Судлаач Эм Зүйч Академи/ The Academy of Research Pharmacists

03/06/2026

✨ЭМ ЗҮЙН САЛБАРЫН ТУЛГЫН ЧУЛУУГ ТАВЬСАН ЭМ ЗҮЙЧИД! ✨
“Тавин ус” ХХК-ийн ерөнхий захирал ЦЭМБЭЛДОРЖИЙН ЭНХТУЯА эм зүйчийг танилцуулахдаа таатай байна.

Ц.Энхтуяа нь дэвшилтэт техник технологи, инновацын шийдлүүдийг ашиглан олон улсын стандартад нийцүүлэн бий болгож, эм зүйн тусламж үйлчилгээг үр бүтээлтэй хүргэж буй бүтээлч, манлайлагч эм зүйч. Тэрбээр хамт олон, мэргэжил нэгтнээ харилцаа хандлага, шаргуу хөдөлмөрөөр үлгэрлэгч, ажил, амьдралын ментор нь болсон удирдагч.

👩‍🎓АОХУ-д Сальвадор Альендийн нэрэмжит Анагаах ухааны соёлч дунд сургуулийг эм найруулагч мэргэжлээр, АШУҮИС-ийн Эм зүйн сургуулийг эм зүйч мэргэжлээр төгсөж, эм зүйн албаны менежмерээр мэргэшсэн.

👩‍💼Ажлын гараагаа Халдварт өвчин судлалын үндэсний төвд эм найруулагчаар эхэлж Дундговь аймгийн Говь-Угтаал сумын сум дундын эмнэлэгт эмийн сангийн эрхлэгч, тус аймгийн Төвийн 1-р эмийн санд эм найруулагч, жор баригч, Эмийн сангийн удирдах конторт нөөцийн тасгийн эрхлэгч, Эмийн сангуудыг удирдах конторын харьяа Хан-Уул дүүргийн 4-р төвд жор баригчаар ажиллаж, одоо“Тавин Ус” ХХК-ийг үүсгэн байгуулж, тус компанийн ерөнхий захирлаар ажиллаж байна. Салбартаа үр бүтээлтэй, тасралтгүй 40 гаруй жил ажилласныг төр засаг үнэлж, Хөдөлмөрийн гавьяаны улаан тугийн одонгоор шагнасан.

"Залуу эм зүйчдэдээ илгээх захидал" номын хэсгээс...

31/05/2026

Эрхэм хүндэт ОДОНТОЙ-ЭМ ЗҮЙЧ ижий нартаа чин сэтгэлийн халуун баяр хүргэе.

Монгол эх орныхоо хүн ардын эрүүл мэндийг хамгаалах ариун үйлсэд зүтгэхийн сацуу, эх орныхоо ирээдүйг бэлтгэж, үр хүүхдээ эрүүл энх төрүүлж, энэрэн хайрласан эрхэм ижий байж, нийгэмдээ үнэтэй хувь нэмэр оруулж яваа Та бүхнээрээ бид маш их бахархаж байна.

Энэ жил “Одонтой-Эм зүйч ээж”-хэмээх эрхэм алдрыг хүртсэн гурван сайхан ижийг онцлон дурдахад:

❤️Хангарьд Эмийн Сангийн Захирал, Эм зүйч н.Гэрэл
💙Дорнод аймгийн Эрүүл Мэндийн Газрын Хяналт, Үйлчилгээний байцаагч, эм зүйч Х.Эрдэнэцэцэг
❤️Сонгинохайрхан Нэгдсэн эмнэлгийн Эм зүйн алба, МСНЭ болон төр даах эм хариуцсан эм зүйч Л.Чанцалдулам ........нартаа нийт эм зүйч, эмийн мэргэжилтнүүдийнхээ нэрийн өмнөөс халуун баяр хүргэж, цаашдын ажил үйлсэд нь өндрөөс өндөр амжилт, гэр бүлд, энхрий үрсэд нь аз жаргал, сайн сайхан бүхнийг хүсэн ерөөе.

Эхийн энэрэл, эм зүйчийн эрдмийг хослуулан,
Эрүүл амьдралын жимийг олон түмэнд гэрэлтүүлж,
Хоёр их үүргийг зэрэг тэгш авч яваа
Хосгүй эрхэм одонт ижий Та — бидний бахархал 💙❤️ Эм зүйн тусламж, үйлчилгээг мэргэжлийн өндөр түвшинд хүргэн, олон хүний амьдралд гэрэл гэгээ нэмсээр буй Та бүхний минь хөдөлмөр, сэтгэл, зүтгэл үнэхээр эрхэм билээ.

