Göyçay Rayon Mərkəzi Xəstəxanası

11/06/2026

Bahadur Rzayev TƏBİB-in İcraçı direktorunun müavini təyin edilib

“Yüksəliş” müsabiqəsinin finalçısı, 2022-2028-ci illər üçün Dövlət Proqramı çərçivəsində İngiltərənin Birmingem Universitetində “Səhiyyə siyasəti və idarəolunması” ixtisası üzrə təhsilini proqram birincisi kimi başa vuran Bahadur Məhərrəm oğlu Rzayev TƏBİB-in İcraçı direktorunun müavini təyin edilib.

B.Rzayev Azərbaycan Respublikasının Prezidenti yanında Dövlət İdarəçilik Akademiyasında menecment ixtisası üzrə bakalavr, İstanbul Universitetində təşkilatların idarəolunması üzrə magistr təhsili alıb. 2018–2019-cu illərdə Almaniyanın RWTH Aachen Universitetində liderlik və təşkilati səmərəliliyin artırılması mövzusunda elmi araşdırmalar aparıb.

Peşəkar fəaliyyəti ərzində Əmək və Əhalinin Sosial Müdafiəsi Nazirliyinin tabeliyində Dövlət Tibbi-Sosial Ekspertiza və Reabilitasiya Agentliyində departament rəhbəri vəzifəsində çalışıb, reabilitasiya xidmətlərinin təşkili, keyfiyyətə nəzarət və xidmətlərin idarə olunması istiqamətlərində fəaliyyət göstərib. Daha sonra həmin Agentliyin İdarə Heyəti sədrinin müşaviri vəzifəsində çalışıb.

Bahadur Rzayev səhiyyə menecmenti, tibbi xidmətlərin təşkili, səhiyyədə rəqəmsal həllərin tətbiqi, keyfiyyət idarəçiliyi və strateji planlaşdırma sahələrində ixtisaslaşıb. Yeni təyinatından əvvəl o, TƏBİB-in İcraçı direktorunun müşaviri vəzifəsində fəaliyyət göstərib.

11/06/2026

🍔 Fastfud dedikdə çoxumuzun ağlına yalnız yağlı və kalorili qidalar gəlir. Amma bu məhsulların ən təhlükəli tərəflərindən biri gizli şəkər tərkibli olmasıdır.

Burger sousları, ketçup, mayonez, qazlı içkilər, hətta bəzi kartof qızartmaları da özündə əlavə şəkər ehtiva edir. Bu isə qanda şəkərin miqdarının sürətlə yüksəlməsinə, qısa müddət sonra isə yenidən aclıq hissinin yaranmasına gətirib çıxarır.

Fastfud məhsullarında şəkərin istifadəsini minimuma endirmək mümkündür:

🔹 Souslardan az istifadə edin;
🔹 Qazlı içkiləri su ilə əvəzləyin;
🔹 Fastfud qəbulunu mümkün qədər məhdudlaşdırın;
🔹 Evdə hazırlanmış sağlam qidalara üstünlük verin.

❗Fastfudun zərərləri yalnız yüksək yağ tərkibi ilə məhdudlaşmır. Tərkibindəki əlavə şəkərlər də sağlamlıq üçün ciddi risk yarada bilər.

10/06/2026

Göyçayda gənclərin zərərli vərdişlərdən qorunması ilə bağlı maarifləndirici tədbir keçirilib

Göyçay şəhər Gənclər Evində gənc nəslin zərərli vərdişlərdən qorunması, yeniyetmələr arasında hüquqi maarifləndirmə işinin gücləndirilməsi və cəmiyyətdə sağlam həyat tərzinin təbliği məqsədilə “Təmiz gələcək üçün sağlam seçimlər” mövzusunda genişmiqyaslı maarifləndirmə tədbiri keçirilib.

Tədbirdə Göyçay Rayon Polis Şöbəsinin rəisi, polis polkovniki Müqalib Abdiyev, Göyçay Rayon İcra Hakimiyyəti başçısı aparatının Hüquq və kadr məsələləri sektorunun müdiri Samir Xəlilov, Dini Qurumlarla İş üzrə Dövlət Komitəsinin Mərkəzi Aran regional bölməsinin müdirinin müavini Əzim Rəfiyev və Göyçay Rayon Mərkəzi Xəstəxanasının həkim-psixiatrı Səməd Səmədov iştirak edib.

