02/06/2026
Material i përgatitur nga Dr. Alfred Nona, Spitali Amerikan 1.
Holteri i zemrës: Çfarë është, përse shërben dhe cilat janë motivet e vendosjes?
Holteri kardiak është monitorizimi dinamik (në kohë) i rrahjeve të zemrës (elektrokardiogramë dinamike). Emri Holter është vendosur në nder të fizikantit N.J. Holter.
Është një egzaminim jo invaziv i përbërë nga një regjistrues (pak a shumë sa një celular) edhe elektrodat që vendosen në kraharor, dhe shërben për regjistrimin e aktivitetit elektrik të zemrës në mënyrë të vazhdueshme, pra regjistrimin e rrahjeve të zemrës, zakonisht për 24-48 orë por ndonjëherë edhe më tepër në bazë të indikacionit dhe gjykimit klinik, duke vlerësuar rregullaritetin e ritmit, prezencën e aritmive apo luhatjet e frekuencës kardiake në kohë. Preferohet që pacienti të mbaj një ditar në mënyrë që palpitacioni apo takikardia që ai percepton të lidhet me atë çfarë identifikohet në të njejtin orar me Holterin, pra ndërthurjen e simptomave me ritmin. Gjatë monitorimit është mirë të kryhen ato aktivitete që zakonisht pacienti kryen çdo ditë, për një m***e sa më reale.
Cila është diferenca midis EKG-së (filmit të zemrës) dhe Holterit kardiak?
Diferenca e vetme është faktori kohë, me të parën në regjistrojmë aktivitetin elektrik të zemrës për pak kohë, zakonisht 1 minutë, ndërsa me Holterin për një kohë më të gjatë dhe për këtë motiv ky i fundit kompleton të parën dhe mund të identifikojë aritmi të ndryshme që herë janë edhe herë nuk janë, pra çrregullime ritmi që zakonisht janë jo kostante në kohë.
Përse shërben Holteri kardiak dhe kur duhet ta kryejmë?
1) Zakonisht kardiologët e kërkojnë Holterin për pacientët që ndiejnë palpitacione-takikardi, ritmike apo aritmike (rrahje në kraharor të rregullta apo të çrregullta), apo edhe për ndjesi sikur mungojnë rrahjet e zemrës.
Fjala “aritmi” do të thotë çrregullim i ritmit (fjala “ritmi” do të thotë diçka e rregullt, pra ritmike, ndërsa me “a” përpara, “aritmi” do të thotë diçka e çrregullt) me këtë terminologji nënkuptojmë një numër të konsiderueshëm llojesh aritmish dhe me Holterin arrijmë (kuptohet kur identifikohen aritmitë dhe ndodhin ditën e vendosjes së pajisjes), ti diagnostikojmë saktë, pra të themi cila lloj aritmie është, pra e thënë në mënyrë popullore t’i vendosim emër edhe mbiemër, çrregullimit të ritmit.
2) Për të monitorizuar terapinë anti-aritmike nëse kjo është vendosur për të korrigjuar aritmitë e ndryshme të diagnostikuara më parë.
3) Kur kemi patur rënie të fikët (sinkope) dhe kur dyshimi është i fortë që varet nga probleme të ritmit të zemrës, qoftë me ulje të rrahjeve (bradi-aritmi) apo me rritje të rrahjeve (taki-aritmi), dhe këtu Holteri është shpesh vendimtar edhe për përqasjen terapeutike, si p.sh. vedosja e Pacemaker-it kardiak ose elektrostimulimit të zemrës (bateria e zemrës) nëse kemi pauza ose pushime të ritmit që konsiderohen patologjike.
4) Kur pacienti është diagnostikuar me Stroke-TIA (paralizë) apo SE (embolizim në periferi) dhe dyshohet fortësisht për fibrilacion atrial (aritmia më e shpeshtë e zemrës) e cila e vetme 5-fishon këtë rrezik.
5) Për të përjashtuar që nuk kemi aritmi silente (të papërceptuara nga pacienti), që ndodhin ditën por edhe natën siç mund të jetë edhe një herë tjetër fibrilacioni atrial, dhe kjo ka ndikim të madh në trajtimin më pas.
6) Monitorizim i ritmit për aritmi madhore në patologji të ndryshme të zemrës që dihet fare mirë që shoqërohen me çrregullime të tilla, si p.sh. pas një infarkti të miokardit, nese kemi insuficiencë kardiake, në pacient me kardiomiopati dilatative, hipertrofike, restriktive, kanalopatite, Ëolf Parkinson Ëhite, displasia aritmogjene e ventrikulit të djathtë, miokarditi, etj dhe në këto raste ndihmon për trajtimin qoftë edhe me vendosje të defibrilatorit kardiak (ICD) në parandalim primar në raste të veçanta.
7) Ndonjëherë u vendosën pacientëve që kanë pacemaker apo defibrilator për të parë nese funksionojnë mirë.
8) Rrallë për të monitorizuar nëse pacientët kanë probleme me enët e gjakut (sidomos koronaropati spastike), ky indikacion i fundit gjithsesi po përdoret gjthmonë e më pak.
