Medical Teaching Institution Bannu, Bannu Township, Bannu (2026)

02/10/2026

آئی بی پی کلینک / شعبہ پلمونولوجی

پھیپھڑوں، سانس کی نالی اور سانس سے متعلق مختلف امراض کے معائنہ، تشخیص اور علاج کی سہولت

اسسٹنٹ پروفیسر ڈاکٹر نوید پرویز پلمونولوجی (امراضِ سینہ) خلیفہ گلنواز ٹیچنگ ہسپتال، بنوں

مہارت، بیماریاں اور علاج:

دمہ (Asthma) اور سانس کی الرجی کا معائنہ اور علاج

پھیپھڑوں کے انفیکشن اور نمونیا (Pneumonia) کی تشخیص و علاج

ٹی بی (Tuberculosis) کی تشخیص، علاج اور فالو اَپ

دائمی پھیپھڑوں کی بیماری (COPD) اور سانس کی تکالیف کا علاج

مسلسل کھانسی، سانس پھولنے اور سینے میں جکڑن کی تشخیص و علاج

پھیپھڑوں کی دیگر بیماریوں اور سانس کی نالی کے مسائل کا معائنہ

نیند کے دوران سانس کی رکاوٹ اور خراٹوں سے متعلق مسائل کی جانچ و رہنمائی

اوقاتِ کار: سوموار تا جمعہ شام 04:00 بجے سے رات 08:00 بجے تک

خلیفہ گلنواز ہسپتال ایم ٹی آئی بنوں

01/10/2026

ایم ٹی آئی بنوں کے سابق ممبر بورڈ آف گورنرز کی جانب سے عائد کردہ الزامات کے حوالے سے وضاحت ، ادارہ تمام الزامات مسترد کرتا ہے،

ادارے کے تمام انتظامی اور مالی معاملات مقررہ قواعد و ضوابط کے تحت انجام دیے جاتے ہیں۔

ایم ٹی آئی بنوں نے بورڈ آف گورنرز کے سابق ممبر شب نیاز خان کی جانب سے چیئرمین بورڈ آف گورنرز اور ہسپتال انتظامیہ کے خلاف عائد کیے گئے الزامات کو بے بنیاد، من گھڑت اور حقائق کے برعکس قرار دیتے ہوئے مسترد کر دیا ہے۔ ادارے کی جانب سے واضح کیا گیا ہے کہ ایم ٹی آئی بنوں کے تمام انتظامی، مالی، تقرریوں اور خریداری سے متعلق امور ایک باقاعدہ ادارہ جاتی نظام، منظور شدہ پالیسیوں اور متعلقہ قواعد و ضوابط کے تحت انجام دیے جاتے ہیں، جن میں شفافیت، میرٹ اور اجتماعی فیصلہ سازی کو بنیادی اہمیت حاصل ہے۔

گزشتہ روز سابق ممبر بورڈ آف گورنرز شب نیاز خان نے ایک پریس کانفرنس کے دوران چیئرمین بورڈ آف گورنرز پروفیسر ڈاکٹر خالد محمود اور ہسپتال انتظامیہ کے مختلف انتظامی و مالی معاملات پر الزامات عائد کیے تھے۔ اس حوالے سے ایم ٹی آئی بنوں کا مؤقف ہے کہ بورڈ آف گورنرز کے فیصلے متعلقہ پالیسی بورڈ کے منظور شدہ قواعد و ضوابط اور ادارہ جاتی طریقہ کار کے مطابق کیے جاتے ہیں۔ یہ فیصلے کسی ایک فرد یا چیئرمین کی ذاتی صوابدید کا نتیجہ نہیں ہوتے بلکہ بورڈ کے سامنے پیش کیے جانے والے معاملات پر ممبران کی اجتماعی مشاورت اور اکثریتی رائے کی بنیاد پر کیے جاتے ہیں۔ لہٰذا کسی اجتماعی فیصلے کو کسی ایک فرد کا ذاتی اقدام قرار دینا حقائق کی درست عکاسی نہیں کرتا۔

