25/02/2026
أبو نواس هو أكتر شاعر "دوّخ" الأدباء العرب والغربيين، وحيّرهم ليفهموا شخصيته وكيف كان هالعقل شغال، ووين كان واقف بالضبط من الدين والأخلاق. والشي اللي الغريب والمضحك، انو يجي بني آدم بعد ما مات الزلمة بأكتر من 1300 سنة، ويحاول يحلله نفسياً ليحاسبه أخلاقياً وثقافياً.. بس لإنو كان يكتب شعر!
أبو نواس " الحسن بن هانئ " بيمثّل "الخيال" أو الجانب المخفي بالشخصية العربية، هاد الجانب اللي الكل بيخاف يواجهه، مشان هيك حبسوه بصورة "السكّير" ونسيوا إنو عالم ومتفلسف وشخصيته معقدة كتير.
هالتناقض الفظيع بشعره مو بس "تقلب مزاج"، هاد انعكاس لعقل بيشوف الدنيا من زوايا عكس بعضها تماماً. شوفوا هالأبيات اللي حيرت الدكاترة والمحللين النفسيين:
1. بقمة التمرد والـ "طنة وال رنة" (الأنا المتضخمة):
هون بيطلع أبو نواس اللي بيجاكر المجتمع وبيرفض التوبة بوقاحة فنية:
" أَلا فَاِسقِني خَمراً وَقُل لي هِيَ الخَمرُ .. وَلا تَسقِني سِرّاً إِذا أَمكَنَ الجَهرُ
فَمَا الغَبنُ إِلا أَن تَراني صاحِياً .. وَما الغُنمُ إِلا أَن يُتَعتِعَني السُكرُ "
(يعني: صبلي كاسة وقلي هي خمرة بوشي، ولا تسقيني بالخفي طالما فينا نشرب قدام الكل.. الخسارة إني أصحى، والربح إني أسكر لدوخ!)
وهي الأبيات هي اللي بيمسكوه منها جماعة "الأخلاق" وبقولوا عليه منحل.
2. بقمة الانكسار والزهد (الأنا اللي بتأنب صاحبها):
بالمقابل، بتلاقي قصيدة التوبة اللي بتدرّس بالدين، وبيطلع فيها إنسان خايف ومنكسر ومآمن بالحساب:
" يا رَبِّ إِن عَظُمَت ذُنوبي كَثرَةً .. فَلَقَد عَلِمتُ بِأَنَّ عَفوَكَ أَعظَمُ
إِن كانَ لا يَرجوكَ إِلّا مُحسِنٌ .. فَبِمَن يَلوذُ وَيَستَجيرُ المُجرِمُ؟ "
هاد البيت الأخير هو "تحليل نفسي" لحاله، هو بيعرف حاله "مجرم" بس مآمن بإنو رحمة الله واسعة.
هاد الشخص مؤمن بنظرية الشخصية بأنه مادام الله قال عن حاله الخبير العليم بالعباد يبقى أكيد معادلته لاعطاء حكم وموقف مختلفة عن البشر لأنه يملك كل المقاييس والاحتمالات !!
3. التناقض الوجودي (بين الكاسة والموت):
وهو غرقان بوصف السهر، فجأة بيقلب فيلسوف بيعرف إنو الموت ناطره، وهون المحلل بيضيع:
" تَبكي العِصابةُ مِن مَوتِ الحُسينِ وَلا .. يَبكونَ مِن قَربِ يومٍ فيهِ تُقبضُ
أَنتم على شَرَفٍ مِن أن تَزولَ بِكُم .. أَقدامُكُم، فَاِحذَروا الموتَ الذي يَرِضُ "
رؤية "نفسية" لهالعجقة:
محللين كبار متل العقاد وطه حسين، شافوا إنو أبو نواس كان عنده "ازدواجية" ناتجة عن صراع هويته وصراعه مع السلطة والدين.
.
.
