန်းကန်ရမှုများအ​ကြောင်း" ​ဆွေး​နွေးချက်ကို ဆက်လက်မျှ​ဝေလိုပါတယ်။

မိန်းက​လေးငယ်များနဲ့ အမျိုးသမီးများရဲ့ ​သွေးမတိတ်​ရောဂါ ရှာ​ဖွေကုသ​ရေးမှာ ဘာလို့ အသိ​နောက်ကျကြရသလဲဆိုတာကို အခုလိုရှင်းပြပါတယ်။
- ရာသီ​သွေး အဆင်းများတာကို ပုံမှန် ဖြစ်ရိုးဖြစ်စဥ်လို့ မှတ်ယူလိုက်တဲ့အခါ ​ရောဂါ ရှိ​ကြောင်းသိရဖို့ နှစ်​ပေါင်းများစွာ ​နောက်ကျသွားနိုင်ပါတယ်။
- ​သွေးအားနဲတာကို အ​ကြောင်းရင်း မရှာ​ဖွေဘဲ သံဓါတ်အား​ဆေး​ပေးပြီး ကု​နေရင် ​ရောဂါ အသိ ​နောက်ကျနိုင်ပါတယ်။
- ရာသီ​သွေးအဆင်းများတာဟာ အမျိုးသမီး​ရောဂါ၊ မီးယပ်​ရောဂါနဲ့ပဲ သက်ဆိုင်တယ်လို့ မှတ်ယူလိုက်ရင် ​ရောဂါ အသိ​နောက်ကျနိုင်ပါတယ်။
- ​အ​ခြေခံကျန်းမာ​ရေးဝန်ထမ်းများ အ​နေနဲ့ မွေးရာပါ ​သွေးမတိတ်​ရောဂါများအ​ကြောင်း ဗဟုသုတနဲတဲ့အခါ ​ရောဂါ အသိ​နောက်ကျနိုင်ပါတယ်။

နိုင်ငံတိုင်းလိုလိုမှာ ကျန်းမာ​ရေး ပြသနာ တခုခုဖြစ်လာရင် အရင်ဦးစွာ​တွေ့တတ်တိုင်ပင်တတ်ကြတာက
- အမျိုးသမီးကျန်းမာ​ရေး​စောင့်​ရှောက်သူများ Lady Health Visitors
- သားဖွားဆရာမများ Midwives
- အ​ထွေ​ထွေ​ရောဂါကု ဆရာဝန်များ
- မိသားစု ဆရာဝန်များ
- တိုင်းရင်း​ဆေးဆရာများ
ဖြစ်​လေ့ရှိပါတယ်။
အဲဒီလူ​တွေကို အဆင့်မြှင့်​ပေးဖို့ လိုအပ်ပါတယ်။

ရာသီ​သွေး ဆင်းတာနဲ့ပါတ်သက်ပြီး အ​သေအချာ ဂရုတစိုက်​မေးမြန်းဖို့ (​ရှေ့က​​ပြောခဲ့တဲ့ ၇၊ ၂၊ ၁)၊ ​​ကျောင်းတက်ပျက်ရတာ အလုပ်မသွားနိုင်ဖြစ်ရတာမျိုး ရှိသလား​မေးဖို့၊ သွေးအားနဲသူတ​ယောက်မှာ ​သွေးထွက်တတ်တဲ့​ရောဂါ တခုခု ရှိ​နေမလား သံသယထားတတ်ဖို့၊ က​​လေးဘဝက ​သွေးထွက်လွယ်တာမျိုး ရှိသလား ​မေးဖို့၊ မိသားစု မျိုးရိုးမှာ ​သွေးမတိတ်ရောဂါ ရှိသလား ​မေးဖို့၊ သင်ကြားထား​ပေးသင့်ပါတယ်။ ဘယ်အချိန် အထူးကုဆီ လွှဲ​ပြောင်းပြသရမယ်ဆိုတာကိုလဲ အသိ​ပေးထားရပါမယ်။

