Isbitaalka Xoogga

08/08/2026

Deeq Kutubta Qur’aanka Kariimka ah oo la gaarsiiyay Masjidka Isbitaalka Xoogga Dalka Soomaaliyeed

U Qayb-sanaha Arrimaha Militaryga ee Safaaradda Jamhuuriyadda Federaalka Soomaaliya ee Boqortooyada Sacuudi Carabiya (Riyaad) ayaa deeq ka kooban Kutubta Qur’aanka Kariimka ah ku wareejiyay Masjidka Isbitaalka Xoogga Dalka Soomaaliyeed.

Deeqda waxaa wakiil ka ahaa Dhamme Dr. Mohamed Ali Abdullahi, Madaxa Kabinetka Xafiiska Kaaliyaha Taliska Guud ee Ciidanka XDS, iyadoo munaasabadda wareejinta uu goobjoog ka ahaa Agaasimaha Isbitaalka Xoogga, Dhamme Dr. Mustafa Xuseen.

Kutubtan Qur’aanka Kariimka ah ayaa loogu talagalay inay ka faa’iidaystaan bukaannada, eheladooda, shaqaalaha isbitaalka iyo jamaacada Masjidka, si kor loogu qaado akhriska Qur’aanka Kariimka ah iyo kobcinta wacyiga diineed.

Maamulka Isbitaalka Xoogga Dalka Soomaaliyeed ayaa uga mahadceliyay U Qayb-sanaha Arrimaha Military-ga deeqdan qiimaha badan, iyagoo ku tilmaamay mid kor u qaadesa xuska iyo aqrinta kalaamka Allah sido kale, waxay Alle uga baryeen inuu kheyr iyo ajar ka siiyo dhammaan intii ka soo gaarsiisay deeqdaan qiyamka leh.

05/08/2026

Agaasimaha Isbitaalka Xoogga ayaa kulan muhiim ah la qaatay masuuliyiin ka socday CIMIC Italy, oo ah waaxda isku xirka xiriirka ciidamada iyo bulshada.

Kulanka ayaa looga hadlay taageerada adeegyada caafimaadka, gaar ahaan qeybta dhalmada, maadaama isbitaalku qorsheynayo horumarinta qeybta Obs & Gyno). Agaasimaha ayaa la wadaagay xog ku saabsan adeegyada ANC iyo tirada hooyooyinka uurka leh ee maalin kasta ka faa'iideysta qeybta haweenka.

Ugu dambeyn, masuuliyiinta CIMIC Italy ayaa ballan qaaday inay taageero ka geysan doonaan hirgelinta iyo horumarinta qeybta Obs & Gyno ee Isbitaalka Xoogga.

04/08/2026

Hormarada Isbitalka Xoogga ee dhanka adeega waa mid mujineyso in ay geesiyaasha Xoogga Dalka Somaliyeed dhiira garineyso.

03/08/2026

Agaasimaha Isbitaalka Xoogga Dalka, Capt. Dr. Mustafa, ayaa shir-guddoomiyey kulan ay yeesheen bahda caafimaadka, waxaana ka qeyb galay Capt. James oo ka socday UNSOS Support kana ah UK Medical Planner, iyo Capt. Dr. Claudia, oo ah EUTM Medical Advisor.

Kulanka ayaa diiradda lagu saaray xoojinta wada-shaqeynta dhinaca caafimaadka iyo horumarinta adeegyada Isbitaalka Xoogga Dalka. Waxaa si gaar ah looga hadlay hirgelinta qeybta karantiilka (Isolation Unit), iyadoo la qorsheeyey in si degdeg ah loo dhiso teendho ku-meel-gaar ah.

Agaasimaha Isbitaalka ayaa sidoo kale soo bandhigay horumarka la gaaray iyo hiigsiga Wasaaradda Gaashaandhigga iyo Taliska Ciidanka Xoogga Dalka Soomaaliyeed ee ku aaddan dhismaha iyo qalabeynta Isbitaalka Xoogga Dalka si isku-tashi Soomaaliyeed ah. Kulanka waxaa sidoo kale lagu lafaguray muhiimadda tababarrada iyo kor u qaadista aqoonta xirfadlayaasha caafimaadka ee ciidamada.

Gabagabadii, waxaa la isku raacay in kulankan oo qabsooma bil kasta la joogteeyo lana ballaariyo, si loo xoojiyo iskaashiga iyo horumarinta adeegyada caafimaadka ee Ciidanka Xoogga Dalka Soomaaliyeed.

02/08/2026

Isbitaalka Xoogga waxaa ka qabsoomay shirka maamulka iyo madaxda qeybaha kala duwan ee Isbitaalka.

