06/18/2026
الصوره اللي علي اليمين دي قبل إمتحان الرخصه الأمريكيه للتمريض NCLEX RN وكنت ساعتها في مطار القاهره رايح للطياره المتجهه لمدينة Mumbai بالهند، واللي منها هركب أوبر ٤ ساعات ونص في المطر الشديد وكانت فيه عاصفه لحظي السئ علشان أوصل لمدينة Pune اللي فيها سنتر الإمتحان، لإنهم بلغوني قبل السفر بيوم إن السنتر حصل فيها مشكله فنيه وإنهم مضطرين يلغوا إمتحاني، ساعتها كلمتهم وقلتلهم حددولي الإمتحان في أقرب سنتر في نفس اليوم حتي لو كان في آخر مكان في الهند، وده لإن أنا كانت فلوسي أصلا خلصت الفتره دي ومش حمل إلغاء تذاكر وحجوزات فندق!
الإمتحان قفل معايا علي ٧٥ سؤال (ال old generation passing score) ،وده معناه إنه حدد إن مستوايا فوق مستوي ال passing score في كل ال branches وإنه مش محتاج يكمل معايا, الإمتحان ممكن يكمل معاك ل ٥ ساعات!
قفل الإمتحان معايا بعد ٤٦ دقيقه، كنت حرفيا بحل السؤال في ثواني!
بعدها وأنا خارج من السنتر علي الباب حرفيا، حسيت بوجع في جنبي عمري ماحسيت بيه إطلاقا، وابتديت أرجع ترجيع عمره ماحصلي قبل كده رغم إني ما أكلتش بره الفندق أبدا، استحملت ونزلت تحت والوجع بدأ يقطعني، رحت الفندق بالعافيه وفضلت أرجع وأقع في الأرض لحد ما كان هيغمي عليا، كلمولي الإسعاف ورحت المستشفي وبعد فحوصات وآشعات، قالولي ده renal colic يعني مغص كلوي ومش شايفين ليه سبب( غالبا high anxiety)، فضلت في الطوارئ وأخدت شوية علاجات ومسكنات، وأنا ع تروللي الطوارئ اتبعتلي إشعار من البورد إن رخصتي طلعت وإني نجحت!
قلتلهم عايز أمشي طيارتي آخر النهار، ادوني مورفين وشريط ترامادول وقالولي حاسب وروح!
حرفيا ساعتها دفعت آخر ٨٠٠ دولار أملكهم، وروحت مش عارف أبتدي من فين تاني، والفرق مابين الصوره اليمين والشمال حرفيا يومين!
ده جزء بسيط من الصعوبات الكتيره، وكتير من زمايلنا في نفس المهنه وغيرها واجهوا صعوبات لاحصر لها، محدش هيشوف معاناتك، كله ليه بالنتائج، ف أنا عايزك تجمد وتتوكل علي الله ومتسيبش نفسك ضحيه لمجتمع ولا لمهنه ولا لناس!
لاتيأس ياصديقي وصباح الخير❤️🫡