Tədbirdə iştirak edənlər müasir dövrün ən qorxulu qlobal problemlərindən olan narkomaniyanın fərdin fiziki və mənəvi aşınmasına, sosial mühitin deqradasiyasına və bütövlükdə cəmiyyətin genofonduna vurduğu ağır zərbələr barədə öz mülahizələrini bölüşüb.

Qarşılıqlı diskussiya və dialoq formatında davam etdirilən tədbirdə gəncləri maraqlandıran suallar ətraflı şəkildə cavablandırılıb.

08/06/2026

Uşaqlarda nitq və inkişaf bacarıqlarının yaşa uyğun formalaşması sağlam inkişafın əsas göstəricilərindən biridir.

Mütəxəssislər bildirir ki, yaşa uyğun söz ehtiyatının formalaşmaması, sosial təmasdan yayınma, göz kontaktının zəif olması və ya yaşıdları ilə ünsiyyətdə gerilik göstərməsi inkişaf ləngiməsinin erkən əlamətləri kimi qiymətləndirilə bilər.

Bu hallarda valideynlərə tövsiyə olunur:

🔹 Uşağın inkişaf göstəricilərini mütəmadi izləmək;
🔹 Gündəlik ünsiyyət və interaktiv oyunları artırmaq;
🔹 Ekran vaxtını məhdudlaşdırmaq və sosial ünsiyyətə təşviq etmək;
🔹 Gecikmə müşahidə olunduqda mütəxəssisə müraciət etmək.

Erkən diqqət və vaxtında müdaxilə uşağın sağlam inkişafında həlledici rol oynayır.

05/06/2026

🦠 Yazda ən çox yayılan respirator viruslar və onların orqanizmə təsiri

Respirator viruslar tənəffüs yollarını zədələyən və əsasən, hava-damcı yolu ilə yayılan infeksion törədicilərdir. Bu viruslar mövsüm keçidlərində, o cümlədən yaz aylarında daha aktiv olur. Ən çox yayılan növləri - rinovirus (adi soyuqdəymə), adenovirus (tənəffüs yolları, göz, bağırsağa düşən virus) və parainfluenza (uşaqlardakı qrip) virusudur.

Virusların ilkin simptomları barədə məlumat verən Yeni Klinikanın həkim-infeksionisti Səxavət Xəlilli aşağıdakı hallar müşahidə olunduqda profilaktik tədbirlərin görülməsini vacib hesab edir.
"Bu viruslar zamanı burunun tutulması, axması, asqırma, öskürmə, boğazda yanma, qıcıqlanma, 37.5°C-ni keçməyən subfebril temperatur, halsızlıq, əzələ-oynaq ağrıları, baş ağrısı və yüksələn temperatur müşahidə edilir.

Əlamətlərin müşahidə olunduğu ilk günlərdən bol maye qəbul etmək, yuxu rejiminin normal olması, mövsümə uyğun qidalanma və istirahətə diqqət etmək lazımdır. Antipiretik/analgetik, antihistamin, lokal analgetik təsiri olan pastillər və ya sprey də istifadə oluna bilər. 3 gündən çox davam edən 38°C-ni keçən temperatur, normallaşıb yenidən yüksələn temperatur halları müşahidə olunursa, sinədə ağrı, təngnəfəslik, kəskin halsızlıq, susuzluq varsa, bundan başqa, risk qrupuna daxil olan 5 yaşından kiçik uşaqların, 65 yaşdan yuxarı şəxslərin, hamilələrin, xroniki xəstəlikləri olan şəxslərin həkimə müraciət etmələri tövsiyə olunur”.

Lökbatan Tibb Mərkəzinin həkim-pediatrı Aytən Bəşirovanın sözlərinə görə isə, yaz aylarında bu virusların aktivləşməsinin səbəbləri var:

"Dəyişkən hava şəraiti bəzi virusların, məsələn, adenovirusun müəyyən temperatur və rütubət şəraitində daha dayanıqlı olmasına səbəb olur. Bu viruslar hava-damcı yolu ilə, çirklənmiş su (məsələn, hovuz), həmçinin virusun saatlarla qala bildiyi çirklənmiş səthlərlə təmas nəticəsində, xüsusilə də gigiyena qaydalarına əməl edilmədikdə yayılır".