Kulanka waxaa diirada lagu saaray dib-u-eegista waxqabadkii bishii July, falanqaynta warbixinadii waaxyaha iyo dejinta yoolalka iyo qorshaha shaqo ee bisha August si loo sii xoojiyo tayada adeegyada caafimaadka.

Kulanka ayaa ku soo gabagaboobay jawi isfaham, wada-shaqeyn iyo go'aan adag oo lagu hirgelinayo yoolalka Isbitaalka, si loo sii horumariyo adeegyada loo hayo ciidamada iyo bulshada ay u adeegaan.

01/08/2026

Xaflad lagu soo bandhigay cilmi-baaris ay sameeyeen dhaqaatiirta ka howlgasha Xarunta Sahan Diagnostic Center ayaa lagu qabtay magaalada Muqdisho, taas oo ay ka soo qaybgaleen dhaqaatiir, aqoonyahanno, iyo marti sharaf kale.

30/07/2026

30/07/2026

Wasiir Ku-xigeenka Wasaaradda Gaashaandhigga Xukuumadda Federaalka Soomaaliya, Mudane Idiris Cismaan Xaaji Cali, ayaa maanta kormeer ku imaadey Isbitaalka Ciidanka Xoogga Dalka, halkaasi oo uu u kuurgalay xaaladda guud ee adeegyada caafimaad ee lagu bixiyo isbitaalka iyo daryeelka ciidamada ka helaan Isbitalka.

30/07/2026

Maamulka Isbitaalka Xoogga Dalka Soomaaliyeed ayaa soo dhaweeyay Wasiir Ku-xigeenka Wasaaradda Gaashaandhigga Xukuumadda Federaalka Soomaaliya, Mudane Idiris Cismaan Xaaji, oo booqasho dhiirrigelin iyo u-kuurgelis ah ku yimid isbitaalka.

Maamulka Isbitaalka ayaa Wasiirka la wadaagay warbixin ku saabsan xaaladda bukaannada, adeegyada caafimaad ee isbitaalku bixiyo, iyo dadaallada lagu horumarinayo tayada daryeelka caafimaadka iyo nidaamka diiwaangelinta xogta daryeelka ciidamada oo ah mid dhameystiran lehna documents cad.

Gabagabadii, Maamulka Isbitaalka Xoogga ayaa uga mahadceliyay Wasiir Ku-xigeenka booqashadiisa iyo garab istaagga uu u muujiyay bahda caafimaadka iyo geesiyaasha Ciidanka Xoogga Dalka Soomaaliyeed, iyagoo xusay in booqashooyinka noocan oo kale ah ay dhiirrigelinayaan horumarinta adeegyada caafimaadka iyo daryeelka ciidamada.

30/07/2026

Shirkii Subaxnimo ee Maamulka Isbitaalka Xoogga

Waxaa saaka hoolka shirarka ee Isbitaalka Xoogga ka qabsoomay shirkii subaxnimo ee joogtada ahaa, kaas oo ay ka qeybgaleen maamulka Isbitaalka, madaxda waaxyaha iyo dhamaan shaqaalaha labada shift ee xalay iyo manta.

Kulanka maanta waxaa diiradda lagu saaray dib-u-eegista guulihii la gaaray intii lagu jiray bisha July, iyadoo la bogaadiyay dadaalka iyo wada shaqeynta horseeday horumarka adeegyada caafimaadka.

Intii uu kulanku socday, Agaasimaha Isbitaalka ayaa ku dardaarmay qodobadan muhiimka ah:

1) In si joogto ah loo dhaqan geliyo dhammaan foomamka, SOP-yada iyo habraacyada maamulka si loo xaqiijiyo adeeg tayo leh oo isku mid ah.
2) In waax kasta ay waajib ku tahay xirashada uniform-keeda rasmiga ah, si loo xoojiyo anshaxa shaqada, aqoonsiga shaqaalaha iyo muuqaalka xirfadeed ee isbitaalka.
3) In khaladaadka la tilmaamo aan loo arkin dhaliil ama wax taban, balse loo fahmo inay yihiin fursado lagu saxo laguna horumariyo maamulka iyo adeegyada, iyadoo la xoojinayo isla xisaabtanka iyo hagaajinta joogtada ah.
4) In madaxda waaxyuhu ay sii xoojiyaan kormeerka, hoggaaminta iyo la socodka fulinta waajibaadka maalinlaha ah.
5) In dhammaan shaqaaluhu ay muujiyaan wada shaqeyn, ixtiraam iyo u hoggaansanaan xeerarka iyo habraacyada isbitaalka.

Ugu dambeyn, Agaasimaha ayaa ku boorriyay dhammaan madaxda iyo shaqaalaha inay sii wadaan dadaalka lagu horumarinayo tayada adeegyada caafimaadka, si Isbitaalka Xoogga uu u noqdo xarun ku suntan hufnaan, nidaam iyo adeeg caafimaad oo tayo sare leh.