08/06/2026
Səhiyyə Nazirliyi Elmi-Tədqiqat Tibbi Profilaktika İnstitutunun rəhbərliyi və əməkdaşları Azərbaycan Tibb Universitetinin mikrobiologiya kafedrasının 100 illiyinə həsr olunan beynəlxalq konfransda iştirak ediblər
Azərbaycan Tibb Universitetində Tibbi Mikrobiologiya və İmmunologiya kafedrasının yaradılmasının 100 illik yubileyinə həsr olunmuş beynəlxalq elmi konfrans keçirilib.
Konfransda Azərbaycan Respublikasının Səhiyyə Nazirliyi V.Y. Axundov adına Elmi-Tədqiqat Tibbi Profilaktika İnstitutunun direktoru Adil Allahverdiyev rəsmi açılış mərasimində çıxış edib. Adil Allahverdiyev, həmçinin “Parazitologiyada yeniliklər və əks-epidemik tədbirlərin əhəmiyyəti” adlı panelə sədrlik edib.
Panel çərçivəsində professor Adil Allahverdiyev “Yenidən əhəmiyyət qazanan parazitar infeksiyalara qarşı nanotexnologiya əsaslı yanaşmalar” mövzusunda elmi məruzə ilə çıxış edib.
Eyni paneldə institutun İmmunologiya şöbəsinin baş elmi işçisi, fəlsəfə doktoru Ruqiyyə Səmədzadə “Vahid Sağlamlıq yanaşması çərçivəsində zoonotik parazitlərin epidemiologiyası və laborator qiymətləndirilməsi” mövzusunda məruzə təqdim edib.
Konfrans çərçivəsində mikrobiologiyanın müxtəlif istiqamətləri üzrə — bakteriologiya, mikologiya, virusologiya, immunologiya və parazitologiya sahələrində aktual elmi mövzular müzakirə olunub. Bununla yanaşı, multidissiplinar əməkdaşlıq, müasir laborator yanaşmalar və beynəlxalq elmi tərəfdaşlıq imkanları da diqqət mərkəzində olub.
Yerli və xarici mütəxəssislərin iştirakı ilə keçirilən elmi sessiyalarda müasir elmi nailiyyətlər təqdim olunub, peşəkar fikir mübadiləsi aparılıb və gələcək əməkdaşlıq perspektivləri müzakirə edilib.