​အထူးကုဆီ စော​စော လွှဲ​ပေးလိုက်တာဟာ
အချိန်တွေ၊ အသက်​ဆုံးရှုံးတာတွေ၊ ​ဝေဒနာ​တွေကို ​လျော့ပါးပြီး ဘဝ အရည်အ​သွေး ပြည့်ဝ​စေပါတယ်။
* အချိန် - ​ရောဂါ အမှန်ကို ​စော​စောသိခြင်းဖြင့် ထိ​ရောက်တဲ့ ကုသမှူကို ​စော​စောရ​စေပါတယ်။
* အသက် - ​စော​စောကုသခြင်းဖြင့် အသက်အန္တရာယ်ရှိ​လောက်တဲ့ ​သွေးထွက်မှုမျိုး ဖြစ်ခြင်းမှ ကာကွယ်နိုင်ပါတယ်။
* ​ဝေဒနာ - ​ရောဂါမှန် မသိရဘဲ နာကျင်ခံစား​နေရတာ​တွေ၊ ပင်ပန်းနွမ်းနယ်​နေရတာ​တွေ၊ မသန်စွမ်းဖြစ်ရတာ​တွေကို ​ရောဂါ​စော​စောသိရင် ​လျှော့ချ​ပေးနိုင်ပါတယ်။
* ဘဝ အရည်အ​သွေး - မိန်းက​လေးငယ်များနဲ့ အမျိုးသမီးများမှာလဲပဲ သွေးမတိတ်​ရောဂါကို ​စော​စောသိ၊ ​စော​စောကုသမှု ခံယူခွင့်ရရင် မိသားစုကြားမျက်နှာငယ်ရတာ၊ လူမှု​ရေးအရ ရှက်​ကြောက်​နေရတာ​တွေ မရှိ​တော့ဘဲ လွတ်လပ်​ပေါ့ပါးတဲ့ ဘဝမျိုး ရနိုင်ပါတယ်။

​နောက်​နေ့ ဆက်​ရေးပါဦးမယ်။

ပါ​မောက္ခ​ဦးစိန်ဝင်း
​သွေး​ရောဂါ အထူးကုဆရာဝန်ကြီး

20/04/2026

မိန်းက​လေးငယ်များနဲ့ အမျိုးသမီးများမှာလဲ သွေးမတိတ်​ရောဂါ ဖြစ်တတ်ပါတယ် (၂) ​

ပါကစ္စတန်နိုင်ငံမှ ​ဒေါက်တာ တဟီရာ ဇာဖာရဲ့
"မိန်းက​လေးငယ်များနဲ့ အမျိုးသမီးများရဲ့ ​သွေးမတိတ်​ရောဂါ ရှာ​ဖွေကုသ​ရေးမှာ မမြင်ရနိုင်​သော ရုန်းကန်ရမှုများအ​ကြောင်း" ​ဆွေး​နွေးချက်ကို မျှ​ဝေလိုပါတယ်။

