II Uşaq Xəstəlikləri Kafedrası

06/10/2026

Dövlət Gömrük Komitəsinin Tibbi Xidmət İdarəsinin Elmi-Təcrübi və Tədris Mərkəzi və Mərkəzi Gömrük Hospitalının birgə təşkilatçılığı, “Florence Nightingale” Xəstəxanalar Qrupunun və Britaniya-Azərbaycan Həkimləri və Stomatoloqları Assosiasiyasının dəstəyi ilə “Ana və uşaq sağlamlığı: Multidissiplinar yanaşmalar, perspektivlər və aktual çağırışlar” mövzusunda beynəlxalq elmi konfransda Azərbaycan Pediatrlar Assosiasiyasının üzvü, kafedramızın dosenti, t.ü.f.d. Fəxriyyə Məmmədova “Pediatrik bioetika: klinik praktikada müasir etik problemlər və yanaşmalar” mövzusunda təqdimatla çıxış edib. Eləcə də , Azərbaycan Respublikası Səhiyyə Nazirliyinin İctimai Səhiyyə və İslahatlar Mərkəzi tərəfindən “Azərbaycanda ictimai səhiyyə: müasir çağırışlar və gələcək hədəflər” mövzusunda elmi-praktik konfransda kafedramızın dosenti, Azərbaycan Pediatrlar Assosiasiyasının Beynəlxalq əlaqələr üzrə eksperti t.ü.f.d. Səbinə Cəfərova “Azərbaycan Pediatrlar Assosiasiyası: milli pediatriyanın təşəkkülündən müasir səhiyyə islahatlarına” mövzusunda təqdimatla çıxış edib.

05/10/2026

Azərbaycan Tibb Universitetinin rektoru, professor Gəray Gəraybəyli müəllimləri təbrik edib.

Əziz müəllimlər, dəyərli həmkarlar!

Azərbaycan Tibb Universitetində müəllim olmaq sözün tam mənasında iki böyük məsuliyyəti eyni anda daşımaq deməkdir. Sizin peşəniz iki müqəddəs anlayışın qovuşduğu yerdə dayanır: bilik və insan həyatı.

Siz həm insana həyat verən həkim, həm də həkim yetişdirən müəllimsiniz!

İnsan həyatı üzərində işləyən bir peşə yüksək bilik, dəqiqlik və məsuliyyət tələb edir.
İnsan yetişdirən bir peşə isə böyük mənəvi məsuliyyət yaradır.
Siz bu iki məsuliyyəti birlikdə daşıyırsınız.

Ona görə də bu universitetin ən böyük gücü məhz onun müəllimləridir.

Siz bu universitetin yaddaşısınız.
Siz onun bu günüsünüz.
Ən əsası, siz onun sabahını yetişdirirsiniz.

5 oktyabr – Beynəlxalq Müəllimlər Günü münasibətilə hər birinizi ürəkdən təbrik edirəm.

Sizə möhkəm cansağlığı, elmi yaradıcılıq, peşəkar uğurlar və yüksək peşəkarlığa, zəngin insani dəyərlərə malik həkimlər yetişdirmək xoşbəxtliyi arzulayıram.

Qoy auditoriyalarımızdan çıxan hər bir gənc həkim sizin adınızı, əməyinizi və sizdən öyrəndiyi ən vacib dərsi – insana xidmət etməyi gələcəyə daşısın.

Bayramınız mübarək, əziz həmkarlar!

30/09/2026

🌍 Avropa Pediatriya Akademik Cəmiyyətlərinin 10-cu Konqresi – EAPS 2026

Pediatriya sahəsində mühüm beynəlxalq elmi platformalardan biri olan EAPS 2026 konqresində əməkdaşlarımızın elmi araşdırmaları ilə təmsil olunmağımız bizim üçün böyük qürurverici hadisədir. 🩺✨

Konqres çərçivəsində iki əməkdaşımız aktual pediatrik problemlərə həsr olunmuş elmi tədqiqatlarını təqdim ediblər:

🔹 T.ü.f.d., assistent Aysel Süleymanlı
“Association of LEPR rs1805096 Polymorphism with Leptin, Insulin and HOMA-IR Levels in Children with Alimentary Obesity”

Tədqiqatda uşaqlarda alimentar piylənmə fonunda LEPR rs1805096 polimorfizmi ilə leptin, insulin və HOMA-IR göstəriciləri arasındakı əlaqə araşdırılıb.

🔹 T.ü.f.d., assistent Pusta Orujova
“Early Metabolic-Inflammatory Dissociation in Neonatal Sepsis: The Role of AMPK as a Marker of Neurovulnerability”

Araşdırmada neonatal sepsisdə erkən metabolik-inflamator dəyişikliklər və AMPK-nın neyrohəssaslığın potensial markerı kimi rolu diqqət mərkəzinə alınıb.