چیئرمین بورڈ آف گورنرز پر اقرباپروری، جانبداری اور میرٹ کے خلاف بھرتیوں کے الزامات کی تردید کرتے ہوئے ادارے نے واضح کیا ہے کہ منیجرز، اسسٹنٹس اور دیگر متعلقہ انتظامی عہدوں پر بھرتیوں کا عمل ہسپتال کی ایگزیکٹو کمیٹی کے ذریعے مکمل کیا جاتا ہے۔ اس عمل میں امیدواروں کی درخواستوں کی جانچ پڑتال، اہلیت کی تصدیق، سکروٹنی اور دیگر مقررہ مراحل متعلقہ کمیٹی اور انتظامی فورمز کے ذریعے انجام دیے جاتے ہیں۔ چیئرمین یا بورڈ آف گورنرز ان بھرتیوں کے انفرادی سکروٹنی یا انتخابی عمل میں براہِ راست شریک نہیں ہوتے؛ بورڈ کا کردار متعلقہ قواعد کے تحت منظوری اور نگرانی تک محدود ہوتا ہے۔ اس لیے بھرتیوں کے پورے عمل کو چیئرمین سے منسوب کرنا درست نہیں۔

ایم ٹی آئی بنوں میں ادویات، طبی آلات، مشینری، آکسیجن گیس اور دیگر ضروری اشیاء کی خریداری ایک مقررہ طریقہ کار کے تحت کی جاتی ہے۔ اس مقصد کے لیے متعلقہ کمیٹیاں اور مجاز ایگزیکٹو افسران قواعد و ضوابط کے مطابق خریداری، ٹینڈرنگ، تکنیکی جانچ اور قیمتوں کے تقابلی جائزے کے مراحل مکمل کرتے ہیں۔ خریداری کے فیصلے متعلقہ فورمز اور مجاز حکام کے ذریعے کیے جاتے ہیں، نہ کہ کسی ایک فرد کی ذاتی مرضی سے۔ آکسیجن گیس کی خریداری بھی باقاعدہ ٹینڈرنگ کے عمل اور مارکیٹ کی قیمتوں کے تقابلی جائزے کے تحت کی جاتی ہے، جس میں چیئرمین کی انفرادی مداخلت کا الزام درست نہیں۔ اسی طرح صحت کارڈ کے تحت مریضوں کے لیے ادویات کی خریداری بھی متعلقہ کمیٹیوں کے ذریعے معیار اور مقررہ طریقہ کار کے مطابق کی جاتی ہے۔

چیئرمین بورڈ آف گورنرز پر یہ الزام کہ ایم ٹی آئی بنوں کے وسائل یا فنڈز کسی دوسرے نجی ہسپتال میں ان کے ذاتی واجبات یا بقایاجات کی ادائیگی کے لیے استعمال کیے گئے، سراسر بے بنیاد اور حقائق کے برعکس ہے۔ ایم ٹی آئی بنوں کے سرکاری و ادارہ جاتی فنڈز کا استعمال مقررہ مالی قواعد، مجاز منظوریوں اور باقاعدہ حسابات کے تحت کیا جاتا ہے۔ کسی بھی ادارہ جاتی رقم کو کسی فرد کے ذاتی مالی معاملات کے لیے استعمال کرنے کا سوال ہی پیدا نہیں ہوتا۔ اس نوعیت کے سنگین الزام کے لیے ٹھوس دستاویزی ثبوت ضروری ہیں، محض دعوے کی بنیاد پر ادارے یا اس کی قیادت کو موردِ الزام ٹھہرانا قابلِ قبول نہیں۔

سیکرٹری بورڈ آف گورنرز کی جانب سے ڈپٹی ڈائریکٹر ہیومن ریسورس (DDHR) کا اضافی چارج چھوڑنے کے معاملے کو بھی غلط رنگ دیا گیا ہے۔ مذکورہ عہدے سے علیحدگی کسی کرپشن، بدانتظامی یا کسی دیگر الزام کی بنیاد پر نہیں تھی بلکہ محکمہ صحت کی ہدایات کے مطابق ایک سے زائد عہدوں کے اضافی چارج رکھنے سے متعلق پابندی کے تناظر میں اضافی ذمہ داری چھوڑی گئی۔ اس عہدے پر مستقل تعیناتی کے لیے باقاعدہ اشتہار اور متعلقہ بھرتی کا عمل قواعد کے مطابق مکمل کیا جائے گا۔

ایم ٹی آئی بنوں میں طبی مشینری کی فراہمی، مختلف شعبہ جات کی بہتری، نئی سہولیات کا قیام، ترقیاتی و تعمیراتی منصوبوں اور دیگر انتظامی اقدامات کو کسی ایک فرد کی ذاتی کارکردگی قرار نہیں دیا جا سکتا۔ یہ تمام اقدامات بورڈ آف گورنرز کی اجتماعی پالیسی سازی، انتظامیہ کی عملی کوششوں اور متعلقہ افسران و عملے کی مشترکہ ذمہ داریوں کے نتیجے میں آگے بڑھتے ہیں۔ ادارے کی کارکردگی کو کسی ایک ممبر یا عہدیدار سے منسوب کرنے کے بجائے اس کے اجتماعی نظام اور ادارہ جاتی کوششوں کے تناظر میں دیکھا جانا چاہیے۔