မြို့နဲ့ မိုင်၂၀ ​လောက် ​ဝေးတဲ့​နေရာက ၁၂ နှစ်အရွယ် မိန်းက​လေးတ​ယောက်ရဲ့ ဖြစ်ရပ်မှန်ဇာတ်လမ်းကို စ​ပြောပြပါတယ်။ ငယ်စဥ်ကထဲက အ​ရေပြားမှာ မကြာ ခန အညိုအမဲ စွဲတတ်ပါတယ်။ အသက် ၁၁နှစ်အရွယ် ရာသီ​သွေးစ​ပေါ်ကထဲက ရာသီ​သွေး အဆင်းများ​လေ့ ရှိပါတယ်။ ​နှုတ်ခမ်းနဲ့ လက်ဖဝါး​တွေ ဖြူ​​ဖျော့​နေလို့ သံဓါတ်အား​ဆေး​တွေ ​သောက်​နေရ​ပေမယ့် ​သွေး​ရောဂါဆိုင်ရာ စစ်​ဆေးမှု​တွေ တခါမှ မစစ်​ဆေးဖူးပါဘူးတဲ့။ တရက်မှာ​​တော့ အူအတက်​ယောင်တာကို ​ခွဲစိတ်ရာက​နေ ​သွေးမတိတ်ဘဲ ​သွေးထွက်များပြီး ​​ရှော့ခ်ရလို့ ​သေလုနီးပါးအ​ခြေအ​နေနဲ့ မြို့​ဆေးရုံ ​ရောက်လာပါတယ်။ အ​ရေး​ပေါ်​သွေးသွင်းကုသ​ပေးပြီး အသက် ရှင်ခွင့်ရလို့ ရောဂါအ​ကြောင်းရင်း ရှာတဲ့အခါ ​မွေးရာပါ ​သွေးမတိတ်​ရောဂါ တမျိုးဖြစ်တဲ့ ဗွန်ဝီလီဘရန်း​သွေးခဲဓါတ် von Willebrand factor ချို့တဲ့​​နေသော ဗွန်ဝီလီဘရန်း ​သွေးမတိတ်​ရောဂါ von Wilebrand Disease ဖြစ်​ကြောင်း ​တွေ့ရှိရပါတယ်။

မိန်းက​လေးငယ်​လေးတဦးရဲ့ ဖြစ်ရပ်မှန်ဇာတ်လမ်းဆို​ပေမယ့် အလားတူ ကြုံ​တွေ့ရတဲ့ မိန်းက​လေးများ၊ အမျိုးသမီးများ အ​တော်များများ ရှိ​နေနိုင်ပါတယ်။ ဘယ်​နေရာ​တွေမှာ လွဲ​ချော်ခဲ့သလဲ သိရဖို့ ​ရောဂါရာဇဝင် ပြန်​မေးကြည့်တဲ့အခါ
၁။ က​လေးအထူးကုဆရာဝန်က အ​ရေပြား အညိုအမဲစွဲတာအတွက် ​သွေးအထူးကုထံမလွှဲခဲ့တာ
၂။ အ​ထွေ​ထွေဆရာဝန်ကလဲ ​သွေးအားနဲတာနဲ့ အ​ရေပြား အညိုအမဲစွဲတာအတွက် အကြိမ်ကြိမ်ပြဖူး​ပေမယ့် ​သွေးစစ်​ဆေးမှု​တွေ မလုပ်ခဲ့တာ
၃။ သားဖွားမီးယပ်ဆရာဝန်ကလဲ ရာသီ​သွေးအဆင်းများတာကို ပုံမှန်ပဲ မှတ်ယူပြီး သဲလွန်စ တခုလို့ မမှတ်ယူ၊ ဆက်လက်ရှာ​ဖွေ စစ်​ဆေးမှုများ မပြုလုပ်ခဲ့တာ​တွေကို ​တွေ့ရှိခဲ့ရပါတယ်။

ရာသီ​သွေး အဆင်းများတာဟာ သတိထားစရာ တခုဖြစ်​ပေမယ့် အလွယ်တကူ လွတ်သွားတတ်ပါတယ်။
ဒေါက်တာ တဟီရာ ဇာဖာက ၇၊ ၂၊ ၁ ဆိုတဲ့ ဂဏန်း သုံးလုံးကို သတိထား မှတ်ထားဖို့ ​ပြောပါတယ်။
- ၇ ဆိုတာ ရာသီ​သွေးဆင်းတာ ၇ ရက်ဆက်တိုက်ထက် များ​နေရင်
- ၂ ဆိုတာ ၂ နာရီမပြည့်ခင် ​အောက်ခံ လဲ​နေရရင်
- ၁ ဆိုတာ ၁ လက်မ အရွယ်တဲ့ ကြီးတဲ့ ​သွေးခဲဆင်းရင် လို့ ဆိုလိုပြီး
ဒီ ၃ ချက်ထဲက တချက်ချက် ရှိရင်ကို
​သွေး​ရောဂါ အထူးကုဆီ လွှဲပြီး ​သွေးမတိတ်​ရောဂါ ရှိ၊ မရှိ ရှာ​ဖွေသင့်​ကြောင်း ​ပြောပါတယ်။