Чин сэтгэлийн талархалыг дахин дахин илэрхийлье.
Хүндэтгэсэн:
Судлаач Эм Зүйч байг

27/05/2026

✨ЭМ ЗҮЙН САЛБАРЫН ТУЛГЫН ЧУЛУУГ ТАВЬСАН ЭМ ЗҮЙЧИД! ✨
АШУҮИС-ийн Эм зүйн сургуулийн багш, эм зүйн ухааны доктор, профессор ЦЭВЭЭНИЙ ДАВААСҮРЭН багшийг эм зүйн салбар бүгд таних билээ.

Ц.Даваасүрэн нь Монгол улсад эм үйлдвэрлэлийн зохистой дадлыг бий болгох, эмийн шинэ технологи бүтээх, эм, эмнэлгийн хэрэгслийн тухай хууль, түүнтэй холбоотой бүхий л дүрэм, журам, стандартад өөрийн хувь нэмрээ оруулан ажилласан судлаач, манлайлагч эм зүйч. Тэрбээр эм зүйн технологийн чиглэлээр эм зүйч бэлтгэх, нарийсан мэргэшүүлэх их үйлсэд өөрийн оюун мэдлэгээ харамгүй зориулсан сурган хүмүүжүүлэгч, шавь нараа үг яриа, үйл хөдлөлөөрөө үлгэрлэдэг эрдэмтэн багш.

👩‍🎓АУДэС-ийн Эм зүйн сургуулийг эм зүйч мэргэжлээр улаан дипломтой төгсөж, МУИС-ийн англи хэлний орчуулагч мэргэжлээр төгссөн хос мэргэжилтэн. АУИС эм зүйн сургуульд магистрын зэргээ хамгаалж, мөн тус сургуульдаа “Ягаан мүгэз эмийн ургамлаас шинэ эмийн хэлбэр гарган авах технологийн судалгаа” сэдвээр эм зүйн ухааны докторын зэрэг хамгаалж улмаар профессор цол хүртсэн.

👩‍💼Ажлын гараагаа Дорнод аймгийн Сүмбэр суманд эмийн сангийн эрхлэгчээр эхэлж, клиникийн 2-р эмнэлгийн эмийн санд эм шинжлэгч, дефектар, “Эмийн үйлдвэр”-ийн лабораторийн эрхлэгч, ерөнхий технологич, ерөнхий инженер, АШУҮИС-н Эм зүйн сургуульд багш, тэнхимийн эрхлэгчээр ажилласан. Ажиллах хугацаандаа 20 гаруй эм зүйн ухааны магистр, доктор удирдаж хамгаалуулсан, 3 шинэ бүтээгдэхүүний патент, 20 гаруй улсын стандарт, технологийн заавар боловсруулж, 10 гаруй ном гарын авлага, 200 орчим гаруй илтгэл өгүүллийг гадаад, дотоодын хэвлэлд хэвлүүлж, олон олон төсөлт ажилд оролцсон. Ажиллахын сацуу ЭМЯ эм зүйн салбар зөвлөлд ажилласан. Салбартаа үр бүтээлтэй, тасралтгүй 50 орчим жил ажилласныг төр засаг үнэлж, Хөдөлмөрийн хүндэт медаль цол тэмдгээр шагнасан.

"Залуу эм зүйчдэдээ илгээх захидал" номын хэсгээс...

19/05/2026

✨ЭМ ЗҮЙН САЛБАРЫН ТУЛГЫН ЧУЛУУГ ТАВЬСАН ЭМ ЗҮЙЧИД! ✨
Монфа ХХК-ий ерөнхий захирал, эм зүйн шинжлэх ухааны доктор, профессор, Эрүүлийг хамгаалахын гавьяат ажилтан
Д.Цэндээхүү эм зүйч.