ایم ٹی آئی بنوں اس امر کا اعادہ کرتا ہے کہ ادارے کے تمام انتظامی اور مالی معاملات میں شفافیت، میرٹ، قواعد و ضوابط کی پابندی اور ادارے کے مفاد کو مقدم رکھا جاتا ہے۔ کسی بھی معاملے پر سوال یا تحفظات سامنے آئیں تو ان کا جائزہ متعلقہ ریکارڈ، دستاویزات اور مجاز فورمز کے ذریعے لیا جا سکتا ہے۔ ادارہ شفافیت اور احتساب کے اصولوں پر یقین رکھتا ہے اور اپنے تمام معاملات کی وضاحت متعلقہ ریکارڈ کی روشنی میں پیش کرنے کے لیے تیار ہے۔

ایم ٹی آئی بنوں کی بنیادی ترجیح بنوں اور ملحقہ اضلاع کے عوام کو بہتر، معیاری اور بروقت طبی سہولیات کی فراہمی ہے۔ ادارے کی قیادت اور انتظامیہ اپنی توجہ ذاتی الزامات اور غیر ضروری تنازعات کے بجائے ہسپتالوں کی بہتری، طبی سہولیات میں توسیع اور مریضوں کو درپیش مسائل کے حل پر مرکوز رکھے ہوئے ہے۔

30/09/2026

ممبران بورڈ آف گورنرز ایم ٹی آئی بنوں کا تینوں ہسپتالوں کا تفصیلی دورہ، طبی و انتظامی امور کا جائزہ

ممبران بورڈ آف گورنرز ایم ٹی آئی بنوں شوکت اللہ خان اور نعمت اللہ خان نے ایم ٹی آئی کے زیرِ انتظام تینوں ہسپتالوں کا تفصیلی دورہ کیا، جہاں انہوں نے مختلف شعبہ جات میں جاری طبی و انتظامی سرگرمیوں، مریضوں کو دستیاب سہولیات اور ہسپتالوں میں جاری ترقیاتی و تعمیراتی کاموں کا موقع پر جائزہ لیا۔ دورے کے دوران خلیفہ گلنواز ٹیچنگ ہسپتال میں ہاسپٹل ڈائریکٹر پروفیسر ڈاکٹر عبدالغفور خان اور میڈیکل ڈائریکٹر اسسٹنٹ پروفیسر ڈاکٹر فرمان اللہ وزیر، وومن اینڈ چلڈرن ہسپتال میں ایسوسی ایٹ ہاسپٹل ڈائریکٹر ڈاکٹر فخر عالم جبکہ ڈسٹرکٹ ہیڈکوارٹر ہسپتال میں ایسوسی ایٹ ہاسپٹل ڈائریکٹر پروفیسر ڈاکٹر محمد اکرم خان نے انہیں مختلف شعبہ جات کا دورہ کرایا اور متعلقہ امور پر تفصیلی بریفنگ دی

اس موقع پر تمام شعبہ جات کے سربراہان، ڈائریکٹرز ،منیجرز ، انتظامی افسران اور سپروائزرز بھی موجود تھے جنہوں نے اپنے اپنے شعبوں سے متعلق بریفنگ پیش کی ،

دورے کے دوران ممبران بورڈ نے ہسپتالوں کے وارڈز، ایمرجنسی، پیتھالوجی، لیبارٹریز، ریڈیالوجی اور دیگر اہم شعبہ جات کا معائنہ کیا اور وہاں مریضوں کے لیے موجود سہولیات، طبی عملے کی دستیابی، شعبہ جاتی انتظامات اور روزمرہ امور کا براہِ راست جائزہ لیا۔ مختلف شعبہ جات کے ذمہ داران کی جانب سے جاری سرگرمیوں، دستیاب وسائل، ضروریات اور مزید بہتری کے لیے درکار اقدامات کے حوالے سے تفصیلی بریفنگ دی گئی۔

اس موقع پر انہوں تیمارداروں سے بھی گفتگو کی اور علاج، سہولیات، رہنمائی اور ہسپتال کے ماحول سے متعلق ان کی آراء معلوم کیں۔ اس موقع پر اس امر کا جائزہ بھی لیا گیا کہ مریضوں کو مختلف مراحل پر درکار طبی و انتظامی سہولیات کس حد تک مؤثر انداز میں دستیاب ہیں اور کہاں مزید بہتری کی ضرورت ہے۔