ထပ်​ဆောင်းအဖြစ်
- က​လေးဘဝကထဲက အ​ရေပြား အညိုအမဲစွဲလွယ်ရင်
- တ​နေရာရာမှ ​သွေးထွက်လွယ်​နေရင်
- ​သွေးထွက်မိတဲ့အခါ ​သွေးတိတ်ဖို့ ကြာ​နေရင်
- ​သွေးအားနည်း​ရောဂါ ရှိ​နေရင်
- မိသားစုဝင် တဦးဦးမှာ ​သွေးမတိတ်​ရောဂါရှိ​နေရင်
သံသယကြီးကြီးထားရမှာ ဖြစ်ပြီး သွေး​ရောဂါ အထူးကုဆီ မဖြစ်မ​နေလွှဲ၊ သွေးမတိတ်​ရောဂါ ရှိ၊ မရှိ ရှာ​ဖွေသင့်​ကြောင်း ​ပြောပါတယ်။

ဆက်​ရေးပါဥိီးမယ်။

19/04/2026

19/04/2026

မိန်းက​လေးငယ်များနဲ့ အမျိုးသမီးများမှာလဲ သွေးမတိတ်​ရောဂါ ဖြစ်တတ်ပါတယ် (၁)

19/04/2026

မိန်းက​လေးငယ်များနဲ့ အမျိုးသမီးများမှာလဲ သွေးမတိတ်​ရောဂါ ဖြစ်တတ်ပါတယ် (၁) ​

မွေးရာပါ ​သွေးမတိတ်​ရောဂါဟာ ​ယောက်ျား​လေး​တွေမှာ အဖြစ်များတယ်ဆို​ပေမယ့် မိန်းက​လေးများမှာ မဖြစ်တတ်တာ မဟုတ်ပါ။
​မွေးရာပါ​သွေးမတိတ်​ရောဂါ​ဝေဒနာရှင် ​ယောက်ျား​လေးတ​ယောက်ရှိတိုင်း မွေးရာပါ​သွေးမတိတ်​ရောဂါ​ဝေဒနာရှင် ​မိန်းက​လေး ၁.၇ ယောက် ရှိ​နေနိုင်ပါတယ်။
အမျိုးသမီး​တွေမှာ ​သွေးမတိတ်​ရောဂါ ရှိ​နေတာကို အသိ​နောက်ကျ တတ်ပါတယ်။

“ရာသီသွေး အဆင်းများတာ” ဟာ ပုံမှန်မဟုတ်ပါ။ သွေးမတိတ်ရောဂါရဲ့ လက္ခဏာတစ်ခု ဖြစ်နိုင်ပါတယ် ။
အမျိုးသမီး ၁၀ ယောက်မှာ ၁ ယောက်က ရာသီသွေးအဆင်းများတတ်ပါတယ်။
အဲဒီထဲက ၃၀ ရာခိုင်နှုန်းလောက်မှာ သွေးမတိတ်ရောဂါ ရှိနေနိုင်ပါတယ်။
အမျိုးသမီး​တွေမှာ ​သွေးမတိတ်​ရောဂါ ရှိ​ကြောင်းသိဖို့ နှစ်ချီပြီး ကြာတတ်ပါတယ်။
အချို့မှာ ရာသီ​သွေး စ​ပေါ်ပြီး ဆယ်နှစ် အထက်ကြာမှ ​သွေးမတိတ်​ရောဂါ ရှိ​နေ​ကြောင်း သိရတာမျိုးလဲ ဖြစ်တတ်ပါတယ်။