Д.Цэндээхүү нь эмийн чанарын стандартчиллын үндсэн зарчмыг боловсруулах чиглэлээр судалгаа шинжилгээ хийдэг эрдэмтэн эм зүйч. Тэрбээр эм, био бэлдмэлийн үндэсний лавлагаа лабораторийг чадавхжуулж эм, бэлдмэлийг эх орондоо шинжлэх нөхцлийг бүрдүүлж, ард түмнийхээ эрүүл энхийн төлөө ариун үйлсэд хүчин зүтгэж, олон улсын стандартад нийцсэн эмийн хяналтын тогтолцоог бий болгоход бодитой хувь нэмэр оруулсан, хөдөлмөрч, удирдагч эм зүйч. Мөн нотолгоонд суурилсан, инновац шингэсэн, эмчилгээний өндөр идэвхтэй, аюулгүй эм бэлдмэлийг импортлох, эмчлүүлэгчид боломжийн үнэтэй хүргэхэд тасралтгүй зүтгэж яваа чадварлаг зохион байгуулагч. Мөн тэрбээр мэргэжилдээ дурлан, илүү ихийг эрэл хайгуул хийж сурсан мэдсэнээ оюутан, залууст хуваалцдаг сурган хүмүүжүүлэгч.

👩‍🎓И.М.Сеченовын нэрэмжит Москвагийн 1-р АУДС-ийг эм зүйч мэргэжлээр төгссөн, Москва хотноо “Фенотиазины бүлгийн эмийн чанарыг үнэлэх, стандартчилахад хроматографийн аргуудыг хэрэглэх нь” сэдвээр эм зүйн ухааны докторын зэрэг хамгаалсан. Москвагийн Анагаах Ухааны академид “Монгол улс дахь эмийн чанарын стандартчиллын үндсэн зарчмуудын боловсруулалт” сэдвээр эм зүйн шинжлэх ухааны докторын зэрэг хослон хамгаалж улмаар профессор цол хүртсэн.

👩‍💼Ажлын гараагаа Улаанбаатар хотын эмийн сангийн удирдах конторт эм шинжлэгчээр эхэлж, эм шинжлэх кабинетын эрхлэгч, АУДэС-ийн багш, Эм биобэлдмэл эмчилгээний хяналтын газрын орлогч дарга, Мэргэжлийн хяналтын нэгдсэн төв лабораторийн эрхлэгчээр тус тус ажиллаж, одоо “Монфа” ХХК-иын зөвлөх болон Монголын эм хангамжийн байгууллагын холбооны тэргүүн, Хүнсний аюулгүй байдлын үндэсний лавлагаа төв лабораторийн ахмадын зөвлөлийн дарга, ЭМЯ-ны дэргэдэх Фармакопейн хорооны гишүүнээр ажиллаж байна. Мөн сургалт, эрдэм шинжилгээ, судалгааны 80 гаруй бүтээл туурвиж нийтлүүлсэн. Салбартаа үр бүтээлтэй, тасралтгүй 50 орчим жил ажилласныг төр засаг үнэлж, Монгол улсын эрүүлийг хамгаалахын гавьяат ажилтнаар шагнасан.

19/05/2026

Монгол улсын ардын багш, ШУА-ийн академич, Монголын анагаах ухааны академийг үндэслэгч, эм зүйн шинжлэх ухааны доктор, профессор Дэнсмаагийн Дүнгэрдорж багш маань эм зүйн салбарын тулгын чулууг тавьсан манлайлагч эм зүйчдийн нэг билээ.

Тэрээр эм зүйн салбарынхан бид Улсын их ачааг үүрч явааг онцлоод, энэ салбарын үйл ажиллагааг мунхагаар доройтуулан улс төрдөө ашиглаж байгаа ёс зүйгүй хүмүүстэй тэмцсээр байгаагаа хэллээ.

Энэ салбараар насаараа гоёж, энэ салбарын төлөө насаараа зүтгэн хөгжүүлж, хамгаалж буй эрхэм багшдаа талархлаа.
Та минь Монгол улсын эм зүйн салбарт “Эцэг” мэт нөмөртэй эрхмийн эрхэм эм зүйч юм шүү

18/05/2026

Маргааш 14 цагт Судлаач эм зүйч та бүхнийг урьж байна.

Сайн байцгаана уу.
АШУҮИС-ийн Эм зүйн сургууль болон Эм зүйн мэргэжлээр төгсөгчдийн холбоо хамтран АШУҮИС-ийн магистр, докторын хөтөлбөрт суралцаж буй судлаач эм зүйч та бүхнийг “JOPPP IMPACT MONGOLIA 2026” эрдэм шинжилгээний хуралд идэвхтэй оролцоход дэмжлэг үзүүлж мэдээлэл хүргэх гэж байна. Та бүхэн идэвхтэй хамрагдана уу.

16/05/2026

Судлаач эм зүйч багийн бүтээл "Залуу эм зүйчдэдээ илгээх захидал" ном маань 39 дэх номын баярт оролцож байна.