تینوں ہسپتالوں میں جاری تعمیراتی، توسیعی اور دیگر ترقیاتی کاموں کا بھی معائنہ کیا گیا۔ جاری منصوبوں کی پیش رفت، تکمیل کے مراحل اور آئندہ کے لائحہ عمل کے حوالے سے بورڈ ممبران کو آگاہ کیا گیا۔ ممبران بورڈ نے مختلف منصوبوں کی پیش رفت کا جائزہ لیتے ہوئے متعلقہ حکام کو کام کے معیار، بروقت تکمیل اور مریضوں کی ضروریات کو مدنظر رکھتے ہوئے منصوبہ بندی جاری رکھنے کی ہدایات دیں۔

ہسپتال انتظامیہ اور مختلف شعبہ جات کے سربراہان کے ساتھ تفصیلی تبادلۂ خیال بھی کیا گیا، جس میں شعبہ جاتی ضروریات، مریضوں کے بڑھتے ہوئے بوجھ، دستیاب سہولیات میں بہتری، طبی خدمات کے دائرہ کار میں توسیع اور انتظامی امور کو مزید مؤثر بنانے سے متعلق مختلف امور زیرِ بحث آئے۔

ممبران بورڈ آف گورنرز نے ہدایت کی کہ ہسپتالوں میں جاری اقدامات اور منصوبوں کی نگرانی محض کاغذی کارروائی تک محدود رکھنے کے بجائے فیلڈ کی ضروریات اور مریضوں کے تجربے کو سامنے رکھتے ہوئے کی جائے، جبکہ متعلقہ افسران کو شعبہ جاتی مسائل کے بروقت حل، دستیاب وسائل کے مؤثر استعمال اور مریضوں کے لیے سہولیات میں مسلسل بہتری کے لیے ضروری اقدامات جاری رکھنے کی ہدایات بھی جاری کی گئیں۔

دورے کے اختتام پر اس امر پر زور دیا گیا کہ ایم ٹی آئی بنوں کے ہسپتالوں میں طبی خدمات، تشخیصی سہولیات، انفراسٹرکچر اور انتظامی نظام میں بہتری ایک مسلسل عمل ہے، جس کے لیے بورڈ آف گورنرز، ہسپتال انتظامیہ اور تمام متعلقہ شعبہ جات کے درمیان مؤثر رابطہ اور عملی اقدامات کا تسلسل ضروری ہے۔

29/09/2026

خلیفہ گلنواز ہسپتال بنوں میں ورلڈ ہارٹ ڈے کے حوالے سے آگاہی تقریب، واک کا بھی اہتمام کیا گیا

خلیفہ گلنواز ٹیچنگ ہسپتال بنوں میں پاکستان کارڈیک سوسائٹی بنوں چیپٹر کے زیرِ اہتمام ورلڈ ہارٹ ڈے کے سلسلے میں آگاہی تقریب کا انعقاد کیا گیا، جس کا بنیادی مقصد دل اور خون کی شریانوں سے متعلق بیماریوں کی روک تھام، ہائی بلڈ پریشر اور ذیابیطس جیسے اہم خطرات کے بارے میں طبی برادری اور عوام الناس میں آگاہی کو فروغ دینا تھا۔

تقریب میں ڈین بنوں میڈیکل کالج و سربراہ شعبہ کارڈیالوجی اور پاکستان کارڈیک سوسائٹی بنوں چیپٹر کے کوآرڈینیٹر پروفیسر ڈاکٹر محمد ندیم سمیت مختلف شعبہ جات سے تعلق رکھنے والے ڈاکٹرز، فیکلٹی ممبران، سینئر و جونیئر ڈاکٹرز اور دیگر طبی عملے نے شرکت کی۔

پروفیسر ڈاکٹر محمد ندیم نے ورلڈ ہارٹ ڈے کی اہمیت، دل کے امراض سے بچاؤ اور صحت مند طرزِ زندگی کے حوالے سے گفتگو کرتے ہوئے کہا کہ قلبی و دیگر امراض دنیا بھر میں صحت کے اہم مسائل میں شامل ہیں، تاہم بروقت آگاہی، خطرے کے عوامل کی نشاندہی اور صحت مند طرزِ زندگی اختیار کرکے ان بیماریوں کے خطرات کو کم کیا جا سکتا ہے۔ انہوں نے صحت کے شعبے سے وابستہ افراد پر زور دیا کہ وہ مریضوں کے ساتھ ساتھ عوام الناس میں بھی دل کے امراض سے بچاؤ کے حوالے سے آگاہی کو فروغ دیں۔

