03/03/2026
اسلام آباد (CNI)
ملک میں سانس اور پھیپھڑوں کے امراض کے علاج کیلئے استعمال ہونے والے طبی آلات کی خریداری میں سنگین بے ضابطگیوں کی اطلاعات سامنے آ رہی ہیں۔ ماہرین کے مطابق CPAP اور BiPAP جیسی مشینیں، جو دمہ، نیند میں سانس رکنے (Sleep Apnea) اور دیگر تنفسی عوارض میں استعمال ہوتی ہیں، نہایت حساس اور ذاتی نوعیت کے طبی آلات ہیں۔
طبی اصولوں کے تحت ان مشینوں کے ماسک اور بعض لوازمات صرف ایک ہی مریض کے استعمال کیلئے مخصوص ہوتے ہیں۔ تاہم مارکیٹ میں استعمال شدہ (Used) مشینوں اور ماسک کی فروخت کے شواہد مل رہے ہیں، جو نہ صرف غیر اخلاقی عمل ہے بلکہ صحت کیلئے بھی خطرناک ثابت ہو سکتا ہے۔
اس حوالے سے راقم کو خود ایک عملی تجربہ پیش آیا۔ ایک معروف ملکی فرم، جو ایک بین الاقوامی کمپنی سے وابستہ بتائی جاتی ہے، کی جانب سے انتہائی مہارت اور چالاکی سے استعمال شدہ CPAP ماسک فراہم کیا گیا۔ معاملہ سامنے آنے پر کمپنی نے محض “نوٹس” لینے تک محدود کارروائی کی۔
یہ امر بھی قابلِ ذکر ہے کہ چند سال قبل عالمی شہرت یافتہ کمپنی Philips نے اپنی بعض CPAP اور BiPAP مشینوں کے حوالے سے حفاظتی خدشات کے باعث باضابطہ Recall جاری کیا تھا اور صارفین سے متاثرہ مشینیں واپس کرنے کی درخواست کی تھی۔
کمپنی کا سرکاری اعلان یہاں ملاحظہ کیا جا سکتا ہے:
https://www.usa.philips.com/healthcare/e/sleep/communications/src-update�
ماہرین کے مطابق Recall شدہ یا بیرونِ ملک سے ریفربشڈ مشینوں کی غیر مصدقہ فروخت مریضوں کیلئے سنگین خطرات پیدا کر سکتی ہے، خصوصاً جب ان کی مناسب جانچ، تصدیق اور رجسٹریشن نہ کی جائے۔
متعلقہ حکام سے مطالبہ ہے کہ:
• درآمد شدہ طبی آلات کی مؤثر جانچ یقینی بنائی جائے
• Recall شدہ مشینوں کی فروخت کی سخت نگرانی کی جائے
• Used ماسک اور ذاتی لوازمات کی فروخت پر واضح ضابطہ کار وضع کیا جائے
مریض حضرات اور ان کے اہل خانہ سے بھی گزارش ہے کہ مشین خریدتے وقت سیریل نمبر کی تصدیق کریں، مستند ڈیلرز سے خریداری کریں اور استعمال شدہ لوازمات سے اجتناب کریں۔
اس اہم عوامی صحت کے مسئلے پر مزید تحقیقی تفصیلات جلد پیش کی جائیں گی۔
قانونی وضاحت (Disclaimer):
یہ تحریر عوامی آگاہی کے مقصد کیلئے ہے۔ مذکورہ Philips Recall کمپنی کا اپنا سرکاری اعلان تھا جس کا حوالہ ان کی ویب سائٹ سے دیا گیا ہے۔ اس تحریر کا مقصد کسی مخصوص کمپنی کی ساکھ کو نقصان پہنچانا نہیں بلکہ طبی آلات کی محفوظ خریداری سے متعلق احتیاطی پہلو اجاگر کرنا ہے۔
