03/08/2026
پریس ریلیز
ڈسٹرکٹ ہیلتھ آفس، استور
آج ڈسٹرکٹ ہیلتھ آفیسر استور، ڈاکٹر عارف حسین صاحب نے بی ایچ یو پکوراہ کا دورہ کیا، جہاں انہوں نے مختلف شعبوں کا معائنہ کیا اور عملے کو عوام کو معیاری اور بروقت طبی سہولیات کی فراہمی یقینی بنانے کی ہدایت کی۔
دورے کے دوران ڈاکٹر عارف حسین صاحب نے حضرت امام حسینؓ، چیلم میں کل منعقد ہونے والے فری میڈیکل کیمپ کے انتظامات کا بھی جائزہ لیا۔ انہوں نے مقامی عمائدین اور کمیونٹی کے افراد سے ملاقات کی، ان کے مسائل سنے اور انہیں یقین دلایا کہ محکمہ صحت دور دراز علاقوں میں بھی بہترین طبی سہولیات کی فراہمی کے لیے ہر ممکن اقدامات کر رہا ہے۔
اس موقع پر فری میڈیکل کیمپ کے لیے فراہم کی جانے والی ادویات بھی موقع پر موجود متعلقہ ڈاکٹروں اور پیرامیڈیکل ٹیم کے حوالے کی گئیں تاکہ کل کیمپ کے دوران مریضوں کو بروقت، معیاری اور مفت طبی خدمات اور ادویات فراہم کی جا سکیں۔
ڈاکٹر عارف حسین صاحب نے کہا کہ دور دراز علاقوں میں فری میڈیکل کیمپس کا انعقاد محکمہ صحت استور کی اولین ترجیحات میں شامل ہے اور عوام کو ان کی دہلیز پر معیاری طبی سہولیات فراہم کرنے کے لیے ایسے اقدامات آئندہ بھی جاری رہیں گے۔