تقریب کے دوران ایسوسی ایٹ پروفیسر شعبہ کارڈیالوجی ڈاکٹر سعید مقصود نے ہائی بلڈ پریشر (بلڈ پریشر) کے موضوع پر تفصیلی پریزنٹیشن پیش کی، جس میں بلند فشارِ خون کی وجوہات، اس کے صحت پر اثرات، بروقت تشخیص اور مؤثر کنٹرول کے مختلف پہلوؤں پر شرکاء کو آگاہی فراہم کی گئی۔

اسی طرح اسسٹنٹ پروفیسر شعبہ اینڈوکرائنالوجی ڈاکٹر طاہر اللہ نے ذیابیطس (شوگر) کے حوالے سے پریزنٹیشن پیش کی اور ذیابیطس، دل کے امراض اور دیگر پیچیدگیوں کے باہمی تعلق، بروقت تشخیص، علاج اور احتیاطی تدابیر کے بارے میں تفصیلی معلومات فراہم کیں۔

تقریب میں اس بات پر بھی زور دیا گیا کہ ہائی بلڈ پریشر، ذیابیطس، غیر متوازن غذا، جسمانی سرگرمی کی کمی اور دیگر قابلِ تدارک عوامل کے حوالے سے بروقت آگاہی اور مناسب احتیاط دل کے امراض کے خطرات کو کم کرنے میں اہم کردار ادا کر سکتی ہے۔

تقریب کا مقصد صرف ورلڈ ہارٹ ڈے کی مناسبت سے آگاہی فراہم کرنا نہیں بلکہ طبی ماہرین، ہیلتھ کیئر پروفیشنلز، طلبہ اور عوام کے درمیان دل کے امراض سے بچاؤ کے حوالے سے شعور اور ذمہ داری کے احساس کو مزید مضبوط بنانا بھی تھا۔

24/09/2026

ایم ٹی آئی بنوں کی اعلیٰ قیادت کی صوبائی وزیر صحت سے ملاقات، ہسپتالوں کی مزید توسیع و ترقی پر تفصیلی گفتگو

چیئرمین بورڈ آف گورنرز ایم ٹی آئی بنوں پروفیسر ڈاکٹر خالد محمود کی قیادت میں ایم ٹی آئی بنوں کی اعلیٰ قیادت کے وفد نے صوبائی وزیر صحت خیبر پختونخوا خلیق الرحمن سے ملاقات کی، جس میں ایم ٹی آئی بنوں کے ہسپتالوں میں طبی سہولیات کی مزید بہتری، مختلف شعبہ جات کی توسیع اور نئی سہولیات کے قیام کے حوالے سے تفصیلی تبادلۂ خیال کیا گیا۔

وفد میں ڈین بنوں میڈیکل کالج بنوں پروفیسر ڈاکٹر محمد ندیم، ہاسپٹل ڈائریکٹر ایم ٹی آئی بنوں پروفیسر ڈاکٹر عبدالغفور خان، میڈیکل ڈائریکٹر اسسٹنٹ پروفیسر ڈاکٹر فرمان اللہ وزیر اور سیکرٹری بورڈ آف گورنرز ایم ٹی آئی بنوں منیب خان بھی شامل تھے۔

ملاقات کے دوران بنوں اور ملحقہ اضلاع سے آنے والے مریضوں کی ضروریات کو مدنظر رکھتے ہوئے ایم ٹی آئی بنوں کے ہسپتالوں میں طبی سہولیات کے دائرہ کار کو مزید وسیع کرنے، موجودہ شعبہ جات کو اپ گریڈ کرنے اور نئی تشخیصی و علاج کی سہولیات فراہم کرنے کے مختلف امور زیرِ بحث آئے۔

اس موقع پر ایم ٹی آئی بنوں کے ہسپتالوں میں ایم آر آئی کی سہولت، ڈی ایچ کیو ہسپتال بنوں کے ٹراما سنٹر کی توسیع، کڈنی سنٹر کے قیام سمیت مختلف شعبہ جات کی توسیع اور دیگر ترقیاتی امور پر تفصیلی گفتگو ہوئی۔ آبادی اور مریضوں کی بڑھتی ہوئی ضروریات کے مطابق ہسپتالوں میں شعبہ جات اور طبی سہولیات میں مزید توسیع کی ضرورت پر بھی زور دیا گیا۔