အချို့ မိန်းက​လေးငယ်များနဲ့ အမျိုးသမီးများမှာ ရာသီ​သွေးနဲ့ပါတ်သက်ပြီး ပုံမှန်မဟုတ်တာကို ပုံမှန်လို့ ထင်​နေတတ်ပါတယ်။
ရာသီ​သွေးနဲ့ ပါတ်သက်တာကို မိသားစုထဲမှာ​တောင် ​ဆွေး​နွေးဖို့ ခက်​နေ၊ ရှက်​နေတတ်ပါတယ်။
အနီးစပ်ဆုံး မိခင်ကို​တောင် ပွင့်ပွင့်လင်းလင်း မတိုင်ပင်တာမျိုးလဲ ရှိပါတယ်။

"အမျိုးသမီးတိုင်း ရာသီလာရင် ဗိုက်နာတတ်တယ်၊ သွေးဆင်းများကြတယ်" စသဖြင့်လဲ အထင်မှားပြီး ဆရာဝန်မပြတာမျိုး ဖြစ်တတ်ပါတယ်။
အဲဒီလို ခံစားရတဲ့ မိန်းကလေးတွေဟာ ​ကျောင်းလဲ မှန်မှန် မတက်နိုင်၊ ပုံမှန် လူမှုဘဝမျိုးလဲ မရနိုင်တာ​တွေ ဖြစ်တတ်ကြပါတယ်။
အချို့ဆရာဝန်များကလဲ သွေးခဲဓါတ် စစ်ဆေးမှု မပြုလုပ်ဘဲ ​ဟော်မုန်း​ဆေးများသာ ​ပေး​နေတတ်ကြပါတယ်။

“ရာသီသွေး အဆင်းများ”တာလို့ ဘယ်လိုသိမလဲ။
- တနာရီအတွင်း ​အောက်ခံတစ်ချပ် သို့မဟုတ် တန်ပွန်တစ်လုံး သွေးစိုပြီး ပြည့်လျှံသွားသလား။
- အကြွေစေ့ အရွယ်ထက်ကြီးတဲ့ သွေးခဲတွေ ပါတတ်သလား။
- သွေးအားနည်းလို့ နေ့စဉ်ဘဝမှာ ပင်ပန်းနွမ်းနယ်နေတတ်သလား။
ဒီထဲက တစ်ခုခု ဖြစ်​နေတယ်ဆိုရင် ပုံမှန်မဟုတ်ပါ။

မိသားစုဝင် တဦးဦးမှာ ​သွေးမတိတ်​ရောဂါ ရှိတာမျိုး
နှာ​ခေါင်းမှ မကြာခန ဆယ်မိနစ်​ကျော်ကြာ​အောင်သွေးလျှံတာမျိုး
ထိခိုက်မှု မရှိပါဘဲ အညိုအမဲကွက်​တွေ အ​ရေပြားမှာပေါ်နေတတ်တာမျိုး
သွားတိုက်ရင် သွားဖုံးမှ သွေးထွက်လွယ်တတ်တာမျိုး
ခွဲစိတ်ခြင်း၊ သွားနှုတ်ခြင်းများ လုပ်ပြီးတဲ့အခါ အချိန်အကြာကြီး သွေးထွက်​နေခြင်းမျိုး
ဖြစ်တတ်သူ​တွေကို ​သွေးမတိတ်​ရောဂါ ရှိ၊ မရှိ စစ်​ဆေးဖို့ ​
သွေး​ရောဂါ အထူးကုဆရာဝန်ထံ ​စေလွှတ်သင့်ပါတယ် ။

အားလုံးကျန်းမာချမ်းသာ ​ဘေးကင်းကြပါ​စေ။

ပါ​မောက္ခဦးစိန်ဝင်း
​​သွေး​ရောဂါ အထူးကု ဆရာဝန်ကြီး