07/03/2026
Bu gün sosial şəbəkələrdə Nizami Tibb Mərkəzinin strukturuna daxil olan Doğum Evinin əməliyyatxanası ilə bağlı həqiqəti əks etdirməyən dezinformasiya yayıldı və yayılan məlumata XəzərXəbərdə aydınlıq gətirdik.
Məlumat üçün qeyd edək ki, Nizami Tibb Mərkəzinin strukturuna daxil olan 7 saylı Doğum Evinin əməliyyatxanasının mövcud vəziyyəti Azərbaycan Respublikası Səhiyyə Nazirliyinin Kollegiyasının 11 mart 2013-cü il tarixli 8 saylı qərarı ilə təsdiq olunmuş “Doğum evlərində Doğuşa yardım işinin təşkili” haqqında təlimatda göstərilən tələblərə tam uyğun qaydadadır.
Həmin təlimatda göstərilir ki, Doğum evlərinin əməliyyatxanasının divarları və döşəməsi antistatik mərmər plitələr olmalı, döşəmələr su buraxmayan, oda davamlı, antistatik materiallarla örtülməlidir. Doğum evinin əməliyyatxanasının quruluşu da bu tələbə uyğunlaşdırılıb.
Ümumilikdə xəstəxana köhnə tikili binada yerləşib.
Buna baxmayaraq, xəstəxanada tam olaraq sanitar-gigiyena şərtlərinə əməl olunur və əməliyyatxanada istifadə olunan avadanlıqların hər birinin strelliyi əməliyyatxanaların strelizasiya olunması qaydalarına uyğun şəkildə icra olunur.
Doğum evinin fəaliyyəti ilə bağlı olaraq mütəmadi olaraq Respublika Gigiyena və Epidemiologiya Mərkəzinin monitorinq qrupunun, eyni zamanda digər üst qurumların iştirakı ilə vaxtaşırı monitorinqlər aparılır.
Bu günədək xəstəxananın fəaliyyətində heç bir nöqsan, yaxud qanunazidd hal aşkarlanmamışdır.
Və həmçinin məlumat üçün bildirək ki, 4 il müddətində xəstəxanada icra olunan 10.000-ə yaxın doğuş prosesindən sonra heç birində ağırlaşma, sepsis, peritonit halları yaşanmamış və ana ölümü qeydə alınmamışdır.