Та бүхэн энэхүү номоос Монголын эм зүйн салбарын манлайлал болсон үе үеийн төлөөлөл нийт 50 ШИЛДЭГ эм зүйчдийн сурсан мэдлэг, олсон туршлага, алдаа оноо, амжилт бүтээлийн ард нуугдсан ажил амьдралынх нь НОУ-ХАУ-аас суралцан түүгээр дамжуулан урам авч, мэргэжлээрээ бахархаж, урагшлах боломж олж авахыг хүсвэл дараах номыг заавал авч уншаарай. Мөн мэргэжлийн зөв чиглэл, ажил амьдралын зөв замыг олж, аз жаргалтай урагшлахад тань туслах номыг эм зүйч найз нартаа бэлэг болгон хүргэж буйдаа таатай байна.

Хаяг : Номын баяр, АШУҮИС-ийн асарт худалдаалагдаж байна.

12/05/2026

✨ЭМ ЗҮЙН САЛБАРЫН ТУЛГЫН ЧУЛУУГ ТАВЬСАН ЭМ ЗҮЙЧИД! ✨
Монголын анагаах ухааны академийн гишүүн, академич, эм зүйн ухааны доктор, профессор ЛУВСАНДОРЖИЙН ЦЭРЭНДУЛАМ эм зүйч

Л.Цэрэндулам нь Монгол улсын төрөлжсөн мэргэжлийн эмнэлгүүдэд эмнэлзүйн эм зүйн тусламж үйлчилгээ дэлхийн хөгжилтэй хөл нийлүүлэн алхахад хүч чадлаа зориулж суурийг тавилцаж, ихээхэн хувь нэмэр оруулсан удирдагч эм зүйч. Тэрбээр боловсролын чиглэлд хичээн ажиллахдаа хувийн хэвшлийн эм зүйн дээд сургуулийг их сургууль болгож, эрдэм шинжилгээ сургалт, үйлдвэрлэл хослуулан хэрэгжүүлэх, боловсролын хөтөлбөр бий болгоход онцгойлон анхаарч, салбарынхаа ирээдүйн хүний нөөцийг бэлтгэхэд хүчин зүтгэсэн эрдэмтэн.

👩‍🎓ЗХУ-ын Иркутск хотын АУДС-д эм зүйч мэргэжлээр суралцсан, эм зүйн ухааны магистр, Монгол улсын АУИС-д “Бэришийн төрлийн зарим зүйлийн ургамлын хими ба хими-технологийн судалгаа” сэдвээр эм зүйн ухааны докторын зэрэг хамгаалж улмаар профессор болон Монголын Анагаах Ухааны Академийн академич цол хүртсэн.

👩‍💼Ажлын гараагаа Хотын Эмийн Сангийн Удирдах Контор (ХЭСУК) -ын харьяа 3 дугаар эмийн санд эм шалгагчаар эхэлж, Хүүхдийн эмийн сангийн эрхлэгч, Анагаах ухааны хүрээлэнд эрдэм шинжилгээний ажилтан, ахлах ажилтан, П.Н.Шастины нэрэмжит төв эмнэлгийн эм зүйн албаны дарга, эрдэм шинжилгээ, сургалт эрхэлсэн менежер, “Монос” дээд сургууль ЭЗШУИС-ийн захирлаар ажиллаж, одоо тус сургуульдаа зөвлөх багшаар ажиллаж байна. Ажиллах хугацаандаа 15 орчим магистр, доктор удирдаж хамгаалуулж, 30 орчим ном товхимол бичиж, редакторласан, 20 гаруй улсын стандарт, технологийн заавар, 100 орчим өгүүлэл болон илтгэлийн хураангуйг гадаад, дотоодын сэтгүүлд хэвлүүлсэн. Мөн тэрбээр Эрүүл мэндийн яамны Фармакопейн хорооны гишүүн, МЭЗБН “Эм” холбооны удирдах зөвлөлийн гишүүн, Монголын Эм зүйн шинжлэх ухааны академийн дэд ерөнхийлөгч, Европын болон Азийн Эм зүйн сургуулиудын холбооны гишүүн зэрэг сонгуульт ажлыг хашдаг Салбартаа үр бүтээлтэй, тасралтгүй 50 орчим жил ажилласныг төр засаг үнэлж, “Алтан гадас” одонгоор шагнасан.

