Alsiddique Veterinary & Poultry Medical Store

28/07/2026

11/03/2026

جب بھی آپ نیا جانور خرید کر فارم پر لائیں تو سب سے پہلے یہ بات یاد رکھیں کہ اس جانور کی صحت کے بارے میں آپ کو مکمل یقین نہیں ہوتا۔ کئی دفعہ جانور باہر سے ٹھیک لگتا ہے لیکن اس کے اندر بیماری موجود ہوتی ہے۔ اگر آپ اس کو سیدھا باقی جانوروں کے ساتھ باندھ دیں تو بیماری پورے فارم میں پھیل سکتی ہے۔
سب سے پہلی احتیاط یہ ہے کہ نئے جانور کو کم از کم 7 سے 10 دن الگ جگہ پر رکھیں۔ اس کو ہم قرنطینہ بھی کہتے ہیں۔ اس دوران آپ دیکھیں کہ جانور صحیح طرح کھا پی رہا ہے یا نہیں، اس کو بخار تو نہیں ہے، یا کوئی کھانسی یا اسہال تو نہیں ہو رہا۔
دوسری اہم بات یہ ہے کہ نئے جانور کو کیڑوں کی دوا اور ٹک مار دوا ضرور لگوائیں۔ اکثر جانوروں کے جسم پر چیچڑ اور جوئیں ہوتی ہیں جو باقی جانوروں میں بھی پھیل سکتی ہیں۔ اس لیے بہتر ہے کہ ڈاکٹر سے مشورہ کر کے سپرے یا انجیکشن لگوا لیں۔
تیسری احتیاط یہ ہے کہ جانور کو فوراً زیادہ ونڈا نہ دیں۔ کیونکہ ہر فارم کی خوراک مختلف ہوتی ہے۔ اگر آپ اچانک زیادہ ونڈا دے دیں گے تو جانور کا پیٹ خراب ہو سکتا ہے یا پیٹ پھولنے کا مسئلہ بھی ہو سکتا ہے۔ اس لیے آہستہ آہستہ اس کو اپنے فارم کی خوراک پر لائیں۔
چوتھی بات یہ ہے کہ جانور کو صاف پانی اور آرام دہ جگہ دیں۔ نیا ماحول ہونے کی وجہ سے جانور کو کچھ دن ایڈجسٹ ہونے میں لگتے ہیں۔ اگر جگہ صاف اور پرسکون ہو گی تو جانور جلدی سیٹ ہو جائے گا اور دودھ بھی بہتر دے گا۔
آخری اہم بات یہ ہے کہ اگر جانور دودھ والا ہے تو اس کا تھن ضرور چیک کریں۔ بعض دفعہ نئے جانور میں ماسٹائٹس یا دودھ کی بیماری ہوتی ہے جو دوسرے جانوروں میں بھی جا سکتی ہے۔ اس لیے پہلے اچھی طرح چیک کریں پھر باقی جانوروں کے ساتھ باندھیں۔
اگر آپ ان چند احتیاطوں پر عمل کریں گے تو آپ کا فارم بیماریوں سے محفوظ رہے گا اور نیا جانور بھی جلدی فارم کے ماحول میں سیٹ ہو جائے گا۔