Respirator viruslar, əsasən, yuxarı və aşağı tənəffüs yollarına təsir göstərir, bəzi hallarda digər orqanlara da yayıla bilir:

"Məsələn, adi soyuqdəymə (rinovirus) orta qulaq iltihabı (otit) və sinüzit kimi ikincili ağırlaşmalara səbəb ola bilər. Xüsusilə, astma xəstələrində tənəffüs yollarının həssaslığını artıraraq ciddi astma tutmalarına zəmin yaradır. Eyni zamanda adenovirus digərlərinə nisbətən daha çox orqana təsir edə bilir. Tənəffüs sistemi, gözlər və mədə-bağırsaq sisteminə və sair. İmmuniteti zəif olan şəxslərdə qaraciyər, ürək və beyin iltihabı kimi həyati təhlükəli vəziyyətlərə səbəb ola bilər. Bu səbəbdən də hər zaman ehtiyatlı olmaq lazımdır".

Pediatr onu da qeyd etdi ki, viruslar daha çox 6 ay - 3 yaş arası olan uşaqlarda yayılır, çünki onların qırtlaq quruluşu dar olduğundan virusun yaratdığı şişkinlik həyati təhlükəli tənəffüs çətinliyinə səbəb ola bilər.

Həkimlər bildirirlər ki, həkim müayinəsindən keçmədən “tez sağalmaq” üçün bir çox dərmanı qarışdırmaq və antibiotiklərdən istifadə etmək yolverilməzdir!

05/06/2026

🌳 Ətraf mühitin qorunması sağlam cəmiyyətin və dayanıqlı inkişafın vacib şərtidir.

🌱Gələcək nəsillər naminə təbiətə qayğı ilə yanaşaq.

04/06/2026

04/06/2026

İştahasızlıq qida qəbuluna marağın azalması və ya tamamilə itməsi ilə xarakterizə olunan bir vəziyyətdir.

Bu hal həm müvəqqəti, həm də müxtəlif xəstəliklərin əlaməti kimi uzunmüddətli ola bilər.

Virus və bakterial infeksiyalar, mədə-bağırsaq sistemi xəstəlikləri, stres və emosional gərginlik, bəzi dərman vasitələrinin yan təsirləri, hormonal pozuntular və xroniki xəstəliklər iştahasızlığın əsas səbəbləri ola bilər.

İştahasızlıq uzun müddət davam etdikdə, səbəbsiz çəki itkisi olduqda, halsızlıq və yorğunluq müşahidə edildikdə, qarın ağrısı, ürəkbulanma və ya qızdırma olduqda mütləq şəkildə həkimə müraciət etmək tövsiyə olunur.

Unutmayın ki, iştahasızlıq bəzən ciddi sağlamlıq problemlərinin ilk əlaməti ola bilər.

Sağlamlığınızı qorumaq üçün profilaktik müayinələri gecikdirməyin.

03/06/2026

Uşaqlarda şəkərli diabetin ilkin əlamətləri

Uşaqlarda şəkərli diabet endokrin sistemin geniş yayılmış metabolik xəstəliklərindən biridir. Xəstəliyin erkən mərhələdə müəyyən olunması müalicə tədbirlərinin vaxtında başlanmasına və ağırlaşma riskinin azaldılmasına imkan yaradır.

İlkin klinik əlamətlər əksər hallarda tədricən formalaşır və gündəlik dəyişikliklərlə qarışdırıla bilər. Bu səbəbdən valideynlərin simptomlara qarşı diqqətli olması xüsusi əhəmiyyət daşıyır.

Şəkərli diabetin ilkin əlamətləri bunlardır:

🔹 Tez-tez sidiyə getmə;
🔹 Həddindən artıq susuzluq hissi;
🔹 İştahanın artmasına baxmayaraq çəki itkisi;
🔹 Daimi yorğunluq və halsızlıq;
🔹 Görmənin bulanıqlaşması;
🔹 Dərinin quruluğu.

ℹ️ Sadalanan əlamətlər müşahidə olunduqda vaxtında tibbi müayinədən keçilməsi uşaqlarda şəkərli diabetin erkən diaqnostikasına və xəstəliyin effektiv idarə olunmasına şərait yaradır.