وفد نے صوبائی وزیر صحت کو ایم ٹی آئی بنوں کے ہسپتالوں میں جاری اور مجوزہ منصوبوں، مریضوں کو درپیش ضروریات اور طبی خدمات کو مزید مؤثر بنانے کے لیے درکار اقدامات سے آگاہ کیا۔ اس بات پر بھی زور دیا گیا کہ بنوں سمیت ملحقہ اضلاع کے عوام کو جدید تشخیصی اور علاج کی سہولیات مقامی سطح پر فراہم کرنے کے لیے منصوبہ بندی کو مزید آگے بڑھایا جائے۔

صوبائی وزیر صحت خلیق الرحمن نے وفد کو ایم ٹی آئی بنوں میں طبی سہولیات کی بہتری اور ضروری ترقیاتی اقدامات کے حوالے سے مکمل تعاون کی یقین دہانی کرائی اور متعلقہ امور پر محکمہ صحت کے حکام کے ساتھ ضروری پیش رفت کے لیے تعاون کی یقین دہانی کرائی۔

ملاقات میں اس امر پر اتفاق کیا گیا کہ ایم ٹی آئی بنوں میں طبی سہولیات کی بہتری اور توسیع کے اقدامات کا بنیادی مقصد مریضوں کو بروقت، معیاری اور جدید طبی خدمات کی فراہمی اور بنوں سمیت ملحقہ اضلاع کے عوام کے لیے علاج کی سہولیات کو مزید آسان اور مؤثر بنانا ہے۔

24/09/2026

آئی بی پی کلینک / آرتھوپیڈک ڈی ایچ کیو ہسپتال بنوں

ہڈیوں، جوڑوں، پٹھوں اور سپورٹس انجریز سے متعلق مختلف امراض کے لیے معائنہ، تشخیص اور علاج کی سہولت

اسسٹنٹ پروفیسر ڈاکٹر نیک محمد خان
آرتھوپیڈک
ڈی ایچ کیو ہسپتال، بنوں

مہارت، بیماریاں اور علاج:

• ہڈیوں اور جوڑوں کے امراض کا معائنہ اور علاج

• ہڈیوں کے فریکچر اور چوٹوں کی تشخیص و علاج

• گھٹنوں، کندھوں اور دیگر جوڑوں کے درد کا معائنہ و علاج

• کمر اور گردن کے درد سے متعلق طبی مسائل کی تشخیص اور علاج

• جوڑوں کی سوزش اور دیگر آرتھوپیڈک مسائل کا علاج

• کھیلوں اور روزمرہ زندگی میں ہونے والی ہڈیوں و جوڑوں کی چوٹوں کا علاج

سوموار سے جمعہ
شام04:00 تا رات 08:00 بجے تک

19/09/2026

ایم ٹی آئی بنوں میں کلینیکل ایگزیکٹو بورڈ کا دوسرا اجلاس

خلیفہ گلنواز ہسپتال (ایم ٹی آئی) بنوں میں میڈیکل ڈائریکٹر اسسٹنٹ پروفیسر ڈاکٹر فرمان اللہ وزیر کی سربراہی میں ان کے دفتر میں گزشتہ روز کلینیکل ایگزیکٹو بورڈ کا دوسرا اجلاس منعقد ہوا، جس میں مختلف شعبہ جات کے چیئرمینز اور سربراہان نے شرکت کی۔

اجلاس میں ہسپتال کے مختلف شعبہ جات کی کارکردگی، درپیش مسائل اور مریضوں کو فراہم کی جانے والی طبی سہولیات کا جائزہ لیا گیا۔ اس موقع پر متعلقہ چیئرمینز اور شعبہ جات کے سربراہان سے ان کے شعبہ جاتی امور، مسائل اور بہتری کے لیے تجاویز بھی حاصل کی گئیں۔

اجلاس میں اس بات پر تفصیلی غور کیا گیا کہ مختلف طبی شعبہ جات کے درمیان باہمی رابطے اور تعاون کو مزید بہتر بنا کر ہسپتال کے طبی نظام کو زیادہ مؤثر اور منظم کیسے بنایا جا سکتا ہے، تاکہ مریضوں کو بروقت اور معیاری طبی سہولیات کی فراہمی یقینی بنائی جا سکے۔

اجلاس کا مقصد کلینیکل سروسز میں بہتری، ڈاکٹرز اور دیگر طبی عملے کے درمیان بہتر ٹیم ورک، درپیش مسائل کے حل اور مریضوں کے لیے طبی سہولیات کو مزید مؤثر بنانا ہے۔

