20/10/2026
🐥 مرحبا...انا اسمي سيسي الأمورة🥰
صرت بعمر الـ 5 شهور....رح خبركن عن تطوري الروحي الحركي وشو صرت أعرف أعمل😌
🌟لياقتي وحركاتي (عضلاتي عم تقوى🤭):
▪️لما تحطوني على بطني، برفع رأسي وصدري لفوق بثبات وبستكشف المكان حواليي بكل فضول.
▪️بقلب حالي بمهارة من بطني لظهري، وعم جرب ارجع اقلب بالعكس!
▪️لما تسندوني، بقعد معكم وضهري أثبت وأقوى من قبل.
▪️اكتشفت رجليّ الصغار! بمسكهن بايديّ وأوقات بحاول حطهن بفمي.
🌟إيديّ الصغار والألعاب 🧸:
▪️بمسك ألعابي بثقة وبقوة بيدي كاملة، وصرت أعرف انقل اللعبة من إيد لإيد.
▪️أي شيء بمسكه بايدي فوراً باخدو على فمي.. هي طريقتي الخاصة لحتى اكتشف العالم ولمس الأشياء!
🌟ضحكتي وتفاعلي معكم (المشاعر والتواصل ❤️):
▪️ضحكتي صارت بصوت عالي ومليانة فرح لما تلعبوني .
▪️بعرف ماما وبابا وإخواتي منيح وبفرح بشوفتهم... وبتطّلع بالوجوه المألوفة بكل حب❤
🌟لغتي وأصواتي 🎶:
▪️صرت طلع أصوات حلوة ومناغاة لما بدي اهتمامكم☺
▪️بفتل رأسي وفوراً بطلع عليكم لما تنادوني باسمي أو تسمعوني صوت مميز.
🌟عيوني الذكية 👁️✨:
▪️بلاحق الأشياء المتحركة بعيوني بمرونة وبدون ما ضيعها.
💡 ملاحظة صغيرة من طبيبتي د. هبة🩺:
كل طفل إلو سرعته الخاصة بالنمو والتطور، بس إذا لاحظتوا طفل بعمر خمس شهور ما عم يثبت الرأس منيح، أو ما عم يتفاعل مع الأصوات والوجوه، أو الجسم مرتخي كتير.. استشيرو طبيب الأطفال للمتابعة والاطمئنان🩺💙
💙دمتم وأطفالكم بألف خير💙
Dr. Hiba Awaj
اختصاص أطفال وحديثي ولادة