05/05/2026

✨ЭМ ЗҮЙН САЛБАРЫН ТУЛГЫН ЧУЛУУГ ТАВЬСАН ЭМ ЗҮЙЧИД! ✨
“Энхийн шүүдэр” ХХК-ны үүсгэн байгуулагч, зөвлөх, эм зүйн ухааны доктор, дэд профессор, Монгол улсын эрүүлийг хамгаалахын гавьяат ажилтан ОРГОДОЛЫН ДАМБА эм зүйч

О. Дамба нь эрүүл мэндийн тусламж үйлчилгээг тасралтгүй, жигд хүргэхэд онцгойлон анхаарч зайлшгүй шаардлагатай эмийн нөөц бүрдүүлж, хүн ардыг импортын эм, эмнэлгийн хэрэгслээр тасралтгүй ханган ажилласан хөдөлмөрч эм зүйч. Цаашлаад импортыг орлох бүтээгдэхүүн үйлдвэрлэх нөхцөлийг эх орондоо бий болгох их үйлст үнэтэй хувь нэмэр оруулсан бүтээлч, судлаач эрдэмтэн. Мөн эм, эмнэлгийн хэрэгслийн тухай хууль, түүнтэй холбоотой бүхий л дүрэм, журам, стандартыг шинэчлэн боловсруулах, мөрдөн хэрэгжүүлэхэд тасралтгүй оролцож, салбарт тулгамдаж буй асуудалд судалгаа шинжилгээ хийж, шийдэл олж сайжруулахад өөрийгөө болон баг хамт олноо дайчлан, манлайлж ажилласан удирдагч эм зүйч.

👩‍🎓Тэрбээр АУДуС-ийг хүний бага эмч, АУДэС-ийг эм зүйч мэргэжлээр төгссөн, Марксизм, ленинизмийн оройн их сургуульд эдийн засаг, улс төрч мэргэжил эзэмшсэн хос мэргэжилтэн. АУДэС-д “Үндэсний зайлшгүй шаардлагатай эмийн жагсаалтад орсон антибиотик эмийн хэрэглээнд хийсэн маркетингийн судалгаа” сэдвээр эм зүйн ухааны докторын зэрэг хамгаалж, дэд профессор цол хүртсэн, зөвлөх зэргийн эм зүйч.
👩‍💼Ажлын гараагаа Баянхонгор аймгийн Бууцагаан суманд бага эмчээр эхэлсэн бол эм зүйчийн карьераа Дархан хотын ЭСУК-н даргаас эхлээд, Монгол эм импекс концернын орлогч захирал, Эмийн заводын захирал, “Энхийн шүүдэр” эмийн үйлдвэрийн үүсгэн байгуулагч, зөвлөхөөр ажилласан. Тэрбээр МЭЗБН-ын “Эм” Холбооны гүйцэтгэх захирал, удирдах зөвлөлийн гишүүн, Хүний эмийн зөвлөлийн гишүүнээр тус тус ажилласан. Мөн 5 ном, товхимол, 20 орчим мэргэжлийн хууль дүрэм бодлогын баримт бичиг, 30 орчим эрдэм шинжилгээний өгүүлэл, илтгэлийг дотоод, гадаадыг сэтгүүлд хэвлүүлж, 4 оюуны өмчийн эрх, 15 үйлдвэрлэгчийн фармакопейн өгүүлэл, 30 гаруй улсын стандарт батлуулсан. Салбартаа үр бүтээлтэй, тасралтгүй 50 гаруй жил ажилласныг төр засаг үнэлж, Хөдөлмөрийн гавьяаны улаан тугийн одон, Монгол улсын эрүүлийг хамгаалахын гавъяат ажилтан цол хэргэмээр шагнажээ.

02/05/2026

💪💪 Yaay We've made it

Судлаач эм зүйч багийн зохион байгуулсан хамгийн анхны “Unlock Your Career” эвент амжилттай зохион байгуулагдлаа.

Онлайн болон биечлэн хосолсон энэхүү уулзалтад мэдлэгт дурладаг, хөгжиж дэвших чин хүсэлтэй 30 гаруй эм зүйч, эмийн мэргэжилтэн, бүр биотехнологич ч хүрэлцэн ирсэн нь бидэнд асар их урам өглөө.