ایم ٹی آئی بنوں میں طبی خدمات کی بہتری اور مریضوں کو محفوظ، معیاری اور بروقت علاج کی فراہمی کے لیے مختلف سطحوں پر ایسے اقدامات کا سلسلہ جاری ہے۔

17/09/2026

وومن اینڈ چلڈرن ہسپتال میں مریض کے انتقال کا واقعہ، باقاعدہ انکوائری کمیٹی تشکیل دے دی گئی

وومن اینڈ چلڈرن ہسپتال، ایم ٹی آئی بنوں میں سعد ولد ایم۔ صابر کے افسوسناک انتقال کے واقعے پر ہسپتال انتظامیہ کی جانب سے باقاعدہ انکوائری کمیٹی تشکیل دے دی گئی ہے، جو واقعے کے تمام پہلوؤں کا تفصیلی جائزہ لے گی۔

ابتدائی رپورٹ کے مطابق مریض کو دوروں (Fits) کی حالت میں ہسپتال لایا گیا، جہاں ڈیوٹی پر موجود ڈاکٹرز، نرسنگ اسٹاف اور دیگر مستند طبی عملے نے مریض کو طبی امداد فراہم کرتے ہوئے اس کی جان بچانے کی بھرپور کوششیں کیں۔ اور طبی اقدامات میں حصہ لیا۔ تاہم تمام تر طبی کوششوں کے باوجود مریض جانبر نہ ہو سکا۔ ہسپتال انتظامیہ اور طبی عملہ اس افسوسناک واقعے پر گہرے دکھ اور افسوس کا اظہار کرتے ہیں اور لواحقین سے دلی ہمدردی کا اظہار کرتے ہیں۔

واقعے کی مکمل اور غیر جانب دارانہ تحقیقات کے لیے تشکیل دی گئی انکوائری کمیٹی مریض کے ہسپتال پہنچنے سے لے کر علاج اور انتقال تک کے تمام متعلقہ ریکارڈ، طبی اقدامات اور واقعے سے متعلق دیگر امور کا تفصیلی جائزہ لے گی۔ کمیٹی متعلقہ ڈاکٹرز، نرسنگ اسٹاف اور دیگر عملے کے بیانات بھی قلمبند کرے گی اور اپنی تحقیقاتی رپورٹ اور سفارشات ہسپتال انتظامیہ کو پیش کرے گی۔

انکوائری کے دوران اگر کسی بھی مرحلے پر غفلت، کوتاہی یا قواعد و ضوابط کی خلاف ورزی ثابت ہوئی تو ذمہ داران کے خلاف متعلقہ قواعد کے مطابق کارروائی عمل میں لائی جائے گی۔

ہسپتال انتظامیہ معزز عوام سے مؤدبانہ گزارش کرتی ہے کہ خدانخواستہ کسی مریض کی جان نہ بچ سکے تو غم اور جذبات کی کیفیت میں بھی سڑکیں بند کرنے، ہسپتال کے راستے میں رکاوٹ پیدا کرنے یا دیگر مریضوں کے علاج میں خلل ڈالنے سے گریز کیا جائے۔ ایسی صورتحال میں بالخصوص ایمرجنسی میں موجود دیگر مریضوں کی بروقت طبی امداد متاثر ہو سکتی ہے اور ان کی زندگی بھی خطرے میں پڑ سکتی ہے۔

کسی بھی شکایت، تحفظات یا واقعے سے متعلق معلومات کے لیے ہسپتال انتظامیہ سے براہِ راست رابطہ کیا جا سکتا ہے۔ انتظامیہ ہر شکایت کو سنجیدگی سے لیتے ہوئے دستیاب حقائق اور ریکارڈ کی روشنی میں شفاف انداز میں جائزہ لے گی اور ضروری کارروائی عمل میں لائے گی۔

ایم ٹی آئی بنوں انتظامیہ مریضوں کے تحفظ، شفافیت، احتساب اور معیاری طبی سہولیات کی فراہمی کے لیے اپنی ذمہ داریاں مؤثر انداز میں ادا کرنے کے عزم کا اعادہ کرتی ہے۔

ترجمان، ایم ٹی آئی بنوں

16/09/2026

ڈاکٹر افشاں خان (PhD) ایم ٹی آئی بنوں کی نرسنگ ڈائریکٹر تعینات، انہوں نے باقاعدہ اپنے عہدے کا چارج سنبھال لیا