Beynəlxalq elmi konqresdə aparılan tədqiqatların təqdim edilməsi əməkdaşlarımızın elmi fəaliyyətinin və pediatriya sahəsində aparılan araşdırmaların beynəlxalq səviyyədə paylaşılması baxımından əhəmiyyətlidir. 🌍🔬

Hər iki əməkdaşımızı bu elmi uğur münasibətilə təbrik edir, gələcək fəaliyyətlərində yeni nailiyyətlər arzulayırıq! 👏🏻💐

Elm, araşdırma və pediatriyanın gələcəyi naminə! ❤️

MedicalResearch NeonatalSepsis Obesity PediatricObesity ScientificResearch AMPK LEPR

22/09/2026

Kafedramızın assistenti Nərgiz Məmmədovanın kuratoru olduğu ATU-nun həkim-rezidenti Gövhər Verdiyeva, eləcə də Rəşad Abızadə və Leyla Səhratova, müxtəlif tibb müəssisələrini təmsil edən digər gənc həkim-rezidentlərlə birgə, növbəti elmi tədqiqat işini hazırlayıblar. Bu iş təbabət sahəsində aparıcı nəşrlərdən olan və “Oxford University Press” tərəfindən buraxılan “Rheumatology” jurnalında dərc olunub.
“Familial Mediterranean fever in Azerbaijani children: a nationwide cohort study of genotype–phenotype association” (“Azərbaycanlı uşaqlarda Ailəvi Aralıq Dənizi Qızdırması: genotip-fenotip əlaqəsinin ölkəmiqyaslı kohort tədqiqatı”) adlı məqalənin birinci müəllifi uşaq revmatoloqu Vəfa Quliyevadır. Tədqiqat ölkəmizdə uşaqlar arasında Ailəvi Aralıq Dənizi Qızdırması (FMF) xəstəliyinin genetik xüsusiyyətlərini və kliniki gedişatını əhatə edən ilk və ən böyük ölkəmiqyaslı kohort araşdırmasıdır. Tədqiqat işində 349 pasiyentin klinik-genetik göstəriciləri analiz edilib, MEFV geni mutasiyalarının yayılması və xəstəliyin gedişatına təsiri dərindən araşdırılıb.

https://academic.oup.com/rheumatology/advance-article/doi/10.1093/rheumatology/keag501/8792908?searchresult=1

15/09/2026

📚 15 Sentyabr — Bilik Günü

15 Sentyabr — Bilik Günü münasibətilə bütün tələbələri, müəllimləri və təhsil ictimaiyyətini səmimi-qəlbdən təbrik edirik!

Yeni tədris ili yeni biliklərin, yeni məqsədlərin və böyük uğurların başlanğıcıdır. Xüsusilə tibb təhsili böyük məsuliyyət, davamlı öyrənmə və insan həyatına xidmət edən yüksək peşəkarlıq tələb edir.

Arzu edirik ki, bu tədris ili tələbələrimiz üçün zəngin bilik və təcrübə, müəllimlərimiz üçün yeni elmi və pedaqoji nailiyyətlər ili olsun.

Gələcəyin həkimlərinin yetişdirilməsində bütün həmkarlarımıza uğurlar, tələbələrimizə isə möhkəm iradə, yüksək nəticələr və işıqlı gələcək arzulayırıq.

15 Sentyabr — Bilik Günü mübarək! 🎓📚

Yeni tədris ili uğurlu olsun!

09/09/2026

09/09/2026

🌿 Akademik Adilə Namazova – 100 il

Azərbaycan pediatriya elminin inkişafında silinməz iz qoymuş, görkəmli alim, pedaqoq və ziyalı Akademik Adilə Əyyub qızı Namazovanın 100 illik yubileyi böyük elmi və tarixi əhəmiyyət daşıyır.
Adilə xanım bütün ömrünü uşaqların sağlamlığının qorunmasına, pediatriya elminin inkişafına və yüksəkixtisaslı həkim kadrlarının yetişdirilməsinə həsr etmişdir. Uşaqlarda ürək-damar xəstəlikləri, revmatik qızdırma, anadangəlmə ürək qüsurları, arterial təzyiq pozulmaları və digər patologiyalarla bağlı elmi araşdırmaları Azərbaycan pediatriyasının inkişafına mühüm töhfə vermişdir.
Onun üçün həkimlik yalnız bir peşə deyil, insana xidmət və cəmiyyət qarşısında məsuliyyət missiyası idi. Elmi prinsipiallığı, pedaqoji fədakarlığı, səmimiyyəti, qayğıkeşliyi və təvazökarlığı ilə yetişdirdiyi nəsillərə həm elm məktəbi, həm də insanlıq məktəbi bəxş etmişdir.
100 illik yubiley – sadəcə bir tarix deyil. Bu, bir alim ömrünün elmi irsinin, bir müəllim ömrünün yetişdirdiyi nəsillərin və bir ziyalı ömrünün cəmiyyətə bəxş etdiyi mənəvi dəyərlərin ehtiramla xatırlandığı əlamətdar gündür.
Adilə xanımın elmi məktəbi və pedaqoji irsi yeni nəsil həkim və alimlərin fəaliyyətində yaşamaqda davam edəcəkdir. 🌹
Ruhu şad, əziz xatirəsi əbədi olsun!

06/08/2026

Kafedramızın dosenti, tibb elmləri doktoru Nurəngiz xanım Hacıyeva IPA - Ümumdünya pediatriya assosasiyasının Azərbaycan üzrə Ana südünün təşviqi və dəstəklənməsi eksperti seçilmişdir.

10/07/2026

Azərbaycanlı pediatrlar beynəlxalq konqresdə brusellyoz, nadir xəstəliklər müalicəsində yenilikləri təqdim ediblər

Qırğızıstan Respublikasında 26-28 iyul keçirilən “İssık-Kul sahilində uşaq ürəyi: nailiyyətlər və perspektivlər” mövzusunda II Beynəlxalq konqresdə ölkəmizi Azərbaycan Pediatrlar Asossiasiyasının sədri, kafedramızın dosenti, t.ü.f.d. Təranə Tağı-zadə, dosent, t.ü.f.d. Fəxriyyə Məmmədova təmsil ediblər.

09/07/2026

II Uşaq Xəstəlikləri kafedrasının 2025-2026 cı tədris ilinin son iş günü.