Оролцогчдын дунд ирээдүйгээ бүтээхээр тэмүүлж буй оюутнууд, шинэхэн төгсөгчид, өөрийгөө дахин сорьж шинэ боломж эрэлхийлж буй залуус, мөн бусдыг манлайлан чиглүүлдэг захирал, удирдагч эм зүйч нар хүртэл нэг дор цугларсан нь энэ уулзалтыг илүү үнэ цэнтэй болгосон юм. Бид зочин илтгэгчээсээ, оролцогч бүрээсээ суралцсан, тэднийхээ санаа бодлыг сонссон гоё өдөр байлаа.

Бидний урилгаар хүрэлцэн ирсэн эрхэм зочин маань зөвхөн сайн суралцагч биш, сайн мэргэжилтэн, сайн удирдагч байх тухай гээд тал бүрийг хамарсан үнэтэй туршлага, бодит амьдрал дээрээсээ урган гарсан олон олон жор хуваалцлаа.
Тэрээр:
• Англи хэлийг хэрхэн тууштай сурсан тухай,
• Карьераа хэрхэн олон чиглэлд хөгжүүлж өөрийгөө сорьсон тухай,
• Ажилласан газар бүрээсээ хэрхэн суралцаж өсөн дэвшсэн тухай,
• Салбарынхаа чанар, аюулгүй байдлыг сайжруулахын төлөө хэрхэн ажилласан тухай,
• Мөн сайн удирдагч байхын үнэ цэнэ, хандлагын талаар бидэнд харамгүй хуваалцсан юм.

Ярьсан туршлага бүр нь амьдралд ойр, практикт хэрэгтэй, бодит үнэ цэнтэй байлаа. Үнэхээр 2 цаг гэдэг ийм хүний туршлагыг сонсоход дэндүү бага хугацаа байсныг бүгд мэдэрсэн байхаа.

Энэ гайхалтай уулзалтаас бидний авч үлдэх хамгийн чухал 3 жор:

✅Амжилтын жор
“Өнөөдрийн өөрийгөө чи өөрөө бүтээдэг.”
Шувуу буух модоо өөрөө сонгодог шиг хэн байх нь зөвхөн өөрөөс тань хамаарна. Өдөр бүр мэдлэгээ хөгжүүлж, чадвараа сайжруулж, хийж буй үйлдэл бүртээ self-reflection хийж, ажлаа чин сэтгэлээсээ хамгийн сайнаараа хийх нь амжилтын үндэс гэдгийг онцоллоо.

✅Англи хэл сурах жор
Хэл сурахад бие, сэтгэл хоёроо нэг зорилгод төвлөрүүлж, хамгийн түрүүнд бичиж сурах хэрэгтэй. Бичсэн зүйл тархинд илүү бат үлддэг. Бичих чадвараа хөгжүүлсний дараа дуртай зүйлээ үзэж, сонсож бусад чадвараа давхар хөгжүүлэх нь хамгийн үр дүнтэй арга гэдгийг зөвлөлөө.

✅Сайн удирдагч байх жор
Сайн удирдагч эм зүйч байна гэдэг зөвхөн өндөр шаардлага тавих биш. Харин хамт олныхоо сэтгэлзүйд эерэг нөлөө үзүүлж, мэргэжлийн өсөлт хөгжилд нь хөрөнгө оруулж чаддаг хүн байх ёстой гэдгийг бидэнд ойлгууллаа.

Мөн бидэнд хамгийн хүчтэй үлдсэн санаа бол:
“Эм зүйн салбарын нэр хүнд эм зүйч бүрийн чадвараар сэргэнэ.” Тиймээс бид өөрсдөө мэдлэгтэй, чадвартай, байнга суралцдаг байх хэрэгтэй. Мөн эм зүйч бүр өөрийн дуу хоолой, өөрийн өнгө төрх, өөрийн оролцоог салбартаа бий болгож байж салбарын маань үнэ цэнэ олон нийтэд хүрнэ. Тэгж байж бид нэгдсэн хүчтэй дуу хоолойтой болно гэдгийг бас санууллаа.

Бидний урилгыг хүлээн авч үнэтэй цагаа зориулсан эрхэм зочиндоо Tsatsral Ichinkhorloo болон энэхүү эвентэд хүрэлцэн ирж, хамтдаа суралцаж, урам өгсөн бүх оролцогчдодоо чин сэтгэлийн талархал илэрхийлье.

Энэ бол зөвхөн эхлэл.
Бид хамтдаа суралцаж, хамтдаа өсөж, салбарынхаа ирээдүйг хамтдаа бүтээхийн төлөө бид үргэлжлүүлэн сайн туршлагыг хуваалцах болноо.

Хүнтэйтгэсэн Судлаач Эм Зүйч Баг