ڈاکٹر افشاں خان (PhD) نے نرسنگ ڈائریکٹر، میڈیکل ٹیچنگ انسٹی ٹیوشن (MTI) بنوں کی حیثیت سے اپنے عہدے کا باقاعدہ چارج سنبھال لیا۔

اپنی نئی ذمہ داریوں کے حوالے سے ڈاکٹر افشاں خان نے اس عزم کا اظہار کیا کہ نرسنگ کیئر کے معیار کو مزید بہتر بنانے، مریضوں کو محفوظ اور معیاری نگہداشت کی فراہمی، نرسنگ سروسز میں پیشہ ورانہ معیار کے فروغ اور نرسنگ اسٹاف کی استعدادِ کار میں بہتری کے لیے مؤثر اقدامات کیے جائیں گے۔

انہوں نے اس عزم کا بھی اظہار کیا کہ ایم ٹی آئی بنوں کے ادارہ جاتی اہداف کے حصول اور مریض مرکز نرسنگ کیئر کے فروغ کے لیے نرسنگ ٹیم کے ساتھ مربوط اور مؤثر انداز میں کام کیا جائے گا۔

ایم ٹی آئی بنوں ڈاکٹر افشاں خان کو بنوں آمد پر خوش آمدید اور نئی ذمہ داری سنبھالنے پر نیک خواہشات کا اظہار کرتا ہے۔

16/09/2026

ایم ٹی آئی بنوں قیادت کا وومن اینڈ چلڈرن ہسپتال کا دورہ، طبی و انتظامی امور کا جائزہ

ڈین بنوں میڈیکل کالج پروفیسر ڈاکٹر محمد ندیم ، ہاسپٹل ڈائریکٹر ایم ٹی آئی بنوں پروفیسر ڈاکٹر عبدالغفور خان ، میڈیکل ڈائریکٹر اسسٹنٹ پروفیسر ڈاکٹر فرمان اللہ وزیر اور نرسنگ ڈائریکٹر ڈاکٹر افشاں خان نے وومن اینڈ چلڈرن ہسپتال بنوں کا مشترکہ دورہ کیا، جہاں انہوں نے مختلف شعبہ جات میں جاری طبی و انتظامی امور، مریضوں کے لیے دستیاب سہولیات اور ہسپتال کے مجموعی انتظامات کا تفصیلی جائزہ لیا۔

دورے کے دوران ایسوسی ایٹ ہاسپٹل ڈائریکٹر ڈاکٹر فخر عالم اور ایسوسی ایٹ میڈیکل ڈائریکٹر زنانہ ہسپتال ڈاکٹر محمد کامران نے ہسپتال کے مختلف شعبہ جات، مریضوں کو فراہم کی جانے والی طبی سہولیات، انتظامی امور اور شعبہ جاتی ضروریات کے حوالے سے تفصیلی بریفنگ دی۔ اس موقع پر مختلف شعبہ جات کے افسران نے اپنے متعلقہ امور اور ضروریات کے بارے میں بھی آگاہ کیا۔

انہوں نے مریضوں اور ان کے تیمارداروں کے لیے انتظامات، طبی عملے کی دستیابی، صفائی ستھرائی اور دیگر سہولیات کا جائزہ لیا۔ انہوں نے ہسپتال میں جاری امور کو مزید منظم اور مؤثر بنانے کے حوالے سے متعلقہ افسران سے بھی گفتگو کی۔

اس امر پر زور دیا گیا کہ خواتین اور بچوں کو بروقت اور معیاری طبی سہولیات کی فراہمی کے ساتھ ساتھ ہسپتال کے انتظامی امور کو مزید بہتر بنایا جائے تاکہ مریضوں اور ان کے تیمارداروں کو زیادہ سے زیادہ سہولت فراہم کی جا سکے۔

ہسپتال انتظامیہ کو ہدایت کی گئی کہ مریضوں کی ضروریات کو ترجیح دیتے ہوئے دستیاب وسائل کو مؤثر انداز میں بروئے کار لایا جائے، شعبہ جاتی امور میں بہتری کے لیے عملی اقدامات جاری رکھے جائیں اور ہسپتال میں فراہم کی جانے والی طبی و انتظامی خدمات کے معیار کو مزید بہتر بنایا جائے۔

Medical Teaching Institution Bannu

02/10/2026

01/10/2026

30/09/2026

29/09/2026

24/09/2026

24/09/2026

19/09/2026

17/09/2026

16/09/2026

16/09/2026

Address

Telephone

Website

Alerts

Contact The Business

Shortcuts

Share

Category

Listing takedown request